መሳፍንት 9

9 ¹የይሩባአል ልጅ አቢሜሌክ ወደ ሴኬም ወደ እናቱ ወንድሞች ሄደ፤ እነርሱንና የእናቱን የአባት ወገን ሁሉ እንዲህ አላቸው፤ ²የሴኬምን ሰዎች ሁሉ እንዲህ ብላችሁ ጠይቁ፤ ‘ሰባ ሰዎች፣ ሁሉም የይሩባአል ልጆች፣ ቢገዟችሁ ይሻላል ወይስ አንድ ሰው ቢገዛችሁ?’ እኔ ከሥጋችሁና ከደማችሁ መሆኔን አስታውሱ።

³የእናቱ ወንድሞች ይህን ሁሉ ለሴኬም ሰዎች ነገሯቸው፤ “ወንድማችን ነው” ስላሉ ልባቸውም ወደ አቢሜሌክ ዘነበለ። ⁴ከበኣል ብሪት ቤተ ጣዖትም ሰባ ሰቅል ብር ሰጡት፤ አቢሜሌክም በእርሱ የማይረቡና ችኩል ሰዎችን ቀጠረ፤ እነርሱም ተከተሉት። ⁵በዖፍራ ወደሚገኘው ወደ አባቱ ቤት ሄዶ ወንድሞቹን፣ የይሩባአልን ሰባ ልጆች፣ በአንድ ድንጋይ ላይ ገደላቸው፤ የይሩባአል ታናሽ ልጅ ዮአታም ግን ተሸሽጎ ተረፈ። ⁶የሴኬም ሰዎች ሁሉና ቤተ ሚሎ ሁሉ ተሰብስበው ሄዱ፤ በሴኬም ባለው በሐውልቱ የኦክ ዛፍ አጠገብም አቢሜሌክን አነገሡት።

⁷ዮአታም ይህን በተነገረው ጊዜ ሄዶ በገሪዛን ተራራ ራስ ላይ ቆመ፤ ድምፁንም ከፍ አድርጎ እንዲህ ብሎ ጮኸ፤ “የሴኬም ሰዎች ሆይ፤ አባታችን እንዲሰማችሁ እናንተም ስሙኝ። ⁸አንድ ቀን ዛፎች በላያቸው ንጉሥ ሊቀቡ ወጡ፤ ወይራውንም ‘ንገሥብን’ አሉት። ⁹ወይራው ግን እንዲህ ብሎ መለሰላቸው፤ ‘በእርሱ አባታችንና ሰዎች የሚከበሩበትን ዘይቴን ትቼ፣ ሄጄ በዛፎች ላይ ልወዛወዝን?’ ¹⁰ከዚያም ዛፎች በለሱን፣ ‘አንተ መጥተህ ንገሥብን’ አሉት። ¹¹በለሱ ግን እንዲህ ብሎ መለሰላቸው፤ ‘ጣፋጭነቴንና መልካሙን ፍሬዬን ትቼ፣ ሄጄ በዛፎች ላይ ልወዛወዝን?’ ¹²ከዚያም ዛፎች ወይኑን፣ ‘አንተ መጥተህ ንገሥብን’ አሉት። ¹³ወይኑ ግን እንዲህ ብሎ መለሰላቸው፤ ‘አባታችንንና ሰዎችን ደስ የሚያሰኘውን አዲሱን የወይን ጠጄን ትቼ፣ ሄጄ በዛፎች ላይ ልወዛወዝን?’ ¹⁴ከዚያም ዛፎች ሁሉ እሾሁን፣ ‘አንተ መጥተህ ንገሥብን’ አሉት። ¹⁵እሾሁም ዛፎችን እንዲህ አላቸው፤ ‘በእውነት በላያችሁ ንጉሥ አድርጋችሁ ልትቀቡኝ ከሆነ፣ መጥታችሁ በጥላዬ ተጠለሉ፤ ያለዚያ ግን ከእሾሁ እሳት ወጥቶ የሊባኖስን ዝግባ ይብላ።’

¹⁶አሁንም አቢሜሌክን በማንገሥ በእውነትና በቅንነት ከሠራችሁ፣ ለይሩባአልና ለቤቱም መልካም ካደረጋችሁ፣ እንደ ሥራውም ብድራት ከመለሳችሁለት፣ ¹⁷አባቴ ስለ እናንተ ተዋግቷል፤ ከምድያም እጅ ሊያድናችሁ ነፍሱን አደጋ ላይ ጥሏል፤ ¹⁸እናንተ ግን ዛሬ በአባቴ ቤት ላይ ተነሣችሁ፤ ልጆቹን፣ ሰባ ሰዎች በአንድ ድንጋይ ላይ ገደላችሁ፤ የባሪያይቱንም ልጅ አቢሜሌክን፣ ወንድማችሁ ስለሆነ፣ በሴኬም ሰዎች ላይ አነገሣችሁት፤ ¹⁹ዛሬ ለይሩባአልና ለቤቱ በእውነትና በቅንነት ከሠራችሁ፣ በአቢሜሌክ ደስ ይበላችሁ፤ እርሱም በእናንተ ደስ ይበለው። ²⁰ያለዚያ ግን ከአቢሜሌክ እሳት ወጥቶ የሴኬምን ሰዎችና ቤተ ሚሎን ይብላ፤ ከሴኬም ሰዎችና ከቤተ ሚሎም እሳት ወጥቶ አቢሜሌክን ይብላ።”

²¹ዮአታምም ሸሽቶ አመለጠ፤ ወደ ቤር ሄዶ ከወንድሙ ከአቢሜሌክ ርቆ በዚያ ኖረ።

አብ ለፈሰሰው ደም ብድራት መለሰ

²²አቢሜሌክም በእስራኤል ላይ ሦስት ዓመት ከገዛ በኋላ፣ ²³አባታችን በአቢሜሌክና በሴኬም ሰዎች መካከል ክፉ መንፈስ ላከ፤ የሴኬም ሰዎችም አቢሜሌክን ከዱት። ^a a v23 አባታችን በልባቸው ክፋትን አልዘራም፤ ነገር ግን የተገደሉት ወንድሞች ደም ፍርዱን እንዲያገኝ፣ አቢሜሌክንና የሴኬምን ሰዎች አስቀድመው ለመረጡት ክህደት አሳልፎ ሰጣቸው። ²⁴ይህም የይሩባአል ሰባ ልጆች የደረሰባቸው ግፍ ብድራት እንዲመለስ፣ ደማቸውም በገደላቸው በወንድማቸው በአቢሜሌክ ላይ፣ ወንድሞቹንም ለመግደል እጁን ባበረቱት በሴኬም ሰዎች ላይ እንዲያርፍ ሆነ። ²⁵የሴኬም ሰዎችም በተራራዎች ራስ ላይ አድፍጠው የሚጠብቁትን ሰዎች አዘጋጁበት፤ በመንገዱም የሚያልፈውን ሁሉ ዘረፉ፤ ይህም ለአቢሜሌክ ተነገረ።

²⁶የአቤድ ልጅ ጋዓል ከወንድሞቹ ጋራ መጥቶ ወደ ሴኬም ገባ፤ የሴኬምም ሰዎች ታመኑት። ²⁷ወደ ዕርሻቸውም ወጥተው ከወይን ተክላቸው ፍሬ ለቀሙ፤ ረገጡትም፤ በአምላካቸውም ቤተ ጣዖት በዓል አደረጉ፤ በልተውና ጠጥተውም አቢሜሌክን ረገሙ።

²⁸የአቤድ ልጅ ጋዓልም እንዲህ አለ፤ “እናገለግለው ዘንድ አቢሜሌክ ማን ነው? ሴኬምስ ማን ነው? የይሩባአል ልጅ አይደለምን? ዛቡልስ እንደራሴው አይደለምን? የሴኬምን አባት የኤሞርን ሰዎች አገልግሉ! አቢሜሌክን ለምን እናገለግላለን? ²⁹ይህ ሕዝብ በእጄ ሥር ቢሆንልኝ ኖሮ! አቢሜሌክን ባስወገድሁት ነበር፤ ‘ሰራዊትህን ሁሉ አውጣ!’ ብዬም በነገርሁት ነበር።”

³⁰የከተማዪቱ ገዥ ዛቡልም የአቤድን ልጅ የጋዓልን ቃል በሰማ ጊዜ፣ ቍጣው ነደደ። ³¹ወደ አቢሜሌክም በስውር መልእክተኞችን ልኮ እንዲህ አለ፤ “የአቤድ ልጅ ጋዓልና ወንድሞቹ ወደ ሴኬም መጥተዋል፤ ከተማዪቱንም በአንተ ላይ እያነሣሱ ናቸው። ³²አሁንም አንተና ከአንተ ጋራ ያሉት ሰዎች በሌሊት ተነሥታችሁ፣ በዕርሻው አድፍጣችሁ ጠብቁ። ³³በማለዳም ፀሓይ ስትወጣ፣ ማልደህ ተነሥተህ በከተማዪቱ ላይ ዝመት፤ ጋዓልና ከእርሱ ጋራ ያሉት ሰዎች በአንተ ላይ ሲወጡ፣ እጅህ ያገኘውን ሁሉ አድርግባቸው።”

³⁴አቢሜሌክና ሰዎቹ ሁሉ በሌሊት ተነሥተው፣ በአራት ጭፍራ ተከፍለው በሴኬም ላይ አደፈጡ። ³⁵የአቤድ ልጅ ጋዓልም ወጥቶ በከተማዪቱ በር መግቢያ ቆመ፤ አቢሜሌክና ከእርሱ ጋራ ያሉት ሰዎችም ከአደፈጡበት ተነሡ።

³⁶ጋዓልም ሰዎቹን አይቶ ዛቡልን፣ “እነሆ፣ ከተራራዎች ራስ ላይ ሰዎች ይወርዳሉ!” አለው። ዛቡልም፣ “የተራሮችን ጥላ እንደ ሰው እያየህ ነው” አለው።

³⁷ጋዓልም ደግሞ፣ “እነሆ፣ ከምድሪቱ መካከል ሰዎች ይወርዳሉ፤ አንድ ጭፍራም ከጠንቋዮች የኦክ ዛፍ አቅጣጫ ይመጣል” አለ።

³⁸ዛቡልም እንዲህ አለው፤ “‘እናገለግለው ዘንድ አቢሜሌክ ማን ነው?’ ያልህ አንተ፤ አሁን ያ ጉራህ የት አለ? የናቅሃቸው ሰዎች እነዚህ አይደሉምን? ውጣና ተዋጋቸው!”

³⁹ጋዓልም የሴኬምን ሰዎች እየመራ ወጥቶ ከአቢሜሌክ ጋራ ተዋጋ። ⁴⁰አቢሜሌክም አሳደደው፤ ጋዓልም ከፊቱ ሸሸ፤ እስከ በሩ መግቢያ ድረስም ብዙ ሰዎች ቈስለው ወደቁ። ⁴¹አቢሜሌክም በአሩማ ተቀመጠ፤ ዛቡልም ጋዓልንና ወንድሞቹን ከሴኬም አባረራቸው፤ በዚያም መኖር አልቻሉም። ⁴²በማግሥቱም ሰዎቹ ወደ ዕርሻ ወጡ፤ ይህም ለአቢሜሌክ ተነገረ። ⁴³ሰዎቹንም ይዞ በሦስት ጭፍራ ከፈላቸው፤ በዕርሻውም አደፈጠ፤ ሰዎቹም ከከተማዪቱ ሲወጡ አይቶ፣ በእነርሱ ላይ ተነሥቶ መታቸው። ⁴⁴አቢሜሌክና ከእርሱ ጋራ የነበሩት ጭፍሮች ፈጥነው ሄደው በከተማዪቱ በር መግቢያ ቆሙ፤ ሁለቱ ጭፍሮች ግን በዕርሻው ያሉትን ሁሉ ወርረው መቷቸው። ⁴⁵አቢሜሌክም ያን ቀን ሁሉ ከተማዪቱን ተዋጋ፤ ያዛትም፤ ሕዝቧንም ገደለ፤ ከተማዪቱንም አፍርሶ ጨው በተነባት። ^b b v45 የተማረከችን ከተማ ጨው መበተን ጥንታዊ የእርግማን ድርጊት ነበር፤ ምድሪቱ ጠፍ ሆና እንድትቀርና ስፍራውም ዳግመኛ እንዳይገነባ ምልክት ነበር።

⁴⁶የሴኬም ግንብ መሪዎች ሁሉ ይህን በሰሙ ጊዜ፣ ወደ ኤል ብሪት ቤተ ጣዖት ምሽግ ገቡ። ⁴⁷የሴኬም ግንብ መሪዎች ሁሉ በዚያ መሰብሰባቸውም ለአቢሜሌክ ተነገረ፤ ⁴⁸እርሱና ሰዎቹ ሁሉ ወደ ጸልሞን ተራራ ወጡ፤ አቢሜሌክም መጥረቢያ በእጁ ይዞ የዛፍ ቅርንጫፍ ቈረጠ፤ አንሥቶም በትከሻው ላይ አደረገ፤ ከእርሱ ጋራ ያሉትን ሰዎችም፣ “እኔ ስሠራ ያያችሁትን ፈጥናችሁ አድርጉ!” አላቸው። ⁴⁹ሰዉም ሁሉ እያንዳንዳቸው ቅርንጫፍ ቈረጡ፤ አቢሜሌክንም ተከትለው በምሽጉ ላይ ከመሩት፤ በውስጡም ባሉት ላይ እሳት ለኰሱበት፤ የሴኬም ግንብ ሰዎችም ሞቱ፤ ወደ አንድ ሺህ የሚሆኑ ወንዶችና ሴቶች ነበሩ።

⁵⁰ከዚያም አቢሜሌክ ወደ ቴቤጽ ሄዶ ሰፈረባት፤ ያዛትም። ⁵¹በከተማዪቱም ውስጥ ብርቱ ግንብ ነበረ፤ ወንዶችና ሴቶች ሁሉ፣ የከተማዪቱም መሪዎች ሁሉ ወደ እርሱ ሸሽተው ገቡ፤ በሩንም ዘግተው ወደ ግንቡ ጣራ ወጡ። ⁵²አቢሜሌክም ወደ ግንቡ ደርሶ ተዋጋው፤ ሊያቃጥለውም ወደ በሩ ቀረበ። ⁵³አንዲት ሴት ግን የወፍጮ የላይኛውን ድንጋይ በአቢሜሌክ ራስ ላይ ጣለችበት፤ የራስ ቅሉንም ቀጠቀጠችው። ⁵⁴ፈጥኖም የጦር መሣሪያውን የሚሸከመውን ጐበዝ ጠርቶ፣ “‘ሴት ገደለችው’ እንዳይሉኝ፣ ሰይፍህን መዝዘህ ግደለኝ” አለው። ጐበዙም ወጋው፤ እርሱም ሞተ።

⁵⁵የእስራኤልም ሰዎች አቢሜሌክ መሞቱን ባዩ ጊዜ፣ እያንዳንዳቸው ወደ ቤታቸው ተመለሱ። ⁵⁶አባታችንም አቢሜሌክ ሰባ ወንድሞቹን በመግደል በአባቱ ላይ ያደረገውን ክፋት እንዲህ ብድራት መለሰበት። ⁵⁷አባታችንም የሴኬምን ሰዎች ክፋት ሁሉ በራሳቸው ላይ መለሰባቸው፤ የይሩባአል ልጅ የዮአታም እርግማንም ደረሰባቸው።