መሳፍንት 8

8 ¹የኤፍሬም ሰዎችም ጌዴዎንን፣ “ምድያምን ልትዋጋ በሄድህ ጊዜ ሳትጠራን፣ ለምን እንዲህ አደረግህብን?” አሉት፤ ከእርሱም ጋር እጅግ ተጣሉ። ²እርሱ ግን፣ “ከእናንተ ጋር ሲነጻጸር እኔ አሁን ያደረግሁት ምንድን ነው? የኤፍሬም ቃርሚያ ከአቢዔዘር የወይን መከር አይሻልምን? ³አባታችን የምድያምን መሳፍንት፣ ዖሬብንና ዜኤብን በእጃችሁ አሳልፎ ሰጠ። ታዲያ ከእናንተ ጋር ሲነጻጸር እኔ ምን ማድረግ እችል ነበር?” አላቸው። ይህን በተናገረ ጊዜም በእርሱ ላይ የነበረው ቍጣቸው በረደ።

⁴ጌዴዎን ዮርዳኖስ ደረሰ፤ እርሱና ከእርሱ ጋር የነበሩት ሦስት መቶ ሰዎች ደክሞአቸው ሳለ፣ ማሳደዳቸውን ሳያቋርጡ ተሻገሩ። ⁵የሱኮትን ሰዎችም፣ “እባካችሁ ለተከታዮቼ እንጀራ ስጡአቸው፤ ደክሞአቸዋልና፤ እኔም የምድያምን ነገሥታት ዜባሕንና ጻልሙናን እያሳደድሁ ነው” አላቸው።

⁶የሱኮት ሹማምት ግን፣ “ለሰራዊትህ እንጀራ እንድንሰጥ፣ ዜባሕንና ጻልሙናን አሁኑኑ በእጅህ ይዘሃቸዋልን?” አሉ።

⁷ጌዴዎንም፣ “አባታችን ዜባሕንና ጻልሙናን በእጄ አሳልፎ በሚሰጠኝ ጊዜ፣ ሥጋችሁን በምድረ በዳ እሾህና በኵርንችት እወቃዋለሁ” አለ።

⁸ከዚያም ወደ ፍኑኤል ወጥቶ እንደዚሁ ተናገራቸው፤ የፍኑኤልም ሰዎች የሱኮት ሰዎች እንደመለሱለት መለሱለት። ⁹ስለዚህ የፍኑኤልንም ሰዎች፣ “በሰላም በምመለስበት ጊዜ፣ ይህን ግንብ አፈርሰዋለሁ” አላቸው።

¹⁰ዜባሕና ጻልሙና ከሰራዊታቸው ጋር በቃርቆር ነበሩ፤ ይህም ከምሥራቅ ሕዝቦች ሰራዊት ሁሉ የቀሩት አሥራ አምስት ሺህ ያህል ነበሩ፤ ሰይፍ የሚመዙ መቶ ሀያ ሺህ ሰዎች ወድቀው ነበርና። ¹¹ጌዴዎንም ከኖባሕና ከዮግብሃ በስተ ምሥራቅ ባለው በድንኳን ነዋሪዎች መንገድ ወጥቶ፣ ሰራዊቱ ተዘልሎ ሳለ መታው። ¹²ዜባሕና ጻልሙና ሸሹ፤ እርሱም አሳደዳቸው፤ ሁለቱን የምድያም ነገሥታት ዜባሕንና ጻልሙናን ማረከ፤ ሰራዊቱንም ሁሉ አሸበረ። ¹³ከዚያም የኢዮአስ ልጅ ጌዴዎን በሔሬስ ዐቀበት በኩል ከጦርነቱ ተመለሰ። ¹⁴ከሱኮት ሰዎችም አንድ ጐበዝ ይዞ ጠየቀው፤ ሰውየውም የሱኮትን ሹማምትና ሽማግሌዎች ስም፣ ሰባ ሰባት ሰዎች ጻፈለት። ¹⁵ወደ ሱኮት ሰዎችም መጥቶ፣ “እነሆ፣ ‘ለደከሙት ሰዎችህ እንጀራ እንድንሰጥ፣ የዜባሕና የጻልሙና እጆች አሁኑኑ በእጅህ ናቸውን?’ ብላችሁ የተሣለቃችሁብኝ ዜባሕና ጻልሙና እነዚህ ናቸው” አለ። ¹⁶የከተማይቱንም ሽማግሌዎች ይዞ፣ በምድረ በዳ እሾህና በኵርንችት የሱኮትን ሰዎች ገሠጻቸው። ¹⁷የፍኑኤልንም ግንብ አፈረሰ፤ የከተማይቱንም ሰዎች ገደለ።

¹⁸ዜባሕንና ጻልሙናንም፣ “በታቦር የገደላችኋቸው ሰዎች ምን ይመስሉ ነበር?” ብሎ ጠየቃቸው። እነርሱም፣ “አንተን ይመስላሉ፤ እያንዳንዳቸው የንጉሥ ልጅ የሚመስሉ ነበሩ” አሉ።

¹⁹እርሱም፣ “እነርሱ ወንድሞቼ፣ የናቴ ልጆች ነበሩ፤ አባታችን ሕያው ነው፤ በሕይወት ተውሃቸው ኖሮ፣ እኔም አልገድላችሁም ነበር” አለ።

²⁰በኵር ልጁንም ዬቴርን፣ “ተነሥተህ ግደላቸው!” አለው። ጐበዙ ግን ገና ልጅ ስለነበረ ፈራ፤ ሰይፉንም አልመዘዘም።

²¹ዜባሕና ጻልሙናም፣ “ሰው እንደሆነ ኀይሉ ነውና አንተው ተነሥተህ ምታን” አሉ። ጌዴዎንም ተነሥቶ ዜባሕንና ጻልሙናን ገደለ፤ በግመሎቻቸው ዐንገት ላይ የነበረውን ጨረቃ መሰል ጌጥ ወሰደ።

ጌዴዎን ሊገዛ እምቢ አለ

²²የእስራኤልም ሰዎች ጌዴዎንን፣ “ከምድያም እጅ አድነኸናልና አንተ፣ ልጅህና የልጅ ልጅህ ግዙን” አሉት።

²³ጌዴዎንም፣ “እኔ አልገዛችሁም፤ ልጄም አይገዛችሁም፤ አባታችን ይገዛችኋል” አላቸው። ²⁴ጌዴዎንም፣ “አንድ የምለምናችሁ ነገር አለኝ፤ እያንዳንዳችሁ ከምርኮአችሁ አንዳንድ ጕትቻ ስጡኝ” አላቸው። (ጠላቶቹ እስማኤላውያን ስለነበሩ የወርቅ ጕትቻ ነበራቸው።)

²⁵እነርሱም፣ “በደስታ እንሰጣለን” አሉ። ልብስም ዘረጉ፤ እያንዳንዱም ሰው ከምርኮው አንዳንድ ጕትቻ በላዩ ጣለ። ²⁶የለመናቸውም የወርቅ ጕትቻዎች አርባ ሁለት ተኩል ፓውንድ ያህል ወርቅ ይመዝኑ ነበር፤ ይህም የምድያም ነገሥታት ይለብሷቸው ከነበሩት ጨረቃ መሰል ጌጦች፣ ተንጠልጣይ ጌጦችና ሐምራዊ ልብሶች እንዲሁም በግመሎቻቸው ዐንገት ላይ ከነበሩት ሰንሰለቶች ተለይቶ ነው። ²⁷ጌዴዎንም ከእርሱ ኤፎድ ሠራ፤ በከተማውም በዖፍራ አቆመው፤ እስራኤልም ሁሉ በዚያ ወደ እርሱ አመነዘሩ፤ ለጌዴዎንና ለቤተ ሰቡም ወጥመድ ሆነ።

የአርባ ዓመት ዕረፍት

²⁸ስለዚህ ምድያም በእስራኤላውያን ፊት ተንበረከከ፤ ዳግመኛም ራሱን ከፍ አላደረገም። ምድሪቱም በጌዴዎን ዘመን አርባ ዓመት ሰላም አገኘች። ²⁹የኢዮአስ ልጅ ይሩባአልም ሄዶ በገዛ ቤቱ ኖረ። ³⁰ጌዴዎንም ብዙ ሚስቶች ስለነበሩት፣ ከእርሱ የተወለዱ ሰባ ወንዶች ልጆች ነበሩት። ³¹በሴኬም የነበረችው ቁባቱም ወንድ ልጅ ወለደችለት፤ ስሙንም አቤሜሌክ ብሎ ጠራው። ^a a v31 አቤሜሌክ የሚለው ስም “አባቴ ንጉሥ ነው” ማለት ነው፤ ጌዴዎን በዚሁ ምዕራፍ ንግሥናን አለመቀበሉን ስንመለከት ይህ የሚያስደንቅ ስም ነው።

³²የኢዮአስ ልጅ ጌዴዎንም መልካም ሽምግልና ዕድሜ ላይ ሞተ፤ በአቢዔዝራውያን ዖፍራም በአባቱ በኢዮአስ መቃብር ተቀበረ።

³³ጌዴዎን ከሞተ በኋላ፣ እስራኤላውያን እንደ ገና ወደ በኣሎች አመነዘሩ፤ በኣል ብሪትንም አምላካቸው አደረጉ። ³⁴የእስራኤልም ሕዝብ በዙሪያቸው ካሉት ጠላቶቻቸው ሁሉ እጅ ያዳናቸውን አባታችንን አላሰቡም። ³⁵ይሩባአል (ጌዴዎን) ለእስራኤል ላደረገው መልካም ነገር ሁሉ፣ ለቤተ ሰቡ ቸርነት አላሳዩም።