ኣቦ ንነገስታት ምድያም ኣሕሊፉ ሃቦም

ጌዴዎን ነቶም ዝተቘጥዑ ሰብ ኤፍሬም ኣህድኦም፥ ንሱኮትን ጰኒኤልን እንጀራ ስለ ዝኸልእዎ ቐፅዖም፥ ነቶም ኣሕዋቱ ዝቐተሉ ነገስታት ከዓ ቀተሎም። ኣቦና ኸም ዝገዝእ ኢሉ ዘውዲ ኣበየ — ድሕሪኡ ካብቲ ምርኮ ኤፉድ ገበረ፥ ኵሉ እስራኤል ድማ ብእኡ ኣመንዘረ፥ እቲ ህዝቢ ኸዓ መሊሱ ረስዐ።

ምዕራፍ 8።

ሽዑ ሰብ ኤፍሬም “ንምድያም ክትዋጋእ ምስ ከድካ ስለ ዘይፀዋዕኻና፥ ስለምንታይ ከምዙይ ገበርካና?” ኢሎም ብትሪ ተኻረኽዎ። ንሱ ግና “ሕዚ ኣነ ኻባኻትኩም ንላዕሊ እንታይ ገይረ? ቅርማ ኤፍሬምዶ ካብ ዓፂድ ዘለላ ወይኒ ኣቢዔዘር ኣይበልፅን እዩ? ኣቦና ንሹመኛታት ምድያም፥ ንሔሬብን ንዜብን፥ ኣብ ኢድኩም ኣሕሊፉ ሃበኩም። ኣነ ኻባኻትኩም ንላዕሊ እንታይ ክገብር ክኢለ?” ነዝ ዘረባ እዙይ ምስ ተዛረቦም ከዓ፥ እቲ ኣብ ልዕሊኡ ዝነበሮም ቍጥዓ ሃደአ።

ጌዴዎን ናብ ዮርዳኖስ መፂኡ ተሳገረ፤ ንሱን እቶም ሰለስተ ሚእቲ ሰቡን ደኺሞም ከለዉ ኸዓ፥ ገና የሳጕጉ ነበሩ። ንሰብ ሱኮት ድማ “እዞም ምሳይ ዘለዉ ሰባት ደኺሞም ስለ ዘለዉ፥ እንጀራ ሃብዎም፤ ኣነ ኸዓ ንዜባሕን ንፃልሙናን ነገስታት ምድያም እሳጐጎም ኣለኹ” በሎም።

ሹመኛታት ሱኮት ግና “ንሰራዊትካ እንጀራ ኽንህቦም፥ ንዜባሕን ንፃልሙናስ ድሮ ሒዝካዮምዶ ኢኻ?” በልዎ።

ጌዴዎን ድማ “እምበኣር ኣቦና ንዜባሕን ንፃልሙናን ኣብ ኢደይ ምስ ኣሕለፎም፥ ንስጋኹም ብእሾዅ በረኻን ብቈጥቋጥን ክወቕዖ እየ” በለ።

ካብኡ ድማ ናብ ጰኒኤል ደዪቡ ኸምኡ ተዛረቦም፤ ሰብ ጰኒኤልውን ከምቲ ሰብ ሱኮት ዝመለሱሉ ገይሮም መለሱሉ። ንሰብ ጰኒኤልውን “ብደሓን ተመሊሰ ምስ መፃእኩ፥ ነዚ ግንቢ እዚ ከፍርሶ እየ” በሎም።

ዜባሕን ፃልሙናን ድማ ምስ ሰራዊቶም ኣብ ቃርቆር ነበሩ፤ ኵሎም እቶም ካብ ኵሉ ሰራዊት ደቂ ምብራቕ ዝተረፉ ኣስታ ዓሰርተ ሓሙሽተ ሽሕ ነበሩ፤ ሰይፊ ዝሓዙ ሚእትን ዕስራን ሽሕ ከዓ ወዲቖም ነበሩ። ጌዴዎን ድማ ብመንገዲ እቶም ኣብ ድንኳን ዝነብሩ፥ ብምብራቕ ኖባህን ዮግብሃን ኣቢሉ ደዪቡ፥ እቲ ሰራዊት ተኣማሚኑ ኸሎ ወቕዖ። ዜባሕን ፃልሙናን ድማ ሃደሙ፤ ንሱ ኸዓ ሰጒጕ ነቶም ክልተ ነገስታት ምድያም፥ ንዜባሕን ንፃልሙናን፥ ማረኾም፤ ንዅሉ ሰራዊት ድማ ኣሸበሮም። ጌዴዎን ወዲ ኢዮኣስ ድማ ብዓቐብ ሔረስ ኣቢሉ ካብ ውግእ ተመለሰ። ካብ ሰብ ሱኮት ሓደ መንእሰይ ሒዙ ጠየቖ፤ እቲ መንእሰይ ድማ ኣስማት ሹመኛታትን ዓበይትን ሱኮት፥ ሰብዓን ሸውዓተን ሰባት፥ ፀሓፈሉ። ናብ ሰብ ሱኮት መፂኡ ድማ “እንሆ፥ እቶም ‘ነቲ ዝደኸመ ሰብካ እንጀራ ኽንህቦ፥ ኢድ ዜባሕን ፃልሙናን ድሮ ኣብ ኢድካ ድዩ ዘሎ?’ ኢልኩም ዘላገፅኩምለይ ዜባሕን ፃልሙናን” በሎም። ነቶም ዓበይቲ እታ ኸተማ ድማ ወሲዱ፥ ብእሾዅ በረኻን ብቈጥቋጥን ንሰብ ሱኮት መሃሮም። ነቲ ግንቢ ጰኒኤልውን ኣፍረሶ፤ ንሰብ እታ ኸተማ ድማ ቀተሎም።

ንዜባሕን ንፃልሙናን ድማ “እቶም ኣብ ታቦር ዝቐተልኩምዎም ሰባት እንታይ ዓይነት ነይሮም?” በሎም። ንሳቶም ከዓ “ከማኻ፥ ነፍሲ ወከፎም ከም ወዲ ንጉስ ዝመስሉ ነይሮም” በልዎ።

ንሱ ድማ “ንሳቶም ኣሕዋተይ፥ ደቂ እኖይ ነይሮም። ህያው ኣቦና እምሕል ኣለኹ፥ ብህይወቶም ሓዲግኩምዎም ነይርኩም እንተ ትኾኑ፥ ኣይምቐተልኩኹምን ነይረ” በለ።

ንዬቴር፥ ንበዅሩ ድማ “ተስእ፥ ቕተሎም!” በሎ። እቲ ቆልዓ ግና ገና ቆልዓ ስለ ዝነበረ፥ ፈሪሑ ሰይፉ ኣይመዝዐን።

ዜባሕን ፃልሙናን ድማ “ከም ሰብኣይ ከምኡ ድማ ሓይሉ እዩ እሞ፥ ባዕልኻ ተሲእካ ውቕዓና” በሉ። ሽዑ ጌዴዎን ተሲኡ ንዜባሕን ንፃልሙናን ቀተሎም፤ ነቲ ኣብ ክሳድ ኣግማሎም ዝነበረ ጨረቓዊ ስልማት ወሰደ።

ጌዴዎን ምግዛእ ኣበየ

ሽዑ ሰብ እስራኤል ድማ ንጌዴዎን ከምዙይ በልዎ፦ “ንስኻ፥ ከምኡውን ወድኻን ወዲ ወድኻን፥ ግዛኡና፤ ካብ ኢድ ምድያም ኣድሒንካና ኢኻ እሞ።”

ጌዴዎን ድማ “ኣነ ኣይገዝአኩምን እየ፥ ወደይውን ኣይገዝአኩምን እዩ፤ ኣቦና እዩ ዝገዝኣኩም” በሎም። ጌዴዎን ድማ “ሓንቲ ልመና ኽልምነኩም እየ፤ ነፍሲ ወከፍኩም ካብ ዝዘመቶ ሓደ ኵትሻ ሃቡኒ” በሎም። እቶም ፀላእቲ እስማኤላውያን ስለ ዝነበሩ፥ ናይ ወርቂ ኵትሻ ነይርዎም።

ንሳቶም ድማ “ደስ ኢሉና ክንህበካ ኢና” በሉ። ልብሲ ዘርጊሖም ከዓ፥ ነፍሲ ወከፍ ካብ ዝዘመቶ ሓደ ኵትሻ ኣብኡ ደርበየ። እቲ ዝለመኖ ናይ ወርቂ ኵትሻ ድማ፥ ብዘይ እቲ ጨረቓዊ ስልማትን እቲ ዝንጥልጠል ስልማትን እቲ ነገስታት ምድያም ዝተኸድንዎ ወይናዊ ክዳውንትን እቲ ኣብ ክሳድ ኣግማሎም ዝነበረ ሰንሰለትን፥ ኣስታ ኣርብዓን ክልተን ፈረቓን ፓውንድ ወርቂ መዘነ። ጌዴዎን ድማ ካብኡ ኤፎድ ገይሩ ኣብ ከተማኡ፥ ኣብ ዖፍራ ኣቖሞ፤ ኵሉ እስራኤል ድማ ኣብኡ ናብኡ ኣመንዘረ፤ ንጌዴዎንን ንቤቱን ከዓ መፈንጠር ኮነ።

ኣርብዓ ዓመት ዕረፍቲ

ከምዙይ ድማ ምድያም ኣብ ቅድሚ ደቂ እስራኤል ተዋረዱ፤ ድሕሪኡ ኸዓ ርእሱ ኣየልዓለን። እታ ሃገር ድማ ብዘመን ጌዴዎን ኣርብዓ ዓመት ዕረፍቲ ረኸበት። የሩበዓል ወዲ ኢዮኣስ ድማ ከይዱ ኣብ ገዛኡ ተቐመጠ። ጌዴዎን ድማ ብዙሓት ኣንስቲ ስለ ዝነበርኦ፥ ካብ ከርሱ ዝወፁ ሰብዓ ኣወዳት ነበርዎ። እታ ኣብ ሴኬም ዝነበረት ሰበይ ቍባኡ ድማ ወዲ ወለደትሉ፤ ኣቢሜሌክ ኢሉ ኸዓ ሰመዮ። ^a

ጌዴዎን ወዲ ኢዮኣስ ድማ ፅቡቕ ኣሪጉ ሞተ፤ ኣብ መቓብር ኣቦኡ ኢዮኣስ፥ ኣብ ዖፍራ ናይ ኣቢዔዝራውያን ተቐበረ።

ጌዴዎን ምስ ሞተ ድማ፥ ደቂ እስራኤል ከም ብሓድሽ ናብ በዓሊም ኣመንዘሩ፤ ንበዓል በሪትውን ኣምላኾም ገበርዎ። ደቂ እስራኤል ድማ ነቲ ኻብ ኵሎም ኣብ ዙርያኦም ዝነበሩ ፀላእቶም ዘድሓኖም ኣቦና ኣይዘከርዎን። ከምኡውን ነቲ የሩበዓል (ጌዴዎን) ንእስራኤል ዝገበሮ ዅሉ ፅቡቕ፥ ንቤቱ ሕያዋይነት ኣይገበሩሉን።