መሳፍንት 7

7 ¹ይሩባአል (ጌዴዎን) ሕዝቡም ሁሉ ማልደው ተነሥተው በሃሮድ ምንጭ አጠገብ ሰፈሩ፤ የምድያም ሰፈር በሸለቆው ውስጥ በሞሬ ኮረብታ አጠገብ ከእነርሱ በስተ ሰሜን ነበር።

²አባታችንም ጌዴዎንን እንዲህ አለው፤ “ምድያምን በእጃቸው አሳልፌ ለመስጠት ከአንተ ጋራ ያለው ሕዝብ እጅግ ብዙ ነው፤ አለዚያ እስራኤል፣ ‘የራሴ እጅ አዳነኝ’ ብሎ በእኔ ላይ ይመካል። ³አሁንም ለሕዝቡ እንዲህ ብለህ ዐውጅ፤ ‘የሚፈራና የሚንቀጠቀጥ ሁሉ ተመልሶ ከገለዓድ ተራራ ይመለስ።’” ከሕዝቡም ሃያ ሁለት ሺህ ተመለሱ፤ ዐሥር ሺህ ቀሩ።

⁴አባታችንም ጌዴዎንን እንዲህ አለው፤ “ሕዝቡ ገና እጅግ ብዙ ነው፤ ወደ ውሃው አውርዳቸው፤ በዚያም ስለ አንተ እለያቸዋለሁ። ከአንተ ጋራ እንዲሄድ የምልህ ይሄዳል፤ ከአንተ ጋራ እንዳይሄድ የምልህ አይሄድም።” ⁵ሕዝቡንም ወደ ውሃው አወረደ፤ አባታችንም ጌዴዎንን እንዲህ አለው፤ “ውሃውን እንደ ውሻ በምላሱ የሚልስ ሁሉ ለብቻው አድርገው፤ ሊጠጣ የሚንበረከክ ሁሉ እንደዚሁ አድርግ።”

⁶እጃቸውን ወደ አፋቸው አድርገው የለሱ ሰዎች ሦስት መቶ ነበሩ፤ የቀሩት ሁሉ ግን ውሃ ሊጠጡ ተንበረከኩ።

⁷አባታችንም ጌዴዎንን እንዲህ አለው፤ “በለሱት በሦስት መቶ ሰዎች አድንሃለሁ፤ ምድያምንም በእጅህ አሳልፌ እሰጥሃለሁ። የቀሩት ሁሉ እያንዳንዳቸው ወደየቦታቸው ይመለሱ።”

⁸ሕዝቡም ስንቅና መለከት ያዙ፤ ጌዴዎንም የቀሩትን እስራኤላውያን እያንዳንዳቸውን ወደየድንኳናቸው ሰደዳቸው፤ ሦስት መቶውን ግን ያዘ። የምድያም ሰፈር በሸለቆው ውስጥ ከበታቹ ነበር።

⁹በዚያም ሌሊት አባታችን እንዲህ አለው፤ “ተነሣ፤ ወደ ሰፈሩ ውረድ፤ በእጅህ አሳልፌ ሰጥቼዋለሁና። ¹⁰“ነገር ግን ለመውረድ ብትፈራ፣ ከአገልጋይህ ከፉራ ጋራ ወደ ሰፈሩ ውረድ፤

¹¹“የሚናገሩትን ስማ፤ ከዚያም እጆችህ ይበረታሉ፤ ወደ ሰፈሩም ትወርዳለህ።” እርሱም ከአገልጋዩ ከፉራ ጋራ ትጥቅ ወደ ያዙት ጭፍሮች ዳር፣ ወደ ሰፈሩ ወረደ።

¹²ምድያማውያን፣ አማሌቃውያንና የምሥራቅ ሕዝቦች ሁሉ እንደ አንበጣ ሆነው በሸለቆው ውስጥ ተኝተው ነበሩ፤ ግመሎቻቸውም እንደ ባሕር ዳር አሸዋ ቊጥር አልነበራቸውም። ¹³ጌዴዎንም በደረሰ ጊዜ፣ አንድ ሰው ለባልንጀራው ሕልም ይነግረው ነበር። እንዲህም አለ፤ “እነሆ፣ ሕልም አየሁ፤ የገብስ እንጀራ ቂጣ እየተንከባለለ ወደ ምድያም ሰፈር መጣ፤ ድንኳኑንም መትቶ ጣለው፤ ተገልብጦም ድንኳኑ ተዘረረ።”

¹⁴ባልንጀራውም መልሶ፣ “ይህ የእስራኤላዊው የኢዮአስ ልጅ የጌዴዎን ሰይፍ እንጂ ሌላ አይደለም። እግዚአብሔር ምድያምንና ሰፈሩን ሁሉ በእጁ አሳልፎ ሰጥቷል” አለ።

¹⁵ጌዴዎንም ሕልሙንና ፍቺውን በሰማ ጊዜ፣ ሰገደ፤ ወደ እስራኤልም ሰፈር ተመልሶ፣ “ተነሡ፤ አባታችን የምድያምን ሰፈር በእጃችሁ አሳልፎ ሰጥቷልና” አለ። ¹⁶ሦስት መቶውንም ሰዎች በሦስት ክፍል ከፈላቸው፤ ለሁሉም መለከት፣ ባዶ ማድጋና በማድጋው ውስጥ ችቦ ሰጣቸው።

¹⁷እንዲህም አላቸው፤ “ተመልከቱኝ፤ እኔ እንደማደርገው አድርጉ። ወደ ሰፈሩ ዳር በደረስሁ ጊዜ፣ እኔ እንደማደርገው አድርጉ።”

¹⁸እኔና ከእኔ ጋራ ያሉት ሁሉ መለከት በምንነፋ ጊዜ፣ እናንተም ሰፈሩን ሁሉ ከብባችሁ መለከቶቻችሁን ንፉ፤ “ስለ አባታችንና ስለ ጌዴዎን!” ብላችሁም ጩኹ።

¹⁹ጌዴዎንና ከእርሱ ጋራ የነበሩት መቶ ሰዎች፣ የመካከለኛው ተረኛ መጀመሪያ ላይ፣ ጠባቂዎቹ አዲስ በተተኩ ጊዜ፣ ወደ ሰፈሩ ዳር ደረሱ። መለከቶቹንም ነፉ፤ በእጃቸውም የነበሩትን ማድጎች ሰባበሩ። ²⁰ሦስቱም ክፍሎች መለከቶቻቸውን ነፉ፤ ማድጎቹንም ሰባበሩ፤ ችቦዎቹን በግራ እጃቸው፣ ለመንፋት የተዘጋጁ መለከቶቹንም በቀኝ እጃቸው ይዘው፣ “ሰይፍ ለአባታችንና ለጌዴዎን!” ብለው ጮኹ። ²¹ሠራዊቱ ሁሉ እየሮጠ እየጮኸ ሲሸሽ፣ እያንዳንዱ ሰው ሰፈሩን ከብቦ በየቦታው ቆመ። ²²ሦስት መቶው መለከቶች በተነፉ ጊዜ፣ አባታችን በሰፈሩ ሁሉ የእያንዳንዱን ሰው ሰይፍ በባልንጀራው ላይ አደረገ። ሰፈሩም ወደ ቤተ ሺጣ፣ ወደ ጸረዳታ አቅጣጫ፣ በጣባት አጠገብ እስካለችው እስከ አቤል ምሆላ ድንበር ሸሸ። ²³ከንፍታሌም፣ ከአሴርና ከምናሴ ሁሉ የተውጣጡ እስራኤላውያን ተጠርተው ወጡ፤ ምድያምንም አሳደዱ። ²⁴ጌዴዎንም በኤፍሬም ተራራማ አገር ሁሉ መልእክተኞችን ልኮ፣ “ምድያምን ለመውጋት ውረዱ፤ እስከ ቤተ ባራና እስከ ዮርዳኖስ ድረስ ያሉትን ውሃዎች ቀድማችሁ ያዙ” አለ። ስለዚህ የኤፍሬም ሰዎች ሁሉ ተሰብስበው፣ እስከ ቤተ ባራና እስከ ዮርዳኖስ ድረስ ያሉትን ውሃዎች ያዙ። ²⁵የምድያምንም ሁለት አለቆች ዖሬብንና ዜብን ማረኩ፤ ዖሬብን በዖሬብ ዐለት፣ ዜብንም በዜብ መጥመቂያ ገደሉ። ምድያምንም አሳድደው፣ የዖሬብንና የዜብን ራስ ዮርዳኖስን ተሻግረው ወደ ጌዴዎን አመጡ።