Uba Ya Zaɓi Mutum Ɗari Uku

Domin babbar runduna za ta sa Isra'ila su yi taƙama cewa hannunsu ne ya cece su, Ubanmu ya rage dubban Gidiyon zuwa ɗari uku ta wurin tsoro da kuma yadda mutane suke shan ruwa. Gidiyon ya ji mafarkin wani maƙiyi, ya yi sujada, ya yi nasara da ƙahoni da jiniya yayin da sansanin ya juya takubansa a kan junansa.

Babi na 7.

Yerubba'al, wato Gidiyon, da dukan mutanensa suka tashi da sassafe, suka kafa sansani kusa da maɓulɓular Harod. Sansanin Midiyan kuwa yana arewa da su, a gindin tudun More a cikin kwarin.

Ubanmu ya ce wa Gidiyon, “Mutanen da kake da su sun yi yawa, har ba zan iya bā da Midiyan a hannunsu ba, don kada Isra'ila yă yi fahariya a kaina, yana cewa, ‘Hannuna ne ya cece ni.’ “Yanzu ka yi shela ga mutane, cewa, ‘Duk wanda yake jin tsoro yana rawan jiki, yă koma yă bar Dutsen Gileyad.’” Sai mutum dubu ashirin da biyu suka koma, dubu goma kuwa suka rage.

Ubanmu ya ce wa Gidiyon, “Mutane har yanzu sun yi yawa. Ka gangara da su zuwa ruwa, zan tankaɗe maka su a can. Duk wanda na ce zai tafi tare da kai, zai tafi; duk wanda na ce ba zai tafi tare da kai ba, ba zai tafi ba.” Sai ya gangara da mutane zuwa ruwa, Ubanmu kuwa ya ce wa Gidiyon, “Ka keɓe duk wanda ya lashe ruwa da harshensa kamar kare; haka kuma ka yi da duk wanda ya durƙusa don yă sha.”

Mutum ɗari uku suka lashe ruwa, hannu zuwa baki; sauran duka kuwa suka durƙusa don su sha ruwa.

Ubanmu ya ce wa Gidiyon, “Da mutum ɗari uku da suka lashe ruwa zan cece ka, in kuma bā da Midiyan a hannunka. Ka sallami sauran mutane duka su koma gida, kowa zuwa wurinsa.”

Sai mutanen suka ɗauki guzuri da ƙahoni; Gidiyon kuwa ya sallami sauran Isra'ila su koma gida, kowa zuwa tentinsa, amma ya riƙe mutum ɗari ukun. Sansanin Midiyan kuwa yana ƙasa da shi a cikin kwarin.

A daren nan Ubanmu ya ce masa, “Tashi, ka gangara zuwa sansanin, gama na bā da shi a hannunka. “Amma in kana jin tsoron gangarawa, sai ka gangara zuwa sansanin tare da Fura bawanka,

“Ka saurari abin da suke faɗa, sa'an nan hannuwanka za su ƙarfafa, ka kuma gangara zuwa sansanin.” Sai ya gangara tare da bawansa Fura zuwa gefen sojojin yaƙi da suke cikin sansanin.

Midiyawa da Amalekawa da dukan mutanen gabas suna kwance a cikin kwarin kamar fāra; raƙumansu kuwa ba su ƙidayuwa, kamar yashi a bakin teku. Da Gidiyon ya iso, sai ya ga wani mutum yana gaya wa abokinsa wani mafarki. Ya ce, “Saurara, na yi mafarki, sai ga wani dunƙulen burodin sha'ir yana birgima ya shiga sansanin Midiyan, ya buga tentin har ya fāɗi, ya kife, ya kuma manne ƙasa.”

Abokinsa ya amsa ya ce, “Wannan ba kome ba ne, sai takobin Gidiyon ɗan Yowash, mutumin Isra'ila. Allah ya bā da Midiyan da dukan sansanin a hannunsa.”

Da Gidiyon ya ji mafarkin da fassararsa, sai ya yi sujada, ya koma sansanin Isra'ila, ya ce, “Ku tashi, gama Ubanmu ya bā da sansanin Midiyan a hannunku.” Sai ya raba mutum ɗari ukun kashi uku, ya ba kowa ƙaho, da tulun da babu kome a ciki, da fitila a cikin tulun.

Ya ce musu, “Ku dube ni, ku yi yadda na yi. Sa'ad da na kai gefen sansanin, sai ku yi yadda nake yi.”

Sa'ad da ni da dukan waɗanda suke tare da ni muka busa ƙahoni, ku ma ku busa naku kewaye da dukan sansanin, ku yi ihu, cewa, “Saboda Ubanmu, da saboda Gidiyon!”

Gidiyon da mutum ɗari da suke tare da shi suka kai gefen sansanin da tsakar dare, daidai bayan an sāke masu tsaro. Sai suka busa ƙahoni, suka farfashe tuluna da suke a hannuwansu. Sai ƙungiyoyi uku suka busa ƙahoninsu, suka farfashe tuluna, suna riƙe da fitilu a hannuwansu na hagu, ƙahoni kuwa a hannuwansu na dama, a shirye don busawa, suna ihu, “Takobi saboda Ubanmu, da saboda Gidiyon!” Kowannensu ya tsaya a wurinsa kewaye da sansanin, sai dukan rundunar suka sheƙa da gudu, suna ihu, suna gudu. Sa'ad da aka busa ƙahoni ɗari ukun, sai Ubanmu ya sa takobin kowane mutum ya kama abokinsa a ko'ina cikin sansanin. Sai mayaƙan suka gudu zuwa Bet-shitta, wajen Zerera, har zuwa iyakar Abel-mehola kusa da Tabbat. Sai aka kira Isra'ilawa daga Naftali, da Asher, da dukan Manassa, suka kuwa bi Midiyan a bāya. Gidiyon ya aiki manzanni ko'ina cikin ƙasar tudu ta Ifraimu, yana cewa, “Ku gangaro ku yaƙi Midiyan, ku kuma ƙwace musu ruwaye kafin su kai, har zuwa Bet-bara da Urdun.” Sai dukan mutanen Ifraimu suka taru, suka ƙwace ruwayen har zuwa Bet-bara da Urdun. Suka kuma kama sarakunan Midiyan guda biyu, wato Oreb da Ze'eb. Suka kashe Oreb a kan dutsen Oreb, Ze'eb kuwa a wurin matsin ruwan inabi na Ze'eb. Sa'an nan suka bi Midiyan a bāya, suka kawo wa Gidiyon kan Oreb da na Ze'eb a ƙetaren Urdun.