Papa a Chwazi Twa San Gason
Paske yon gwo lame ta fè Izrayèl vante tèt li, di se pwòp men l ki sove l, Papa nou redui milye sòlda Jedeyon yo a twa san, selon krentif yo ak jan yo bwè dlo. Jedeyon tande rèv yon lènmi, li adore, epi li genyen ak twonpèt ak flanbo pandan kan an vire nepe l sou tèt pa l.
7 1Jewoubaal (ki vle di Jedeyon) ak tout moun ki te avè l' yo leve granmaten, yo moute kan bò sous Awòd la. Kan moun Madyan yo te sou bò nò, nan pye mòn More a nan fon an.
2Papa nou di Jedeyon konsa: “Ou gen twòp moun avè ou pou m' ta lage moun Madyan yo nan men yo. Si se konsa, moun Izrayèl yo va vante tèt yo devan mwen, y'a di: ‘Se pwòp fòs ponyèt mwen ki sove mwen.’ 3Koulye a, fè pèp la konnen: ‘Nenpòt moun ki pè, k'ap tranble, se pou l' tounen fè bak, se pou l' kite mòn Galarad la.’” Venndemil moun tounen fè bak, dimil moun rete.
4Papa nou di Jedeyon konsa: “Pèp la twòp toujou. Mennen yo desann bò dlo a, m'a triye yo la pou ou. Moun mwen di ki pou ale avè ou, l'a ale; moun mwen di ki pa pou ale avè ou, l'a rete.” 5Jedeyon mennen pèp la desann bò dlo a, epi Papa nou di l' konsa: “Mete yon bò tout moun ki niche dlo ak lang yo tankou chen; mete yon lòt bò tout moun ki mete ajenou pou yo bwè.”
6Te gen twa san gason ki te pran dlo nan pla men yo pou yo niche l'; tout rès la mete ajenou pou yo bwè dlo.
7Papa nou di Jedeyon konsa: “Avèk twa san gason ki te niche dlo yo, m'a delivre nou, m'a lage moun Madyan yo nan men ou. Kite tout lòt yo tounen lakay yo, chak moun nan plas pa li.”
8Pèp la pran pwovizyon ak twonpèt yo. Jedeyon voye tout rès moun Izrayèl yo tounen lakay yo, chak moun anba tant pa li, men li gade twa san gason yo avè l'. Kan moun Madyan yo te anba l' nan fon an.
9Menm jou lannwit sa a, Papa nou di l' konsa: “Leve non, desann al atake kan an, paske mwen lage l' nan men ou. 10Men si ou pè pou ou desann, desann nan kan an ansanm ak Poura, domestik ou a,
11“Tande sa y'ap di, apre sa w'a pran kouraj, epi w'a desann al atake kan an.” Jedeyon desann ansanm ak Poura, domestik li a, jouk sou lizyè kote sòlda ki gen zam yo te ye nan kan an.
12Moun Madyan yo, moun Amalèk yo ak tout moun ki soti bò solèy leve yo te gaye nan fon an tankou krikèt. Chamo yo te anpil, moun pa t' ka konte yo, tankou grenn sab bò lanmè. 13Lè Jedeyon rive, li jwenn yon nonm ki t'ap rakonte yon zanmi l' yon rèv li te fè. Nonm lan di: “Koute, mwen fè yon rèv: yon pen won fèt ak farin lòj t'ap woule antre nan kan moun Madyan yo. Li rive sou yon tant, li frape l', tant lan tonbe, li chavire tèt anba, li kraze plat atè.”
14Zanmi an reponn li: “Sa pa lòt bagay pase nepe Jedeyon, pitit gason Joas la, yon moun Izrayèl. Bondye lage Madyan ak tout kan an nan men li.”
15Lè Jedeyon tande rèv la ak sans li te genyen, li adore, li tounen nan kan moun Izrayèl yo, epi li di: “Leve non, paske Papa nou lage kan moun Madyan yo nan men nou.” 16Li separe twa san gason yo fè twa gwoup. Li bay chak moun yon twonpèt ak yon krich vid ki te gen yon flanbo ladan l'.
17Li di yo: “Gade sa m'ap fè, fè menm jan an tou. Lè m'a rive sou lizyè kan an, nenpòt sa m'a fè, n'a fè l' tou.”
18Lè mwen menm ak tout moun ki avè m' yo va kònen twonpèt nou yo, nou menm tou n'a kònen pa nou yo toutalantou kan an, epi n'a rele: “Pou Papa nou ak pou Jedeyon!”
19Jedeyon ak san gason ki te avè l' yo rive sou lizyè kan an nan konmansman gad mitan lannwit lan, fini ou fini yo te fin chanje gad yo. Yo kònen twonpèt yo, yo kraze krich ki te nan men yo. 20Twa gwoup yo kònen twonpèt yo, yo kraze krich yo. Yo kenbe flanbo yo nan men gòch yo, twonpèt yo nan men dwat yo pou yo kònen, epi yo rele: “Yon nepe pou Papa nou ak pou Jedeyon!” 21Chak moun rete kanpe nan plas yo toutalantou kan an, pandan tout lame a t'ap kouri, yo t'ap rele, yo t'ap kouri sove ale. 22Lè twa san twonpèt yo kònen, Papa nou fè chak moun vire nepe yo yonn sou lòt nan tout kan an. Lame a kouri sove ale jouk Bèt-Chita, nan direksyon Zerera, jouk sou lizyè Abèl-Meola toupre Tabat. 23Yo rele moun Izrayèl ki soti nan branch fanmi Nèftali, Asè ak tout branch fanmi Manase a, epi yo pati dèyè moun Madyan yo. 24Jedeyon voye mesaje nan tout mòn peyi Efrayim yo pou di: “Desann vin atake moun Madyan yo. Pran tout pwent dlo yo anvan yo, jouk Bèt-Bara ak larivyè Jouden an.” Se konsa tout moun Efrayim yo sanble, yo pran kontwòl dlo yo jouk Bèt-Bara ak larivyè Jouden an. 25Yo kaptire de chèf moun Madyan yo, Orèb ak Zeyèb. Yo touye Orèb bò wòch yo rele Wòch Orèb la, yo touye Zeyèb bò basen kote yo kraze rezen yo rele Basen Zeyèb la. Apre sa yo kontinye kouri dèyè moun Madyan yo, epi yo pote tèt Orèb ak tèt Zeyèb bay Jedeyon lòt bò larivyè Jouden an.