Wungva̱-Wungvā 9

9 ¹Jerubbaalwui naomayara Abimelechna Shechemli ava̱va̱wui achinā ngarāli vaida athumli kala ava̱va̱wui avāva̱ shimkhur saikorali hānga, ²"Shechemwui mibing saikorali ngahānlu: 'Jerubbaalwui naomayara mi hangshini saikorana nathumwuitungli mungra, lah mi akhana nathumwuitungli mungra, khi phāmeirakhala?' Phaningunglu, I nathumwui asā kala ashee akhana."

³Ava̱va̱wui achinā ngarāna hi saikora Shechemwui mibingli latluida hāngsera, kala athumwui ning Abimelechshong thuihaowa, kaja athumna "A ithumwui achināna" da hānga. ⁴Athumna ali Baal-berithwui khorumshimwui eina lupāsā hangshini mi, kala chi eina Abimelechna ali shurthuwa wortam kala chānhān makhaunga mibing masākhui. ⁵Chiwui thili ana Ophrahli avāva̱wui shimli achinā ngarā, Jerubbaalwui naomayara hangshini, ngalung akha tungli sāthatserhaowa. Kha Jerubbaalwui naomayara paisho Jothamna a khalatta thumhaida mathila ringa. ⁶Shechemwui mibing saikora kala Beth-millo saikorana rākazipta ungda Shechemli khalei pākra̱wui shirimthingpheili Abimelechli awunga sāhaowa.

⁷Chi Jothamli hānghaowa da theilaga, ana ungda Gerizim Kaphung akuili nganinga, panglāk eina vaoda hānga: "Shechemwui mibing, ili nganākhuilu, chieina ithumwui Avāna nathumli nganāmira. ⁸Athum khalatta tungli awunga neomi khavai, chithang akhali thingrongbingna zangda vai. Athumna oliverongli hānga, 'Ithumwuitungli munglu.' ⁹Kha oliverongna athumli ngahānkai, 'Ina iwui thao horhaida, chi eina ithumwui Avā kala mibingli khayā ngasakra, thingrongbingwuitungli ngayitung ngayitva sākhavai vaira?' ¹⁰Chiwui thili thingrongbingna khaorārongli hānga, 'Na rāda ithumwuitungli munglu.' ¹¹Kha khaorārongna athumli ngahānkai, 'Ina iwui shimmeithui kala iwui khamathā athei horhaida, thingrongbingwuitungli ngayitung ngayitva sākhavai vaira?' ¹²Chiwui thili thingrongbingna drakhārongli hānga, 'Na rāda ithumwuitungli munglu.' ¹³Kha drakhārongna athumli ngahānkai, 'Ina iwui zam horhaida, chi eina ithumwui Avā kala mibingli mathān ngasakra, thingrongbingwuitungli ngayitung ngayitva sākhavai vaira?' ¹⁴Chiwui thili thingrong saikorana kara̱theirongli hānga, 'Na rāda ithumwuitungli munglu.' ¹⁵Kala kara̱theirongna thingrongbingli hānga, 'Nathumna ili nathum tungli awunga neomi khavai kaje phaningakha, chithākha rāda iwui khaya̱li ngayin sālu; kha maningakha, kara̱theirongwui eina mei shokta Lebanonwui cedarthing chuitup tāranu.'

¹⁶Ara nathumna Abimelechli awunga sākahaili ning tharlak eina kala ningsā khangazip eina sāhaiakha, kala Jerubbaal eina awui shimkhurli kaphā sāhaiakha, awui pāngli sākahai athishurda ali sāmanhaiakha, ¹⁷iwui avāva̱na amanglā hamlaga Midianaobingwui pāngwui eina nathumli kanmi khavai nathumwui vang ngararhaowa, ¹⁸kha aja nathumna iwui avāva̱wui shimtungli ngakarthuida, awui naomayarabing mayarnao hangshini ngalung akhali shaothatlaga, awui raonaova̱wui naomayara Abimelechli Shechemwui mibingtungli awunga sāhaira, kaja a nathumwui achināna, ¹⁹aja nathumna Jerubbaal kala awui shimli ningsā khangazip kala mashungrik eina sāhairasaakha, chithākha Abimelechli mathānlu, kala anala nathumli mathānranu. ²⁰Kha maningakha, Abimelechwui eina mei shokta Shechemwui mibing kala Beth-millo chuitup tāranu, kala Shechemwui mibing eina kala Beth-millowui eina mei shokta Abimelechli chuitup tāranu."

²¹Jothamna yāmshokhaowa, kala awui achinā Abimelechwui eina Beerli vāda, chili pamhaowa.

Avāna Ashee Chi Athut Hāngsanga

²²Abimelechna Israellungli zingkum kathum munga kahaiwui thili, ²³ithumwui Avāna Abimelech eina Shechemwui mibingwui ngachaili makaphā manglā akha chihovāda, athumna Abimelechli makaphā eina sāhaowa. ^a a v23 ithumwui Avāna athumwui ningli makaphā malingmana; ana Abimelech kala Shechemwui mibingli, athumna sāngngaran khuikahai makaphā chiwui pāngli mihaowa, chithāda sāda shaokathata achinābingwui ashee chi khamashungli samphangra. ²⁴Jerubbaalwui naomayara hangshinitungli sākahai khayon chi runsang khavai, athumwui ashee chi athumli shaothata achinā Abimelechtungli haida, kala awui achinābingli shaothat khavai awui pāng pangngasaka Shechemwui mibingtungli haihaira. ²⁵Shechemwui mibingna kaphungtungli ali rimpama mibing sāsangda, shongfali rārā mi kachiva̱li ngapona. Kala Abimelechli hānghaowa.

²⁶Ebedwui naomayara Gaalna awui achinābing ngasoda Shechemli rāpamhaowa, kala keinung chiwui mibingna ali shitsanga. ²⁷Athumna luili vāda, athumwui drakhā yāmgui eina drakhāthei phākhuilaga, chi netda, athumwui varewui khorumshimli phanit sāda, chili phāshak phāzāda Abimelechli khonshihaowa.

²⁸Ebedwui naomayara Gaalna hānga, "Ithumna ali otram ngatha̱ khavai Abimelech hi khipākhala, kala Shechem hi khipākhala? A Jerubbaalwui naomayara maningmala, kala Zebul awui mahut kashina maningmala? Shechemwui avāva̱ Hamorwui mibingli otram ngatha̱lu! Khisāda ithumna Abimelechli otram ngatha̱rakhala? ²⁹Mi hi iwui pāngli ningkhami khavai leisi kaja phālaka! Chithākha ina Abimelechli thahaimira; ina ali, 'Nawui raimi saikora hokhuiserlu!' da hāngra."

³⁰Keinung chiwui khamunga Zebulna Ebedwui naomayara Gaalwui tui kashā tharan, a malungvāthaowa. ³¹Ana ngathumda Abimelechli paomebing chihovāda hānga: "Ebedwui naomayara Gaal kala awui achinābing Shechemli rāhaira kala keinung chi nawui yangkashe sāngasakhaira. ³²Ara na kala nawui ngasoda mibing ngayā ngakarthuilaga, luili rimpamsālu. ³³Ngathor zimik kashok eina ngathorthak thuilaga keinung chi ngararlu. Gaal kala awui mibing nawui yangkashena shok tharan, nawui pāngna samkaphang athishurda athumli sālu."

³⁴Chieina Abimelech kala awui mibing saikora ngayā zatphokta, khum mati eina Shechemli rimpama. ³⁵Ebedwui naomayara Gaalna shokta keinung ngavei zangkhavaili nganinga; kala Abimelech eina awuili ngaso mibingna rimkasāwui eina ngakarthuihaowa.

³⁶Gaalna mibing chili theilaga Zebulli hānga, "Yanglu, mi kaphungbingwui eina katāhaira!" Zebulna hānga, "Nana kaphungwui khaya̱ chi mikumo thāda theira."

³⁷Gaalna hāngluishita, "Yanglu, mi ngaleiwui alungthungwui eina katāhaira, kala khum akha laivā kasābingwui shirimthingwui shongwui eina rāhaira."

³⁸Chieina Zebulna ali hānga, "Nawui tui kakā ara kali leikhala? 'Ithumna ali otram ngatha̱ khavai Abimelech chi khipākhala?' da kahānga na maningmala? Hibing hi nana ningkachai mibing maningmala? Shokta athumli rai sālu!"

³⁹Chiwui vang Gaalna Shechemwui ruichumnaobingwui mangāli shokta Abimelechli ngarara. ⁴⁰Kha Abimelechna ali kharomvai, kala Gaal awui mangāwui eina yāmhaowa, kala mi kachungkhana ngavei zangkhavai eina tangda khamā za̱da pitai. ⁴¹Abimelechna Arumahli pamsanghaowa, kala Zebulna Gaal eina achinā ngarāli Shechemwui eina kashamshokhaowa, chiwui vang athum apam chili masompaimana. ⁴²Akhama kathā mibingna luili shokhaowa, kala Abimelechli hānghaowa. ⁴³Ana awui mibingli khuilaga khum kathum sālaga luili ngathirai sākhavai vāpama. Mibingna keinung chiwui eina shok kahai chi kathei eina ana athumli ngararda sāthata. ⁴⁴Abimelech eina awui khumbingna yongvāda keinung ngavei zangkhavaili nganinga, chitharan khangatei khum khani china luili khalei saikorali ayangda sāthata. ⁴⁵Abimelechna chithang katonga keinung chili ngararlaga akhuihaowa; keinungwui mila sāthatlaga keinung chi shaokhaimihaida machi yaosangmihaowa. ^b b v45 Keinung khuikahai chili machi eina yao chi khare atamwui katup otsak akhana—aram chi mathei khavai kala apam chi mavaingasakāluishit khavaiwui chitheikhami akhana.

⁴⁶Chi kashā tharan Shechemwui dolanwui akhokabing saikorana El-berithwui shimwui raipanli zanga. ⁴⁷Shechemwui dolanwui akhokabing saikora apam chili rākazip kahai chi Abimelechli hānghaowa, ⁴⁸Chieina ava kala awui mi saikora Zalmon Kaphungli kai. Ana apāngli ngahā khuilaga luishā aphāng akha tektālaga khāngkhuida ayartuili ngava̱, kala awui mibingli hānga, "Kathākmeilu, ina kasā nathumna theida chi sālu!" ⁴⁹Chieina mi saikorana aphāngbing tektālaga Abimelechli shurda raipanli akhum khoda, kala alungli khalei mibingwui tungli meina chuisangmihaowa. Shechemwui dolanwui mibingla, mayarnao eina sha̱nao thing akha shakha, thihaowa.

⁵⁰Chiwui thili Abimelechna Thebezli vālaga chili rairum vasāpama, kala akhuihaowa. ⁵¹Keinung chiwui alungli kapanga dolan akha nganinga, kala keinungwui akhokabing, mayarnao eina sha̱nao saikora chili yāmda vaida themlāk shungnamhailaga dolanwui shimtungli kai. ⁵²Abimelechna dolanli rāda chili angararda, chi mei eina riktā khavai awui khāmongli rāshungnanai. ⁵³Kha sha̱nao akhana Abimelechwui kuili chakrikui akha hortada awui kuira̱ akha̱ sāmihaowa. ⁵⁴Ana katotsisi awui chāngvei phungkhame chili hokhuida hānga, "Nawui raighai sutkhuilaga ili sāthathaolu, chi maningakha, 'Sha̱naona ali sāthata,' da mibingna iwui vang hāngpaishina." Chieina yaronnao china ali tothathaowa, kala a thihaowa.

⁵⁵Israelwui mibingna Abimelech thikahai chi kathei eina, athum saikora kachichā shimli ungserhaowa. ⁵⁶Chithāda Abimelechna achinā hangshini shaothatta awui avāva̱li sākahai makaphā chi ithumwui Avāna awuitungli athut khuimihaira. ⁵⁷Ithumwui Avāna Shechemwui mibingwui makaphā saikora athumwui kuili tāngasakmihaowa, kala Jerubbaalwui naomayara Jothamwui khonkashi chi athumtungli tahaowa.