መሳፍንት 10

10 ¹ከአቤሜሌክ በኋላ የይሳኮር ሰው የሆነው የዶዶ ልጅ የፉዓ ልጅ ቶላ እስራኤልን ለማዳን ተነሣ፤ እርሱም በኤፍሬም ተራሮች ውስጥ በሳሚር ኖረ። ²በእስራኤል ላይ ሀያ ሦስት ዓመት ፈረደ፤ ከዚያም ሞተ፣ በሳሚርም ተቀበረ።

ኢያዕር እስራኤልን ይመራል

³ከእርሱም በኋላ ገለዓዳዊው ኢያዕር ተነሣ፤ እርሱም በእስራኤል ላይ ሀያ ሁለት ዓመት ፈረደ። ⁴በሠላሳ አህዮች ላይ የሚጋልቡ ሠላሳ ወንዶች ልጆች ነበሩት፤ በገለዓድም ሠላሳ ከተሞች ነበሩአቸው፤ እስከ ዛሬም ሐዎት ኢያዕር ተብለው ይጠራሉ። ^a a v4 ሐዎት ኢያዕር ማለት “የኢያዕር ሰፈሮች” ማለት ነው፤ ከተሞቹ ስማቸውን ከእርሱ አግኝተዋል። ⁵ኢያዕር በሞተ ጊዜ በቃሞን ተቀበረ።

እስራኤል እንደ ገና አብን ይተዋል

⁶እስራኤላውያንም እንደ ገና በአባታችን ፊት ክፉ ነገር አደረጉ፤ በኣሎችንና አስታሮትን፣ የአራምን አማልክት፣ የሲዶናን አማልክት፣ የሞአብን አማልክት፣ የአሞናውያንን አማልክትና የፍልስጥኤማውያንን አማልክት አገለገሉ። አባታችንንም ተዉ፤ ከእንግዲህም አላገለገሉትም። ⁷ስለዚህ የአባታችን ቍጣ በእስራኤል ላይ ነደደ፤ ለፍልስጥኤማውያንና ለአሞናውያን እጅም ሸጣቸው። ⁸በዚያ ዓመት እስራኤላውያንን ሰባበሩና አደቀቁ፤ በዮርዳኖስ ማዶ በአሞራውያን ምድር በገለዓድ ያሉትን እስራኤላውያንን ሁሉ ዐሥራ ስምንት ዓመት አስጨነቋቸው። ⁹አሞናውያንም ደግሞ በይሁዳ፣ በብንያምና በኤፍሬም ቤት ላይ ለመዋጋት ዮርዳኖስን ተሻገሩ፤ እስራኤልም እጅግ ተጨነቀ። ¹⁰እስራኤላውያንም ወደ አባታችን ጮኸው እንዲህ አሉ፤ “አባታችንን ትተን በኣሎችን ስላገለገልን በአንተ ላይ ኀጢአት ሠርተናል።”

¹¹አባታችንም እስራኤላውያንን እንዲህ አላቸው፤ “ከግብፃውያን፣ ከአሞራውያን፣ ከአሞናውያንና ከፍልስጥኤማውያን አላዳንኋችሁምን? ¹²ሲዶናውያን፣ አማሌቃውያንና ማዖናውያን ባስጨነቋችሁ ጊዜ ወደ እኔ ጮኻችሁ፤ እኔም ከእጃቸው አዳንኋችሁ። ¹³ነገር ግን እናንተ ተዋችሁኝ፤ ሌሎች አማልክትንም አገለገላችሁ፤ ስለዚህ ከእንግዲህ አላድናችሁም። ¹⁴ሄዳችሁ ወደ መረጣችኋቸው አማልክት ጩኹ፤ በመከራችሁ ጊዜ እነርሱ ያድኗችሁ።”

¹⁵እስራኤላውያንም አባታችንን እንዲህ አሉት፤ “ኀጢአት ሠርተናል። መልካም መስሎ የታየህን ሁሉ አድርግብን፤ ዛሬ ብቻ እባክህ አድነን።” ¹⁶የባዕድ አማልክትንም አስወግደው አባታችንን አገለገሉ፤ ልቡም የእስራኤልን መከራ ከእንግዲህ ሊታገሥ አልቻለም።

¹⁷አሞናውያንም ተሰብስበው በገለዓድ ሰፈሩ፤ እስራኤላውያንም ተሰበሰቡ በምጽጳም ሰፈሩ። ¹⁸ሕዝቡም፣ የገለዓድ አለቆች እርስ በርሳቸው፣ “አሞናውያንን መዋጋት የሚጀምር ሁሉ በገለዓድ ሕዝብ ሁሉ ላይ አለቃ ይሆናል” ተባባሉ።