ኣቦ ንእስራኤል ከድሕን ንቶላ የተስኦ

ቶላን ያኢርን ኣብ መንጎ እቲ ህውከት ብህድኣት ፈረዱ። ድሕሪኡ እስራኤል ኣማልኽቲ ኵሎም ጎረባብቶም ብሓንሳእ ኣገልገሉ፥ ብደቂ ኣሞን ድማ ዓሰርተ ሸሞንተ ዓመት ተጨፍለቑ። ምስ ኣእወዩ፥ ኣቦና ነቲ ዝሓለፈ ዅሉ ምድሓን ዘርዚሩ ኣበዮም — ነቶም ዝሓረኹምዎም ኣማልኽቲ ኣእውዩሎም። ልቡ ኸዓ ንመከራኦም ክፅወሮ ኣይከኣለን።

ምዕራፍ 10።

ድሕሪ ኣቢሜሌክ፥ ቶላ ወዲ ፉዋ ወዲ ዶዶ፥ ሰብ ይሳኮር፥ ንእስራኤል ከድሕን ተሲኡ፤ ንሱ ኣብ ኰረብታታት ኤፍሬም ኣብ ሳምር ይነብር ነበረ። ንእስራኤል ዕስራን ሰለስተን ዓመት ፈረደ፤ ድሕሪዙይ ድማ ሞተ፤ ኣብ ሳምርውን ተቐበረ።

ያኢር ንእስራኤል ይመርሕ

ድሕሪኡ ድማ ገለዓዳዊ ያኢር ተሲኡ፥ ንእስራኤል ዕስራን ክልተን ዓመት ፈረደ። ኣብ ሰላሳ ኣእዱግ ዝተቐመጡ ሰላሳ ደቂ ነበርዎ፤ ኣብ ገለዓድ ድማ ሰላሳ ዓድታት ነበሮም፥ ክሳዕ ሎሚ ዓድታት ያኢር ተብሂለን ይፅዋዓ። ^a ያኢር ምስ ሞተ፥ ኣብ ቃሞን ተቐበረ።

እስራኤል መሊሱ ንኣቦ ይሓድግ

ደቂ እስራኤል መሊሶም ኣብ ቅድሚ ኣቦና ክፉእ ገበሩ፤ ነቶም በዓሊምን ኣስታሮትን ኣማልኽቲ ኣራም፥ ኣማልኽቲ ሲዶንን ኣማልኽቲ ሞኣብን ኣማልኽቲ ደቂ ኣሞንን ኣማልኽቲ ፍልስጥኤማውያንን ኣምለኹ። ንኣቦና ሓዲጎም ድማ ደጊም ኣየምለኽዎን። ስለዙይ ቍጥዓ ኣቦና ኣብ ልዕሊ እስራኤል ነደደ፤ ናብ ኢድ ፍልስጥኤማውያንን ደቂ ኣሞንን ድማ ሸጦም። በታ ዓመት እቲኣ ንደቂ እስራኤል ሰባበርዎምን ጨፍለቕዎምን፤ ነቶም ኣብ ማዕዶ ዮርዳኖስ ኣብ ምድሪ ኣሞራውያን ኣብ ገለዓድ ዝነበሩ ኵሎም ደቂ እስራኤል ዓሰርተ ሸሞንተ ዓመት ገፍዕዎም። ደቂ ኣሞን ድማ ምስ ይሁዳን ብንያምን ቤት ኤፍሬምን ክዋግኡ ዮርዳኖስ ተሳገሩ፤ እስራኤል ከዓ ኣብ ብርቱዕ ፀበባ ወደቐ። ሽዑ ደቂ እስራኤል ናብ ኣቦና “ንኣቦና ሓዲግና ነቶም በዓሊም ስለ ዘምለኽና፥ ንኣኻ በዲልና ኢና” ኢሎም ኣእወዩ።

ኣቦና ድማ ንደቂ እስራኤል ከምዙይ በሎም፦ “ካብ ግብፃውያንን ኣሞራውያንን ደቂ ኣሞንን ፍልስጥኤማውያንን ኣየድሓንኩኹምንዶ? ሲዶናውያን፥ ኣማሌቃውያንን ማዖናውያንን ገፍዑኹም፤ ናባይ ኣእዌኹም፤ ኣነ ኸዓ ኻብ ኢዶም ኣድሓንኩኹም። ንስኻትኩም ግና ሓዲግኩምኒ ንኻልኦት ኣማልኽቲ ተገዛእኩም፤ ስለዙይ ድሕሪ ደጊም ኣየድሕነኩምን እየ። ኺዱ ነቶም ዝሓረኹምዎም ኣማልኽቲ ኣእውዩሎም፤ ኣብ ግዜ ፀበባኹም ንሳቶም የድሕኑኹም።”

ደቂ እስራኤል ድማ ንኣቦና “በዲልና ኢና፤ ዝሓሸ ዝመስለካ ኵሉ ግበረና፤ ሎሚ ጥራሕ በይዛኻ ኣድሕነና” በልዎ። ነቶም ጓኖት ኣማልኽቲ ኣርሒቖም ድማ ንኣቦና ኣምለኹ፤ ልቡ ኸዓ ንመከራ እስራኤል ደጊም ክፅወሮ ኣይከኣለን።

ደቂ ኣሞን ድማ ተኣኪቦም ኣብ ገለዓድ ሰፈሩ፤ ደቂ እስራኤል ከዓ ተኣኪቦም ኣብ ምፅጳ ሰፈሩ። እቲ ህዝቢ፥ ዓበይቲ ገለዓድ፥ ንሓድሕዶም “እቲ ምስ ደቂ ኣሞን ክዋጋእ ዝጅምር ኵሉ፥ ኣብ ልዕሊ ኵሎም ሰብ ገለዓድ ሓለቓ ክኸውን እዩ” ተበሃሃሉ።