Mark 14

Chapter 14.

14 ¹Makānkhami phanit eina Khawok makazang khamui phanit nganaihaira zimiksho khani rida, pāngmon akhokabing eina ain kathembingna Jishuli kapik eina tukkhuida shaothat khavai apong phaihaowa. ²Kaja athumna hānga, "Phanit atamli masāmilu, kalikha mibingna otshot sapaishina."

³Jishu Bethanyli phārrei kakazā Simonwui shimli tableli phazāda leilakha, sha̱nao akhana aman kasaka nard nganamkaphā thao alabaster thaokhong akha khuirai. Ana thaokhong chi sakhailaga Jishuwui kuitungli heirora. ⁴Kaikhana malungvātta athum khalatta hānga, "Khisāda thao hi hithāda arema sākhala? ⁵Kaja thao hi denarii shākathum lānga eina yorhailaga kachāmbingli mihaipai!" Chieina athumna ali kharara.

⁶Kha Jishuna hānga, "Aningkhānranu. Khisāda ali sheikhautkhala? Ana iwui vang khamathā ot sāmihaira. ⁷Kaja kachāmbing chi atam kachida nathumli ngasomichingra, kala nathumna ngasakngai tharan athumli khamathā sāpaira; kha ili nathumna atam kachida masamphangmara. ⁸Ana kannāluikahai chi sāmihaira; kachizanwui vang rida iwui phasāli thao neomihaira. ⁹Ina nathumli kachangkhat da kahāngna, hi paokaphā okathui saikorali hāshok kachida, ana sāmihai kaji chi ali phaningkhaung khavai hāngchitheira."

¹⁰Chieina tharāda khaniwui ngachaili akha Judas Iscariotna Jishuli athumli yansai khavai pāngmon akhokabingwuili vai. ¹¹Hi kashā tharan athumna ringphāhaoda ali lupā mira da mayāngaroka. Chieina ana Jishuli yansai khavai atam kachā phāhaowa.

Sākhangatha̱bingna Makānkhami ngarān

¹²Khawok makazang khamui phanitwui kharethang, athumna Makānkhamiwui yaonao taithat zimiksholi, awui sākhangatha̱bingna ali ngahāna, "Makānkhami phāzat na zākhavai, ithumna kali vāda khangarān sālu jikhala?"

¹³Ana awui sākhangatha̱ khani chihovāda hānga, "Keinungli vālu; mayarnao akhana tara̱ham phunglaga nathumli ngarokra. Ali shurvālu, ¹⁴kala ana akazang shim chili, shimva̱ chili hānglu, 'Ojāna hānga: Iwui sākhangatha̱bingli ngasoda Makānkhami zākhavai iwui rākazanga kā chi kali leikhala?' ¹⁵Kala ana nathumli mathāng khamatoli sāmathakharik kahai kala ngarān kupkahai kahaka kā akha chitheira; chili ithumwui vang ngarānlu."

¹⁶Sākhangatha̱bing zatphokta keinungli vai, kala Jishuna athumli hāngkahai thada samphanga, chieina athumna Makānkhami ngarāna.

¹⁷Kala kazing yingkahai eina, Jishuna tharāda khani ngasoda rai.

¹⁸Athumna phazā khavai pamda phazāmahunglakha, Jishuna hānga, "Kachangkhat eina ina nathumli kahāngna, nathumwui ngachaili akha, ili ngasoda phazākasā akhana, ili yansaira."

¹⁹Chieina athum ningchota, kachichāshi ali ngahān ngaroka, "Ina kajilā?"

²⁰Ana athumli hānga, "Tharāda khani ngachaili mi akha, ili ngasoda khamui dishonli kapheokasāna. ²¹Miwui Naomayarava awui pongli Kathara Lairikli kapihaikasā thada jimara, kha miwui Naomayarali yankasai mi chi vang kalākashi ngasaranu! Ana marāpharākasāna thada phāmeikharra."

²²Athumna phazāmahunglakha, ana khamui khuida seihā sāhailaga, serkhaida, athumli mida hānga, "Khuilu; hi iwui asāna."

²³Ana tengkot akha khuida, ningkashi mihailaga, chi athumli shimana, kala saikorana chi mangahaowa.

²⁴Ana athumli hānga, "Hi iwui tuingashitwui ashee, mi kachungkhawui vang heishokmi kahaina. ²⁵Kachangkhat eina ina nathumli kahāngna, ithumwui Avā wungramli drakhāra̱ kadhar mangki kaji zimiksho marāranglakha eina tangda, ina drakhāra̱ hiwui mamangluimara." ^a a v25 Jishuna rāda kahokhui khavai wungram chi ithumwui Avā khalattawui wungramna — awui naobingwui vang ana khangarān sāda leiwui shimkhur china.

²⁶Athumna masotlaa sālaga, Olive kaphungli hongda vāhaowa.

Jishuna Peterwui Kahat Sāngngarānda Hānga

²⁷Jishuna athumli hānga, "Nathum saikora yāmserhaora, kaja hithada kapihaida lei: 'Ina yaokahomali sāthathaora, kala yao chi chaiyānghaora.'" ²⁸Kha I ringshok kahaiwui thili, nathumli ina Galileeli rida vāra."

²⁹Peterna ali hānga, "Athum saikora yāmserlala, ina chi mayāmlakmara."

³⁰Jishuna ali hānga, "Kachangkhat eina ina nali kahāngna, aja, arui ngayā, harvāna khanishida makhongranglakha eina tangda, nana ili matheimana da kathum shida hatra."

³¹Kha ana khāmda hānga, "Nali ngasoda thishapralā jilala, ina nali chi mahatlakmara." Kala saikoranala chithada hāngsera."

Anaomayarana Avāli Khalatta Yāmsang

³²Athum Gethsemane kaho apam chili ungshunga, kala ana awui sākhangatha̱bingli hānga, "Ina seihā sāda leilakha, nathum hili pamsālu."

³³Ana Peter, James kala John athummāngli thānphunglaga, hakmahālak eina ningchot kala angun ngaroka.

³⁴Ana athumli hānga, "Iwui wuklung kakhanangna sātekmi, thiki jiura. Hili pamda ningngasharlu."

³⁵Ana khavāmeilaga ngaleili ngakhumshām zangda, sāpaisi kaja atam chi awui eina khuithuimihaolu da seihā sai.

³⁶Ana hānga, ""Abba" Ishavā, nawui vanga ot saikora sapaisera. Tengkot hi iwui eina khuithuimihaolu; kha iwui kaphaning maningmana, nawui kaphaning eina vailu." ^b b v36 "Abba" chi Jishuna ithumwui Avāli hokhui khavai khuikahai, naongarāna ningtitnga̱ eina hoi kahai leikashe ming china. Ithumwui Avāna hikathā Manglā chiwui pangshap eina khangakao chi, latuluihai naongarā kachiva̱li khamila da Paulna ithumli hānga (Romans 8:15; Galatians 4:6).

³⁷Ana hanunglaga athum piphup eina khalei samphanga. Chieina ana Peterli hānga, "Simon, na pihaola? Na pungkhamāngla mahonpamrarmala? ³⁸Nathum kasuili matāzang khavai, ngasharlu kala seihā sālu; manglāva sāngaikachangkhata, kha asāva ngazanhaowa."

³⁹Kala ana latluida vālaga, ngaraikachā tui chi hānglaga seihā sai. ⁴⁰Ana hanungluishit kaji tharan athum pida khalei samphanga; athum mikla marakrarthuwa, kala athumna ali kathada ngahānkāra da matheimana.

⁴¹Ana kakathumalila latunlaga, athumli hānga, "Nathumna aruila tangda pida kala ngasāmda leifala? Chi shapa; atam chi rāhaira. Yanglu, miwui Naomayarali morei kaphungbingwui pāngli horsangmira. ⁴²Ngakarthuilu, ithum vaura; yanglu, iwui yorkazāpa rāhaira."

Jishuli Morei Kaphungbingwui Pāngli Horsangmi

⁴³Jishuna matui mahungda leilakha, tharāda khaniwui ngachaili akha Judasna rāsai, kala ali ngasoda mi kachungkha raighai kala thinghun singlaga pāngmon akhokabing, ain kathembing kala ararbingwui eina rai. ⁴⁴Awui yorkazāpa mina ingkit akha athumli mihailaga hānga, "Ina kaje amaya̱ki, chiva a kho; chi tukkhuilaga, kalāmashi khavai shimenvai sālu." ⁴⁵Ana hengsāda Jishuwuili vālaga, "Ojā!" da hānga, kala ali amaya̱ya. ⁴⁶Chieina athumna ali pāng khānglaga tukkhuihaowa. ⁴⁷Chili nganingkasābing ngachaili akhana awui raighai sutkhuilaga, pāngmon khareiwui rao akhali shaoda, awui khanā yortāmihaowa.

⁴⁸Jishuna athumli hānga, "Ili tukkhuiki khavai, pha̱ma̱ kashao mi thada, nathum raighai kala thinghun singda kharālā? ⁴⁹Thangkachida ina nathumli ngasopamda khorumshimli tamchitheia, kha nathumna ili matukkhuimana. Kha Katharatui chi ungshungranu."

⁵⁰Chieina athum saikorana ali horhailaga yāmhaowa. ⁵¹Kala yaronnao akhana khamanaka kachon akha mānga ngavaida ali shurvai. Kala athumna yaronnao chili tukkhuida, ⁵²kha ana khamanaka kazaira̱ kachon chi hortāhailaga mahonghat eina yonga thuihaowa.

Jishu Hanga̱shimwui Mangāli

⁵³Athumna Jishuli pāngmon khareili shimenvai, kala pāngmon akhokabing eina ararbing kala ain kathembing saikora rākazipngaruma. ⁵⁴Peterna khalāchāham eina pāngmon khareiwui kārotli tangda shurvai, kala khamayonbingli ngasopamda meili tikpama. ⁵⁵Pāngmon akhokabing eina hangva̱naobing saikorana Jishuli shaothat khavai awuitungli shākhi phai, kha khikha masamphangmana. ⁵⁶Kaja mi kachungkhana awuitungli makhamashunga shākhi sai, kha athumwui shākhi mangaraichāmana. ⁵⁷Chieina kaikhana thuinganingda awuitungli makhamashunga shākhi sāda hānga, ⁵⁸"Ithumna ali, 'Ina miwui pāng eina kasā khorumshim hili sāshimānhaora, kala kathumthang miwui pāng eina masā khangatei akha sākāra' da hāngkahai shāhaira." ⁵⁹Chithālala hiwui pongli tangda athumwui shākhi mangaraichāmana.

⁶⁰Kala pāngmon kharei china alungli ngakarthuida Jishuli ngahāna, "Nali ngahānkā khavai maleimalā? Mibing hina nawuitungli shākhi khami hi khida?" ⁶¹Kha ana kasaikha pamda khikha mangahānkāmana. Latluida pāngmon kharei china ali hāngluishita, "Na Khrista, Kasoramiwui Naomayara chinala?" ^c c v61 "Kasorami" da kahāng hi Jihudibingna Varewui ming chi matuila khayāshingaida "Vare" da hāngkakā apong akhana.

⁶²Jishuna hānga, "Ina china, kala miwui Naomayarana Sāshapawui yashongli pamda kala kazingramwui muiyāli tongda kharā nathumna theira." ^d d v62 Jishuna ithumwui Avāna kachuia thingphungli Mosesli mi ming kathara — 'Ina china' (Exodus 3:14) chi eina pāngmon khareili ngahānkā. Hanga̱shimbingna chi kahāng chi ngalāngda bhap tārhaida Vareli kachipat tuina ali yonngasakhaowa (v.64).

⁶³Kala pāngmon kharei china awui kachon serkhākta hānga, "Ithumna khisāda lāngda shākhi khangatei darkar sāra? ⁶⁴Awui kachipat tui khamatui nathumna shāhaira. Nathumwui khamayā khida?" Chieina athum saikorana ali thikapai kasā da yonngasaka. ⁶⁵Kaikhana awuitungli machora̱ mashoror pokta, amai fakhamda, ali shaoda, ali hānga, "Phongmilu!" Chieina khamayonbingna ali kapheya.

Peterna Anaomayarali Khalanhai

⁶⁶Peterna kārotli azingshong leilakha, pāngmon khareiwui rao sha̱nao akha rai, ⁶⁷Peterna meili tikpama kathei eina, ana ali khayangrāda hānga, "Nala Nazarethwui Jishuli ngasosai."

⁶⁸Kha ana mamayāmada hānga, "I matheimana, lah nana khi kahāngkhala kaji bhap matāmana." Chieina ana kayāngwui khāmongli shokta, kala harvāna khonghaowa. ^e e v68 Haokaphokwui lairik kaikhali "kala harvāna khonghaowa" da tui maleimana. Markna māng harvā khonghai kani (14:30) kapihaina, chiwui vang eina tui hi pao chi kathada kashurhai chili darkarna.

⁶⁹Rao sha̱nao china ali theida, nganingkasābing chili hāngluishita, "Mipā hi athumwui ngachaili akhana." ⁷⁰Kha ana latluida mamayāmada ngahānkai. Khaleilaga nganingkasābing china Peterli hāngluishita, "Kachangkhat eina nala athumli ngasokasā akhana, kaja na Galileenaona." ⁷¹Chieina ana a khalatta khonshāt pokhuida shākhi sāda hānga, "Nathumna kahāng mipā chili I matheimana." ⁷²Heng sāda harvāna kakhane khonguwa. Jishuna hāngkahai tui chi Peterna phaningunga: "Harvāna khani shida makhongranglakha nana ili kathum shida hatra." Chieina ana malung ngawokta chapa.