Mark 15

15 ¹Ngathorthakva pāngmon akhokabing, ararbing, ain kathembing kala hangva̱nao katongana ngasoda kaziplaga, Jishuli khalaplaga shimenthuihailaga Pilateli khuivāmihaowa.

²Pilatena ali ngahāna, "Na Jihudiwui Awunga chila?" Jishuna ngahānkāda hānga, "Chi nana hānghaira."

³Pāngmon akhokabingna ali apong kachungkhali phennganaowa. ⁴Chieina Pilatena ali hāngluishita, "Na mangahānkāla khikha maleimala? Yanglu, athumna nawuitungli kayākha phenda leikhala."

⁵Kha Jishuna khikha mangahānkāthuwa, chieina Pilate matakhakhaowa.

⁶Chitharan phanit kachida, Pilatena athumna kapo phātopli zangkasā mi akhali athumwui vang chihokhami khangachāna. ⁷Barabbas kaho mi akha tui shokkhangasak tharan mi shaokathata ngakaikashebing ngasoda phātopli zangsai. ⁸Mi kachungkha china rālaga, Pilatena atam kachida sākhangatha̱ chi athumwui vang sāmi khavai poi ngaroka. ⁹"Jihudiwui Awunga hili nathumwui vang chihomilu jikhala?" da Pilatena ngahānkai, ¹⁰kaja pāngmon akhokabingna Jishuli yuikashiwui vang horsangmi kaji ana thei. ¹¹Kha pāngmon akhokabingna Barabbasli athumwui vang chihomi khavai yaruili suiya. ¹²"Chithākha nathumna Jihudiwui Awunga kaho a chili ina khi sarakhala?" da Pilatena athumli hāngluishita.

¹³"Ali krushli shaoshānhaolu!" da athumna vaoluishita.

¹⁴"Khiwui vang? Ana khi makaphā sāhaokhala?" da Pilatena hānga. Kha athumna vaoda pangmeikhar eina hānga, "Ali krushtungli shaoshānhaolu!"

¹⁵Yaruiwui kapo athishurda Pilatena Barabbasli athumwui vang chihomihaowa. Kala Jishuli shaongasaklaga krushli shaoshān khavai horsangmihaowa.

Shipaibingna Awungali Mana̱shi

¹⁶Shipaibingna Jishuli konung (governorwui kārot) li khuizanglaga, shipai ashang katonga chi kuinamda rākazipa. ¹⁷Athumna ali mengchin kachon ngavaimi, kala ka̱shātwui kuihon akha sākhuilaga akuili ngahonmi. ¹⁸Chieina athumna ali salui khaninghaowa: "Jihudiwui awungali okpeimeiranu!" ¹⁹Athumna khāmshui eina awui akuili shaopama, ali machora̱ mashorda, kala khuktizangda mana̱shi eina ali khoruma. ²⁰Ali mana̱shi kahaiwui thili athumna hungrisi phahon chi raishokmihailaga, awui khangachā phahon chi sangmihaowa. Chieina krushtungli shaothat khavai ali khuithuihaowa.

Anaomayarali Krushli Shaoshāna

²¹Athumna Kha̱ramwui eina kharā rākakān Alexander kala Rufuswui avā Cyrenewui Simonli Jishuwui krush phung khavai tandi sāmi. ²²Athumna Jishuli Golgotha (chiwui kakhalata Mikuira̱pam) kaho apam chili khuirai. ²³Athumna ali myrrh manāt kahai zam khami, kha ana chi makhuimana.

²⁴Athumna ali krushli shaoshāna. Kala khipāna khi khuira da ka̱lā yanglaga awui kashankachon chi ngayara. ²⁵Ngathor pung kachiko atamli athumna ali krushli shaoshāna. ²⁶Awui khanguiwui kapihai chithi china JIHUDIWUI AWUNGA da hānga. ²⁷Athumna Jishuli ngasoda ngakaikashe khani, akhana yāshong kala akhana uishong da krushtungli shaoshāna. ^a a v27 Khare kasā chithibingna hili verse 28 maleimana; thili kapi chithibingna hi tama: "Kala hithada kapihai kathara tui ungshunghaowa, 'Ana morei kaphungbing eina ngasoda shānhaira.'"

²⁹Chiwui ngalemli kānkhavābing china kuikhayitta ali zeida hānga, "Ha! Na khorumshim shimān ngasakhailaga kathumthangwui alungli sakāluishit kahāngapā, ³⁰nakhalatta huikhuilu, kala krushwui eina tunglu!"

³¹Chithada sāda pāngmon akhokabing eina ain kathembingna athum khalattawui ngachaili ali mana̱shida hānga, "Ana mi khangateili huimilaga akhalatta mahuikhuirarmana. ³²Khrista, Israelwui Awunga chi ara krushtungwui eina tungranu, chithākha ithumna theida shitsangra." Ali ngasoda krushli shaoshān kahaibingnala ali zeida hānga.

Avāwui Naomayarana Amanglā Chihohaowa

³³Pung katharuka atamli, pung kachiko eina tangda ngalei katonga tangmangtinghaowa.

³⁴Pung kachiko atamli Jishuna panglāk eina vaoda hānga, "Eloi, Eloi, lema sabachthani?" kaja, "Iwui Vare, iwui Vare, nana ili khisāda horhaokhala?"

³⁵Ngalemli khanganing mibing kaikhana hi shālaga hānga, "Nganālu, ana Elijahli ngakaowa."

³⁶Akhana ngasamvālaga wothop chi drakhāra̱ kathurli rurkhuilaga thing akhali khalapshānlaga ali mangkhavai mida hānga, "Ngarailu, Elijahna ali khuithuikhavai marānikhala, ithum yangsa."

³⁷Jishuna panglāk eina vaoda thihaowa. ³⁸Kala khorumshimwui kachon rānkahai china ato eina aze tāshungda khani akai sāhaowa. ³⁹Jishuwui yangkhangasungchangli nganinga raimi shākhawui akhavā china, ana kathada thikhala chi theilaga hānga, "Kachangkhat eina mipā hi Varewui Naomayarana."

⁴⁰Sha̱naobingla tālak eina yangpama; athumwui ngachaili Magdalawui Mary, James nganuida kala Joseswui ava̱ Mary, kala Solome zanga. ⁴¹Hi sha̱naobingna Galileeli ali shurvāda ngachonmi kahaina; kala ali ngasoda Jerusalemli unga mi kachungkha khangateila apam chili leisai.

Chikhurli Chizanhaowa

⁴²Kazing khaying eina rai, kala chithang chi Khangarān kasā zimiksho sāhaogada, chiya Sabbath marāranglakhawui zimikshona. ⁴³Keinungwui hanga̱shimli kāshunglak kahai mayarnao akha, khalattala ithumwui Avā wungram kharā ngaraikapama mi Arimatheawui Josephna kaping eina Pilatewuili vāda Jishuwui angun apoi. ⁴⁴Jishu ara thihaira da Pilate matakhak kahaowa; kala raimi shākhawui akhavā chi hozangkhuilaga, Jishu thipai longa jila da ngahāna. ⁴⁵Raimi shākhawui akhavā eina chithada jika theilaga, Jishuwui angun chi Josephli mihaowa. ⁴⁶Josephna khamanaka kachon lokhuilaga, angun chi khuitālaga, kachon chi eina khalaphailaga, lunghārli kashophut kahai chikhur chili chizanhaowa. Chiwui thili ana lung akha khalangda chikhurwui khāmongli shingkhamhaowa. ⁴⁷Magdalawui Mary kala Joseswui ava̱ Mary china, ali kali chizanhaokhala chi thei.