Yo Lage Jezi nan Men Pilat

Pilat konnen se jalouzi, men li lage kò l lè foul la chwazi Barabas. Sòlda yo pase l nan rizib tankou wa. Yo kloure l sou kwa a nevè, li rele fò paske Bondye lage l, epi li mouri nan fènwa. Yon santenye ak fanm k ap gade yo se sa ki rete.

Chapit 15.

Nan granmaten, chèf prèt yo, chèf fanmi yo, dirèktè lalwa yo, ak tout konsèy la reyini ansanm pou pran desizyon. Yo mare Jezi, yo mennen l ale, epi yo lage l nan men Pilat.

Pilat mande l: “Èske ou se wa jwif yo?” Jezi reponn li: “Se ou menm ki di l.”

Chèf prèt yo t'ap akize l pou anpil bagay. Se konsa Pilat mande l ankò: “Ou pa gen anyen pou reponn? Gade konbe bagay yo akize ou.”

Men Jezi pa di anyen ankò, kifè Pilat te sezi anpil.

Chak fèt, Pilat te konn lage yon prizonye pou yo, nenpòt moun yo te mande. Te gen yon nonm yo te rele Barabas ki te nan prizon ansanm ak moun ki te fè soulèvman yo, moun ki te touye moun pandan revòlt la. Foul moun yo moute vin jwenn Pilat, yo kòmanse mande l pou l fè pou yo sa li te toujou konn fè a. Pilat reponn yo: “Èske nou vle m lage wa jwif yo pou nou?” paske li te konnen se jalouzi ki te fè chèf prèt yo te lage Jezi nan men l. Men chèf prèt yo chofe foul la pou l te lage Barabas pou yo pito. Pilat mande yo ankò: “Kisa nou vle m fè ak moun nou rele wa jwif yo a?”

Yo reponn byen fò: “Kloure l sou kwa a!”

Pilat mande yo: “Poukisa? Ki mal li fè?” Men yo rele pi fò toujou: “Kloure l sou kwa a!”

Pou l te fè foul la plezi, Pilat lage Barabas ba yo. Li fè yo bat Jezi ak fwèt, epi li lage l pou yo kloure l sou kwa a.

Sòlda yo Pase Wa a nan Betiz

Sòlda yo mennen l anndan palè a (kay gouvènè a), epi yo rele tout rejiman sòlda yo vin ansanm. Yo mete yon rad koulè violèt sou li, yo trese yon kouwòn pikan, epi yo mete l sou tèt li. Epi yo kòmanse salwe l: “Bonjou, wa jwif yo!” Yo t'ap frape tèt li ak yon baton, yo krache sou li, epi yo mete ajenou devan l pou pase l nan betiz. Apre yo fin pase l nan betiz, yo wete rad violèt la, yo remete rad pa l sou li, epi yo mennen l deyò pou yo kloure l sou kwa a.

Yo Kloure Pitit la sou Kwa a

Yo fòse yon nonm ki t'ap pase, ki t'ap soti nan jaden, pote kwa Jezi a. Nonm sa a se te Simon, moun peyi Sirèn, papa Aleksann ak Rifis. Yo mennen Jezi yon kote yo rele Gòlgota (sa vle di: Plas Zo Bwa Tèt la). Yo ba l diven melanje ak lami, men li pa pran l.

Yo kloure l sou kwa a. Yo separe rad li yo pami yo, yo tire osò pou konnen kisa chak moun t'ap genyen. Li te nèvè nan maten lè yo kloure l sou kwa a. Yo te ekri kòz yo t'ap akize l la: WA JWIF YO. Yo kloure de bandi sou kwa ansanm avè l, yonn sou bò dwat li, yonn sou bò gòch li. ^a

Moun ki t'ap pase yo t'ap joure l, yo t'ap souke tèt yo, yo t'ap di: “Ha! Ou menm ki t'ap kraze tanp lan pou ou rebati l nan twa jou, sove tèt ou, desann sou kwa a non!”

Menm jan an tou, chèf prèt yo ak dirèktè lalwa yo t'ap pase l nan betiz yonn ak lòt: “Li sove lòt moun, men li pa ka sove tèt li. Se pou Kris la, wa pèp Izrayèl la, desann sou kwa a koulye a, pou nou ka wè epi pou nou ka kwè.” Moun yo te kloure sou kwa ansanm avè l yo t'ap joure l tou.

Pitit Papa a Rann Dènye Souf li

Vè midi, fènwa kouvri tout peyi a jiska twazè nan apremidi.

A twazè nan apremidi, Jezi rele byen fò: “Eloyi, Eloyi, lema sabaktani?” sa vle di: “Bondye m, Bondye m, poukisa ou lage m?”

Lè kèk nan moun ki te kanpe tou pre yo tande sa, yo di: “Koute non, l'ap rele Eli.”

Yon moun kouri, li tranpe yon eponj nan diven si, li mete l nan pwent yon wozo, epi li ba l bwè. Li di: “Kite l konsa, ann wè si Eli ap vin desann li.”

Jezi bay yon gwo rèl, epi li rann dènye souf li. Epi rido ki te nan tanp lan chire an de moso, depi anwo jouk anba. Kòmandan sòlda ki te kanpe anfas Jezi a wè ki jan li rann dènye souf li, epi li di: “Vreman vre, nonm sa a te Pitit Bondye.”

Te gen kèk fanm tou ki t'ap gade byen lwen. Pami yo te gen Mari, moun lavil Magdala, Mari manman Jak ti a ak Jozas, ansanm ak Salome. Fanm sa yo te konn swiv Jezi lè li te nan peyi Galile, yo te konn okipe l. Te gen anpil lòt fanm tou ki te moute lavil Jerizalèm ansanm avè l.

Yo Mete l nan Kavo a

Lè sa a, aswè te rive, epi se te jou Preparasyon an, ki vle di jou ki vin anvan jou repo a. Jozèf, moun lavil Arimate, yon manm konsèy la ki te gen anpil konsiderasyon, ki li menm t'ap tann wayòm Papa nou an, gen kouraj pou l al jwenn Pilat mande kò Jezi. Pilat te sezi tande Jezi te gen tan mouri. Li rele kòmandan sòlda a, li mande l èske gen lontan depi Jezi mouri. Lè kòmandan an fè l konnen se konsa sa te ye, Pilat bay Jozèf kò a. Jozèf achte yon dra fen, li desann kò a, li vlope l nan dra a, epi li mete l nan yon kavo yo te fouye nan wòch la. Apre sa, li woule yon gwo wòch devan bouch kavo a. Mari, moun lavil Magdala, ak Mari manman Jozas, te wè kote yo te mete Jezi a.