Mark 15 FHB Father's Heart Bible™

15 ¹Phojur te, mukhyo purohit khan, bura manuh khan, niyom likha khan aru pura sabha mili kene paramorsho kori kene, Jisu ke bandhi kene loi jaise, aru Pilate ke di dise.

²Pilate pora Tar ke hudise, “Tumi Yehudi khan laga Raja ase naki?” Jisu pora jawab dise, “Tumi nijor koi ase.”

³Mukhyo purohit khan pora Tar ke bisi kotha te golti lagai thakise. ⁴Titia Pilate pora Tar ke aru hudise, “Tumi eku jawab nai naki? Sabi, tarkhan pora kiman kotha Tumi laga bhirodh te anise.”

⁵Kintu Jisu aru eku kowa nai, aru Pilate asurit hoise.

⁶Etiya purbb te, Pilate pora tarkhan nimite ekjon bondhi ke chari dithake—kun ke tarkhan mangise, tai ke. ⁷Barabbas koi kene ekjon manuh, hungama te manuh morai diya bidrohi khan logote, bondhi ghor te thakise. ⁸Manuh bhir ahhi kene, Pilate pora hodai kora nisina tarkhan nimite koribole mangi thakise. ⁹Pilate pora jawab dise, “Moi tumikhan nimite Yehudi khan laga Raja ke chari dibo, tumikhan itcha ase naki?” ¹⁰Kilemane, mukhyo purohit khan pora suya kori kene Tar ke di diya tu, tai jani thakise. ¹¹Kintu mukhyo purohit khan pora, Tar bodli te Barabbas ke tarkhan nimite chari dibole, manuh bhir ke uksai dise. ¹²Pilate pora tarkhan ke aru hudise, “Titia, kun ke tumikhan Yehudi khan laga Raja koi, Tar logote Moi ki koribo tumikhan itcha ase?”

¹³Tarkhan aru hala kori kene koise, “Tar ke krus te morai dibi!”

¹⁴Pilate pora hudise, “Kile? Tai ki biya kaam korise?” Kintu tarkhan aru bisi jor pora hala kori kene koise, “Tar ke krus te morai dibi!”

¹⁵Manuh bhir ke khushi koribole, Pilate pora tarkhan ke Barabbas ke chari dise. Aru tai Jisu ke chabuk marise, aru krus te morai dibole di dise.

Sipahi Khan pora Raja ke Thatta Korise

¹⁶Sipahi khan pora Tar ke mohol bhitor te (rajyopal laga ghor) loi jaise, aru pura sipahi dol ke matise. ¹⁷Tarkhan pora Tar ke beguni kapor pindhai dise, aru kata laga mukut ekta buni kene, Tar matha te rakhise. ¹⁸Aru tarkhan Tar ke salam kori kene koise, “Jai ho, Yehudi khan laga Raja!” ¹⁹Tarkhan pora lathi ekta pora Tar matha te mari thakise, Tar uporte thuk phelai dise, aru thatta pora athu teki kene Tar ke salam korise. ²⁰Tar ke thatta kora pichete, tarkhan beguni kapor tu khuli dise aru Tar nijor kapor Tar ke pindhai dise, titia Tar ke krus te morai dibole bahar te loi jaise.

Putro ke Krus te Morai Dise

²¹Gaon pora ahhi thaka ekjon manuh ke—Alexander aru Rufus laga pitri, Cyrene laga Simon ke—tarkhan pora joborjosti kori kene Tar krus bukhibole lagai dise. ²²Tarkhan Jisu ke Golgotha koi kene ekta jagate loi anise (juntu laga ortho hoise Matha-hadi laga Jaga). ²³Tarkhan Tar ke myrrh milai diya angur-ros dise, kintu Tai etu lua nai.

²⁴Tarkhan Tar ke krus te morai dise. Aru kun ki pabo etu nimite chithi phelai kene, Tar kapor khan tarkhan majot te bhag kori loise. ²⁵Tarkhan Tar ke krus te morai diya homoi tu phojur nou baji thakise. ²⁶Tar bhirodh te likha doshdiya kotha tu eneka likhi thakise: YEHUDI KHAN LAGA RAJA. ²⁷Tarkhan Tar logote duijon bidrohi ke krus te morai dise, ekjon ke Tar dyna phale aru ekjon ke Tar baya phale. ^a a v27 Sob pora purana likha khan te yate 28 nombor ayat nai; pichete likha khan te eneka juri dise: “Aru Dhormoshastro laga kotha purah hoise, juntu koi, ‘Tai ke golti kora manuh khan logote ginti korise.’”

²⁹Rasta pora jai thaka manuh khan pora Tar matha hilai kene Tar ke sorom dise, aru koise, “Ha! Tumi kun mondir ke bhangai kene tin din te aru bonai diya, ³⁰nijor ke bacha, aru krus pora nami ahhibi!”

³¹Tike, mukhyo purohit khan aru niyom likha khan pora bhi nijor majot te Tar ke thatta kori kene koise, “Tai dusra khan ke bachaise; kintu nijor ke bachabo napare. ³²Khrista, Israel laga Raja, etiya krus pora nami ahhibi, titia ami dekhi kene biswas koribo.” Tar logote krus te morai diya manuh khan pora bhi Tar ke sorom dise.

Pitri laga Putro laga Saas Tuti Jaise

³³Duporiya te, pura desh te andhera ahhise, aru tin baji tak thakise.

³⁴Tin baji te Jisu pora jor pora hala kori kene koise, “Eloi, Eloi, lema sabachthani?” juntu laga ortho hoise, “Moi laga Isor, moi laga Isor, Apuni kile moi ke chari dise?”

³⁵Usorte khara thaka kunba manuh khan etu huni kene koise, “Huni bi, Tai Elijah ke mati ase.”

³⁶Ekjon polai kene, ekta sponge te tita angur-ros bhorai kene, bah laga daal te lagai dise, aru Tar ke khabole dise. Aru tai koise, “Rakhi dibi, ami sabo Elijah Tar ke namabole ahhe naki.”

³⁷Jor pora hala kori kene, Jisu laga saas tuti jaise. ³⁸Aru mondir laga porda tu upor pora niche tak, duita bhag te phati jaise. ³⁹Jisu laga age te khara thaka subedar pora Tai kineka saas tuti jaise etu dekhi kene koise, “Hosa bhi, etu manuh Isor laga Putro thakise.”

⁴⁰Kunba maiki khan bhi dur pora sai thakise, taikhan majot te Mary Magdalene, chutu James aru Joses laga ama Mary, aru Salome bhi thakise. ⁴¹Etu maiki khan pora Galilee te Tar piche kori kene Tar sewa korise; aru Tar logote Jerusalem te aha dusra bisi manuh bhi ta te thakise.

Kobor te Rakhise

⁴²Saam hoi jaise, aru etu Taiyari Din thakise—mani Bisram Din laga age din thakise. ⁴³Arimathea laga Joseph, kun ekjon maan thaka sabha laga manuh thakise, aru kun nijor amar Pitri laga rajyo nimite rukhi thakise, tai mon dangor kori kene Pilate logote jaise aru Jisu laga gaw-mori mangise. ⁴⁴Jisu agete he mori jaise koi kene Pilate asurit hoise; aru subedar ke mati kene, Jisu bisi homoi mori jaise naki koi kene hudise. ⁴⁵Subedar pora etu hosa ase koi kene jani loi, tai gaw-mori tu Joseph ke di dise. ⁴⁶Joseph pora mihin kapor kinise, aru gaw-mori ke namai kene, kapor pora bandhi dise, aru pathor te kata ekta kobor te rakhise. Titia tai kobor laga mukh te ekta pathor polot kene lagai dise. ⁴⁷Mary Magdalene aru Joses laga ama Mary pora Tar ke kun jagate rakhise etu dekhise.