NgokukaMakhu 15

15 ¹Ekuseni ngovivi, abapristi abakhulu, abadala, ababhali, nawo wonke umkhandlu bacebisana ndawonye, bambopha uJesu, bamqhuba bamnikela kuPilatu.

²UPilatu wambuza wathi: “Wena uyiNkosi yamaJuda na?” UJesu waphendula wathi: “Usho wena.”

³Abapristi abakhulu baqhubeka bemmangalela ngezinto eziningi. ⁴Ngakho uPilatu waphinda wambuza wathi: “Awunampendulo na? Bheka ukuthi bakubeka amacala amangaki.”

⁵Kodwa uJesu akabange esaphendula lutho, uPilatu wamangala.

⁶Njalo ngomkhosi, uPilatu wayejwayele ukubakhululela isiboshwa esisodwa—noma ngubani ababemcela. ⁷Indoda egama layo linguBaraba yayiboshiwe kanye nabahlubuki ababebulele abantu ngesikhathi sokuvukela umbuso. ⁸Isixuku safika saqala ukucela uPilatu ukuba abenzele njengoba ayevame ukwenza. ⁹UPilatu waphendula wathi: “Nifuna ukuba nginikhululele iNkosi yamaJuda na?” ¹⁰ngokuba wayazi ukuthi abapristi abakhulu babemnikele ngomona. ¹¹Kodwa abapristi abakhulu bashukumisa isixuku ukuba kunalokho abakhululele uBaraba. ¹²UPilatu waphinda wababuza wathi: “Pho, nifuna ukuba ngenzeni ngalowo enimbiza ngokuthi iNkosi yamaJuda?”

¹³“Mbethele esiphambanweni!” bamemeza bephendula.

¹⁴UPilatu wabuza wathi: “Kungani? Wenze bubi buni?” Kodwa bona bamemeza nakakhulu bathi: “Mbethele esiphambanweni!”

¹⁵Efuna ukwanelisa isixuku, uPilatu wabakhululela uBaraba. Wayesemenza ukuba uJesu ashaywe ngesiswebhu, wamnikela ukuba abethelwe esiphambanweni.

Amabutho Aklolodela INkosi

¹⁶Amabutho amqhuba amyisa esigodlweni (okuyikomkhulu lombusi), abiza lonke iviyo lamabutho ndawonye. ¹⁷Amgqokisa ingubo ebubende, aphotha umqhele wameva, awubeka kuye. ¹⁸Aqala ukumbingelela athi: “Bayede, Nkosi yamaJuda!” ¹⁹Ambetha ikhanda ngomhlanga, amkhafulela ngamathe, aguqa ngamadolo enza sengathi ayamkhonza. ²⁰Esemklolodele, amhlubula ingubo ebubende, amgqokisa izingubo zakhe, ase emqhuba emkhiphela ngaphandle ukuba amubethele esiphambanweni.

INdodana Ibethelwa Esiphambanweni

²¹Acindezela umuntu owayedlula evela emaphandleni—uSimoni waseKhurene, uyise ka-Alekzanda noRufu—ukuba athwale isiphambano sakhe. ²²Amletha uJesu endaweni ebizwa ngokuthi iGolgotha (okuchaza ukuthi iNdawo Yokhakhayi). ²³Amnika iwayini elixutshwe nemuri, kodwa akalithathanga.

²⁴Ambethela esiphambanweni. Ahlukaniselana izingubo zakhe, enza inkatho ngalokho ngamunye ayezokuthola. ²⁵Kwakuyihora lesishiyagalolunye ekuseni lapho ambethela esiphambanweni. ²⁶Isaziso esalotshwa secala elalibekwe kuye sasithi: INKOSI YAMAJUDA. ²⁷Abethela abahlubuki ababili kanye naye, omunye ngakwesokunene sakhe, omunye ngakwesokhohlo. ^a a v27 Imibhalo yakudala kunazo zonke ayinalo ivesi lama-28 lapha; amakhophi akamuva anezelela: “Wagcwaliseka umBhalo othi, ‘Wabalwa kanye neziphulamthetho.’”

²⁹Ababedlula bamthuka, benikina amakhanda abo, bethi: “Ha! Wena odiliza ithempeli ulakhe ngezinsuku ezintathu, ³⁰zisindise wehle esiphambanweni!”

³¹Kanjalo nabapristi abakhulu nababhali bamklolodela bodwa bathi: “Wasindisa abanye; yena angeke azisindise. ³²UKhristu, iNkosi yakwa-Israyeli, akehle manje esiphambanweni, ukuze sibone sikholwe.” Nalabo ababebethelwe kanye naye bamthuka.

INdodana KaBaba Iphefumula Okokugcina

³³Emini enkulu, ubumnyama bembesa lonke izwe kwaze kwaba yihora lesithathu ntambama.

³⁴Ngehora lesithathu ntambama uJesu wamemeza ngezwi elikhulu wathi: “Eloyi, Eloyi, lema sabaktani?” okuchaza ukuthi: “Nkulunkulu wami, Nkulunkulu wami, ungishiyeleni na?”

³⁵Lapho abanye ababemi eduze bekuzwa lokhu, bathi: “Lalelani, ubiza u-Eliya.”

³⁶Omunye wagijima, wagcwalisa isiponji ngewayini elimuncu, walihloma eluthini, wamnika ukuba aphuze. Wathi: “Myekeni, asibone ukuthi u-Eliya uyeza yini ukuzomethula.”

³⁷Ngokumemeza ngezwi elikhulu, uJesu waphefumula okokugcina. ³⁸Ikhethini lethempeli ladabuka kabili, kusukela phezulu kuya phansi. ³⁹Induna yekhulu eyayibhekene noJesu yabona indlela aphefumula ngayo okokugcina, yathi: “Ngempela lo muntu ubeyiNdodana kaNkulunkulu.”

⁴⁰Kwakukhona nabesifazane ababebukele bekude, phakathi kwabo kukhona uMariya waseMagadala, uMariya unina kaJakobe omncane noJose, noSalome. ⁴¹Laba besifazane babemlandele eGalile bemkhonza; babekhona nabanye abaningi ababenyukele naye eJerusalema.

Ubekwa Ethuneni

⁴²Kwase kuhlwile, njengoba kwakuwuSuku Lokulungiselela—usuku olwandulela iSabatha. ⁴³UJosefa wase-Arimatheya, ilunga lomkhandlu elihloniphekileyo elalilindele umbuso kaBaba wethu, walokotha waya kuPilatu, wacela isidumbu sikaJesu. ⁴⁴UPilatu wamangala ukuthi wayesefile kakade; wabiza induna yekhulu, wayibuza ukuthi uJesu wayesefe isikhathi eside yini. ⁴⁵Lapho ezwa endunenni yekhulu ukuthi kwakunjalo, wanika uJosefa isidumbu. ⁴⁶UJosefa wathenga indwangu yelineni, wasethula isidumbu, wasisonga ngendwangu, wasibeka ethuneni elaligujwe edwaleni. Wabe esegingqa itshe emnyango wethuna. ⁴⁷UMariya waseMagadala noMariya unina kaJose babona lapho abekwa khona.