ማርቆስ 15

15 ¹በማለዳ የካህናት አለቆች፣ ሽማግሌዎች፣ ጸሐፍትና ሸንጎው ሁሉ ተመካከሩ፤ ኢየሱስንም አስረው ወስደው ለጲላጦስ አሳልፈው ሰጡት።

²ጲላጦስም፣ “አንተ የአይሁድ ንጉሥ ነህን?” ብሎ ጠየቀው። ኢየሱስም፣ “አንተ አልኸው” ብሎ መለሰ።

³የካህናት አለቆችም በብዙ ነገር ይከሱት ነበር። ⁴ጲላጦስም እንደ ገና፣ “ምንም መልስ የለህምን? በአንተ ላይ የሚያቀርቡብህ ክስ ስንት እንደ ሆነ ተመልከት” ብሎ ጠየቀው።

⁵ኢየሱስ ግን ከዚያ በኋላ ምንም አልተናገረም፤ ጲላጦስም ተደነቀ።

⁶በበዓሉ ጊዜ ጲላጦስ የሚጠይቁትን አንድ እስረኛ ይፈታላቸው ነበር። ⁷በዓመፁ ጊዜ ነፍስ ከገደሉ ዓመፀኞች ጋራ በርባን የተባለ ሰው ታስሮ ነበር። ⁸ሕዝቡም መጥቶ ጲላጦስ የለመደውን እንዲያደርግላቸው ይለምኑት ጀመሩ። ⁹ጲላጦስም፣ “የአይሁድን ንጉሥ እንድፈታላችሁ ትፈልጋላችሁን?” ብሎ መለሰ፤ ¹⁰የካህናት አለቆች በቅንዓት ተነሣሥተው አሳልፈው እንደ ሰጡት ያውቅ ነበርና። ¹¹የካህናት አለቆች ግን በርባንን እንዲፈታላቸው ሕዝቡን አነሣሡ። ¹²ጲላጦስም እንደ ገና፣ “እንግዲህ የአይሁድ ንጉሥ የምትሉትን ምን ላድርገው ትፈልጋላችሁ?” ብሎ ጠየቃቸው።

¹³እነርሱም፣ “ስቀለው!” ብለው መልሰው ጮኹ።

¹⁴ጲላጦስም፣ “ለምን? ምን ክፉ ነገር አድርጎአል?” ብሎ ጠየቀ። እነርሱ ግን አብልጠው፣ “ስቀለው!” እያሉ ጮኹ።

¹⁵ጲላጦስም ሕዝቡን ለማስደሰት ብሎ በርባንን ፈታላቸው፤ ኢየሱስንም አስገርፎ እንዲሰቀል አሳልፎ ሰጠው።

ወታደሮቹ ንጉሡን ተሳለቁበት

¹⁶ወታደሮቹም ወደ ግቢው (የገዥው መኖሪያ) ወስደው ጭፍራውን ሁሉ በአንድነት ጠሩ። ¹⁷ሐምራዊ ልብስም አለበሱት፤ የእሾህ አክሊልም ጐንጕነው አቀዳጁት። ¹⁸ሰላምታም ሊሰጡት ጀመሩ፤ “የአይሁድ ንጉሥ ሆይ፣ ሰላም ላንተ ይሁን!” ¹⁹በበትርም ራሱን ይደበድቡት፣ ይተፉበትም ነበር፤ ተንበርክከውም ለማስመሰል ይሰግዱለት ነበር። ²⁰ከተሳለቁበትም በኋላ ሐምራዊውን ልብስ ገፈፉት፤ የራሱንም ልብስ አለበሱት፤ ከዚያም ሊሰቅሉት ወደ ውጭ ወሰዱት።

ወልድ ተሰቀለ

²¹ከገጠር ይመጣ የነበረውን አንድ መንገደኛ፣ የእስክንድሮስና የሩፎስ አባት የቀሬናውን ስምዖንን፣ መስቀሉን እንዲሸከም አስገደዱት። ²²ኢየሱስንም ጎልጎታ ወደ ተባለው ስፍራ አመጡት፤ ትርጓሜውም የራስ ቅል ስፍራ ማለት ነው። ²³ከከርቤ ጋራ የተቀላቀለ የወይን ጠጅ ሊሰጡት ፈለጉ፤ እርሱ ግን አልተቀበለም።

²⁴ሰቀሉት። እያንዳንዳቸውም የሚወስዱትን ዕጣ እየተጣጣሉ ልብሱን ተከፋፈሉ። ²⁵በሰቀሉት ጊዜ ጧት ሦስት ሰዓት ነበር። ²⁶የክሱም ጽሑፍ፣ “የአይሁድ ንጉሥ” የሚል ነበር። ²⁷ከእርሱም ጋራ ሁለት ዓመፀኞችን አንዱን በቀኙ አንዱንም በግራው ሰቀሉ። ^a a v27 የቀደሙት ቅጂዎች እዚህ ላይ ቍጥር ፳፰ን የላቸውም፤ የኋለኞቹ ቅጂዎች ግን፣ “‘እርሱም ከዐመፀኞች ጋራ ተቈጠረ’ የሚለው የመጽሐፍ ቃል ተፈጸመ” የሚለውን ይጨምራሉ።

²⁹በዚያ የሚያልፉትም ራሳቸውን እየነቀነቁ ይሰድቡት ነበር፤ “ዋ! ቤተ መቅደሱን አፍርሰህ በሦስት ቀን የምትሠራው፣ ³⁰ራስህን አድን፤ ከመስቀሉም ውረድ!”

³¹እንዲሁም የካህናት አለቆችና ጸሐፍት እርስ በርሳቸው ተሳለቁበት፤ “ሌሎችን አዳነ፤ ራሱን ግን ማዳን አይችልም። ³²የእስራኤል ንጉሥ ክርስቶስ አይተን እንድናምን አሁን ከመስቀሉ ይውረድ።” ከእርሱም ጋራ የተሰቀሉት ይሰድቡት ነበር።

የአብ ልጅ ነፍሱን ሰጠ

³³ቀኑ ስድስት ሰዓት ሲሆን እስከ ዘጠኝ ሰዓት ድረስ በምድር ሁሉ ላይ ጨለማ ሆነ።

³⁴በዘጠኝ ሰዓትም ኢየሱስ በታላቅ ድምፅ፣ “ኤሎሄ፣ ኤሎሄ፣ ላማ ሰበቅታኒ?” ብሎ ጮኸ፤ ትርጓሜውም፣ “አምላኬ፣ አምላኬ፣ ለምን ተውኸኝ?” ማለት ነው።

³⁵በአጠገብ ቆመው የነበሩ አንዳንዶች ይህን በሰሙ ጊዜ፣ “እነሆ፣ ኤልያስን ይጠራል” አሉ።

³⁶አንዱም ሮጦ ሰፍነግ በሆምጣጤ ሞልቶ በመቃ ላይ አድርጎ ሊያጠጣው ሰጠው፤ “ተዉት፤ ኤልያስ መጥቶ ሊያወርደው እንደ ሆነ እንይ” አለ።

³⁷ኢየሱስም በታላቅ ድምፅ ጮኾ ነፍሱን ሰጠ። ³⁸የቤተ መቅደሱም መጋረጃ ከላይ እስከ ታች ከሁለት ተቀደደ። ³⁹በኢየሱስ ፊት ለፊት ቆሞ የነበረው የመቶ አለቃ እንዴት ነፍሱን እንደ ሰጠ ባየ ጊዜ፣ “ይህ ሰው በእውነት የእግዚአብሔር ልጅ ነበር” አለ።

⁴⁰ከሩቅ ሆነው የሚመለከቱ ሴቶችም ነበሩ፤ ከእነርሱም መካከል መግደላዊት ማርያም፣ የታናሹ ያዕቆብና የዮሳ እናት ማርያም፣ ሰሎሜም ነበሩ። ⁴¹እነዚህ ሴቶች በገሊላ ሳለ ተከትለውት ያገለግሉት ነበር፤ ከእርሱም ጋራ ወደ ኢየሩሳሌም የወጡ ሌሎች ብዙዎች ደግሞ በዚያ ነበሩ።

በመቃብር ተቀመጠ

⁴²መሸም፤ ያም ቀን ከሰንበት በፊት ያለው የዝግጅት ቀን ነበር። ⁴³የተከበረ የሸንጎ አባል የሆነ፣ እርሱ ራሱም የአባታችንን መንግሥት ይጠባበቅ የነበረ የአርማትያሱ ዮሴፍ ደፍሮ ወደ ጲላጦስ ገባ፤ የኢየሱስንም ሥጋ ለመነ። ⁴⁴ጲላጦስም አስቀድሞ መሞቱን ሰምቶ ተደነቀ፤ የመቶ አለቃውንም ጠርቶ ኢየሱስ ከሞተ ቆይቶ እንደ ሆነ ጠየቀው። ⁴⁵ከመቶ አለቃውም እንዲሁ መሆኑን ባወቀ ጊዜ ሥጋውን ለዮሴፍ ሰጠው። ⁴⁶ዮሴፍም በፍታ ገዝቶ ሥጋውን አውርዶ በበፍታው ከፈነው፤ ከዐለትም በተፈለፈለ መቃብር ውስጥ አኖረው፤ ከዚያም በመቃብሩ ደጃፍ ላይ ድንጋይ አንከባለለ። ⁴⁷መግደላዊት ማርያምና የዮሳ እናት ማርያም የተቀመጠበትን ስፍራ ተመለከቱ።