An Mika Yesu ga Bilatus

Bilatus ya san kishi ne, duk da haka ya ba da kai sa'ad da taron suka zaɓi Barabbas. Sojoji suka yi masa ba'a a matsayin sarki. Aka gicciye shi da ƙarfe tara, ya yi kuka cewa Allah ya yashe shi, ya mutu cikin duhu. Wani jarumin soja da matan da suke kallo ne suka rage.

Babi na 15.

Da gari ya waye, sai manyan firistoci, da dattawa, da malaman Attaura, da dukan majalisa suka yi shawara tare, suka daure Yesu, suka tafi da shi, suka kuma mika shi ga Bilatus.

Bilatus ya tambaye shi, “Kai ne Sarkin Yahudawa?” Yesu ya amsa ya ce, “Kai ka faɗa haka.”

Manyan firistoci suka dinga zarginsa da abubuwa masu yawa. Sai Bilatus ya sāke tambayarsa, “Ba ka da wata amsa? Dubi yawan zarge-zargen da suke yi maka.”

Amma Yesu bai ƙara cewa kome ba, Bilatus kuwa ya yi mamaki.

A lokacin Idi, Bilatus yakan sakar musu ɗan kurkuku guda—wanda suka roƙa. Wani mutum mai suna Barabbas yana a kurkuku tare da 'yan tawaye waɗanda suka yi kisankai a lokacin bore. Taron suka matso, suka fara roƙon Bilatus yă yi musu kamar yadda ya saba yi. Bilatus ya amsa musu ya ce, “Kuna so in sakar muku Sarkin Yahudawa?” gama ya san saboda kishi ne manyan firistoci suka mika shi. Amma manyan firistoci suka zuga taron, domin yă sakar musu Barabbas a maimakonsa. Sai Bilatus ya sāke tambayarsu, “To me kuke so in yi da wanda kuke kira Sarkin Yahudawa?”

Suka sāke yin ihu, “A gicciye shi!”

Bilatus ya tambaye su, “Don me? Wane irin mugunta ya yi?” Amma suka ƙara ƙarfin ihu, suna cewa, “A gicciye shi!”

Don yă faranta wa taron rai, sai Bilatus ya sakar musu Barabbas. Ya sa aka yi wa Yesu bulala, ya kuma mika shi a gicciye.

Sojoji Suka Yi wa Sarki Ba'a

Sojoji suka tafi da shi cikin fada (watau hedkwatar gwamna), suka tara dukan ƙungiyar sojoji. Suka sa masa tufa mai shunayya, suka tuƙa rawanin ƙaya, suka kuma sa masa. Suka fara gaisawa da shi, suna cewa, “Ranka yă daɗe, Sarkin Yahudawa!” Suka dinga dūkan kansa da sanda, suka tofa masa yau, suka durƙusa suna yi masa sujada ta ba'a. Bayan sun yi masa ba'a, sai suka tuɓe masa tufar shunayya, suka sa masa tufafinsa, sa'an nan suka fito da shi don su gicciye shi.

An Gicciye Ɗa

Suka tilasta wa wani mai wucewa da yake zuwa daga karkara—Saminu Bakurane, mahaifin Aleksanda da Rufus—yă ɗauki gicciyensa. Suka kawo Yesu wurin da ake kira Golgota (watau ma'anarsa Wurin Ƙoƙon Kai). Suka ba shi ruwan inabi gauraye da mur, amma bai karɓa ba.

Suka gicciye shi. Suka raba tufafinsa a tsakaninsu, suna jefa ƙuri'a a kan abin da kowa zai samu. Ƙarfe tara na safe ne suka gicciye shi. Rubutun zargin da aka yi masa ya ce, SARKIN YAHUDAWA. Suka gicciye 'yan tawaye biyu tare da shi, ɗaya a damansa, ɗaya kuma a hagunsa. ^a

Masu wucewa suka zazzage shi, suna kaɗa kai, suna cewa, “Kai! Kai mai rushe haikali, kana sāke gina shi cikin kwana uku, ka ceci kanka mana, ka sauka daga gicciye!”

Haka ma manyan firistoci da malaman Attaura suka yi masa ba'a a tsakaninsu, suna cewa, “Ya ceci waɗansu; kansa kuwa ba ya iya cetowa. Bari Almasihu, Sarkin Isra'ila, yă sauko daga gicciye yanzu, domin mu gani mu gaskata.” Waɗanda aka gicciye tare da shi ma suka zazzage shi.

Ɗan Uba Ya Ja Numfashinsa na Ƙarshe

Da tsakar rana ta yi, sai duhu ya mamaye dukan ƙasar har ƙarfe uku na yamma.

Da ƙarfe uku na yamma, sai Yesu ya yi kuka da babbar murya, “Eloi, Eloi, lema sabaktani?” watau, “Allahna, Allahna, don me ka yashe ni?”

Da waɗansu daga cikin waɗanda suke tsaye kusa suka ji haka, sai suka ce, “Ku saurara, yana kiran Iliya.”

Sai wani ya ruga, ya jiƙa soso da ruwan inabi mai tsami, ya soka a kan kara, ya ba shi yă sha, yana cewa, “Ku ƙyale shi, bari mu ga ko Iliya zai zo yă saukar da shi.”

Da babban kuka, sai Yesu ya ja numfashinsa na ƙarshe. Sai labulen haikali ya tsage kashi biyu, daga sama har ƙasa. Da shugaban sojoji ɗari wanda yake tsaye a gaban Yesu ya ga yadda ya ja numfashinsa na ƙarshe, sai ya ce, “Lalle wannan mutum Ɗan Allah ne.”

Akwai kuma waɗansu mata suna kallo daga nesa, cikinsu akwai Maryamu Magadaliya, da Maryamu uwar Yaƙubu ƙarami da Yoses, da Salome. Waɗannan mata sun bi shi tun a Galili, suna yi masa hidima; waɗansu masu yawa da suka zo tare da shi Urushalima ma suna nan.

An Kwantar da shi a Kabari

Da yamma ta yi, tun da yake Ranar Shiri ce—watau ranar kafin Asabar, sai Yusufu Baramatiya, wani shahararren ɗan majalisa wanda shi kansa yake jiran Mulkin Ubanmu, ya yi ƙarfin hali ya tafi wurin Bilatus, ya roƙi jikin Yesu. Bilatus ya yi mamaki da ya ji Yesu ya riga ya mutu; sai ya kirawo shugaban sojoji ɗari, ya tambaye shi ko Yesu ya daɗe da mutuwa. Da ya tabbatar daga wurin shugaban sojojin cewa haka ne, sai ya ba Yusufu jikin. Yusufu ya sayi likkafani, ya saukar da jikin, ya nannaɗe shi da likkafanin, ya kwantar da shi a cikin kabarin da aka fafe daga dutse. Sa'an nan ya gungura wani dutse ya rufe bakin kabarin. Maryamu Magadaliya da Maryamu uwar Yoses suka ga inda aka kwantar da shi.