Marko 15

15 ¹Alfajiri wakuu wa makuhani, wazee, waandishi, na baraza lote wakafanya shauri pamoja, wakamfunga Yesu, wakamchukua, wakamtia mikononi mwa Pilato.

²Pilato akamwuliza, "Wewe ndiwe Mfalme wa Wayahudi?" Yesu akamjibu, "Wewe wasema."

³Wakuu wa makuhani wakaendelea kumshtaki kwa mambo mengi. ⁴Basi Pilato akamwuliza tena, "Hujibu neno lolote? Tazama ni mashtaka mangapi wanayoleta juu yako."

⁵Lakini Yesu hakusema neno tena, hata Pilato akastaajabu.

⁶Basi wakati wa sikukuu, Pilato alikuwa na desturi ya kuwafungulia mfungwa mmoja—yeyote waliyemwomba. ⁷Mtu mmoja aitwaye Baraba alikuwa kifungoni pamoja na waasi waliokuwa wameua watu wakati wa ghasia. ⁸Umati ukapanda, ukaanza kumwomba Pilato awafanyie kama alivyokuwa akiwafanyia sikuzote. ⁹Pilato akawajibu, "Mwataka niwafungulie Mfalme wa Wayahudi?" ¹⁰kwa maana alijua ni kwa sababu ya wivu wakuu wa makuhani walimtia mikononi mwake. ¹¹Lakini wakuu wa makuhani wakauchochea umati ili awafungulie Baraba badala yake. ¹²Pilato akawauliza tena, "Basi mwataka nimtendeje huyu mnayemwita Mfalme wa Wayahudi?"

¹³Wakapiga kelele tena, "Msulubishe!"

¹⁴Pilato akawauliza, "Kwa nini? Amefanya uovu gani?" Lakini wakazidi kupiga kelele, "Msulubishe!"

¹⁵Ili kuuridhisha umati, Pilato akawafungulia Baraba. Akamtia Yesu adhabu ya kupigwa mijeledi, kisha akamtoa asulubiwe.

Askari Wamdhihaki Mfalme

¹⁶Askari wakamchukua wakamwingiza ndani ya ikulu (yaani makao makuu ya liwali), wakaikusanya kikosi chote cha askari. ¹⁷Wakamvika vazi la rangi ya zambarau, wakasokota taji ya miiba, wakamvika kichwani. ¹⁸Wakaanza kumsalimu, "Salamu, Mfalme wa Wayahudi!" ¹⁹Wakampiga kichwa kwa fimbo, wakamtemea mate, wakampigia magoti kwa dhihaka ya kumsujudia. ²⁰Baada ya kumdhihaki, wakalivua vazi lile la zambarau, wakamvika nguo zake mwenyewe, kisha wakamtoa nje ili wamsulubishe.

Mwana Asulubiwa

²¹Wakamlazimisha mtu mmoja aliyekuwa akipita akitoka shambani—Simoni Mkirene, baba yao Aleksanda na Rufo—achukue msalaba wake. ²²Wakamleta Yesu mahali paitwapo Golgotha (maana yake, Mahali pa Fuvu la Kichwa). ²³Wakampa divai iliyochanganywa na manemane, lakini hakuipokea.

²⁴Wakamsulubisha. Wakazigawa nguo zake, wakizipigia kura ili kila mmoja apate sehemu yake. ²⁵Ilikuwa saa tatu asubuhi walipomsulubisha. ²⁶Na maandishi ya mashtaka juu yake yalisomeka hivi: MFALME WA WAYAHUDI. ²⁷Wakawasulubisha pamoja naye waasi wawili, mmoja upande wake wa kuume na mmoja upande wake wa kushoto. ^a a v27 Nakala za kale kabisa hazina mstari wa 28 hapa; nakala za baadaye zaongeza: "Na Maandiko yakatimia yasemayo, 'Alihesabiwa pamoja na wakosaji.'"

²⁹Wale waliokuwa wakipita wakamtukana, wakitikisa vichwa vyao, wakisema, "Aha! Wewe uvunjaye hekalu na kulijenga kwa siku tatu, ³⁰jiokoe mwenyewe, ushuke kutoka msalabani!"

³¹Vivyo hivyo wakuu wa makuhani na waandishi wakamdhihaki wao kwa wao, "Aliwaokoa wengine; nafsi yake hawezi kuiokoa. ³²Kristo, Mfalme wa Israeli, na ashuke sasa kutoka msalabani, ili tuone na tuamini." Hata wale waliosulubiwa pamoja naye wakamtukana.

Mwana wa Baba Akata Roho

³³Ilipofika saa sita mchana, giza likaifunika nchi yote hata saa tisa alasiri.

³⁴Saa tisa alasiri Yesu akalia kwa sauti kuu, "Eloi, Eloi, lama sabakthani?" maana yake, "Mungu wangu, Mungu wangu, mbona umeniacha?"

³⁵Baadhi ya wale waliokuwa wamesimama karibu waliposikia haya, wakasema, "Sikilizeni, anamwita Eliya."

³⁶Mmoja akakimbia, akajaza sifongo divai ya siki, akaiweka juu ya mwanzi, akampa anywe. Akasema, "Mwacheni, na tuone kama Eliya atakuja kumshusha."

³⁷Yesu akalia kwa sauti kuu, akakata roho. ³⁸Pazia la hekalu likapasuka vipande viwili, toka juu hata chini. ³⁹Yule akida aliyekuwa amesimama akimwelekea Yesu, alipoona jinsi alivyokata roho, akasema, "Hakika mtu huyu alikuwa Mwana wa Mungu."

⁴⁰Palikuwa na wanawake pia wakitazama kwa mbali, miongoni mwao Mariamu Magdalene, na Mariamu mama yao Yakobo mdogo na Yose, na Salome. ⁴¹Wanawake hawa walikuwa wamemfuata huko Galilaya na kumtumikia; na wengine wengi waliokuwa wamepanda pamoja naye kwenda Yerusalemu walikuwako pia.

Azikwa Kaburini

⁴²Ilipokuwa jioni, na kwa kuwa ilikuwa Siku ya Maandalio—yaani siku iliyotangulia Sabato, ⁴³Yusufu wa Arimathaya, mmoja wa baraza mwenye heshima, ambaye naye alikuwa akiungoja ufalme wa Baba yetu, akajipa moyo akaenda kwa Pilato, akaomba mwili wa Yesu. ⁴⁴Pilato akashangaa kwamba amekwisha kufa; akamwita yule akida, akamwuliza kama Yesu amekufa siku nyingi. ⁴⁵Alipojua hakika kutoka kwa akida, akampa Yusufu ule mwili. ⁴⁶Yusufu akanunua sanda ya kitani, akamshusha, akamfunga katika sanda ile, akamlaza katika kaburi lililokuwa limechongwa mwambani. Kisha akalivingirisha jiwe mlangoni pa kaburi. ⁴⁷Mariamu Magdalene na Mariamu mama yake Yose wakaona alikolazwa.