Mariko 15 FHB Father's Heart Bible™

15 ¹Rũũciinĩ tene athĩnjĩri Ngai arĩa anene, na athuuri, na aandĩki a watho, o hamwe na Kĩama kĩu gĩothe, magĩciira hamwe, makĩoha Jesũ, makĩmũtwara, makĩmũneana kũrĩ Pilato.

²Nake Pilato akĩmũũria atĩrĩ, “Wee nĩwe Mũthamaki wa Ayahudi?” Nake Jesũ akĩmũcookeria atĩrĩ, “Wee nĩwe woiga ũguo.”

³Nao athĩnjĩri Ngai arĩa anene magĩthiĩ na mbere kũmũthitanga maũndũ maingĩ. ⁴Nake Pilato akĩmũũria o rĩngĩ atĩrĩ, “Kaĩ ũtarĩ na ũndũ wa gũcookia? Ta rora ũrĩa maragũthitanga maũndũ maingĩ.”

⁵No Jesũ ndaacookire kuuga ũndũ o na ũmwe, nake Pilato akĩgega.

⁶Na rĩĩrĩ, hĩndĩ ya Gĩathĩ, Pilato aamenyereire kũmohorera muohwo ũmwe, o ũrĩa mangĩetia. ⁷Na nĩ kwarĩ na mũndũ wetagwo Baraba, woohetwo hamwe na arĩa maaremeire thirikari, arĩa mooragĩte andũ hĩndĩ ya ngũĩ ĩyo. ⁸Nakĩo kĩrĩndĩ gĩgĩthiĩ igũrũ, gĩkĩambĩrĩria kũũria Pilato amekĩre o ũrĩa aamenyereire gwĩka. ⁹Nake Pilato akĩmacookeria atĩrĩ, “Nĩmũkwenda ndĩmuohorere Mũthamaki wa Ayahudi?” ¹⁰Amu nĩamenyete atĩ nĩ ũndũ wa ũiru athĩnjĩri Ngai arĩa anene maamũneanĩte. ¹¹No athĩnjĩri Ngai arĩa anene magĩthogothia kĩrĩndĩ, nĩguo Pilato amohorere Baraba handũ hake. ¹²Nake Pilato akĩmooria o rĩngĩ atĩrĩ, “Mũgũkĩenda ndĩke atĩa na mũndũ ũyũ mũretaga Mũthamaki wa Ayahudi?”

¹³Nao magĩkaya makiuga atĩrĩ, “Mwambe mũtĩ igũrũ!”

¹⁴Nake Pilato akĩmooria atĩrĩ, “Nĩkĩĩ? Nĩ ũũru ũrĩkũ ekĩte?” No-o magĩkĩrĩrĩria kũkaya na hinya, makiuga atĩrĩ, “Mwambe mũtĩ igũrũ!”

¹⁵Nake Pilato, nĩguo akenie kĩrĩndĩ, akĩmohorera Baraba. Agĩcooka agĩathana Jesũ ahũũrwo iboko, akĩmũneana athiĩ akaambwo mũtĩ igũrũ.

Thigari Igĩnyarara Mũthamaki

¹⁶Nacio thigari ikĩmũtwara nja ya nyũmba ya ũthamaki (nĩyo nyũmba ya barũthi), igĩcooka igĩĩta mbũtũ yothe ya thigari hamwe. ¹⁷Ikĩmũhumba nguo ya rangi wa ndathi, igĩcooka igĩtuma thũmbĩ ya mĩigua, ikĩmwĩkĩra mũtwe. ¹⁸Nacio ikĩambĩrĩria kũmũgeithia ikiugaga atĩrĩ, “Wĩ mwega, Mũthamaki wa Ayahudi!” ¹⁹Ikĩmũhũũra mũtwe na rũthanju, ikĩmũtuĩra mata, igĩturia maru ikĩmũinamĩrĩra ta igũkũmũhooya. ²⁰Thuutha wa kũmũnyarara, ikĩmũruta nguo ĩyo ya ndathi, ikĩmũhumba nguo ciake mwene, igĩcooka ikĩmũrutũrũra nja nĩguo ikamwambe mũtĩ igũrũ.

Mũũriũ Nĩ Ambwo Mũtharabainĩ

²¹Nao makĩnyiita mũndũ warĩ akĩhĩtũka oimĩte mĩgũnda, wetagwo Simoni wa Kurene, ithe wa Alekizandero na Rufo, makĩmũkuuithia mũtharaba wa Jesũ na hinya. ²²Nao magĩtwara Jesũ handũ harĩa heetagwo Gologotha (ũguo nĩ kuuga, Handũ ha Ihĩndĩ rĩa Mũtwe). ²³Makĩmũhe ndibei ĩtukanĩtio na manemane, no we ndaamĩnyuire.

²⁴Nao makĩmwamba mũtĩ igũrũ. Makĩgayana nguo ciake, magĩcuuka mĩtĩ nĩguo monane kĩrĩa o mũndũ ekũheo. ²⁵Na rĩrĩ, rĩrĩa maamwambire mũtĩ igũrũ kwarĩ thaa ithatũ cia rũũciinĩ. ²⁶Nakĩo kĩandĩko kĩa mũthitango wake kĩandĩkĩtwo atĩrĩ: MŨTHAMAKI WA AYAHUDI. ²⁷Nao makĩamba hamwe nake aremi eerĩ, ũmwe mwena wake wa ũrĩo, na ũrĩa ũngĩ mwena wake wa ũmotho. ^a a v27 Maandĩko ma tene mũno matirĩ na mũhari wa 28 haha; makũmbũkũ ma thuutha nĩmongererete atĩrĩ: “Namo Maandĩko makĩhingio marĩa moigaga atĩrĩ, ‘Aataranĩirio hamwe na ehia.’”

²⁹Nao andũ arĩa maahĩtũkagĩra hau makĩmũruma, makĩinainagia mĩtwe yao, makiugaga atĩrĩ, “Hĩ! Wee ũrĩa ũtharagia hekarũ na ũkamĩaka na mĩthenya ĩtatũ, ³⁰wĩhonokie wee mwene, ũikũrũke kuuma mũtharabainĩ!”

³¹O ũndũ ũmwe nao athĩnjĩri Ngai arĩa anene marĩ hamwe na aandĩki a watho makĩmũnyarara marĩ oiku, makiugaga atĩrĩ, “Nĩahonokagia andũ angĩ; no we mwene ndangĩhota kwĩhonokia. ³²Kristũ ũcio, Mũthamaki wa Isiraeli, nĩaikũrũke rĩu kuuma mũtharabainĩ, nĩguo tuone twĩtĩkie.” Nao arĩa maambĩtwo hamwe nake o nao makĩmũruma.

Mũũriũ wa Ithe Witũ Arekia Roho Wake

³³Na kuuma thaa thita, nduma ĩkĩgũĩra bũrũri wothe nginya thaa kenda.

³⁴Na rĩrĩa gwakinyire thaa kenda, Jesũ akĩanĩrĩra na mũgambo mũnene atĩrĩ, “Eloi, Eloi, lema sabakathani?” naguo ũguo nĩ kuuga, “Ngai wakwa, Ngai wakwa, nĩkĩĩ wandiganĩria?”

³⁵Rĩrĩa amwe a arĩa maarũgamĩte hakuhĩ maiguire ũguo, makiuga atĩrĩ, “Ta thikĩrĩriai, nĩ Elija araeta.”

³⁶Nake mũndũ ũmwe agĩteng'era, akĩiyũria thibũnji ndibei ĩrĩ ĩcũrĩa, akĩmĩĩkĩra mũrangiinĩ, akĩmũhe anyue. Akiuga atĩrĩ, “Mũrekei, nĩtwĩrorere kana Elija nĩegũũka kũmũikũrũkia.”

³⁷Nake Jesũ akĩanĩrĩra na mũgambo mũnene, agĩcooka agĩtuĩkana. ³⁸Nakĩo gĩtambaya kĩa hekarũ gĩgĩatũkana icunjĩ igĩrĩ kuuma igũrũ nginya thĩ. ³⁹Nake mũnene wa thigari ũrĩa warũngiĩ ang'etheire Jesũ, rĩrĩa oonire ũrĩa aatuĩkanire, akiuga atĩrĩ, “Ti-itherũ mũndũ ũyũ aarĩ Mũrũ wa Ngai.”

⁴⁰Na nĩ kwarĩ na atumia o nao maikarĩte haraaya makĩĩrorera, amwe ao maarĩ Mariamu Mũmagidali, na Mariamu nyina wa Jakubu ũrĩa mũnini na wa Jose, na Salome. ⁴¹Atumia acio nĩmamũrũmĩrĩire rĩrĩa aarĩ Galili, makĩmũtungatagĩra; na nĩ haarĩ na angĩ aingĩ maambatĩte nake nginya Jerusalemu.

Kũigwo Mbĩrĩrainĩ

⁴²Na rĩrĩ, gwakinyĩte hwaĩinĩ, na tondũ warĩ Mũthenya wa Ihaarĩria—nĩguo mũthenya ũrĩa warĩ mbere ya Thabatũ, ⁴³Jozefu wa Arimathea, warĩ mũndũ ũmwe wa Kĩama ũrĩ igweta, o nake mwene aaetereire Ũthamaki wa Ithe witũ, akĩgĩa na ũcamba wa gũthiĩ kũrĩ Pilato, akĩhooya mwĩrĩ wa Jesũ. ⁴⁴Nake Pilato akĩgega nĩ kũigua atĩ nĩarĩkĩtie gũkua; agĩĩta mũnene wa thigari, akĩmũũria kana Jesũ nĩakuĩte ihinda iraaya. ⁴⁵Na rĩrĩa aamenyire kuuma kũrĩ mũnene ũcio wa thigari atĩ nĩ ũguo, akĩhe Jozefu mwĩrĩ ũcio. ⁴⁶Nake Jozefu akĩgũra gĩtambaya kĩa gatani, akĩmũharũrũkia, akĩmũoha na gĩtambaya kĩu, akĩmũiga thĩinĩ wa mbĩrĩra yaarĩ ĩenjetwo rwaroinĩ rwa ihiga. Agĩcooka akĩgaragaria ihiga, akĩhinga mũromo wa mbĩrĩra ĩyo. ⁴⁷Nao Mariamu Mũmagidali na Mariamu nyina wa Jose makĩona harĩa aigirwo.