ኢየሱስ ናብ ጲላጦስ ተኣሕሊፉ ተዋህበ

ጲላጦስ ብቕንኣት ምዃኑ ፈለጠ፥ ኮይኑ ግና እቲ ህዝቢ ንበርባን ምስ ሓረዩ ፍቓዶም ገበረ። ወታደራት ከም ንጉስ ኣባጨዉሉ። ሰዓት ሰለስተ ተሰቕለ፥ ኣምላኽ ከም ዝሓደጎ ኸዓ ጨደረ፥ ኣብ ፀልማት ድማ ሞተ። ሓደ ሓለቓ ሚእትን ዝዕዘባ ዝነበራ ኣንስትን ተረፉ።

ምዕራፍ 15።

ወጋሕታ ምስ ኮነ ድማ ሊቃነ ካህናትን ሽማግለታትን መምህራን ሕግን ኵሉ እቲ ባይቶን ተማኺሮም፥ ንኢየሱስ ኣሲሮም ወሲዶም ናብ ጲላጦስ ኣሕሊፎም ሃብዎ።

ጲላጦስ ድማ “ንስኻ ንጉስ ኣይሁድ ዲኻ?” ኢሉ ጠየቖ። ኢየሱስ ከዓ “ንስኻ ኢኻ እትብሎ” ኢሉ መለሰሉ።

ሊቃነ ካህናት ድማ ብብዙሕ ነገር ይኸስዎ ነበሩ። ጲላጦስ ከዓ መሊሱ “ዝምልሶ ነገርዶ የብልካን? እንሆ ኽንደይ ዝኣክል ይኸሱኻ ኣለዉ ርኤ” ኢሉ ጠየቖ።

ኢየሱስ ግና ድሕሪኡ ሓደኳ ኣይመለሰሉን፤ ጲላጦስ ድማ ተገረመ።

ኣብ በዓል ከዓ፥ እቲ ዝሓተትዎ ሓደ እሱር ይፈትሓሎም ነበረ። በርባን ዝበሃል ሰብ ድማ፥ ምስቶም በቲ ዓመፅ ቕትለት ዝገበሩ ዓመፀኛታት ኣብ ቤት ማእሰርቲ ነበረ። እቶም ህዝቢ ድማ ደይቦም፥ ከምቲ ወትሩ ዝገብሮ ኽገብረሎም ንጲላጦስ ክልምን ጀመሩ። ጲላጦስ ከዓ “ንንጉስ ኣይሁድ ክፈትሓልኩምዶ ትደልዩ ኣለኹም?” ኢሉ መለሰሎም፤ ሊቃነ ካህናት ብቕንኣት ከም ዘሕለፍዎ ይፈልጥ ነበረሞ። ሊቃነ ካህናት ግና፥ ኣብ ክንድኡ ንበርባን ክፈትሓሎም፥ ነቶም ህዝቢ ኣለዓዓልዎም። ጲላጦስ ድማ መሊሱ “ነዝ ንጉስ ኣይሁድ እትብልዎ እንታይ ክገብሮ ትደልዩ ኣለኹም?” ኢሉ ጠየቖም።

ንሳቶም ከዓ “ስቐሎ!” ኢሎም ዓው ኢሎም መለሱ።

ጲላጦስ ድማ “ስለ ምንታይ? እንታይ ክፉእ ገይሩ?” በሎም። ንሳቶም ግና የመና ዓው ኢሎም “ስቐሎ!” በሉ።

ጲላጦስ ከዓ ነቶም ህዝቢ ከሐጕስ ደልዩ፥ ንበርባን ፈትሓሎም። ንኢየሱስ ድማ ገሪፉ፥ ክስቀል ኣሕሊፉ ሃቦ።

እቶም ወታደራት ነቲ ንጉስ ኣባጨዉሉ

እቶም ወታደራት ድማ ናብ ውሽጢ ቤተ መንግስቲ (ማለት ቤት ፍርዲ ገዛኢ) ወሰድዎ፤ ንብዘሎ ጭፍራ ወታደራት ከዓ ኣኪቦም ፀውዕዎም። ቀይሕ ክዳን ኣልበስዎ፤ ኣኽሊል እሾዅ ጠሚሮም ድማ ኣብ ርእሱ ገበሩሉ፤ “ዋእ ንጉስ ኣይሁድ!” እናበሉ ድማ ሰላም ክብልዎ ጀመሩ። ርእሱ ብበትሪ ይወቕዕዎ ነበሩ፤ ተፍዎውን፤ ተምበርኪኾም ድማ ብላግፂ ሰገዱሉ። ምስ ኣባጨዉሉ ድማ፥ ነቲ ቀይሕ ክዳን ገፊፎም፥ ናይ ገዛእ ርእሱ ክዳን ኣልበስዎ፤ ክሰቕልዎ ኸዓ ወሰድዎ።

ወልድ ተሰቒሉ

ሓደ ኻብ በረኻ ዝመፀ ሓላፊ፥ ስምኦን ቀሬናዊ፥ ኣቦ እስክንድሮስን ሩፎስን፥ መስቀሉ ኽስከም ኣገደድዎ። ንኢየሱስ ድማ ናብታ ጎልጎታ እትብሃል ቦታ ወሰድዎ፤ ትርጕማ ኸዓ “ቦታ ናላ ርእሲ” ማለት እዩ። ብከርበ ዝተሓወሶ ወይኒ ድማ ሃብዎ፤ ንሱ ግና ኣይተቐበሎን።

ሰቐልዎ፤ ነፍሲ ወከፍ እንታይ ከም ዝወስድ ድማ፥ ዕፃ ኣውዲቖም፥ ክዳኑ ተማቐሉ። ክሰቕልዎ እንተለዉ ኸዓ ሰለስተ ሰዓት ናይ ንግሆ ነበረ። እቲ ዝተፅሓፈ ዝተኸሰሰሉ ፅሕፈት ድማ፦ “ንጉስ ኣይሁድ” ዝብል ነበረ። ምስኡ ድማ ክልተ ዓመፀኛታት፥ ሓደ ብየማኑ ሓደ ኸዓ ብፀጋሙ ሰቐልዎም። ^a

እቶም ሓለፍቲ ድማ ርእሶም እናነቕነቑ፥ “ኣንታ ንቤተ መቕደስ እተፍርስ፥ ብሰለስተ መዓልቲ ኸዓ እትሰርሕ፥ ኣሽካዕ!” ኢሎም ፀረፍዎ፤ “ንርእስኻ ኣድሕን እሞ ካብ መስቀል ውረድ!” በልዎ።

ከምኡ ኸዓ ሊቃነ ካህናትን መምህራን ሕግን፥ ኣብ ንስንሳቶም “ንኻልኦት ኣድሓነ፤ ንርእሱ ኣድሒኑ ኽ ኣይኽእልን እዩ። ርኢና ምእንቲ ኽንኣምን፥ እቲ ክርስቶስ ንጉስ እስራኤል፥ ሕዚ ኻብ መስቀል ይውረድ” እናበሉ ኣባጨዉሉ። እቶም ምስኡ ዝተሰቕሉ ድማ ፀረፍዎ።

ወዲ ኣቦ ነፍሱ ኣሕለፈ

ፍርቂ መዓልቲ ምስ ኮነ ድማ፥ ክሳዕ ሳልሳይ ሰዓት ናይ ድሕሪ ቐትሪ፥ ፀልማት ኣብ ብዘላ እታ ምድሪ ኾነ።

ሳልሳይ ሰዓት ናይ ድሕሪ ቐትሪ ድማ፥ ኢየሱስ ዓው ኢሉ “ኤሎሄ፥ ኤሎሄ፥ ለማ ሰበቕታኒ?” ኢሉ ፀውዐ፤ ትርጕሙ ኸዓ “ኣምላኸይ፥ ኣምላኸይ፥ ስለ ምንታይ ሓደግካኒ?” ማለት እዩ።

ገሊኣቶም ኻብቶም ኣብ ጥቓኡ ደው ኢሎም ዝነበሩ ድማ፥ እዙይ ምስ ሰምዑ፥ “እንሆ ንኤልያስ ይፅውዕ ኣሎ ስምዑ” በሉ።

ሓደ ድማ ጎዩ፥ ሰፍነግ ብመፂፅ ወይኒ መሊኡ፥ ኣብ ሻምብቆ ገይሩ፥ ከስትዮ ሃቦ። “ኣይትትንክፍዎ፥ ንኤልያስ ከውርዶ ይመፅእ እንተ ኾይኑ ንርአ” ከዓ በለ።

ኢየሱስ ድማ ዓው ኢሉ እናእወየ፥ ነፍሱ ኣሕለፈ። መጋረጃ ቤተ መቕደስ ድማ ካብ ላዕሊ ኽሳዕ ታሕቲ ናብ ክልተ ተቐደደ። እቲ ኣብ መንፅሩ ደው ኢሉ ዝነበረ ሓለቓ ሚእቲ ድማ፥ ከመይ ገይሩ ኸም ዝሞተ ርኢዩ፥ “ብሓቂ እዝ ሰብኣይ እዙይ ወዲ እግዚኣብሄር ነበረ” በለ።

ኣንስቲ ኸዓ ካብ ርሑቕ ይርእያ ነበራ፤ ኣብኣተን ድማ ማርያም መግደላዊትን፥ ማርያም እኖ ናእሽተይ ያእቆብን ዮሳን፥ ሳሎሜን ነበራ። እዘን ኣንስቲ እዚኣተን፥ ኣብ ገሊላ እንተሎ ይኽተልኦን የገልግልኦን ነበራ፤ ብዙሓት ካልኦት ድማ፥ እተን ምስኡ ናብ ኢየሩሳሌም ዝደየባ ኣብኡ ነበራ።

ኣብ መቓብር ተቐበረ

ምሸት ኮይኑ ነበረ፥ መዓልቲ ምድላው ማለት ቅድሚ ሰንበት ዘላ መዓልቲ ስለ ዝነበረት፤ ዮሴፍ ብዓል ኣርማትያስ፥ እቲ ባዕሉ መንግስቲ ኣቦና ዝፅበ ዝነበረ ፍሉጥ ኣባል ባይቶ፥ ናብ ጲላጦስ ክኸይድ ደፊሩ ስጋ ኢየሱስ ለመኖ። ጲላጦስ ድሮ ከም ዝሞተ ተገረመ፤ ነቲ ሓለቓ ሚእቲ ፀዊዑ ኸዓ፥ ኢየሱስ ካብ ዝመውት ነዊሕ እንተ ኾይኑ ጠየቖ። ካብቲ ሓለቓ ሚእቲ ከምኡ ምዃኑ ምስ ፈለጠ፥ ነቲ ስጋ ንዮሴፍ ሃቦ። ዮሴፍ ድማ በፍታ ዓዲጉ፥ ነቲ ስጋ ኣውሪዱ፥ በቲ ኽዳን ጠቕሊሉ፥ ኣብ ኰዅሒ ኣብ ዝተወቕረ መቓብር ኣቐመጦ። ድሕሪኡ ኸዓ ኣብ ኣፍ እቲ መቓብር እምኒ ኣንከባሊሉ ዓፀዎ። ማርያም መግደላዊትን እኖ ዮሳ ማርያምን ድማ፥ ኣበይ ከም ዝተቐመጠ ረአያ።