Hiak swak thang rwe
Chongdip

Jisu ding Pilate khou bachoi thang rwe

Pilate na haga takhai briakpina gaye diga theiye, atiyeda mi khangna Barabbas kounu kaan bi bani lang bathan thang rwe. Kraanmi rwanna Maan ding krwang danga loh lo to rwe. Khwaphran bi Maan ding kraan bi tak thangluga, Rikrwang na Maan bathan thang rwe diga paoga kou rwe, khatle zingnu bi thi rwe. Kraanmi mangal khat le phaang ongnu kamaisa rwan za baat rwe.

Bung 15.

Khwaphran tanu kaan bi takopuba rwan, mangal rwan, chongtan bachuthangnu rwan khatle sung sanu doina chong kathuiluga, Jisu ding bang thangluga kalwang se ongluga, Pilate khou bachoi thang rwe.

Pilate na Bakhou chong ngai rwe, “Nang Jihudi rwan om Krwang gaye-bo?” Jisu na bakhou katake, “Nang gana hadanga rinne.”

Takopuba rwanna Bating thinu tamga koi impu thang ngaake. Atibriakpina Pilate na Bakhou tangai ngai lat rwe, “Nang katak langna makpo? Phaang ngo, banina nating lu chung bi atiga tamga koi impu thangnuwe.”

Atiyeda Jisu na chong khatchale katak lat make, atiga Pilate loh lo ngaake.

Atiga balou lumik bi, Pilate na mi nunna kounu tudannu khat ga qwan in bi tangnu pakhat bani lang lat thou thang damnu chwan am ngaake. Krwang lu chung bi kathou thounu kaan bi mi athat satnu, kathou thounu nun le diga qwan in bi tangnu, Barabbas diga kounu manpa khat am ngaake. Mi khang gana hung tangluga, maanna kama kama tonu danga bani lang le to thang ngo diga Pilate khou inkam nai ngaake. Pilate na bakhou katake, “Jihudi rwan Krwang ding nani lang eina lat thou thang langna nanina nwambo?” Balangbe takopuba rwanna takhai briakpina Jisu ding bachoi thang ngaaknu ga maanna thei ngaake. Atiyeda takopuba rwanna, Barabbas ga bani lang lat thou thang ngo diga, mi khang ding kachui thang rwe. Pilate na bani khou tangai ngai lat rwe, “Atibriakpina nanina Jihudi rwan Krwang diga kounu Maan ding eina pa-aam to thang langna nanina nwambo?”

Banina pao lat rwe, “Bating cross pi athat thang dammo!”

Atiyeda Pilate na bani khou rinne, “Pa-aam langbo? Maanna paaam kasianu chwan torugabo?” Atiyeda banina pao rakan ranga rinne, “Bating cross pi athat thang dammo!”

Mi khang ding karo thang nwamga, Pilate na Barabbas ding bani lang lat thou thang rwe. Atiga maanna Jisu ding pi bweiluga, cross pi athat lang pi swak rwe.

Kraanmi rwanna Krwang ding kiam rwe

Kraanmi nunna Jisu ding krwang in dinuba taleipuba om Praetorium sung bi kalwang se ongluga, kraanmi doina qwatluga Bating hung ong thang rwe. Banina sendumnu pwan ga Jisu ding sin thangluga, kaling na luthop bacha thangnu ga Balu la run pi rwe. Atiga banina Bating salu nai rwe, “Kalumme, Jihudi rwan Krwang!” Banina sungrwanna Balu bi bwei ngaakluga, Bakhou bachin thangluga, Bameithaan bi kuntaluga Bating kiamga kalum danga to rwe. Banina Bating kiam taangnu nung, sendumnu pwan ga lou satluga Bapwan ga sin thang rwe, atiga Bating cross pi athat lang kalwang se ong rwe.

Sa Kapaisa ding cross pi athat thang rwe

Nam lana hungnu, Alexander le Rufus bani pa, Cyrene rwan Simon diga kounu, se hungnu manpa pakhat ting banina namluga, Jisu om cross ka pon lang pi pon rwe. Banina Jisu ding Golgotha bakabana, Luru riak diga kounu riak pi kalwang hung rwe. Banina myrrh le thang katwaknu drakha Bakhou in lang pi rwe, atiyeda Maanna haga inlan make.

Banina Bating cross pi athat thang rwe. Atiga tuna tatonu lousulu dingbo dinu tasaan phaangluga, Bapwan ga bani lak pi tasaanluga kasem rwe. Banina Bating cross pi athat thangnu kaan bi chakrin kathum tanu dat pi ngaake. Bating koi impu thangnu chong hiak thangnu ga, “JIHUDI RWAN KRWANG” diga ngaake. Banina kathou thounu mi kani ding Maan le diga cross pi athat thang rwe, khat ting Bainchang pek la, khat ting Baimbei pek la bakhai ka rwe. a a v27 Kama kataknu chongdip bing bi heiya verse 28 am make; nung om copy bing bina heiya pi hung ong rwe: “Atiga Bathiangnu chongdip pi rin thangnu, ‘Maan ding noh tonu nun le diga sem thang rwe’ dinu ga hung tang rwe.”

Se hungnu mi nunna bani lu kazinga Bating rin basiatka rinne, “Ha! Nang kalum in ding bachekluga ni thum bi raza latnu, Nang bahak ding kanthangluga cross khouna rok hung ngo!”

Hadanga takopuba rwan le chongtan bachuthangnu rwan le bani cham bi Bating kiamga rinne, “Maanna mi katei ding kanthang rwe; Maan bahak ding kanthang ngam make. Christa, Israel rwan Krwang ga, aniyana muluga balumsa langna, hanta cross khouna rok hung ngo.” Atiga Maan le diga cross pi bakhai kanu nun le Bating rin basiat rwe.

Pa om Sa Kapaisana Bakatha bathan sat rwe

Chakrin karuk tanu dat pina chakrin kaqwa tanu dat pi, talei ram doi chung bi inthim ta rwe.

Chakrin kaqwa tanu kaan bi Jisu na baraam basaangga paoga rinne, “Eloi, Eloi, lama sabachthani?” bakabana, “Arikrwang, Arikrwang, Nangna Ating pa-aam lang bathan thangnubo?” dinuwe.

Han ongnu mi nun lak pi kasemna haga ngainu kaan bi rinne, “Ngai ngo, Maanna Elijah ding kouwe.”

Pakhatna pak seluga, sponge ding kathunnu drakha tui bi imphomluga, tou sungrwan lan bi thangluga Bakhou in dam lang pi rwe. Maanna rinne, “Maan ding thou ngo, Elijah na Bating rok lou ta langna hungbo makpo diga ani phaangzo.”

Jisu na baraam basaangga paoluga, Bakatha bathan sat rwe. Atiga kalum in khamthing pwan ga balu lana bakalan tangga, badam kani swakka reta rwe. Jisu meithaan bi han ongnu kraanmi lu pakhatna, Maan hadanga Bakatha bathan satnu ga munu kaan bi rinne, “Batak sekka heiba Manpa ga Rikrwang Sa Kapaisa ngaake.”

Mannu rwan le diga arwai lana swak rangaaknu ong ngaake, bani lak pi Mary Magdalene, James naosen le Joses bani nu Mary khatle Salome le sui ngaake. Ha mannu rwanna Galilee bi Maan sui se ngaake khatle Bating banang thang damnu ngaake; Maan le diga Jerusalem la hung tangnu katei taswang khak le habei am ngaake.

Thaan bi Ri Thangnu

Khwazinren tang rwe, haga Chamdaannu Lumik ngaake, balangbe Sabbath nai hung ngaaknu lumik ngaake. Ani Pa om krwang talei ding Baraantoza ngaakka ongnu, sung bi mannu sung sanu Arimathea rwan Joseph na, ngamluga Pilate khou hungluga Jisu pum ding ni ngaake. Jisu thi drwe diga Pilate loh lo ngaake; kraan milu ding kouluga, Jisu kama thi rurugabo diga ngaiye. Kraan milu bina haba takka ye diga theinu kaan bi, maanna pum ding Joseph khou za thang rwe. Joseph na pwan kaleiluga, pum ga loutaluga, pwan bina batum thangluga, lung bi ran thangnu thaan bi ri thang rwe. Atiga maanna lung khat thaan inkhaanmun bi lengnam thang rwe. Mary Magdalene khatle Joses nu Mary na, Maan ri thangnu riak ga mu rwe.