Maan Ring Thou Drwe
Meithaan rwanna barim banamsanu pot ga choi hung rwe, lung ga tun swak thangnu, khatle Maan ring thou drwe diga rinnu reizuni pakhat ga mu rwe, atiga bani kachiga pak thou rwe, pakhatcha khou le rin swak make. Jisu na Magdalene Mary khatle katei rwan khou han hung rwe, atiyeda potroi rwanna za mak ngaake, habei ga pat somga khat ding talei ram chung bi lang thang rwe.
16 1Sabbath ni loinu kaan bi, Magdalene Mary, James nu Mary khatle Salome na Bating thao kanun lang se lang barim banamsanu pot ga kalei rwe. 2Maap lak om kamanu ni, louthwan karang takka, louthwan insi thannu nung bi, banina thaan la hung rwe. 3Banina bani rwei khou rinne, “Ani lang thaan inkhaanmun bina lung ga tu na tun swak thang dingbo?” 4Atiyeda banina kahan phaang kaan bi, lung pui kaliannu ga takanse tun swak tam ngaaknu mu rwe.
5Banina thaan bi khutluga, pwan ngounu sin thangnu reizuni pakhat baom raqwan la badung ongnu ga mu rwe. Atiga bani sung riangre rwe. 6“Nani sung riangre mako,” Maanna rinne. “Nani cross bi kathing thangnu Nazareth Jisu ding zong ongme. Maan ring thou drwe—Maan abeiya ong lan rwe. Phaang ngo, heiya banina Bating ri thang damnu riak gaye. 7Atiyeda sero, Baom potroi rwan khatle Peter khou rinro, ‘Maan nani ma Galilee la kama thoulune. Maanna nani khou rin thang ngaaknu danga, habei ga nani Bating mulune.’”
8Mannu rwan ga kathokka khatle kaloga, thaan lana pak thou drwe, bani pakhatcha khou le rin swak make—balangbe bani kachi rwe.
9Maap lak om kamanu ni louthwan karang takka Jisu ring thounu nung, Maanna ri kasia siari bathou sat thang damnu Magdalene Mary khou kama pi mu thang rwe. a a v9 Kamanu takka hiak thangnu chongdip rwanna Mark ding sake pat bi loi thang ngaake. Sake 9 bina 20 tangga bataang la hiaknu chongdip tamga bi dou sunge khatle atunba Bible tamga danga, abeiya hiak thang nge. 10Maanna seluga, nu hweiga khatle chapka ongnu Maan le diga bacham ngaaknu nun khou pu rwe. 11Jisu ga ring ongnu khatle maanna Bating muwe diga ngaisunu kaan bi, banina ha ding balumsa make.
12Bataang la, taram la senu bani nun lak pi mani khou, Jisu na thot katei ga pi mu thang rwe. 13Barwei han hungluga katei rwan khou bapu rwe, atiyeda banina haba ding le balumsa make.
14Bataang la, potroi rwan pat somga khat sa in lang ong ongnu kaan bi, Jisu na bani khou pi mu thang rwe khatle bani balumsa maknu khatle bani sung natnu ding twei thou rwe, balangbe banina Maan ring thou drwe diga munu nun ding balumsa mak ngaake.
15Maanna bani khou rinne, “Talei ram pum bi se koiluga, dam thang damnu bing lu chung bi sacham ga kasammo. 16Tudannu balumsaluga baptize to thangnu maan ga kanthangnu lousulune, atiyeda tudannu balumsa maknu maan ga pi koi thang lang nge. 17Khatle balumsanu nun ding hei bing tasiatnu ga sui thanglune: Ameng bi banina ri kasia nun ding bathou satlune, tong kathan ga kabialune. 18Banina bakut ka le barun bing ding lou thoulune; banina thi zanu hu ga in dabe, hagana bani ding pi sok laye; banina kasanu nun lu chung bi bakut ga tinglune, atiga bani sa damlune.”
19Pukraangba Jisu na bani khou chong kabia loinu nung, Maan ding tambaan la lou thak thangluga ani Pa om raqwan la badung ong rwe. b b v19 Sa Kapaisana Baom to ding ga loi thangnu kaan bi, Maan Bapa kim la han hung lat rwe — haga Maanna Bapa le diga sipsanu to damnu riak gaye. 20Banina swak koiluga bariak thin se kasam se ngaake, Pukraangba na bani le diga to ong ongga, sui thangnu tasiatnu bing paan bina Baom chong ga tip thang rwe.