A Ringshokhaira
Sha̱naobingna nganamkaphā thaoyur khuiphungda rāda, lungsham khalangshokhairakasā kala 'A ringshokhaira' da kahāng yaronnao akha theilaga, ngacheeda yāmserhaowa, kala khipālikha mahāng. Jishuna Mary Magdaleneli kala sākhangatha̱bingna mashitsangkahai kaikhali rida theingasaka, chiwui thili tharāda akhali sākahai ot saikorawuili chihovai.
16 1Sabbath zimiksho peikahai tharan, Mary Magdalene, Jameswui ava̱ Mary, kala Solomena Jishuli vāda neokhavai nganamkaphā thaoyur lokhui. 2Haptāwui kharethang ngathorthakva̱, zimik shokahai tharan, athumna chikhurli vai. 3Athumna akha eina akha ngahānngaroka, "Ithumwui vang khipāna chikhurwui khamong eina lungsham chi khalangshokrakhala?" 4Kha munlak eina yangkakā tharan, ngarān kahaimānga kahaka lungsham chi khalangshokhairakasā chi athumna thei.
5Athumna chikhurli azunda, kachar phahon ngavai yaronnao akha yāvāk chipamda leikasā chi athei. Chieina athum khananglakhaowa. 6Ana hānga, "Makhanangalu. Nathumna krushtungli shaothat kahaiya Nazarene Jishuli phāda lei. A ringshokhaira; a hili maleimana. Yanglu, ali chipet kahai pam hina. 7Kha vāda, awui sākhangatha̱bing kala Peterli ahānglu, 'Ana nathumli rida Galileeli vāra. Ana nathumli hāngkahai athishurda, nathumna ali chili theira.'"
8Kakathir kala matakhakhai eina sha̱naobingna chikhur eina yāmserhaowa, kala khipālikha mahāngmana, khikhalajila athum ngacheehaowa.
9Haptāwui kharethang ngathorthakva̱ ringshok kahai tharan, Jishuna kameo shini kashamshokmi kahai Mary Magdaleneli rida rāchithei. a a v9 Khare kap lairikbingna Mark hi verse 8-li kupphunga. Verse 9-20 chi naoda kap lairik kachungkhali samphanga, kala kadhar Bible kachungkhali thada, hili kapihaina. 10Ana vāda, ali ngasotabing, sifada chapngachāda leibingli unghānga. 11Jishu kharinga kala ana ali theihaira kaji shā tharan, athumna chi mashitsanghaowa.
12Chiwui thili, ngaleili zatlaga leikasā athum anili, Jishuna khangatei khangachā eina rāchithei. 13Anina hanungda khangateibingli unghānga, kha khangateibingnala anili mashitsangmana.
14Naoda, athum phazā ngarum khavai pamlakha, Jishuna tharāda akhabingli rāchithei, kala ali ringshokhaira theibingli athumna mashitsangthuwa kaji eina, athumwui shitkasang mavāt kala ning khamakang chi kahara.
15Ana athumli hānga, "Okathui hupta vāda, sākahai ot saikorali paokaphā chi vaosanglu. 16Shitkasanga kala ra̱hikkhami mi kachiva̱ kahui samphangra, kha mashitkasanga mi chi yonngasakra. 17Kala machut hibingna shitkasangbingli shurrai: iwui ming eina athumna kameo kashamshokra, tuiyur kadhar matuira. 18Athumna apāng eina phara̱ khuiphungra; kathiwui kathiri mangakha, athumli khamā mazararmara; kakazānaobingwuitungli pāng parrorra, kala athum raihaora."
19Athumli hāngkahaiwui thili, Proho Jishu chi kazingramli khuikāhailaga ithumwui Avāwui yāshong pama. b b v19 Anaomayarana awui ot chi sāshimitmi kahaiwui thili, awui Avāwuili latrāluihaowa — ana Avāla ngasoda samphangkapai tekhamateiwui apam china. 20Athumna shokta apam kachiva̱li paokaphā hāshoka, Prohona athumla ngasoda ot sāda, ali ngasovā matakhak kahaibing eina awui tui chi mashunga.
