Luke 1

1 ¹Mi kachungkhana ithumwui alungli ungshung kahai ot saikorawui apongli ayat unglak eina kapi khavai phokcham kahaiwui vang, ²Haokaphokwui eina mik eina katheibing kala Tuiwui raobingna ithumli kapangkhui kahai athishurda, ³Phākhamataiya Theophilus, inala haokaphokwui eina ot saikora matuida kapeoyanglaga nawui vang ayat unglak eina kapi khavai phaninghaira, ⁴nana tamchitheihaokahai tuibingwui mashuntui chi theikhuipai khavaina.

Avāna Zechariahli Naomayara akha Ngashit mi

⁵Judeawui awunga Herodwui atamli, Zechariah kaho pāngmon akha Abijahshiwui pāngmon khumli leisai. Awui preiva̱ Elizabethna Aaronwui ara̱-azāna. ^a a v5 Pāngmonbing chi khum maga̱da mati eina khangasangda, khorumshimli khumkhum eina otram ngatha̱; Abijahshiwui khum chi kashatena. ⁶Ani khani ithumwui Avāwui mangāli khamashung khangarongna, awui ningkhami kala shiyan-chikan saikorawui alungli shāt makāthuwada okthuisai. ⁷Kha aniwui nao maleimana, kaja Elizabeth nao kashumna, kala ani khani kasāngkha okpeihairasai.

⁸Ara awui khum otram khangatha̱li zang atamli ana ithumwui Avāwui mangāli pāngmon otram ngatha̱ tharan, ⁹pāngmonwui khangachā athishurda, awui katharapamli zangda nganamkaphā riktā khavai ka̱lā yanglaga awuili kapangkhui. ¹⁰Kala nganamkaphā riktā atamli mi yarui saikorana ayarli seihā sāsai. ^b b v10 Ngaya kachiva̱ kala zingyin kachiva̱li katharapamwui alungli nganamkaphā riktāhaowa; chi pungbingli mibingna seihā sākhavai ayarli rākazip tharan.

¹¹Chieina ithumwui Avāwui kazingrao akha nganamkaphā hanphutwui yāpangli nganingda awuili shoka. ¹²Zechariahna ali theilaga ningkashaklakhaowa, kala ana ngacheenāhaowa. ¹³Kazingrao china ali hānga, "Zechariah, mangacheealu; nawui seihā kasā chi shākahaina. Nawui preiva̱ Elizabethna nawui vang naomayara akha pharāra; awui aming John phoklu." ¹⁴Nawui vang ringkaphā khamathān leira, kala mi kachungkhana awui kapharāli mathānra. ¹⁵Ana ithumwui Avāwui mangāli kahaka mi ngasāra, drakhāra̱ lah zamshei khikha mamangpaimara; kala ana awui ava̱va̱wui naopamwui eina thuida Manglā Katharana pemting ngasāra. ¹⁶Kala ana Israelnaobing kachungkhali athumwui Avāli latung ngasakra. ¹⁷Ana Elijahwui manglā kala pangshapli ithumwui Avāwui mangāli zatra, avābingwui wuklung chi anaobingli ngalan ngasakta, kala kahāng makhanganābingli khamashung khangarongbingwui thangkhameili ngalanda, ithumwui Avāwui vang ngaranpinghai kahai miyur akha ngarān khavaina."

¹⁸Zechariahna kazingrao chili hānga, "Kathada hi ina theira? I rarhaira, kala iwui preiva̱la saryuihaira."

¹⁹Kazingrao china ali ngahānkai, "I ithumwui Avāwui mangāli khanganinga Gabrielna; nali khazekda paokhamathā hi khuirā khavai kashirāt kahaina. ²⁰Kala ara ot hibing shokkahai zimiksho eina tangda na khak mashokla khak ngasha̱ra, kaja atam retkahai tharan ungshungki kaji iwui tui chi nana mashitsangthuwa."

²¹Chitharan mibingna Zechariahli ngarai, khisāda ana katharapamli sāngnā leipamkhala da matakhakhai." ²²Ana kashok tharan, athumli khak mashokla matuithuwa, kala ana katharapamli khamahā akha theihaira kaji athumna thei. Ana athumli ingkit saserda khak ngasha̱da pamsanga. ²³Kala awui khangatha̱ zimiksho peikahaiwui thili, ana shimli unghaowa. ²⁴Chiwui thili awui preiva̱ Elizabethna nao vaihaowa, kala kachāng phangā shakha a khalatta ngathumsāda hānga, ²⁵"Ana ili ngareira zimiksholi mibingwui ngachaili iwui maikashi khuithui khavai ithumwui Avāna iwui vang hi sāmi kahaina."

Avāna Gabrielli Maryli Chihovā

²⁶Kachāng katharuka ithumwui Avāna kazingrao Gabrielli, Galileeli khalei Nazareth kaho keinung akhali chihovā, ²⁷Davidwui shimkhurwui Joseph kaho mayara akhali mākhām kahai kachingva̱ akhali vāhaowa; ngalāva̱wui aming Maryna. ²⁸Kala ana awuili rāhānga, "Shālam, ngahānkhangai mi! Ithumwui Avā nali ngasoda lei."

²⁹Kha ana awui tui china ning kachungkha chothaowa, kala hi khiwui shālam chiralā da awui wuklungli machuka. ³⁰Kazingrao china awuili hānga, "Mangacheealu, Mary, kaja nana ithumwui Avāwui eina ngahānkhangai samphanghaira. ³¹Na nawui naopamli nao vaida mayarnao akha pharāra, kala awui aming Jishu hora. ³²Ana kahakva ngasāra kala Juikhamataiwui Naomayara da hora, kala ithumwui Avāna ali awui avā David wungpamkhong mira, ³³kala ana Jacobwui shimkhurtungli mashimānla mungra; awui wungram katang mavaimara."

³⁴Kala Maryna kazingrao chili hānga, "Kathada hi sapairakhala, kaja I kachingva̱ akhana?"

³⁵Kazingraona ali ngahānkai, "Manglā Kathara nawuitungli rāra, kala Reikhamataiya pangshapna nali khaya̱ eina worra; chiwui vang eina kapharā nao kathara chi ithumwui Avāwui Naomayara da hora. ³⁶Yanglu, nawui theisā Elizabethla a rar atamli mayarnao akha vaikhuihaira. Nao kashuma da hokahaina awuili hi kachāng katharukana. ³⁷Kaja ithumwui Avāwui vanga masākapai kaji khikhana maleimara."

³⁸Maryna hānga, "I ithumwui Avāwui raona; nana hāngkahai thāda ili shokranu." Chieina kazingrao chi awui eina thuihaowa.

Maryna Elizabethli Samphang Vai

³⁹Chi atambingli Maryna ngakarthuida hengsāda kaphungramli, Judahwui keinung akhali vāhaowa, ⁴⁰kala ana Zechariahwui shimli azangda Elizabethli shālam mi. ⁴¹Elizabethna Marywui shālam shālaga, awui naopamli angangnao chi ngalongkahaowa, kala a Manglā Katharana pemtinghaowa. ⁴²Ana panglāk eina vaoda hānga, "Sha̱naobingwui ngachaili na sokhamina, nawui naopamwui athei chila sokhamina! ⁴³Kala iwui Prohowui ava̱na ili rāsamphang khavai hi khisāda ili mihaokhala? ⁴⁴Kaja nawui shālam ina shālaga, iwui naopamli angangnao chi khamathānna ngalongkahaowa. ⁴⁵Ithumwui Avāna ali hāngkahai chi ungshungra da shitsang kahaiva̱ chi sokhamina."

Marywui Masot Laa

⁴⁶Kala Maryna hānga, "Imanglāna ithumwui Avāli tekmatei ngasaka, ⁴⁷kala imanglāna iwui Huikhame ithumwui Avāli mathāna, ⁴⁸kaja ana awui raowui khangahui ngalem chi yanghaira. Kaja aja eina thuida thot saikorana ili sokhamiva̱ da hora; ⁴⁹kaja Pangshapa china iwui vang kahaka ot sāmihaira, kala awui ming katharana. ⁵⁰Kala awui lukhamashan chi ali khangacheebingwui vang thot eina thotli lei. ⁵¹Ana awui pāngtheina yāng chitheihaira; athumwui ningwui kaphaningli langkasobing chi kashamyāng ngasakhaira; ⁵²ana kapingabing chi athumwui wungpamkhong eina ngakhuntaihaira, kala khangazanabingli reingasaka; ⁵³ana thaihaobingli khamathā ot eina chipemmi, kala kashāngabingli khamasai eina shiunhaowa. ⁵⁴Ana awui rao Israelli ngachonmi, awui lukhamashan phaningda, ⁵⁵ana ithumwui shāvā ngarāli Abrahamli, kala awui ara̱-azāli mashimānda hāngkahai thāda."

⁵⁶Kala Maryna ali ngasoda kachāng kathum shakha pamlaga awui shimli latunghaowa.

John Pharāhaira

⁵⁷Ara Elizabethwui naosak atam ungshunghaowa, kala ana mayarnao akha pharāmi. ⁵⁸Awui khongnainaobing kala athei-asābingna ithumwui Avāna ali lukhamashan kachungkha chitheimi kaji shālaga, ali ngasoda ringphai. ⁵⁹Kachishatathang athum nao chi ahui rimshok khavai rai, kala ashāvā athishurda ali Zechariah da ho khavai sāngai, ⁶⁰kha ashāva̱na ngahānkai, "Chi maningmana; awui ming John hora."

⁶¹Kala athumna ali hānga, "Nawui athei-asābingwui ngachaili ming hi eina hokahai khipākha maleimana." ⁶²Kala athumna ashāvāli machut sāda, Zechariahna nao chi khi da ho khavai ningkhala da ngahāna.

⁶³Ana lungphek akha ningchānga kala kapi, "Awui ming John." Kala mi saikora matakhakhai. ⁶⁴Kala ngalāngda awui khamor rakhaowa kala awui male khalāmihaira, kala ana tui hānglaga ithumwui Avāli sochikata. ⁶⁵Khangachee china athumwui khongnainaobing saikorawuitungli tāshunga, kala ot saikora hi Judeawui kaphungram peichaoda hānghairasai. ⁶⁶Kala kashā saikorana ot hibing athumwui ningli khuisangda, "Chithākha angangnao hi khi sāhaokhala?" da hānga. Kaja ithumwui Avāwui pāng awuitungli leisai.

Zechariahna Marāna

⁶⁷Kala awui shāvā Zechariah Manglā Katharana pemtinghaoda marānda hānga, ⁶⁸"Israelwui ithumwui Avāli soranu, kaja ana awui mibingli rāzangda ngatangmihaira, ⁶⁹kala awui rao Davidwui shimkhurli ithumwui vang pangshapa Huikhame akha sāngasaka, ⁷⁰achālakha awui kathara marānbingwui khamor eina hānghaikasā thāda, ⁷¹ithumwui yangkashebingwui eina kala ithumli yangkakharing saikorawui pāng eina ana ithumli huimira; ⁷²ithumwui avā ngarāli ngashit kahai lukhamashan chitheimi khavai kala awui kathara tuingashit phaningung khavai, ⁷³ithumwui avā Abrahamli khangashit sākahai, ithumli khami khavai, ⁷⁴ithumwui yangkashebingwui pāng eina ithum kanshok ngasak tharan, khangachee maleila ali otram ngatha̱ khavai, ⁷⁵awui mangāli ithumwui mirin peida tharkhamatheng kala khamashung khangarong eina otram ngatha̱paira. ⁷⁶Kala nava, nao, Juikhamataiawui marān da hora; kaja awui apong ngarān khavai na Prohowui rida vāra, ⁷⁷athumwui morei pheokhamiwui mangā eina awui mibingli huikhamiwui theikakhui khami khavai, ⁷⁸ithumwui Avāwui lukhamashan pemting kahaiwui vang atungshong eina zimik kashokna ithumwuili rāra, ^c c v78 'Atungshong eina zimik kashok' hi Jishuwui aming akhana — ithumwui Avāna tangkhamangli khaleibingli chihovā kahai ngathor kahor, ithumli shimli thānmi khavai. ⁷⁹tangkhamangli kala kathi khaya̱li pamda khaleibingli kahor mira, kala ithumwui phei chingri kahaiwui apongli thānmira."

⁸⁰Nao chi haksangda, manglārinli yāng kāhaowa, kala Israelli phonglāk eina kashok zimiksho eina tangda lamhāngli pamhaowa.