Mi eng' bukuit
Bukuit

Koitetap Luka ne ki Tilyo

Logoiywek che myach ne po ineendet ne iyae piik komyee ne oo, ne nyiitaat rireenet agobo poorik, che kiisto, ak che petyotiin. Tinyei paragutap weeriit ne ki petyot ak kaboorunoik che tenden kosiir che po rireenetap Jeso.

Sura 1.

Amu kigetesta chaang' koip koitet ne kiteptoi che po tuguuk che kaagimiit kwenunnyo, ko uu ye ki kigoonech icheek che ki geer eng' konyekwak eng' taita ak ki poisyonigap ng'olyoot, ko anee kora, kingo asoome tuguuk tugul komyee kobunu taita, ka ariam ale asirchini inyee koitet ne kiteptoi, ee Theophilus ne torooreen, si inai imanda ne po tuguuk che ki kineetin.

Koyomchini Kwandanyo Zakaria Weeriit

Eng' peetuusyegap Herode, laitoryatap Judea, ki mi tisiindet ne kigoguure Zakaria eng' kebeberwegap tisiigap Abijah. Ak ki po tai Elizabeth osotyonnyi eng' iyoteetap Aron. a a v5 Ki kirutin tisiik eng' kebeberwek artam ak ang'wan che kiboisyoni eng' kesirtoitet eng' Temple; kebeberwetap Abijah ko ne po sisiit. Ki po imanda icheek tugul eng' taitap Kwandanyo, kowendote eng' ng'atuutikyik tugul ak kirwoogutikyik ko mata komi ng'ony. Ago ki ma kotinyei lakwa, amu ki sonen Elizabeth, ak ki kagokorren icheek tugul.

Ye kiboisyei ineendet ko uu tisiindet eng' taitap Kwandanyo ye ki mi kebeberwennyi poisyet, ko uu piteetap tisiik, ki kinyoorchin ineendet eng' kurgeet si koba koong'ung' ne tiliil ak kolal ubaani. Ak ki saaei tuiyosyetap piik tugul kokwen eng' sait ne kileet ubaani. b b v10 Ki kilei ubaani orin eng' koong'ung' ne tiliil eng' korooreet ak eng' kemeutyet ye kuiyei piik kokwen koba kosaa eng' saitinooto.

Yeityo konyoonji angeetap Kwandanyo ineendet, kotononi eunnyi ne po tai eng' kapkorosutap ubaani. Ki tumduma Zakaria kingo keer ineendet, ak ki nam ineendet ywaita. Koleenji angeet ineendet, “Amelkei ywei, Zakaria—amu kagogas saaetong'ung'. Isich Elizabeth osotyong'ung' weeriit; iguure kainennyi Johana. Ak itinye poiboiyet ak kagasetapkei; kobaibai chaang' eng' sigennyi. Koek ne oo eng' taitap Kwandanyo, ak amat koe divai anan ko ne itogunoti age tugul, ak kinyiit ineendet Kabuuset ne Tiliil agoi eng' moetap kamennyi. Ak iweekta chaang' eng' lagogap Israel kobendi ole mi Kwandanywa. Iwendi taitap Kwandanyo eng' sabeetap Elijah ak kimnateet, koweekta muguleldap kwondoik kobendi lagokwak, ak koweekta che ngelelteen kobendi ng'omnatetap piik che po imanda, si koyain Kwandanyo piik che kagechop.”

Koleenji Zakaria angeet, “Anai ne ano niito? Amu akorreen, ak kagosiirto kenyiisyegap osotyonnyu miising'.”

Ki wolji angeet ineendet, “Aa Gabriel, ne tononi eng' taitap Kwandanyo, ak kaiyoonwo amwaun ak akoitun logoiywek che myach chu. Ak nguno ko isilem, ak ma imuuch ing'alaal, agoi peetuut ne nyolu tuguuchu, amu ki ma iyan ng'aleegap, che nyolu eng' sait.”

Ak kirib piik Zakaria, ak ki kwong'yo amu ki ekerenotee koong'ung' ne tiliil miising'. Ye ki manda, ko ma komuuch kong'alaalji icheek, ak ki nai keele kaager ineendet ng'ang'utyet eng' koong'ung' ne tiliil. Ki boornotini icheek eunnyi ak kosilem. Ak ye ki kata peetuusyegap poisyennyi, koweektagei kwo koonnyi. Eng' let peetuusyechooto ki labo Elizabeth osotyonnyi, ak ki ung'ot ineegei eng' arawek mut, koleenji, “Ki ayaiywo Kwandanyo kou ni, eng' peetuusyek che ki gerwo, si kobees ng'ongisyennyu eng' piik.”

Iyokto Kwandanyo Gabriel ole mi Maria

Eng' arawet ne po lo ki iyookto Kwandanyo angeet Gabriel koba nganaseetap Galilaya ne kigoguure Nazareth, ole mi chepto ne pergeiyat ne kigeyachi koito ne po muren ne kigoguure Joseph, ne po kootap Daudi; ak ki po tai kaineetap chebooto Maria. Ki nyoonji ineendet koleenji, “Chamge, inyee ne ki kicham! Mi Kwandanyo kobooten.”

Ago ki iimgei miising' agobo ng'aleegap angeet, ak ki kwong'yo kole ngoro kagateet ne uu ni. Koleenji angeet ineendet, “Amelkei ywei, Maria, amu kaanyooru kaalyeet eng' Kwandanyo. Ilab ineegei eng' moeng'ung' ak isich weeriit, ak iguure kainennyi Jeso. Koek ne oo ak kiguure Weeriitap Ineendet Ne po Kamuktaet, ak igoochini Kwandanyo kaboorweetap laitornatetap Daudi kwandanyi, ak ilaitoran kootap Jakobo koigeny; mamei laitornatennyi.”

Koleenji Maria angeet, “Nyolu ne ano ni, amu aa chepto ne pergeiyat?”

Ki wolji angeet ineendet, “Nyoonji Kabuuset ne Tiliil inyee, ak urwokjin kimnateetap Ineendet Ne po Kamuktaet; si kiguure lakweet ne tiliil ne sigei Weeriitap Kwandanyo. Keero, kagolabo kora Elizabeth tupchendeng'ung' weeriit eng' korenatennyi—ko ni arawet ne po lo eng' ineendet ne kigoguure soon. Amu mamine kiy ne tos etee Kwandanyo.”

Koleenji Maria, “Aa otwogindetap Kwandanyo; ingonyolwo ko uu ye imwae.” Yeityo komanda angeet ineendet.

Korutoochi Maria Elizabeth

Eng' peetuusyechooto ki ng'eetyo Maria ak kolabat kwo emetap tuloonook, nganaseet ne po Judah, ak ki chut kootap Zakaria ak kogat Elizabeth. Kingo kas Elizabeth kagatap Maria, kowirwir lakweet eng' moennyi, ak kinyiiti Kabuuset ne Tiliil. Ki waach eng' kutit ne oo, kole, “Kaberuuren inyee eng' kwonyiik, kiberuuri logoegap moeng'ung'! Ak amu nee si koonigei anee ni, si konyoonjo kametap Kiptaiyandennyu? Amu kingo kas anee kagang'ung', kowirwir lakweet ne mi moennyu eng' boiboiyet. Kaberuuren ineendet ne kayan kole kosulda tuguuk che ki mwachi Kwandanyo.”

Songolyetap lelyet ne po Maria

Ak kole Maria, “Tororet saboondanyu Kwandanyo, ak paibai sabennyu eng' Kwandanyo, Yetindennyu, amu kigeer ming'innateetap otwogindennyi. Amu koigobune nguno koguur iriisyek tugul kole kaberuuren; amu kiyaiywo Ineendet ne po Kamuktaet tuguuk che oo, ak tiliil kainennyi. Ak mi rireenennyi icheeget che iywei ineendet koyob iriisyek koba iriisyek. Kaboorun kimnateet eng' eunnyi; kabirbiraan che menotik eng' kabwaatutigap mugulelwekwak; kaicho laitorinik koyob ng'echerokwak ak kaito che ming'inotin; kaanyiit che amei rubeet tuguuk che myach, ak che boorotin kaweekta mo tinyei kiy. Katoreti otwogindennyi Israel, eng' kabwaatetap rireenennyi, ko uu ye ki mwachi kwanisyekyok, Abraham ak iyotennyi agoi koigeny.”

Ak ki menye Maria kobooto ineendet arawek somok, yeityo koweektagei kwo koonnyi.

Sikyetap Johana

Ko kagoit sait ne kisikyi Elizabeth, ak kisich weeriit. Kogas piigap kokwennyi ak tiliikyik kole kaboorun Kwandanyo rireenennyi ne oo, ak kiboiboitu kobooto ineendet. Eng' peetuut ne po sisiit ko ki pwo komuratan lakweet, ak ki mache koguur kainennyi Zekariah ko uu kwandanyi, ago ki wolu kamennyi kole, “Acha; keguure Johana.”

Ak ki leenji ineendet, “Ma mi age eng' tiliiguk ne kiguure kainani.” Ak ki yachi kaboorunet kwandanyi, keteebe ole mache Zekariah koguure lakweet.

Ki soom keetit ne kisire ak kosir, kole, “Kainennyi ko Johana.” Ak ki kwong'yo chii age tugul. Ak eng' yooto koyatagis kutinnyi ak kowalak ng'eleptanyi, ak kong'alaal, koberuuri Kwandanyo. Ki but iywei eng' piigap kokwennywa tugul, ak kieng'alaaloti tuguuchu tugul eng' emetap tuloonoogap Judea. Ak ki konde che kagas tugul tuguuchu mugulelwekwak, kole, “Ko nee anyun ne koegu lakwani?” Amu ki mi eutap Kwandanyo kobooto ineendet.

Maotetap Zekaria

Ak ki nyiit kwandanyi Zekariah Kabuuset ne Tiliil, ak komaoteni, kole, “Ingiberuur Kwandanyo ne po Israel, amu korutoochi ak kowiir piikyik, ak kang'etunech kuinetap yetunet eng' kootap otwogindennyi Daudi, ko uu ye ki ng'alaal eng' kutitap maotikyik che tiliil keny, si kisarwech eng' puuniguk ak eng' eutap che wechech tugul; koboorchi kwanisyekyok rireenet ne ki kiyomis ak kobwaat arorutyennyi ne tiliil, muma ne ki aamun kwandanyo Abraham, si koonech, si echeek, kagisarech eng' eutap puuniguk, kiboisyechi ineendet keny ma kiywei, eng' tiliilindo ak imanda eng' tainnyi eng' peetuusyekyok tugul. Ak inyee, lakweet, keguure maotyotap Ineendet Ne po Kamuktaet; amu iwendi tai eng' Kiptaiyat si iyaktooi ortinwekyik, si iischi piikyik ng'omnatetap yetunet eng' nyoetap kaat ne po tengekwogikwak, amu rireenet ne tenden ne po Kwandanyo, ne korutyinech asiista ne ng'etu koyob barak, c c v78 'Asiista ne ng'etu koyob barak' ko kainetap Jeso — oldoeetap asiista ne iyookyin Kwandanyo icheeget che mi ng'oriin, si koindochech kwo kaa. koloolchin che tebee eng' ng'oriin ak eng' urwetap meet, koindochi keelyekyok koba ooreetap kalya.”

Ki eet lakweet, ko iimit eng' sabeet, ak ki menyei surkwen agoi peetuut ne ki toi koboorunkei eng' taitap Israel.