Labari Mai Tsari na Luka

Bisharar Babban Mai Warkarwa, cike da tausayi ga matalauta, waɗanda aka ware, da batattu. Tana ɗauke da misalin ɗa mubazzari da hotuna mafiya taushi na jinƙan Yesu.

Babi na 1.

Da yake mutane da yawa sun ɗau niyya su tsara labari mai tsari na abubuwan da aka cika a cikinmu, yadda waɗanda suka gani da idanunsu tun farko, waɗanda kuma suke bayin maganar, suka miƙa mana waɗannan labaru, ni ma, da na bi diddigin kome daidai tun daga farko, na ga ya kyautu in rubuta maka shi bi da bi, ya mai girma Tiyofilus, domin ka tabbatar da gaskiyar abubuwan da aka koya maka.

Uba Ya Yi wa Zakariya Alkawarin Ɗa

A zamanin Hirudus, sarkin Yahudiya, an yi wani firist mai suna Zakariya, na sashen firistoci na Abiya. Matarsa Alisabatu kuwa daga zuriyar Haruna take. ^a Dukansu biyu kuwa masu adalci ne a gaban Ubanmu, suna tafiya babu abin zargi cikin dukan umarnai da farillansa. Amma ba su da ɗa, domin Alisabatu bakararriya ce, kuma dukansu biyu sun tsufa ƙwarai.

To, yayin da yake aikin firist a gaban Ubanmu, a lokacin da sashensa ya kai ga yin hidima, bisa ga al'adar aikin firist, ƙuri'a ta zaɓe shi yă shiga wuri mai tsarki yă ƙona turare. Dukan taron jama'a kuwa suna addu'a a waje a sa'ar ƙona turaren. ^b

Sai wani mala'ikan Ubanmu ya bayyana gare shi, tsaye a dama ta bagaden turare. Da Zakariya ya gan shi, sai ya firgita, tsoro kuma ya kama shi. Mala'ikan ya ce masa, “Kada ka ji tsoro, Zakariya, gama an ji addu'arka. Matarka Alisabatu za ta haifa maka ɗa; ka kuma sa masa suna Yahaya. Za ka yi murna da farin ciki, mutane da yawa kuwa za su yi farin ciki saboda haihuwarsa. Zai zama mai girma a gaban Ubanmu, kada kuwa yă taɓa shan ruwan inabi ko wani abin sha mai sa maye, zai kuma cika da Ruhu Mai Tsarki tun yana cikin mahaifiyarsa. Zai kuma juyo da mutane da yawa na 'ya'yan Isra'ila zuwa ga Ubansu. Zai yi gaban Ubanmu da ruhu da ikon Iliya, yă juyo da zukatan ubanni zuwa ga 'ya'yansu, da marasa biyayya zuwa ga hikimar masu adalci, domin yă shirya wa Ubanmu jama'a shiryayyu.”

Zakariya ya ce wa mala'ikan, “Yaya zan san haka? Ga ni tsoho, matata kuma ta tsufa ƙwarai.”

Mala'ikan ya amsa masa ya ce, “Ni ne Jibra'ilu, wanda yake tsaye a gaban Ubanmu, an aiko ni in yi maka magana, in kuma kawo maka wannan bishara. Yanzu kuwa za ka zama bebe, ba za ka iya magana ba, har ranar da waɗannan abubuwa za su faru, domin ba ka gaskata da maganata ba, wadda za ta cika a lokacinta.”

Ana cikin haka, jama'a suna jiran Zakariya, suna mamakin dalilin da ya sa ya daɗe haka a cikin wuri mai tsarki. Da ya fito, bai iya yi musu magana ba, sai suka gane ya ga wahayi a cikin wuri mai tsarki. Ya dinga yi musu alama da hannu, ya kuma ci gaba da zama bebe. Da kwanakin hidimarsa suka cika, sai ya tafi gida. Bayan waɗannan kwanaki, matarsa Alisabatu ta yi ciki, ta kuma ɓoye kanta har wata biyar, tana cewa, “Ga abin da Ubanmu ya yi mini a kwanakin da ya kula da ni, don yă kawar da kunyata a cikin mutane.”

Uba Ya Aiki Jibra'ilu wurin Maryamu

A wata na shida, Ubanmu ya aiki mala'ika Jibra'ilu zuwa wani gari a Galili mai suna Nazarat, wurin wata budurwa da aka yi wa alkawarin aure da wani mutum mai suna Yusufu, na gidan Dawuda; sunan budurwar kuwa Maryamu ne. Mala'ikan ya zo wurinta ya ce, “Gaisuwa gare ki, ke da aka yi wa alheri! Ubanmu yana tare da ke.”

Amma ta damu ƙwarai saboda maganarsa, tana tunanin wace irin gaisuwa ce wannan. Mala'ikan ya ce mata, “Kada ki ji tsoro, Maryamu, gama kin sami tagomashi a wurin Ubanmu. Za ki yi ciki, ki haifi ɗa, ki kuma sa masa suna Yesu. Zai zama mai girma, za a kuma kira shi Ɗan Maɗaukaki, Ubanmu kuwa zai ba shi gadon sarautar ubansa Dawuda, zai kuma yi mulkin gidan Yakubu har abada; mulkinsa kuwa ba zai taɓa ƙarewa ba.”

Sai Maryamu ta ce wa mala'ikan, “Yaya wannan zai yiwu, da yake ni budurwa ce?”

Mala'ikan ya amsa mata ya ce, “Ruhu Mai Tsarki zai sauko miki, ikon Maɗaukaki kuma zai rufe ki da inuwa; saboda haka ɗa mai tsarki da za a haifa za a kira shi Ɗan Ubanmu. Ga shi kuwa, 'yar'uwarki Alisabatu ita ma ta yi cikin ɗa a tsufanta—wannan kuwa shi ne wata na shida gare ta, ita da ake ce da ita bakararriya. Gama babu abin da zai gagari Ubanmu.”

Maryamu ta ce, “Ni baiwar Ubanmu ce; bari yă faru da ni yadda ka faɗa.” Sai mala'ikan ya rabu da ita.

Maryamu Ta Ziyarci Alisabatu

A waɗannan kwanaki, Maryamu ta tashi da sauri ta nufi ƙasar tudu, zuwa wani gari a Yahuda, ta kuma shiga gidan Zakariya, ta gai da Alisabatu. Da Alisabatu ta ji gaisuwar Maryamu, sai jaririn da yake cikinta ya yi tsalle, ita kuma ta cika da Ruhu Mai Tsarki. Ta ɗaga murya da ƙarfi ta ce, “Mai albarka ce ki a cikin mata, mai albarka ne kuma amfanin cikinki! Me ya sa aka yi mini wannan daraja, har mahaifiyar Ubangijina ta zo wurina? Gama nan da nan da na ji gaisuwarki, sai jaririn da yake cikina ya yi tsalle don murna. Mai albarka ce wadda ta gaskata cewa za a cika abin da Ubanmu ya faɗa mata.”

Waƙar Yabo ta Maryamu

Sai Maryamu ta ce, “Raina yana ɗaukaka Ubanmu, ruhuna kuma yana farin ciki da Ubanmu, Mai Cetona, gama ya dubi ƙasƙancin baiwarsa. Gama daga yanzu dukan tsararraki za su ce da ni mai albarka; gama Mabuwayi ya yi mini manyan abubuwa, sunansa kuma mai tsarki ne. Jinƙansa kuma yana ga masu tsoronsa daga tsara zuwa tsara. Ya nuna ƙarfi da hannunsa; ya watsar da masu girman kai cikin tunanin zukatansu; ya saukar da masu iko daga kujerun sarautarsu, ya kuma ɗaga masu ƙasƙanci; ya ƙosar da masu yunwa da abubuwa masu kyau, mawadata kuma ya sallame su hannu wofi. Ya taimaki bawansa Isra'ila, yana tunawa da jinƙansa, kamar yadda ya yi alkawari ga kakanninmu, ga Ibrahim da zuriyarsa har abada.”

Maryamu ta zauna tare da ita wajen wata uku, sa'an nan ta koma gidanta.

An Haifi Yahaya

Da lokacin haihuwar Alisabatu ya cika, sai ta haifi ɗa. Maƙwabtanta da danginta suka ji Ubanmu ya nuna mata jinƙai mai girma, sai suka yi murna tare da ita. A rana ta takwas, suka zo su yi wa yaron kaciya, suna kuma so su sa masa suna Zakariya bisa sunan ubansa, amma mahaifiyarsa ta amsa ta ce, “A'a; za a kira shi Yahaya.”

Sai suka ce mata, “Babu wani a cikin danginki da ake kira da wannan suna.” Sai suka yi wa ubansa alama da hannu, suna tambaya ko wane suna Zakariya yake so a sa wa yaron.

Ya nemi allo, ya rubuta, “Sunansa Yahaya ne.” Sai kowa ya yi mamaki. Nan da nan sai bakinsa ya buɗe, harshensa kuma ya saku, ya kuma yi magana, yana yabon Ubanmu. Tsoro ya kama dukan maƙwabtansu, aka kuma yi ta zancen dukan waɗannan abubuwa a ko'ina a ƙasar tudu ta Yahudiya. Dukan waɗanda suka ji kuwa suka riƙe waɗannan abubuwa a zukatansu, suna cewa, “To, me wannan yaro zai zama?” Gama hannun Ubanmu yana tare da shi.

Zakariya Ya Yi Annabci

Ubansa Zakariya kuwa ya cika da Ruhu Mai Tsarki, ya yi annabci, yana cewa, “Yabo ya tabbata ga Ubanmu na Isra'ila, gama ya ziyarci mutanensa, ya kuma fanshe su, ya kuma tā da mana Mai Ceto mai iko a cikin gidan bawansa Dawuda, kamar yadda ya yi magana ta bakin annabawansa masu tsarki tun dā da, cewa za a cece mu daga magabtanmu da kuma daga hannun dukan masu ƙinmu; domin yă nuna jinƙan da ya yi alkawari ga kakanninmu, yă kuma tuna da alkawarinsa mai tsarki, rantsuwar da ya yi wa kakanmu Ibrahim, cewa zai ba mu, cewa mu, da aka cece mu daga hannun magabtanmu, mu bauta masa ba tare da tsoro ba, cikin tsarki da adalci a gabansa dukan kwanakinmu. Kai kuwa, ɗana, za a kira ka annabin Maɗaukaki; gama za ka yi gaban Ubangiji domin ka shirya hanyoyinsa, domin ka ba mutanensa sanin ceto ta wurin gafarar zunubansu, saboda yawan jinƙan Ubanmu, wanda ta wurinsa fitowar rana daga sama za ta ziyarce mu, ^c domin yă haskaka waɗanda suke zaune cikin duhu da cikin inuwar mutuwa, domin yă bi da ƙafafunmu a kan hanyar salama.”

Yaron kuwa ya yi girma, ya kuma yi ƙarfi a ruhu, yana zaune a jeji har ranar da ya bayyana a fili ga Isra'ila.