هغه بيا ژوندے شو
ښځې خوشبويي راوړي، ګوري چې ډبره رغړول شوې ده او یو ځوان سړی وايي چې هغه راپاڅېدلی دی. هغوی په وېره تښتي او هېچا ته څه نه وايي. عيسىٰ مریم مجدلیه ته او نورو ته ښکاره کېږي چې شاګردان یې خبره نه مني، بیا یوولس تنه ټول مخلوق ته لېږي.
16 1کله چې سبت ختم شو، نو مريم مګدلينى، د يعقوب مور مريم او سلومى خوشبودار شيان راواخستل چې هغه مسح کړى. 2د هفتې په اول ورځ، ډېر سحر وختى، نمر خاتو سره ئے، هغوئ قبر ته لاړې. 3هغوئ يو بل ته وئيل چې، ”زمونږ دپاره به د قبر د خولې نه دغه تيږه څوک ريبوى؟“ 4خو کله چې ئے وکتل، نو هغوئ وليدل چې هغه ډېره لويه تيږه مخکښے نه ريبل شوې وه.
5هغوئ قبر ته ننوتلې او وئے ليدل چې يو ځوان سپينې جامې اغوستې او ښى لاس ته ناست دے. هغوئ ډېرې حېرانې شوې. 6هغۀ ورته ووئيل چې، ”مۀ يرېږئ. تاسو عيسىٰ ناصرى لټوئ، هغه چې په سولۍ ووهلے شو. هغه بيا ژوندے شوے دے، هغه دلته نشته. ګورئ، دا هغه ځائ دے چرته چې هغوئ هغه پروت کړے وو. 7خو ځئ، د هغۀ مريدانو او پطروس ته ووايئ چې، ’هغه ستاسو نه مخکښے ګليل ته ځى. تاسو به هغه هلته ووينئ، لکه چې هغۀ تاسو ته وئيلى وو.‘“
8هغوئ ښځې رپېدلې او حېرانې وې، او د قبر نه وتښتېدې، او هيچا ته ئے هيڅ ونۀ وئيل، ځکه چې هغوئ وېرېدلې.
9د هفتې په اول ورځ سحر وختى کله چې عيسىٰ بيا ژوندے شو، نو هغه اول مريم مګدلينى ته ښکاره شو، هغه چې له دې نه ئے اوۀ بدروحونه شړلى وو. a a v9 تر ټولو زاړۀ نسخې د مرقوس انجيل په اتم آيت ختموى. ۹-۲۰ آيتونه په ډېرو وروستو نقلونو کښې موندلے شى او دلته چاپ شوى دى، لکه چې په ډېرو نوو انجيلونو کښې دى. 10هغې لاړه او هغو کسانو ته ئے خبر ورکړو چې د هغۀ سره وو، او چې ماتم او ژړا ئے کوله. 11کله چې هغوئ واورېدل چې عيسىٰ ژوندے دے او هغې ليدلے دے، نو هغوئ باور ونۀ کړو.
12له دې نه پس عيسىٰ په بل شکل کښې د هغوئ د دوو کسانو مخې ته ښکاره شو چې کله هغوئ په بانډه کښې روان وو. 13هغوئ بېرته لاړل او نورو ته ئے خبر ورکړو، خو هغوئ د هغوئ هم باور ونۀ کړو.
14وروستو عيسىٰ هغه يوولسو ته ښکاره شو چې کله هغوئ په ډوډۍ خوړلو ناست وو، او هغه ئے د بے ايمانۍ او د زړۀ د سختوالى په سبب ملامته کړل، ځکه چې هغوئ د هغه کسانو باور نۀ وو کړے چې هغه ئے بيا ژوندے شوے ليدلے وو.
15هغۀ هغوئ ته وفرمائيل چې، ”په ټوله دُنيا کښې لاړ شئ او ټول مخلوق ته زېرے ورسوئ. 16څوک چې ايمان راوړى او بپتسمه ترې واخلى، هغه به خلاصون مومى، خو څوک چې ايمان رانۀ وړى، هغه به مجرم ثابت کړے شى. 17او دا نښانونه به د هغه کسانو تابعدارى کوى چې ايمان راوړى: زما په نوم به هغوئ بدروحونه شړى، په نوو ژبو به خبرې کوى. 18هغوئ به ماران په لاسونو کښې اوچتوى، کۀ هغوئ قاتل زهر وڅکى، نو هغه به ورته نقصان ونۀ رسوى، هغوئ به ناروغانو باندې لاسونه ږدى، او هغوئ به روغ شى.“
19کله چې مالِک عيسىٰ هغوئ ته خبرې وکړلې، نو هغه آسمان ته پورته کړے شو او د زمونږ پلار ښى لاس ته کښېناستو. b b v19 کله چې زوئ خپل کار پوره کړو، نو هغه بېرته د خپل پلار څنګ ته لاړو — هغه د عزت ځائ چې د هغۀ سره ئے شريکوى. 20هغوئ ووتل او هر چرته ئے تبليغ وکړو، او مالِک د هغوئ سره کار کوو او د هغه نښانونو په وسيله ئے چې ورسره وو، د هغۀ کلام ثابتولو.
