Tai Jee Uthise
Mahila khan sugondh moshla loi ahhise, pathor tu ghurai diya aru ekjon jowan manuh Tai uthi jaise koi kene kotha kora paise, aru bhoi pora bhagi jaise, kunke bhi nokoi. Jisu Mariam Magdalini ke aru dusra khan ke dikhai dise, jun khan ke chella khan biswas na korise, aru pichete egarajon ke sob srishti phale pathai dise.
16 1Bisram din khotom huwa pichete, Mariam Magdalini, aru James laga ama Mariam, aru Salome khan pora, Tar ke tel lagabole jabole sugandh saman khan kinise. 2Hafta laga prothom din te, bisi phojur te, suryo ulua pichete, tarkhan kobor te jaise. 3Tarkhan ekjon-ekjon ke hudise, “Amikhan nimite kobor laga mukh pora pathor ke kun pora gorai dibo?” 4Kintu uporte sai thaka homoi te, bisi dangor thaka pathor tu agete pora gorai di kene thaka tarkhan dikhise.
5Tarkhan kobor bhitor te ghusi kene, boga kapra lagai thaka ekjon jawan manuh ke dyna phale bohi thaka dikhise. Tarkhan asurit hoise. 6Tai pora koise, “Bhoi na koribi. Tumikhan Najaret laga Jisu ke bisari ase, Kun ke Cross te morai dise. Tai jee uthise—Tai yate nai. Sabi, tarkhan Tai ke rakha jaga tu. 7Kintu jabi, Tar chella khan aru Peter ke kobi, ‘Tai tumikhan laga age te Galilee te jai ase. Tai tumikhan ke kowa nisena, tumikhan ta te Tai ke dikhibo.’”
8Kapi kene aru asurit hoi kene, mahila khan kobor pora polai jaise, kunke eku kowa nai—tarkhan bhoi khaise.
9Hafta laga prothom din te phojur te jee uthi kene, Jisu he, jun pora Tai sat-ta bhoot ulai disile, hei Mariam Magdalini ke poila dikhai dise. a a v9 Sob pora purana likha khan Mark ke 8 number verse te khotom kore. 9-20 verse khan pichete laga bisi nakol khan te pai, aru etiya laga bisi Bible khan nisena, eitu yate chapai dise. 10Tai jai kene, Tar logot te thaka khan ke, jun khan mon dukh kori kene kandi thakise, taikhan ke koise. 11Jisu jinda ase aru tai pora Tai ke dikhise koi kene huni kene, tarkhan biswas kora nai.
12Hei pichete, Jisu, alag rup te, gaon phale berai thaka duijon ke dikhai dise. 13Taikhan jai kene, dusra khan ke eitu koise, kintu taikhan ke bhi tarkhan biswas kora nai.
14Pichete, egaroh jon khana kha bohi thaka homoi te, Jisu taikhan ke dikhai dise, aru taikhan laga biswas nathaka aru mon tan huwa karne gali dise, kilemane Tai jee uthise koi kene dikha khan ke taikhan biswas kora nai.
15Tai taikhan ke koise, “Prithibi sob jagate jabi aru bonai diya sob jinis khan ke susamachar prachar koribi. 16Jun pora biswas kori kene baptizma loi, tai poritran pabo, kintu jun pora biswas nakore, tar ke dosi thik kori dibo. 17Aru biswas kora khan logot te eitu chihna khan thakibo: Moi laga nam te taikhan bhoot khan ke khedabo, notun bhasha khan te kotha kobo. 18Taikhan laga hath pora saph khan ke uthabo; jodi taikhan mori bole bikh khabo, eitu pora taikhan ke eku nuksan nakoribo; taikhan bemar manuh khan uporte hath rakhibo, aru taikhan bhal hoi jabo.”
19Taikhan ke kotha kowa pichete, Prabhu Jisu ke sorgo te uthai loi jaise, aru amar Pitri laga dyna hath te bohise. b b v19 Jitia Putro pora Tar kaam khotom korise, Tai nijor Pitri laga usor te wapas jaise — jun sonman laga jaga tu Tai Pitri logot te bhag loi. 20Taikhan bahar te jai kene sob jagate prachar korise, Prabhu he taikhan logot te kaam kori thakise, aru logote thaka chihna khan pora Tar kotha ke saboot kori dise.