ਮਰਕੁਸ 16

16 ¹ਜਦੋਂ ਸਬਤ ਦਾ ਦਿਨ ਬੀਤ ਗਿਆ, ਤਾਂ ਮਰਿਯਮ ਮਗਦਲੀਨੀ, ਯਾਕੂਬ ਦੀ ਮਾਤਾ ਮਰਿਯਮ, ਅਤੇ ਸਲੋਮੇ ਨੇ ਖੁਸ਼ਬੂਦਾਰ ਮਸਾਲੇ ਖਰੀਦੇ ਤਾਂ ਜੋ ਉਹ ਜਾ ਕੇ ਉਸ ਨੂੰ ਮਲ਼ਣ। ²ਹਫ਼ਤੇ ਦੇ ਪਹਿਲੇ ਦਿਨ ਬਹੁਤ ਸਵੇਰੇ, ਸੂਰਜ ਚੜ੍ਹਦੇ ਹੀ, ਉਹ ਕਬਰ ਕੋਲ ਗਈਆਂ। ³ਉਹ ਆਪਸ ਵਿੱਚ ਕਹਿਣ ਲੱਗੀਆਂ, “ਸਾਡੇ ਲਈ ਕਬਰ ਦੇ ਮੂੰਹ ਤੋਂ ਪੱਥਰ ਕੌਣ ਰੇੜ੍ਹ ਕੇ ਪਰੇ ਕਰੇਗਾ?” ⁴ਪਰ ਜਦੋਂ ਉਨ੍ਹਾਂ ਨੇ ਨਜ਼ਰ ਚੁੱਕ ਕੇ ਵੇਖਿਆ, ਤਾਂ ਪੱਥਰ—ਜੋ ਬਹੁਤ ਵੱਡਾ ਸੀ—ਪਹਿਲਾਂ ਹੀ ਰੇੜ੍ਹਿਆ ਹੋਇਆ ਸੀ।

⁵ਉਹ ਕਬਰ ਵਿੱਚ ਵੜੀਆਂ ਅਤੇ ਉਨ੍ਹਾਂ ਨੇ ਇੱਕ ਜੁਆਨ ਨੂੰ ਚਿੱਟਾ ਚੋਲਾ ਪਾਈ ਸੱਜੇ ਪਾਸੇ ਬੈਠਾ ਵੇਖਿਆ। ਉਹ ਘਬਰਾ ਗਈਆਂ। ⁶ਉਸ ਨੇ ਕਿਹਾ, “ਘਬਰਾਓ ਨਾ। ਤੁਸੀਂ ਯਿਸੂ ਨਾਸਰੀ ਨੂੰ ਲੱਭ ਰਹੀਆਂ ਹੋ, ਜਿਹੜਾ ਸਲੀਬ ਉੱਤੇ ਚੜ੍ਹਾਇਆ ਗਿਆ ਸੀ। ਉਹ ਜੀ ਉੱਠਿਆ ਹੈ—ਉਹ ਇੱਥੇ ਨਹੀਂ ਹੈ। ਵੇਖੋ, ਇਹ ਉਹ ਥਾਂ ਹੈ ਜਿੱਥੇ ਉਨ੍ਹਾਂ ਨੇ ਉਸ ਨੂੰ ਰੱਖਿਆ ਸੀ। ⁷ਪਰ ਜਾਓ, ਉਸ ਦੇ ਚੇਲਿਆਂ ਨੂੰ ਅਤੇ ਪਤਰਸ ਨੂੰ ਦੱਸੋ, ‘ਉਹ ਤੁਹਾਥੋਂ ਪਹਿਲਾਂ ਗਲੀਲ ਨੂੰ ਜਾਂਦਾ ਹੈ। ਤੁਸੀਂ ਉਸ ਨੂੰ ਉੱਥੇ ਵੇਖੋਗੇ, ਜਿਵੇਂ ਉਸ ਨੇ ਤੁਹਾਨੂੰ ਕਿਹਾ ਸੀ।’”

⁸ਕੰਬਦੀਆਂ ਅਤੇ ਹੈਰਾਨ ਹੋਈਆਂ, ਉਹ ਤੀਵੀਆਂ ਕਬਰ ਤੋਂ ਭੱਜ ਨਿੱਕਲੀਆਂ, ਅਤੇ ਕਿਸੇ ਨੂੰ ਕੁਝ ਨਾ ਦੱਸਿਆ—ਕਿਉਂਕਿ ਉਹ ਡਰ ਗਈਆਂ ਸਨ।

⁹ਹਫ਼ਤੇ ਦੇ ਪਹਿਲੇ ਦਿਨ ਸਵੇਰੇ ਜੀ ਉੱਠ ਕੇ, ਯਿਸੂ ਸਭ ਤੋਂ ਪਹਿਲਾਂ ਮਰਿਯਮ ਮਗਦਲੀਨੀ ਨੂੰ ਦਿਖਾਈ ਦਿੱਤਾ, ਜਿਸ ਵਿੱਚੋਂ ਉਸ ਨੇ ਸੱਤ ਭੂਤ ਕੱਢੇ ਸਨ। ^a a v9 ਸਭ ਤੋਂ ਪੁਰਾਣੀਆਂ ਹੱਥ-ਲਿਖਤਾਂ ਵਿੱਚ ਮਰਕੁਸ ਦਾ ਅੰਤ ਆਇਤ 8 ਉੱਤੇ ਹੁੰਦਾ ਹੈ। ਆਇਤਾਂ 9-20 ਬਹੁਤੀਆਂ ਬਾਅਦ ਦੀਆਂ ਨਕਲਾਂ ਵਿੱਚ ਮਿਲਦੀਆਂ ਹਨ ਅਤੇ ਇੱਥੇ ਛਾਪੀਆਂ ਗਈਆਂ ਹਨ, ਜਿਵੇਂ ਬਹੁਤੀਆਂ ਆਧੁਨਿਕ ਬਾਈਬਲਾਂ ਵਿੱਚ ਹੈ। ¹⁰ਉਸ ਨੇ ਜਾ ਕੇ ਉਨ੍ਹਾਂ ਨੂੰ ਦੱਸਿਆ ਜਿਹੜੇ ਉਸ ਦੇ ਨਾਲ ਰਹੇ ਸਨ, ਜੋ ਸੋਗ ਅਤੇ ਰੋਣਾ ਕਰ ਰਹੇ ਸਨ। ¹¹ਜਦੋਂ ਉਨ੍ਹਾਂ ਨੇ ਸੁਣਿਆ ਕਿ ਯਿਸੂ ਜੀਉਂਦਾ ਹੈ ਅਤੇ ਉਸ ਨੇ ਉਸ ਨੂੰ ਵੇਖਿਆ ਹੈ, ਤਾਂ ਉਨ੍ਹਾਂ ਨੇ ਵਿਸ਼ਵਾਸ ਨਾ ਕੀਤਾ।

¹²ਇਸ ਤੋਂ ਬਾਅਦ ਯਿਸੂ ਵੱਖਰੇ ਰੂਪ ਵਿੱਚ ਉਨ੍ਹਾਂ ਵਿੱਚੋਂ ਦੋ ਨੂੰ ਦਿਖਾਈ ਦਿੱਤਾ, ਜਦੋਂ ਉਹ ਪਿੰਡ ਵੱਲ ਤੁਰੇ ਜਾ ਰਹੇ ਸਨ। ¹³ਉਨ੍ਹਾਂ ਨੇ ਵਾਪਸ ਜਾ ਕੇ ਬਾਕੀਆਂ ਨੂੰ ਇਹ ਦੱਸਿਆ, ਪਰ ਉਨ੍ਹਾਂ ਨੇ ਉਨ੍ਹਾਂ ਦਾ ਵੀ ਵਿਸ਼ਵਾਸ ਨਾ ਕੀਤਾ।

¹⁴ਬਾਅਦ ਵਿੱਚ ਯਿਸੂ ਉਨ੍ਹਾਂ ਗਿਆਰਾਂ ਨੂੰ ਦਿਖਾਈ ਦਿੱਤਾ ਜਦੋਂ ਉਹ ਭੋਜਨ ਲਈ ਬੈਠੇ ਸਨ, ਅਤੇ ਉਸ ਨੇ ਉਨ੍ਹਾਂ ਦੀ ਬੇ-ਵਿਸ਼ਵਾਸੀ ਅਤੇ ਮਨ ਦੀ ਕਠੋਰਤਾ ਲਈ ਉਨ੍ਹਾਂ ਨੂੰ ਝਿੜਕਿਆ, ਕਿਉਂਕਿ ਉਨ੍ਹਾਂ ਨੇ ਉਨ੍ਹਾਂ ਦਾ ਵਿਸ਼ਵਾਸ ਨਹੀਂ ਕੀਤਾ ਸੀ ਜਿਨ੍ਹਾਂ ਨੇ ਉਸ ਨੂੰ ਜੀ ਉੱਠਿਆ ਵੇਖਿਆ ਸੀ।

¹⁵ਉਸ ਨੇ ਉਨ੍ਹਾਂ ਨੂੰ ਕਿਹਾ, “ਸਾਰੇ ਸੰਸਾਰ ਵਿੱਚ ਜਾਓ ਅਤੇ ਸਾਰੀ ਸ੍ਰਿਸ਼ਟੀ ਨੂੰ ਖੁਸ਼ਖ਼ਬਰੀ ਦਾ ਪ੍ਰਚਾਰ ਕਰੋ। ¹⁶ਜਿਹੜਾ ਵਿਸ਼ਵਾਸ ਕਰਦਾ ਅਤੇ ਬਪਤਿਸਮਾ ਲੈਂਦਾ ਹੈ ਉਹ ਬਚਾਇਆ ਜਾਵੇਗਾ, ਪਰ ਜਿਹੜਾ ਵਿਸ਼ਵਾਸ ਨਹੀਂ ਕਰਦਾ ਉਹ ਦੋਸ਼ੀ ਠਹਿਰਾਇਆ ਜਾਵੇਗਾ। ¹⁷ਅਤੇ ਵਿਸ਼ਵਾਸ ਕਰਨ ਵਾਲਿਆਂ ਦੇ ਨਾਲ ਇਹ ਨਿਸ਼ਾਨ ਹੋਣਗੇ: ਉਹ ਮੇਰੇ ਨਾਮ ਵਿੱਚ ਭੂਤ ਕੱਢਣਗੇ, ਨਵੀਆਂ ਬੋਲੀਆਂ ਬੋਲਣਗੇ। ¹⁸ਉਹ ਆਪਣੇ ਹੱਥਾਂ ਨਾਲ ਸੱਪ ਚੁੱਕਣਗੇ; ਜੇ ਉਹ ਕੋਈ ਜਾਨਲੇਵਾ ਜ਼ਹਿਰ ਪੀ ਲੈਣ, ਤਾਂ ਉਹ ਉਨ੍ਹਾਂ ਦਾ ਕੁਝ ਨਹੀਂ ਵਿਗਾੜੇਗਾ; ਉਹ ਰੋਗੀਆਂ ਉੱਤੇ ਹੱਥ ਰੱਖਣਗੇ, ਅਤੇ ਉਹ ਚੰਗੇ ਹੋ ਜਾਣਗੇ।”

¹⁹ਉਨ੍ਹਾਂ ਨਾਲ ਗੱਲ ਕਰਨ ਤੋਂ ਬਾਅਦ, ਪ੍ਰਭੂ ਯਿਸੂ ਸੁਰਗ ਵਿੱਚ ਚੁੱਕ ਲਿਆ ਗਿਆ ਅਤੇ ਸਾਡੇ ਪਿਤਾ ਦੇ ਸੱਜੇ ਹੱਥ ਬੈਠ ਗਿਆ। ^b b v19 ਜਦੋਂ ਪੁੱਤਰ ਨੇ ਆਪਣਾ ਕੰਮ ਪੂਰਾ ਕਰ ਲਿਆ, ਤਾਂ ਉਹ ਆਪਣੇ ਪਿਤਾ ਦੇ ਨਾਲ ਵਾਲੀ ਥਾਂ—ਆਦਰ ਦੀ ਉਸ ਥਾਂ ਨੂੰ ਪਰਤ ਗਿਆ ਜੋ ਉਹ ਉਸ ਦੇ ਨਾਲ ਸਾਂਝੀ ਕਰਦਾ ਹੈ। ²⁰ਉਹ ਨਿੱਕਲ ਪਏ ਅਤੇ ਹਰ ਥਾਂ ਪ੍ਰਚਾਰ ਕਰਦੇ ਰਹੇ, ਅਤੇ ਪ੍ਰਭੂ ਉਨ੍ਹਾਂ ਨਾਲ ਕੰਮ ਕਰਦਾ ਰਿਹਾ, ਅਤੇ ਨਾਲ ਹੋਣ ਵਾਲੇ ਨਿਸ਼ਾਨਾਂ ਦੁਆਰਾ ਆਪਣੇ ਬਚਨ ਦੀ ਪੁਸ਼ਟੀ ਕਰਦਾ ਰਿਹਾ।