Iye Alamuka
Akazi abweresa mafuta akununkhira, agumana mwala wakufudzulwa na nyamalumbwana mbalonga kuti Iye walamuka, mbathawa mwakugopa, mbakhonda kupanga munthu. Yezu aonekera kuna Maria Madhalena na kuna anango ale anyakupfundza akhonda kukhulupira, buluka mbatuma khumi na m'bodzi kuna cilengedwe consene.
16 1Pidamala Sabudu, Maria Madhalena, Maria mai wa Tiyago, na Salome agula mafuta akununkhira toera kuenda kumudzodza Iye. 2Namacibese kakamu, pa nsiku wakutoma wa sumana, dzuwa mbudamala kubuluka, aenda ku nthumbi. 3Abvundzana unango na ndzace, mbalonga: “Mbani anatikunushira mwala wa pa nsuwo wa nthumbi?” 4Mbwenye pidayang'ana iwo kudzulu, aona kuti mwala ukhadakunusirwa kale, maseze ukhali ukulu kakamu.
5Apita m'nthumbi mbaona mphale m'bodzi akhabvala nguwo yakucena, akhakhala ku dzanja yamadyo. Iwo adzumatirwa. 6Iye alonga kuti: “Lekani kudzumatirwa. Musasaka Yezu wa ku Nazareti, ule adakhomerwa pa ntanda. Iye alamuka, nkhabepo pano. Onani, pa mbuto pidamuikha iwo. 7Mbwenye ndokoni, mukapange anyakupfundzace na Pedhru kuti: ‘Iye akuenda patsogolo panu ku Galileya. Munadzamuona kweneko, ninga mudakupangani Iye.’”
8Akazi anewa atetemera mbadzumatirwa, mbathawa pa nthumbi; nee apanga munthu cinthu, thangwi akhagopa.
9Pidalamuka Iye namacibese pa nsiku wakutoma wa sumana, Yezu aonekera pakutoma kuna Maria Madhalena, ule Iye adam'bulusira madimonyo manomwe. a a v9 Malemba akale kakamu a Marko asamala pa vesi 8. Mavesi 9 mpaka 20 asagumanika m'makopya mazinji akudzacitwa patsogolo, mbaikhwa pano, ninga munacitira Mabiblya mazinji a nzidzi uno. 10Iye aenda mbakapanga ale akhali pabodzi na Iye, akhalira mbatsukwala. 11Pidabva iwo kuti Yezu ali maso, na kuti aonwa na iye, nee akhulupira.
12Pakumala penepo, Yezu aonekera na maonekero anango kuna awiri a iwo, akhafamba mbaenda ku minda. 13Iwo abwerera mbakapanga anango, mbwenye iwo nee aakhulupirambo.
14Pakumalisa, Yezu aonekera kuna khumi na m'bodzi mukhadya iwo, mbaasandika thangwi ya kusowa kwa cikhulupiro na kuwuma kwa mitima yawo, thangwi nee akhulupira ale adamuona Iye adalamuka.
15Iye aapanga kuti: “Ndokoni pa dziko yonsene yapantsi, mbamwaza Mphangwa Zadidi kuna pyonsene pyadalengwa. 16Ule anakhulupira mbabatizwa anadzapulumuswa, mbwenye ule anakhonda kukhulupira anadzatongwa. 17Pontho pidzindikiro ipi pinadzatowera ale anakhulupira: mu dzina yanga anadzabulusa madimonyo, mbalonga pilongero pipsa. 18Anadzaphata nyoka na manja awo; angamwa poyizoni yakupha, nee inadzaacitira cinthu cakuipa; anadzaikha manja awo pa akuduwala, iwo anadzapola.”
19Pakumala kulonga na iwo, Mbuya Yezu akwatirwa mbaenda kudzulu, mbakhala ku dzanja yamadyo ya Baba wathu. b b v19 Pidamala Mwana kucita basa yace, abwerera ku khundu ya Baba wace — mbuto ya mbiri inagawana Iye na Baba. 20Iwo abuluka mbaenda kamwaza mphangwa konsene-konsene, Mbuya mbaphata basa pabodzi na iwo, mbasimbisa fala yace na pidzindikiro pikhatowera.
