Yandi Me Vumbuka na Lufwa
Bakento nataka mananasi ya nsunga, talaka ti ba me nengumuna ditadi mpe ntwenya mosi yina tubaka ti yandi me vumbuka, mpe bawu kimaka na boma, ba zabisaka ata muntu mosi ve. Yesu monikinaka na Maliya ya mbanza Madala mpe na bantu ya nkaka yina bilandi mangaka na kukwikila, na manima fidisaka kumi na mosi na bigangwa nyonso.
16 1Ntangu kilumbu ya saba manaka, Maliya ya mbanza Madala, Maliya mama ya Zaki, mpe Salome sumbaka mananasi ya nsunga ya mbote samu na kwenda dukula yandi. 2Na suka-suka mingi ya kilumbu ya lumingu, kaka na manima ya kubasika ya ntangu, bawu kwendaka na ndyamu. 3Bawu yufulaka bawu na bawu: «Nani ke nengumuna beto ditadi na mwelo ya ndyamu?» 4Kasi ntangu bawu talaka na zulu, bawu talaka ti ba me nengumuna ditadi, yina vwandaka ya nene-nene.
5Bawu kotaka na ndyamu, mpe bawu talaka ntwenya mosi ya kulwata kiyunga ya mpembe, yina vwandaka ya kuvwanda na lubakala. Bawu yitukaka mingi. 6Yandi tubaka: «Beno yituka ve. Beno ke na kusosa Yesu muntu ya Nazaleti, yina ba komaka na kulunsi. Yandi me vumbuka na lufwa, yandi kele ve awa. Beno tala kisika yina bawu vwandaka tula yandi. 7Kasi beno kwenda, beno zabisa bilandi ya yandi mpe Pyele: “Yandi ke kwenda na ntwala ya beno na Ngalili. Beno ke tala yandi kuna, mutindu yandi zabisaka beno.”»
8Na kutekita mpe na kuyituka, bakento kimaka ndyamu, bawu zabisaka ata muntu mosi ve, samu ti bawu vwandaka na boma.
9Ntangu Yesu vumbukaka na lufwa na suka-suka ya kilumbu ya lumingu, yandi monikinaka na mbala ya ntete na Maliya ya mbanza Madala, yina yandi bingisaka bampeve ya yimbi nsambwadi. a a v9 Bamikanda ya ntama-ntama ke manisaka Malako na kavunga 8. Bavunga 9-20 ke monikinaka na bitini mingi ya manima mpe ba me soniki yawu awa, mutindu na Babibila mingi ya bubu yayi. 10Yandi kwendaka mpe zabisaka bayina vwandaka kintwadi na yandi, bayina vwandaka na kusala kifwidi mpe na kudila. 11Ntangu bawu kuwaka ti Yesu kele ya moyo mpe yandi me tala yandi, bawu kwikilaka yawu ve.
12Na manima, Yesu monikinaka na kifwani ya nkaka na bantu zole na kati ya bawu, yina vwandaka tambula na bilanga. 13Bawu vutukaka mpe zabisaka yawu na bayina ya nkaka, kasi bawu kwikilaka bawu mpe ve.
14Na manima, Yesu monikinaka na bantu kumi na mosi ntangu bawu vwandaka kudya na mesa, mpe yandi semba bawu samu ti bawu vwandaka na kiminu ve mpe samu ti bantima ya bawu vwandaka ngolo, samu ti bawu kwikilaka ve bayina talaka yandi ya kuvumbuka na lufwa.
15Yandi tubaka na bawu: «Beno kwenda na yinza ya muvimba mpe beno zabisa Nsangu ya Mbote na bima nyonso yina Nzambi yidikaka. 16Muntu yina ke kwikila mpe yina ba ke botika ke guluka, kasi muntu yina ke kwikila ve ke kuzwa kitumbu. 17Mpe bidimbu yayi ke landa bayina ke kwikilaka: na nkumbu ya munu bawu ke bingisa bampeve ya yimbi, bawu ke zonza na bandinga ya mpa. 18Bawu ke simba banyoka na maboko ya bawu; kana bawu nwa pwazon ya kufwa, yawu ke sala bawu yimbi ve; bawu ke tula maboko na zulu ya bambevo, mpe bawu ke vwanda mbote.»
19Na manima ya kuzonza na bawu, ba nataka Mfumu Yesu na zulu mpe yandi vwandaka na lubakala ya Tata ya beto. b b v19 Ntangu Mwana manisaka kisalu ya yandi, yandi vutukaka na lweka ya Tata ya yandi — kisika ya luzitu yina yandi ke kabulaka na yandi. 20Bawu basikaka mpe longisaka bisika nyonso, Mfumu vwandaka sala kintwadi na bawu, mpe vwandaka kumisa mambu ya yandi ngolo na bidimbu yina vwandaka landa yawu.