او دئرئلدی
آروادلار عطرئیّات گتئرئرلر، داشین دیرله‌دئلمئش اولدوغونو و دئرئلدئیئنی دیئن بئر جاوان اوغلانی تاپیرلار، و قورخودان قاچیب هچ کئمه بئر شی دِمئرلر. عئسا مجدللی مریمه و باشقالارینا گؤرونور، کی، شاگئردلر اونلارا ائنانمیرلار؛ سونرا اون‌بئری بوتون خئلقته گؤندَ‌رئر.
16 1سَبّت گونو قورتاراندان سونرا، مجدللی مریم، یعقوبون آناسی مریم و سالومه عطرئیّات ساتین آلدیلار کی، گدئب عئسانی مسح اتسئنلر. 2هفته‌نئن ائلک گونو، گونش طولوع ادن کئمی سحر چوخ ارکن قبئرئن یانینا گتدئلر. 3بئر-بئرئندن سوروشدولار: «کئم بئزئم اوچون داشی قبئرئن آغزیندان دیرله‌ده‌جک؟» 4آمّا باخاندا گؤردولر کی، چوخ بؤیوک اولان او داش آرتیق دیرله‌دئلئب.
5قبئرئن ائچئنه گئرئب گؤردولر کی، آغ جوبّه گیئنمئش بئر جاوان اوغلان صاغ طرفده اوتوروب. اونلار واهئمه‌یه دوشدولر. 6او ددی: «واهئمه‌یه دوشمه‌یئن. سئز چارمیخا چکئلمئش ناصئره‌لی عئسانی آختاریرسینیز. او دئرئلدی، بورادا دیئل. باخین، اونو یاتیردیقلاری یِر بودور. 7آمّا گدئن، اونون شاگئردلرئنه و پطروسا دیئن: ”او سئزدن قاباق جلئله گدئر. ددئیی کئمی، اونو اورادا گؤره‌جکسئنئز.“»
8آروادلار تئتره‌یه‌رک و مات قالاراق قبئردن قاچدیلار و هچ کئمه بئر شی دِمه‌دئلر، چونکی قورخموشدولار.
9عئسا هفته‌نئن ائلک گونو سحر ارکن دئرئلدئکدن سونرا، اوّلجه یدّی ائبلئس قوودوغو مجدللی مریمه گؤروندو. a a v9 لاپ قدئم اَل‌یازمالاری مرقوسو ۸-جی آیه‌ده قورتاریر. ۹-۲۰ آیه‌لر سونراکی اَکثر نوسخه‌لرده تاپیلیر و چوخ موعاصئر مقدّس کئتابلاردا اولدوغو کئمی بورادا یازیلیب. 10او گدئب عئسا ائله اولانلارا خبر وردی، او آداملار کی، یاس توتوب آغلاییردیلار. 11عئسانین صاغ اولدوغونو و مریمه گؤروندویونو اشئدنده، اونا ائنانمادیلار.
12اوندان سونرا عئسا، کَندده گَزَن اونلاردان ائکئسئنه آیری بئر صورتده گؤروندو. 13اونلار قاییدیب بونو اؤزگه‌لره خبر وردئلر، آمّا اونلارا دا ائنانمادیلار.
14سونرا عئسا، سوفره باشیندا اوتوران اون بئر شاگئرده گؤروندو و اونلارین ائمانسیزلیغینا و اورَکلرئنئن قاتیلیغینا گؤره اونلارا آجیقلاندی، چونکی اونو دئری گؤرَنلره ائنانمامیشدیلار.
15و اونلارا ددی: «بوتون دونیایا گدئن و خوش خبری بوتون خئلقته وعظ ادئن. 16ائمان گتئرئب تعمئد آلان نئجات تاپاجاق، آمّا ائمان گتئرمه‌ین محکوم اولاجاق. 17و بو علامتلر ائمان گتئرنلری موشایئعت اده‌جک: اونلار منئم آدیمدا ائبلئسلری قوواجاقلار، تزه دئللرده دانیشاجاقلار. 18اونلار اَللری ائله ائلانلار گؤتوره‌جکلر؛ اگر اؤلدوروجو زهر ائچسه‌لر، اونلارا ضرر اولمایاجاق؛ ناخوشلارین اوستونه اَل قویاجاقلار و اونلار صاغالاجاقلار.»
19رب عئسا اونلارا دانیشاندان سونرا، گؤیه قالدیریلدی و آتامیزین صاغیندا اوتوردو. b b v19 اوغول اؤز ائشئنی تامام ادندن سونرا، آتاسینین یانینا قاییتدی ـ او عئزّت یرئنه کی، آتاسی ائله بؤلوشور. 20اونلار چیخیب هر یرده وعظ اتدئلر، رب ده اونلارلا بئرلئکده ائشله‌یئب، اونلاری موشایئعت ادن علامتلرله اؤز سؤزونو تصدئق ادئردی.
