Wufutumukini
Bakhetu bánata mananasi ma tsudi, bámona ditadi dyabundumuka amana mwana yakala wuzimbula ni wáfutumuka, amana bátina mu bweya, bámenikinaku kwena mutu. Yesu wádimonikisa kwena Madiya mwisi Makatala yi kwena bakwawu bana balonguki bakala manga kwikila, amana wátuma kumi yi mosi kwena lusemunu lwosu.
16 1Kunima dya kumana kwa sabata, bakhetu básumba mananasi ma tsudi ndangu bakwenda bamutsita. Bawu bakala Madiya mwisi Makatala, Madiya ngudi wa Zyaki yi Salomeyi. 2Kilumbu kyatheti kya phosa, muna suka-suka ya lawu, kunima dya kulubuka kwa tangwa, bénda ku mazyamu. 3Báhyula bawu yi bawu: «Nani katúbundumwina ditadi ku mwelu wa mazyamu?» 4Kaasi buna batála ku zilu, bámona ditadi, dyakala kalunga tadi, dyamana bundumuka kedi.
5Bákota mu mazyamu amana bámona mwana yakala, wuvwatiki muzaka wa phembi, wazakala ku koku dya lubakala. Hanga bábanga. 6Wuzimbudi: «Lubangaku!» «Lusódila Yesu mwisi Nazaleti, wuna báhonda ha kitakani. Wufutumukini; keku haha. Talenu, homa hana bámusya. 7Kaasi lwenda, luzimbwala kwena balonguki bandi yi kwena Phetelu: “Kenda ku thwala yenu ku Ngadidi. Lukamúmona kuna, bwosu kázimbula kwena benu.”»
8Mu matekita yi mu kuyituka, bakhetu bátina ku mazyamu; bámenikinaku kwena mutu, mukuma bábanga.
9Buna káfutumuka muna suka ya kilumbu kyatheti kya phosa, Yesu wádimonikisa theti kwena Madiya mwisi Makatala, wuna kákwasa bitembu bya mbi tsambwadi. a a v9 Mikanda mya khulu ma lawu misi manisina Malaku ha vesi 8. Vesi 9-20 mibati solukana mu mikanda mya kunima mya mingi amana misonikini haha, bwosu bwenina mu Babibila bya pha bya mingi. 10Yandi wénda zimbula kwena bana bákala yi yandi, bana bakala sya khondu yi dila. 11Buna báyuka ni Yesu kenina wamoya, amana ni yandi kámumona, bákwikilaku.
12Kunima, Yesu wádimonikisa, mu kifwani kyahika, kwena bodi hana kati dya bawu bana bakala kangala ku mahata. 13Bávutuka, bazimbwala dyawu kwena bakwawu, kaasi bákwikilaku phi bawu.
14Kunima, Yesu wádimonikisa kwena bawu kumi yi mosi buna bakala kuna mesa, amana wábakaya mu kukonda kwa lukwikilu yi mbundu ya ngolu ya bawu, mukuma bákwikilaku kwena bana bámona yandi wufutumukini.
15Wubazimbwadini: «Lwenda muna tsi yosu amana lusamwana Musamu wa Bukheti kwena bihangwa byosu. 16Wuna wisi kwikila amana wubotikwa, kahúluka; kaasi wuna kisi kwikilaku, bamuzengila ndola. 17Amana bidimbu byabi bikalánda bana bisi kwikila: mu khumbu yama, bakakwása bitembu bya mbi, bazónza mu ndinga za pha. 18Bakabónga banyoka mu moku mawu; yuka ni banwa ndikila yina yisi honda, yakabáhangaku mbi; bakatúla moku kwena bambefu, amana bakabéluka.»
19Kunima dya kubazimbwala, Pfumu Yesu wázangulwa ku zilu amana wázakala ku koku dya lubakala lwa Tata wetu. b b v19 Buna Mwana kámanisa kisalu kyandi, wávutuka kuna kabeta ka Tata wandi — homa ha khembu hana kakhundakana yi yandi. 20Bálubuka, básamuna muma mwosu, Pfumu buna kakala sala yi bawu, mu kusyamisa ndinga yandi mu bidimbu bina bikala landa.
