John 11

11 ¹Lazarus kaho mi akha kazāhaowa, a Mary eina agatuiva̱ Marthawui kha̱ Bethanywui mina. ²Maryna Proholi nganamkaphā thao eina neomida awui kuisam eina awui phei mitmi. Kazāda khalei Lazarus chi awui achināna. ³Chieina gatuiva̱ngarāna ali pao chihovāda hānga, "Proho, nana leikashipa kazāhaira."

⁴Jishuna chi shālaga hānga, "Kazāt hi kathili katang mavaimara, kha ithumwui Avāwui tekhamateiwui vangna, chieina chi eina ithumwui Avāwui Naomayarawui tekhamatei phongra."

⁵Jishuna Martha, awui agatuiva̱ kala Lazarusli leishi. ⁶Chieina Lazarus kazāhaira kaji kashā tharan, a leiwui apamli zimiksho khani pamsangluishita.

⁷Chiwui thili ana sākhangatha̱bingli hānga, "Ithumna Judeali latunsa."

⁸Sākhangatha̱bingna ali hānga, "Ojā, Jihudibingna arui nali lunggui eina horthat khavai sai, kala na chili vāluishitrala?"

⁹Jishuna ngahānkai, "Zimikshokhali pung tharāda khani maleimalā? Ngashunshong kazata mi chi mangaphokmara, kaja ana okathui hiwui kahor thei. ¹⁰Kha ngayāshong kazata mi chi kongluira, kaja awuili kahor maleimana." ¹¹Chiwui thili ana athumli hānga, "Ithumwui ngasotnao Lazarus pihaira, kha ina ali ngakarthuisang khavai vaura."

¹²Chieina sākhangatha̱bingna ali hānga, "Proho, ana pihaiakha, a raira." ¹³Jishuna awui kathiwui pongli hānga, kha athumna ana pikakhuiwui pongli hānga da thoukai.

¹⁴Chieina Jishuna athumli shenglak eina hānga, "Lazarus thihaira, ¹⁵Ina chili maleisāhairawui vang, nathumwui vang eina I ringphā, chieina nathumna shitsangra. Kha ithumna awui pamli vāsa."

¹⁶Chieina Ngashira kaho Thomasna khangatei sākhangatha̱bingli hānga, "Ithumla vāsa, kala ali ngasoda thisa."

¹⁷Chieina Jishuna vākashung tharan, Lazarus chikhurli zimiksho mati arui leihaira kaji thei. ¹⁸Bethany chi Jerusalemwui eina mile khani sha̱kha katā nganailakhaira, ^a a v18 Stadia 15 chi mile khani sha̱kha katāna (km kathum sha̱kha katā). ¹⁹kala Jihudi mi kachungkhana athumwui achināwui vang wukkakhanang chithei khavai Martha eina Maryli rāhaira. ²⁰Marthana Jishu rārā kaji shā tharan, ali samphang khavai vai; kha Maryna shimli pamhaowa. ²¹Marthana Jishuli hānga, "Proho, na hili leisai kaja, ichinā mathisāmara. ²²Kha aruila, nana ithumwui Avāli kapopo chi ana nali khamira kaji ina thei."

²³Jishuna ali hānga, "Nachinā ringluishitra."

²⁴Marthana ali hānga, "Khanaowa zimikshowui ringkhalui atamli ana ringluishitra kaji ina thei."

²⁵Jishuna ali hānga, "I ringkhalui kala kharingna. Ili shitkasanga mi chi a thihailala ringra, ²⁶kala ringda kala ili shitkasanga mi kachiva̱ katang mathilakmara. Hi nana shitsangla?"

²⁷Ana ali hānga, "Mha, Proho; na Khrista, ithumwui Avāwui Naomayara, okathuili rārā mi china kaji ina shitsanga."

²⁸Hi hānghailaga, ana vāda achināva̱ Maryli ngathumsāda hoi: "Ojā hili leihaira, kala ana nali hoihaira." ²⁹Maryna hi shālaga ngalāngda ngakarthuida awuili vāhaowa. ³⁰Jishu kha̱lungli mazangrangsai; Marthana ali samphang kahai apam chili ava leikasāna. ³¹Shimli awuili ngasoda leida ali wukkakhanang chithei kasā Jihudibingna, Maryna ngalāngda ngakarthuida shokhaowa chi theilaga, ana chapkhavai chikhurli vākra da phaninglaga ali shurthuwa. ³²Maryna Jishuwuili rāda, ali theida, awui pheili mashunzangda hānga, "Proho, na hili leisai kaja, ichinā mathisāmara."

³³Jishuna ana chapngachāda leiping, kala awuili ngasoda rā kahai Jihudibingla chapngachāda leiping chi theilaga, ana amanglāli ringāda ningli saza̱lakhaowa.

³⁴Kala ana hānga, "Ali nathumna kachili chipetkhala?" Athumna ali hānga, "Proho, rāyanglu."

³⁵Jishuna chapa.

³⁶Chieina Jihudibingna hānga, "Yanglu, ana ali kathāda leishikhala!" ³⁷Kha athum ngakhumkhana hānga, "Mik khangapeopā chiwui mik theingasakpa mipā hina, ali mathiranu da sākhavai masārarmala?"

³⁸Chieina Jishuna awuklungli latluida ning saza̱lakhaoda chikhur chili vāhaowa. Chi lungkhur akhana, kala akhamorli lunggui eina shirenshāna.

³⁹Jishuna hānga, "Lunggui chi khuithuiulu." Marthana, kathipā chiwui achonva̱na, ali hānga, "Proho, ana ara nganamda leihaira, kaja a thihaiya zimiksho matina."

⁴⁰Jishuna ali hānga, "Nana shitsangakha ithumwui Avāwui tekhamatei chi theira da, ina nali mahāngmihaimala?"

⁴¹Chieina athumna lunggui chi khuithuihaowa. Jishuna yangkakā tharan hānga, "Avā, nana ili shāhaira da, ina nali ningshi. ⁴²Nana atam kachida ili shā kaji ina thei, kha nana ili kashirāt kaji athumna shitsang khavai, hili khanganing mibing chiwui vang ina hi hānga." ⁴³Ana hi hānghai tharan, ana panglāk eina vaosanga, "Lazarus, shokhaolu!"

⁴⁴Kathipā chi shokhaowa, aphei kala apāng khamanaka kachon eina khalapta, kala amai kachon eina fakhamkahaina. Jishuna athumli hānga, "Ali khalāmihaolu; zat ngasakhaolu."

Hanga̱ Kazipngaruma

⁴⁵Chieina Maryli rālaga Jishuna kasāhai chi kathei Jihudi mi kachungkhana ali shitsanghaowa. ⁴⁶Kha athum ngakhumkhana Phariseebingwuili vālaga, Jishuna kasāhai chi athumli unghānga. ⁴⁷Chieina pāngmon akhokabing eina Phariseebingna hanga̱ kazipngaruma, kala hānga, "Ithumna khi kasākhala? Kaja mipā hina matakhak kahai ot kachungkha sai. ⁴⁸Ithumna ali hithāda leiserakha, mi saikorana ali shitsangra, kala Romewui mibingna rālaga ithumwui pam kala ithumwui yur khanini khuithuira."

⁴⁹Kha athumwui ngachaili akha, chikum pāngmon kharei sākasā Caiaphasna, athumli hānga, "Nathumna khikha matheimana. ⁵⁰Mi katongawui vang mi akhali thikhangasakna, yur katonga shimānki kajiwui vanga, nathumwui vang phāmei kaji, nathumna matheimala?" ⁵¹Ana hi aningsasak eina mahāngmana; chikum pāngmon kharei sākasā chiwui vang, Jishuna yurwui vang thira da ana marānda hānga, ⁵²yurwui vangmāngli maningla, kha ithumwui Avāwui raithā kahai naongarābing akhali kazipkhui khavaila thira. ^b b v52 Kaiaphana ana theikahai lāngda kashunga da hānga. Jishuna Jihudi yurwui vangmāngli maningla, kha ithumwui Avāwui raithā kahai naongarā kachiva̱li shimkhur akhali kazipkhui khavaila kathira. ⁵³Chieina chithang eina thuida athumna ali shaothat khavai khangarān sai. ⁵⁴Chiwui vang Jishuna Jihudibingwui alungli phonglāk eina mazatluithuwa, kha lamhāng nganaili khalei Ephraim kaho keinungli zatthuihailaga, apam chili awui sākhangatha̱bingli ngasopama.

⁵⁵Jihudiwui Makānkhami phanit chi nganaihairasai, kala phanit chi sākida athum khalatta tharngasak khavai mi kachungkhana ngaleiwui eina Jerusalemli kāhaowa. ⁵⁶Chieina athumna Jishuli phāda, khorumshimli nganingda athum khalatta athumwui ngachaili, "Nathumna khi phaningkhala? Ana phanitli marāmarakhala?" da ngahān ngaroka. ⁵⁷Chitharan pāngmon akhokabing eina Phariseebingna, ali tukkhui khavai, kachikathāna a khalei pam theiakha unghāngranu da kasoi.