Yahaya 11 FHB Father's Heart Bible™

11 ¹Wani mutum mai suna Li'azaru yana fama da rashin lafiya, mutumin Betani ne, ƙauyen Maryamu da 'yar'uwarta Marta. ²Maryamu — wadda ɗan'uwanta Li'azaru yake fama da rashin lafiya — ita ce ta shafa wa Ubangiji turare mai ƙamshi, ta kuma goge ƙafafunsa da gashin kanta. ³Sai 'yan'uwan mata suka aika masa saƙo, suna cewa, “Ubangiji, wanda kake ƙauna yana fama da rashin lafiya.”

⁴Da Yesu ya ji haka, sai ya ce, “Wannan ciwo ba zai ƙare da mutuwa ba, sai dai domin ɗaukakar Ubanmu ne, domin a ɗaukaka Ɗan Ubanmu ta wurinsa.”

⁵Yesu kuwa yana ƙaunar Marta da 'yar'uwarta da Li'azaru. ⁶Saboda haka da ya ji Li'azaru yana fama da rashin lafiya, sai ya ƙara kwana biyu a inda yake.

⁷Sa'an nan bayan haka ya ce wa almajiran, “Mu koma Yahudiya.”

⁸Almajiran suka ce masa, “Mallam, ba jima ba Yahudawa suka yi ƙoƙarin su jajjefe ka da duwatsu, yanzu kuma za ka sāke komawa can?”

⁹Yesu ya amsa ya ce, “Ba sa'o'i goma sha biyu ne a rana ba? Duk wanda yake tafiya da rana ba zai yi tuntuɓe ba, domin yana ganin hasken wannan duniya. ¹⁰Amma in wani yana tafiya da dare, sai ya yi tuntuɓe, domin babu haske a cikinsa.” ¹¹Bayan haka, ya ce musu, “Abokinmu Li'azaru ya yi barci, amma zan je in tashe shi.”

¹²Sai almajiran suka ce masa, “Ubangiji, in barci ya yi, to, zai sami sauƙi.” ¹³Yesu dai yana magana ne a kan mutuwarsa, amma su suna tsammani barci na hutawa yake nufi.

¹⁴Saboda haka sai Yesu ya gaya musu a fili, “Li'azaru ya mutu, ¹⁵ina kuma murna saboda ku da ban kasance a can ba, domin ku gaskata. Amma mu je wurinsa.”

¹⁶Sai Toma, wanda ake kira Ɗan Tagwai, ya ce wa sauran almajiran, “Mu ma mu je, mu mutu tare da shi.”

¹⁷Saboda haka da Yesu ya iso, sai ya tarar Li'azaru ya riga ya yi kwana huɗu a kabari. ¹⁸Betani kuwa tana kusa da Urushalima, wajen mil biyu, ^a a v18 Istadiya goma sha biyar wajen mil biyu ne (kusan kilomita uku). ¹⁹Yahudawa da yawa kuwa suka zo wurin Marta da Maryamu domin su yi musu ta'aziyya a kan ɗan'uwansu. ²⁰Da Marta ta ji Yesu yana zuwa, sai ta fito ta tarye shi, amma Maryamu ta zauna a gida. ²¹Marta ta ce wa Yesu, “Ubangiji, da kana nan, da ɗan'uwana bai mutu ba. ²²Amma har yanzu ma na san duk abin da ka roƙi Ubanmu, zai ba ka.”

²³Yesu ya ce mata, “Ɗan'uwanki zai tashi.”

²⁴Marta ta ce masa, “Na san zai tashi a tashin matattu a rana ta ƙarshe.”

²⁵Yesu ya ce mata, “Ni ne tashin matattu, ni ne kuma rai. Duk wanda ya gaskata da ni zai rayu, ko da ya mutu, ²⁶kuma duk wanda yake raye ya kuma gaskata da ni ba zai taɓa mutuwa ba. Kin gaskata da wannan?”

²⁷Ta ce masa, “I, Ubangiji; na gaskata kai ne Almasihu, Ɗan Ubanmu, wanda yake zuwa duniya.”

²⁸Bayan ta faɗi haka, sai ta tafi ta kira 'yar'uwarta Maryamu a asirce, ta ce, “Mallam ya zo, yana kuma kiranki.” ²⁹Da Maryamu ta ji haka, sai ta tashi da sauri ta tafi wurinsa. ³⁰Yesu bai riga ya shiga ƙauyen ba tukuna, yana nan inda Marta ta tarye shi. ³¹Yahudawan da suke tare da ita a gida, suna yi mata ta'aziyya, da suka ga Maryamu ta tashi da sauri ta fita, sai suka bi ta, suna tsammani za ta kabari ne domin ta yi kuka a can. ³²Da Maryamu ta zo wurin Yesu, ta gan shi, sai ta fāɗi a ƙafafunsa, ta ce, “Ubangiji, da kana nan, da ɗan'uwana bai mutu ba.”

³³Da Yesu ya ga tana kuka, Yahudawan da suka zo tare da ita kuma suna kuka, sai ya yi nishi a ruhunsa, ya kuma damu ƙwarai.

³⁴Ya ce, “Ina kuka kwantar da shi?” Suka ce masa, “Ubangiji, zo ka gani.”

³⁵Yesu ya yi kuka.

³⁶Sai Yahudawa suka ce, “Ku dubi yadda yake ƙaunarsa!” ³⁷Amma waɗansunsu suka ce, “Wannan mutum da ya buɗe idanun makahon, bai iya ya kāre wannan daga mutuwa ba?”

³⁸Sai Yesu, yana cike da baƙin ciki a ransa, ya zo kabarin — wani kogo ne da aka rufe da dutse.

³⁹Yesu ya ce, “Ku kawar da dutsen.” Marta, 'yar'uwar wanda ya mutun, ta ce masa, “Ubangiji, yanzu ya riga ya yi wari, ai ya yi kwana huɗu da mutuwa.”

⁴⁰Yesu ya ce mata, “Ban gaya miki ba cewa in kin gaskata za ki ga ɗaukakar Ubanmu?”

⁴¹Sai suka kawar da dutsen. Yesu kuwa ya daga kai sama ya ce, “Ya Uba, na gode maka da ka ji ni. ⁴²Na san kullum kana jina, amma na faɗi haka ne saboda taron da suke tsaye a nan, domin su gaskata kai ka aiko ni.” ⁴³Da ya faɗi haka, sai ya ɗaga murya da ƙarfi ya ce, “Li'azaru, fito waje!”

⁴⁴Sai wanda ya mutun ya fito, ƙafafunsa da hannuwansa a ɗaure da ƙyallayen lilin, fuskarsa kuma a naɗe da zane. Yesu ya ce musu, “Ku kunce shi, ku bar shi yă tafi.”

Majalisa Ta Taru

⁴⁵Saboda haka Yahudawa da yawa da suka zo wurin Maryamu, suka kuma ga abin da Yesu ya yi, suka gaskata da shi. ⁴⁶Amma waɗansunsu suka tafi wurin Farisiyawa, suka gaya musu abin da Yesu ya yi. ⁴⁷Sai manyan firistoci da Farisiyawa suka kira majalisa, suka ce, “Mene ne za mu yi? Gama wannan mutum yana aikata alamu masu yawa. ⁴⁸In muka ƙyale shi haka, kowa zai gaskata da shi, Romawa kuma su zo su ƙwace wurinmu da al'ummarmu.”

⁴⁹Amma ɗayansu, Kayafas, babban firist na wannan shekara, ya ce musu, “Ba ku san kome ba ko kaɗan. ⁵⁰Ba ku gane ba cewa ya fi muku kyau mutum ɗaya yă mutu saboda jama'a, da dukan al'umma ta hallaka?” ⁵¹Bai faɗi haka daga kansa ba, sai dai tun da yake shi ne babban firist na wannan shekara, ya yi annabci cewa Yesu zai mutu saboda al'ummar, ⁵²ba don al'ummar kaɗai ba, har ma domin yă tara 'ya'yan Ubanmu da suka watse su zama ɗaya. ^b b v52 Kayafas ya yi magana mafi zurfi fiye da yadda ya sani. Yesu zai mutu ba don al'ummar Yahudawa kaɗai ba, har ma domin yă tara kowane ɗan Ubanmu da ya watse cikin iyali ɗaya. ⁵³Saboda haka tun daga wannan rana suka ƙulla shawara domin su kashe shi. ⁵⁴Saboda haka Yesu bai ƙara zagawa a fili a cikin Yahudawa ba, sai dai ya janye zuwa wani gari mai suna Ifraimu kusa da jeji, ya kuma zauna a can tare da almajiransa.

⁵⁵Idin Ƙetarewa na Yahudawa kuwa ya kusa, mutane da yawa kuma suka haura daga ƙauyuka zuwa Urushalima kafin idin domin su tsarkake kansu. ⁵⁶Suka yi ta neman Yesu, suna tambayar juna yayinda suke tsaye a cikin haikali, suna cewa, “Me kuke tsammani? Lalle ba zai zo idin ba, ko?” ⁵⁷Manyan firistoci da Farisiyawa kuwa sun riga sun ba da umarni cewa duk wanda ya san inda yake, dole yă bayar da labari, domin su kama shi.