Lazarọs onye Betani

Jisọs chere ụbọchị abụọ, bịarute mgbe ụbọchị anọ gafere, kwaakwa ákwá nʼili enyi ya. Ọ gwara Mata na ya bụ mbilite nʼọnwụ na ndụ, kelee Nna ya nʼolu dara ụda maka na ọ nụrụ ya, wee kpọpụta Lazarọs. Ọ bụ mgbe ahụ ka ndị kansụl kpebiri igbu ya.

Isi 11.

Otu nwoke aha ya bụ Lazarọs nọ nʼọrịa, onye si na Betani, obodo nta Meri na Mata nwanne ya nwanyị. Meri a, onye nwanne ya nwoke bụ Lazarọs nọ nʼọrịa, bụ onye tere Onyenwe anyị mmanụ na-esi isi ụtọ, werekwa agịrị isi ya hichaa ụkwụ ya. Ya mere, ụmụnne ndị nwanyị ahụ zigaara ya ozi, sị, “Onyenwe anyị, onye ị hụrụ nʼanya nọ nʼọrịa.”

Mgbe Jisọs nụrụ nke a, ọ sịrị, “Ọrịa a agaghị akwụsị nʼọnwụ, kama ọ bụ maka ebube Nna anyị, ka e wee nye Ọkpara Nna anyị otuto site na ya.”

Ugbu a, Jisọs hụrụ Mata na nwanne ya nwanyị na Lazarọs nʼanya. Ya mere, mgbe ọ nụrụ na Lazarọs nọ nʼọrịa, ọ nọgidere ụbọchị abụọ ọzọ nʼebe ọ nọ.

Emesịa, ọ gwara ndị na-eso ụzọ ya, sị, “Ka anyị laghachi na Judia.”

Ndị na-eso ụzọ ya sịrị ya, “Rabaị, ndị Juu chọrọ iji nkume tugbuo gị na nso nso a, ị na-alaghachikwa nʼebe ahụ?”

Jisọs zara sị, “Ọ bụ na awa iri na abụọ adịghị nʼotu ụbọchị? Onye ọbụla na-eje ije nʼehihie agaghị asụ ngọngọ, nʼihi na ọ na-ahụ ìhè nke ụwa a. Ma ọ bụrụ na mmadụ na-eje ije nʼabalị, ọ ga-asụ ngọngọ, nʼihi na ìhè adịghị nʼime ya.” Mgbe o kwuchara nke a, ọ gwara ha, sị, “Enyi anyị Lazarọs arahụla ụra, ma ana m aga ịkpọte ya.”

Ya mere, ndị na-eso ụzọ ya sịrị ya, “Onyenwe anyị, ọ bụrụ na ọ rahụla ụra, ọ ga-agbake.” Ma Jisọs nọ na-ekwu banyere ọnwụ ya, ha chere na ọ na-ekwu maka ụra nkịtị.

Ya mere, Jisọs gwara ha nʼụzọ doro anya, sị, “Lazarọs anwụọla, obi dị m ụtọ nʼihi unu na anọghị m nʼebe ahụ, ka unu wee kwere. Ma ka anyị gakwuru ya.”

Ya mere, Tọmọs, onye a na-akpọ Ejima, gwara ndị na-eso ụzọ ya ndị ọzọ, sị, “Ka anyị gakwaa, ka anyị soro ya nwụọ.”

Ya mere, mgbe Jisọs rutere, ọ chọpụtara na Lazarọs anọọlarị nʼili ụbọchị anọ. Betani dị nso Jerusalem, ihe dị ka maịl abụọ nʼebe dị anya, ^a ọtụtụ nʼime ndị Juu abịakwutela Mata na Meri ịkasi ha obi banyere nwanne ha nwoke. Mgbe Mata nụrụ na Jisọs na-abịa, ọ gara izute ya; ma Meri nọdụrụ ala nʼime ụlọ. Mata sịrị Jisọs, “Onyenwe anyị, a sị na ị nọ nʼebe a, nwanne m nwoke agaraghị anwụ. Ma ọbụladị ugbu a, amaara m na ihe ọbụla ị rịọ Nna anyị, ọ ga-enye gị.”

Jisọs sịrị ya, “Nwanne gị nwoke ga-ebili ọzọ.”

Mata sịrị ya, “Amaara m na ọ ga-ebili ọzọ na mbilite nʼọnwụ nke ụbọchị ikpeazụ.”

Jisọs gwara ya, sị, “Abụ m mbilite nʼọnwụ na ndụ. Onye ọbụla kwere na m ga-adị ndụ, ọ bụ ezie na ọ nwụrụ anwụ, onye ọbụla dịkwa ndụ ma kwere na m agaghị anwụ ma ọlị. Ị kwere nke a?”

Ọ sịrị ya, “Ee, Onyenwe anyị; ekwere m na ị bụ Kraịst, Ọkpara Nna anyị, onye ahụ na-abịa nʼụwa.”

Mgbe o kwuchara nke a, ọ gara kpọọ nwanne ya nwanyị bụ Meri na nzuzo, sị, “Onye Nkuzi ahụ nọ ebe a, ọ na-akpọ gị.” Mgbe Meri nụrụ nke a, o biliri ọsịịsọ gakwuru ya. Jisọs abanyebeghị nʼobodo nta ahụ; ọ ka nọ nʼebe Mata zutere ya. Ndị Juu ndị ya na ha nọ nʼime ụlọ, ndị na-akasi ya obi, hụrụ ka Meri biliri ọsịịsọ pụọ; ha soro ya, na-eche na ọ na-aga nʼili iga bee ákwá nʼebe ahụ. Meri bịakwutere Jisọs, hụ ya, daa nʼụkwụ ya, sị, “Onyenwe anyị, a sị na ị nọ nʼebe a, nwanne m nwoke agaraghị anwụ.”

Mgbe Jisọs hụrụ ka ọ na-ebe ákwá, na ndị Juu ndị so ya bịa na-ebekwa ákwá, ọ sụrụ ude nʼime mmụọ ya, nọrọkwa na mwute.

Ọ sịrị, “Olee ebe unu tọgbọrọ ya?” Ha sịrị ya, “Onyenwe anyị, bịa hụ.”

Jisọs bere ákwá.

Ya mere, ndị Juu sịrị, “Lee ka o si hụ ya nʼanya!” Ma ụfọdụ nʼime ha sịrị, “Nwoke a meghere anya onye ìsì, ọ pụghị ime ka nwoke a ghara ịnwụ?”

Ya mere, Jisọs, onye obi gbawara ọzọ nʼime onwe ya, bịara nʼili ahụ—ọ bụ ọgba nkume nke e ji nkume mechie ọnụ ya.

Jisọs sịrị, “Wepụ nkume ahụ.” Mata, nwanne nwoke ahụ nwụrụ anwụ, sịrị ya, “Onyenwe anyị, ọ ga-abụ na ọ na-esi isi ugbu a, nʼihi na ọ nwụọla ụbọchị anọ.”

Jisọs sịrị ya, “Ọ bụ na agwaghị m gị na ọ bụrụ na i kwere, ị ga-ahụ ebube Nna anyị?”

Ya mere, ha wepụrụ nkume ahụ. Jisọs weliri anya ya elu sị, “Nna, ekele m gị nʼihi na ị nụrụ olu m. Amaara m na ị na-anụ olu m mgbe niile, ma ekwuru m nke a nʼihi igwe mmadụ guzo nʼebe a, ka ha wee kwere na ọ bụ gị zitere m.” Mgbe o kwuchara nke a, o tiri mkpu nʼoke olu, sị, “Lazarọs, pụta!”

Nwoke ahụ nwụrụ anwụ pụtara, ejiri akwa ọcha kee ya ụkwụ na aka, werekwa akwa kechie ihu ya. Jisọs sịrị ha, “Tọpụ ya; hapụ ya ka ọ laa.”

Nzukọ Ndị Ndu Ahụ Ezukọta

Ya mere, ọtụtụ nʼime ndị Juu ndị bịakwutere Meri ma hụ ihe Jisọs mere kwere na ya. Ma ụfọdụ nʼime ha gakwuru ndị Farisii gwa ha ihe Jisọs mere. Ya mere, ndịisi nchụàjà na ndị Farisii kpọkọtara nzukọ ndị ndu ahụ, sị, “Gịnị ka anyị na-eme? Nʼihi na nwoke a na-arụ ọtụtụ ihe ịrịbaama. Ọ bụrụ na anyị ahapụ ya, mmadụ niile ga-ekwere na ya, ndị Rom ga-abịakwa wepụ ma ebe anyị ma mba anyị.”

Ma otu nʼime ha, bụ Kaịafas, onye bụ onyeisi nchụàjà nʼafọ ahụ, gwara ha, sị, “Unu amaghị ihe ọbụla ma ọlị. Ọ bụ na unu adịghị ahụ na ọ ka mma nye unu ka otu mmadụ nwụọ maka ndị mmadụ karịa ka mba niile laa nʼiyi?” O kwughị nke a nʼonwe ya; dịka onyeisi nchụàjà nʼafọ ahụ, o buru amụma na Jisọs ga-anwụ maka mba ahụ, ọ bụghị naanị maka mba ahụ, kamakwa iji chịkọta nʼotu ụmụ Nna anyị ndị gbasasịrị agbasasị. ^b Ya mere, site nʼụbọchị ahụ gawa, ha gbara izu igbu ya. Ya mere, Jisọs akwaghị aga ihu ọha nʼetiti ndị Juu, kama ọ pụrụ gawa nʼotu obodo a na-akpọ Ifrem nke dị nso ọzara, ya na ndị na-eso ụzọ ya nọrọ nʼebe ahụ.

Mmemme Ngabiga nke ndị Juu dị nso, ọtụtụ mmadụ sitere nʼime obodo rịgoro Jerusalem tupu ya eruo, ka ha wee doo onwe ha ọcha. Ya mere, ha na-achọ Jisọs, na-ajụrịta onwe ha mgbe ha guzo nʼụlọnsọ ukwu ahụ, sị, “Gịnị ka unu chere? Ọ ga-abụ na ọ gaghị abịa na mmemme ahụ?” Ndịisi nchụàjà na ndị Farisii enyela iwu na onye ọbụla maara ebe ọ nọ aghaghị ịkọ ya, ka ha wee jide ya.