John 11 FHB Father's Heart Bible™

11 ¹Bethany gaon, Mary aru tar bhoini Martha laga gaon te, Lazarus naam ekjon manuh bemar thakise. ²Eitu Mary tu, kun laga bhai Lazarus bemar thakise, Prabhu ke sugandh tel lagai dise aru tar laga chul pora Tar theng puchi dise. ³Karne bhoini khan pora Tar logot te khobor pathaise, koi kene, “Prabhu, Apuni kun ke morom kore, tai bemar ase.”

⁴Eitu huni kene, Jisu koise, “Eitu bemar tu mrityu te khotom nahobo, kintu amar Pitri laga mahima karne ase, eneka kene amar Pitri laga Putro tu eitu pora mahima pabo.”

⁵Etiya Jisu pora Martha aru tar bhoini aru Lazarus ke morom korise. ⁶Karne Lazarus bemar ase koi kene huna pichete, Tai thaka jagate aru dui din thaki jaise.

⁷Titia eitu pichete Tai chella khan ke koise, “Ahh, amikhan Judea te wapas jabo.”

⁸Chella khan pora Tar ke koise, “Rabbi, etiya he Yehudi khan pora Apuni ke pathor maribole kosis korise, aru Apuni ta te wapas jai ase?”

⁹Jisu jawab dise, “Din te baroh ghonta nai naki? Kun manuh din te berai, tai thokar nakhabo - tai eitu prithibi laga puhor dikhe. ¹⁰Kintu jodi kun manuh rati te berai, tai thokar khai, kilemane tar bhitor te puhor nai.” ¹¹Eitu pichete, Tai tarkhan ke koise, “Amar sathi Lazarus ghumai jaise, kintu Moi tai ke uthai dibole jai ase.”

¹²Karne chella khan pora Tar ke koise, “Prabhu, jodi tai ghumai jaise, tai bhal hoi jabo.” ¹³Etiya Jisu tai laga mrityu laga kotha koi thakise, kintu tarkhan bhabise Tai asol ghuma laga kotha koi ase.

¹⁴Karne titia Jisu khula-khula tarkhan ke koise, “Lazarus mori jaise, ¹⁵Moi ta te thaka nai, tumikhan nimite Moi khushi ase, eneka kene tumikhan biswas koribo. Kintu ahh, amikhan tar logote jabo.”

¹⁶Karne Thomas, kun ke Jurwa koi, dusra chella khan ke koise, “Amikhan bhi jabo, aru tar logote mori jabo.”

¹⁷Karne Jisu ponchi juwa somoite, Tai paise Lazarus kobor te char din hoi juwa thakise. ¹⁸Bethany to Jerusalem laga usorte, prai dui mile dur te thakise, ^a a v18 Pondroh stadia to prai dui mile thakise (prai 3 km). ¹⁹aru bisi Yehudi khan Martha aru Mary logote tarkhan laga bhai nimite shanti dibole ahhise. ²⁰Jisu ahhi ase koi kene Martha huna somoite, tai Tar ke lok koribole jaise; Mary to ghor te bohi thakise. ²¹Martha pora Jisu ke koise, “Prabhu, jodi Apuni yate thakise, moi laga bhai namoribo thakise. ²²Kintu etiya bhi moi jane, Apuni amar Pitri ke ji mangibo, Tai Apuni ke dibo.”

²³Jisu pora tai ke koise, “Tumar bhai aru jee uthibo.”

²⁴Martha pora Tar ke koise, “Moi jane tai hekh din te punoruthan te aru jee uthibo.”

²⁵Jisu pora tai ke koise, “Moi he punoruthan aru jivon ase. Kun Moi ke biswas kore, tai morile bhi jinda thakibo, ²⁶aru kun jinda ase aru Moi ke biswas kore, tai kitia bhi namoribo. Tumi eitu biswas kore naki?”

²⁷Tai pora Tar ke koise, “Hoi, Prabhu; moi biswas kore Apuni Khrista ase, amar Pitri laga Putro, kun prithibi te ahhi ase.”

²⁸Eitu koi kene, tai jai kene tai laga bhoini Mary ke lukai kene matise: “Guruji yate ahhise—Tai tumi ke mati ase.” ²⁹Mary eitu huna somoite, tai joldi uthi kene Tar logote jaise. ³⁰Jisu etiya tak gaon bhitor te ahha nai; Tai etiya bhi Martha pora Tar ke lok kora jagate thakise. ³¹Ghor te tai logote thaka Yehudi khan, tai ke shanti di thaka khan, Mary ke joldi uthi kene juwa dikhise; tarkhan pichete jaise, tai kobor te kandibole jai ase koi kene bhabise. ³²Mary Jisu logote ahhi kene, Tar ke dikhi kene, Tar theng te giri kene, koise, “Prabhu, jodi Apuni yate thakise, moi laga bhai namoribo thakise.”

³³Jisu tai kandi thaka, aru tai logote ahha Yehudi khan bhi kandi thaka dikhi kene, Tai atma te dangor dukh korise aru mon chinta hoise.

³⁴Aru Tai koise, “Tumikhan tai ke kot te rakhise?” Tarkhan pora Tar ke koise, “Prabhu, ahhi kene sabi.”

³⁵Jisu kandise.

³⁶Karne Yehudi khan koise, “Sabi Tai tai ke kineka morom korise!” ³⁷Kintu tarkhan bhitor te kunba koise, “Eitu manuh kun andha manuh laga suku khuli dise, Tai eitu manuh ke mora pora bachabole napare thakise naki?”

³⁸Karne Jisu, aru bar Tai nijor bhitor te dangor dukh kori kene, kobor logote ahhise—eitu ekta gufa thakise aru tar mukh te ekta pathor rakhise.

³⁹Jisu koise, “Pathor tu hatai dibi.” Mora manuh laga bhoini Martha pora Tar ke koise, “Prabhu, etiya tak tai gundh ulabo—tai char din pora mori ase.”

⁴⁰Jisu pora tai ke koise, “Moi tumi ke kowa nai naki: jodi tumi biswas kore tumi amar Pitri laga mahima dikhibo?”

⁴¹Karne tarkhan pathor tu hatai dise. Jisu upor te sai kene koise, “Pitri, Apuni Moi laga kotha hunise karne Moi Apuni ke dhanyavad diye. ⁴²Moi jane Apuni hodai Moi laga kotha hune, kintu yate rukhi thaka manuh khan nimite Moi eitu koise, eneka kene tarkhan Apuni Moi ke pathaise koi kene biswas koribo.” ⁴³Eitu kowa pichete, Tai dangor awaj te hala kori koise, “Lazarus, bahar ulai ahhibi!”

⁴⁴Mora manuh bahar ulai ahhise, tar theng aru hath to kapor laga tukra khan pora bandhi rakhise, aru tar mukh to kapor pora bandhise. Jisu pora tarkhan ke koise, “Tai ke khuli dibi; tai ke jabole dibi.”

Sabha tu Ekheta Hoise

⁴⁵Karne Mary logote ahha aru Jisu ki korise eitu dikha bisi Yehudi khan Tar ke biswas korise. ⁴⁶Kintu tarkhan bhitor te kunba Pharisee khan logote jai kene Jisu ki korise eitu tarkhan ke koise. ⁴⁷Karne mukhyo purohit khan aru Pharisee khan sabha ekheta kori kene koise, “Amikhan ki kori ase? Kilemane eitu manuh bisi chihna khan dikhai ase. ⁴⁸Jodi amikhan Tai ke eneka chari dibo, sob manuh Tar ke biswas koribo, aru Rome manuh khan ahhi kene amar jaga aru amar desh duita loi jabo.”

⁴⁹Kintu tarkhan bhitor te ekjon, Caiaphas, hei saal laga moha-purohit, tarkhan ke koise, “Tumikhan eku bhi na jane. ⁵⁰Pura desh noshto huwa pora, manuh khan nimite ekjon manuh mora to tumikhan nimite bhal ase, eitu tumikhan nabuje naki?” ⁵¹Tai nijor pora eitu kowa nai; hei saal laga moha-purohit hoi kene, tai bhabobani korise Jisu desh nimite moribo, ⁵²khali desh nimite nohoi, kintu chatki juwa amar Pitri laga bacha khan ke ekta te joma koribole bhi. ^b b v52 Caiaphas tai jana pora bhi bhal koise. Jisu khali Yehudi desh nimite nohoi, kintu chatki juwa amar Pitri laga sob bacha ke ekta poribar te joma koribole moribo. ⁵³Karne hei din pora tarkhan Tai ke morai dibole chalna korise. ⁵⁴Karne Jisu aru Yehudi khan majot te khula-khula berai thaka nai, kintu Tai jongol usorte Ephraim naam ekta sheher te jai jaise, aru ta te tai laga chella khan logote thakise.

⁵⁵Yehudi khan laga Nistar Porob usorte thakise, aru bisi manuh nijor ke sapha koribole eitu laga age te desh pora Jerusalem te uthi jaise. ⁵⁶Karne tarkhan Jisu ke bisarise, mondir te rukhi kene ekjon-ekjon ke hudise, “Tumikhan ki bhabe? Tai porob te nahibo, hoi na nohoi?” ⁵⁷Mukhyo purohit khan aru Pharisee khan hukum di thakise, kun manuh Tai kot te ase eitu jane, tai khobor dibo lage, eneka kene tarkhan Tai ke dhori bo pare.