Juwau 11 FHB Father's Heart Bible™

11 ¹Mamuna m'bodzi akhacemerwa Lazaro akhaduwala, wa ku Bhetania, mudzi wa Mariya na mulongo wace Marta. ²Mariya, ule m'bale wace Lazaro akhaduwala, ndiye adadzodza Mbuya na mafuta akununkhira mbapukuta miyendo yace na tsisi zace. ³Natenepo alongo atumiza mphangwa kuna Iye, mbalonga tenepa: “Mbuya, ule munamufuna Imwe ali kuduwala.”

⁴Pidabva Iye pyenepi, Yezu alonga tenepa: “Utenda uyu nkhabe kumalisira mu kufa tayu, mbwenye ndi wa mbiri ya Baba wathu, toera Mwana wa Baba wathu apaswe mbiri kubulukira mwa iwo.”

⁵Yezu akhafuna Marta na mulongo wace na Lazaro. ⁶Natenepo, pidabva Iye kuti Lazaro akhaduwala, apitiriza kukhala ntsiku ziwiri pontho pa mbuto ikhali Iye.

⁷Penepo pakumala pyenepi, apanga anyakupfundzace tenepa: “Tiendeni pontho ku Yudeya.”

⁸Anyakupfundza ampanga tenepa: “Rabi, Ayuda cincino akhayesera kukumendani na miyala, penu musabwerera pontho kweneko?”

⁹Yezu atawira tenepa: “Kodi nkhabe maola khumi na mawiri mu ntsiku? Munthu anafamba masikati nkhabe kupunduka tayu, thangwi asaona ceza ca dziko ino. ¹⁰Mbwenye munthu angafamba namasiku, asapunduka, thangwi ceza nkhabe muna iye.” ¹¹Pakumala pyenepi, aapanga tenepa: “Xamwali wathu Lazaro agona, mbwenye Ine ndinaenda kukamulamusa.”

¹²Natenepo anyakupfundza ampanga tenepa: “Mbuya, angakhala agona, anawanga.” ¹³Yezu akhalonga thangwi ya kufa kwace, mbwenye iwo akhanyerezera kuti akhalonga thangwi ya kugona kwandimomwene.

¹⁴Natenepo Yezu aapanga pakweca tenepa: “Lazaro afa, ¹⁵Ndiri wakutsandzaya thangwi yanu kuti nee ndikhalipo kweneko, toera imwe mukhulupire. Mbwenye tiendeni kuna iye.”

¹⁶Natenepo Tomasi, adacemerwa Mapasa, apanga anyakupfundza anango tenepa: “Tiendeni ifembo, toera tikafe pabodzi na iye.”

¹⁷Natenepo, pidafika Yezu, agumana kuti Lazaro akhali kale m'nthumbi mu ntsiku zinai. ¹⁸Bhetania ikhali cifupi na Yerusalemu, pafupi na mailu mawiri, ^a a v18 Stadiya khumi na zixanu zikhali pafupi na mailu mawiri (pafupi na makilometro matatu). ¹⁹na Ayuda azinji akhadabwera kuna Marta na Mariya toera kuabalangaza thangwi ya m'bale wawo. ²⁰Marta pidabva iye kuti Yezu akhabwera, aenda kukamuchingamira; Mariya apitiriza kukhonja n'nyumba. ²¹Marta apanga Yezu tenepa: “Mbuya, mungadakhala pano, m'bale wanga nee mbadafa. ²²Mbwenye npaka cincino, ndisadziwa kuti cinthu consene cinaphemba Imwe kuna Baba wathu, Iye anakupasani.”

²³Yezu ampanga tenepa: “M'bale wako anadzalamuka pontho.”

²⁴Marta ampanga tenepa: “Ndisadziwa kuti anadzalamuka pontho mu kulamuka muli akufa pa ntsiku yakumalisa.”

²⁵Yezu ampanga tenepa: “Ine ndine kulamuka muli akufa na umaso. Ule anandikhulupira anadzakhala maso, maseze afe, ²⁶pontho munthu onsene anakhala maso mbandikhulupira nkhabe kudzafa tayu. Kodi usakhulupira pyenepi?”

²⁷Iye ampanga tenepa: “Inde, Mbuya; ndisakhulupira kuti Imwe ndimwe Kirixtu, Mwana wa Baba wathu, ule anabwera pa dziko yapantsi.”

²⁸Pakumala kulonga pyenepi, aenda mbakacemera mulongo wace Mariya pakubisika: “Mpfundzisi ali pano—akukucemera.” ²⁹Mariya pidabva iye pyenepi, alamuka mwakucimbiza mbaenda kuna iye. ³⁰Yezu akhadzati kupita m'mudzi; akhali pa mbuto idamuchingamira Marta. ³¹Ayuda akhali na iye n'nyumba, mbam'balangaza, aona Mariya mbalamuka mwakucimbiza mbabuluka; iwo antowera, mbanyerezera kuti akhaenda ku nthumbi toera akalire kweneko. ³²Mariya afika kuna Yezu, mbamuona, mbagwa pa miyendo yace, mbalonga tenepa: “Mbuya, mungadakhala pano, m'bale wanga nee mbadafa.”

³³Yezu pidamuona iye mbakhalira, na Ayuda akhadabwera na iye mbakhalirambo, atsukwala kakamwe mu nzimu, mbanentseka muntima.

³⁴Mbalonga tenepa: “Mwamuika kupi?” Iwo ampanga tenepa: “Mbuya, bwerani muone.”

³⁵Yezu alira.

³⁶Natenepo Ayuda alonga tenepa: “Onani ninga pikhamufuna iye!” ³⁷Mbwenye anango a iwo alonga tenepa: “Mamuna uyu adafungula maso a mamuna wa boola, kodi nee mbadakwanisa kucitisa kuti uyu akhonde kufa?”

³⁸Natenepo Yezu, mbakhali pontho wakutsukwala kakamwe muntima mwace, afika pa nthumbi—phanga ikhadafungwa na mwala.

³⁹Yezu alonga tenepa: “Bulusani mwala.” Marta, mulongo wa nyakufa, ampanga tenepa: “Mbuya, panango asanunkha kale—afa kale ntsiku zinai.”

⁴⁰Yezu ampanga tenepa: “Kodi nee ndakupanga kuti: ungakhulupira unadzaona mbiri ya Baba wathu?”

⁴¹Natenepo abulusa mwala. Yezu alang'ana kudzulu mbalonga tenepa: “Baba, ndisakutendani thangwi mwandibva. ⁴²Ine ndikhadziwa kuti Imwe musandibva ntsiku zonsene, mbwenye ndalonga pyenepi thangwi ya mwinji uli pano, toera iwo akhulupire kuti Imwe mwandituma.” ⁴³Pidamala iye kulonga pyenepi, akhuwa na fala ikulu, tenepa: “Lazaro, buluka kunja!”

⁴⁴Nyakufa abuluka kunja, miyendo na manja yace zidamangwa na maxale a nguwo za linu, na nkhope yace idakulungwa na nguwo. Yezu aapanga tenepa: “Munsudzuleni; mulekeni aende.”

Nkhundu Isagumanyikana

⁴⁵Natenepo Ayuda azinji adabwera kuna Mariya mbaona pidacita Yezu, ankhulupira Iye. ⁴⁶Mbwenye anango a iwo aenda kuna Afarisi mbaapanga pidacita Yezu. ⁴⁷Natenepo akulu a anyantsembe na Afarisi agumanisa nkhundu ya atongi, mbalonga tenepa: “Tisacitanji? Thangwi mamuna uyu asacita pirengo pizinji. ⁴⁸Tingansiya iye ekhene, anthu onsene anadzankhulupira, buluka penepo Aroma anadzabwera mbakwata mbuto yathu pabodzi na dzindza yathu.”

⁴⁹Mbwenye m'bodzi wa iwo, Kayafa, nyantsembe wankulu wa caka ceneco, aapanga tenepa: “Imwe nkhabe kudziwa cinthu tayu. ⁵⁰Kodi nkhabe kuona kuti mphyadidi kwa imwe kuti mamuna m'bodzi afe thangwi ya mbumba, kupita kuti dzindza yonsene ifudzwe?” ⁵¹Iye nee alonga pyenepi mwekhene tayu; nakukhala nyantsembe wankulu wa caka ceneco, aprofeta kuti Yezu anadzafera dzindza, ⁵²tayu basi thangwi ya dzindza, mbwenye pontho toera kugumanya pabodzi ana a Baba wathu akhadabalalika. ^b b v52 Kayafa alonga mwadidi kupita pikhadziwa iye. Yezu akhafuna kufa tayu basi thangwi ya dzindza ya Ayuda, mbwenye toera kugumanya ana onsene a Baba wathu adabalalika mu banja ibodzi. ⁵³Natenepo kubulukira pa ntsiku ineyo, iwo atoma kulinganiza njira yakumupha. ⁵⁴Natenepo Yezu nee akhafamba-famba pontho pakweca pakati pa Ayuda, mbwenye abuluka mbaenda ku nzinda ukhacemerwa Efraimu cifupi na thando, mbakhala kweneko pabodzi na anyakupfundzace.

⁵⁵Paskwa ya Ayuda ikhali cifupi, na anthu azinji akwira kubuluka kumidzi mbaenda ku Yerusalemu pa ndzidzi ukhadzati kufika Paskwa, toera kudzicenesa. ⁵⁶Natenepo iwo asaka Yezu, mbabvundzana unango na ndzace mukhaima iwo n'Templo: “Musanyerezeranji? Kodi, panango nkhabe kudzabwera ku phwando?” ⁵⁷Akulu a anyantsembe na Afarisi akhadapereka ntemo kuti munthu onsene anadziwa kunkhali iye, apange, toera iwo akwanise kum'phata.