ዮሃንስ 11 FHB Father's Heart Bible™

11 ¹ካብ ቢታንያ፥ ካብ ዓዲ ማርያምን ሓብታ ማርታን፥ ኣልኣዛር ዝበሃል ሓደ ሰብ ሓሚሙ ነበረ። ²ማርያም ከዓ፥ እታ ሓዋ ኣልኣዛር ዝሓመመ፥ ንጐይታ ብምዑዝ ዘይቲ ቀብአቶ፥ ብፀጉራውን ኣእጋሩ ሓበሰት። ³እምበኣር እተን ኣሓት፥ “ኦ ጐይታ፥ እቲ እተፍቅሮ ሓሚሙ ኣሎ” ኢለን ናብኡ ለኣኻሉ።

⁴ኢየሱስ ከዓ እዙይ ምስ ሰምዐ፥ “እዝ ሕማም እዙይ፥ ወዲ ኣቦና ብእኡ ምእንቲ ክኸብር፥ ንኽብሪ ኣቦና ደኣ እምበር፥ ናብ ሞት ዘብፅሕ ኣይኮነን” በለ።

⁵ኢየሱስ ድማ ንማርታን ንሓብታን ንኣልኣዛርን የፍቅሮም ነበረ። ⁶ስለዙይ ኣልኣዛር ከም ዝሓመመ ምስ ሰምዐ፥ ኣብቲ ዝነበሮ ቦታ ኻልእ ክልተ መዓልቲ ፀንሐ።

⁷ድሕሪዙይ ድማ ነቶም ደቀ መዛሙርቲ “ናብ ይሁዳ ንመለስ” በሎም።

⁸እቶም ደቀ መዛሙርቲ ኸዓ “ረቢ፥ ኣይሁድ ሕዚ ብእምኒ ክቐጥቅጡኻ ደልዮም ነይሮም፥ ንስኻ ኸዓ ናብኡ ትምለስ ኣለኻ?” በልዎ።

⁹ኢየሱስ ከዓ መሊሱ “ኣብ መዓልቲ ዓሰርተ ኽልተ ሰዓት ዶ የለን? ብመዓልቲ ዝኸይድ ዅሉ፥ ብርሃን እዛ ዓለም እዚኣ ይርኢ እዩ እሞ፥ ኣይዕንቀፍን እዩ፤ ¹⁰ብለይቲ ዝኸይድ ግና፥ እቲ ብርሃን ኣብኡ ስለ ዘየለ፥ ይዕንቀፍ እዩ” በለ። ¹¹እዙይ ምስ በለ ድማ “ዓርክና ኣልኣዛር ደቂሱ ኣሎ፥ ኣነ ግና ከበራብሮ ክኸይድ እየ” በሎም።

¹²እቶም ደቀ መዛሙርቲ ድማ “ኦ ጐይታ፥ ደቂሱ እንተ ኾይኑስ፥ ክሓዊ እዩ” በልዎ። ¹³ኢየሱስ ግና ብዛዕባ ሞቱ እዩ ዝዛረብ ዝነበረ፥ ንሳቶም ከዓ ብዛዕባ ምድቃስ ድቃስ ዝተዛረበ መሰሎም።

¹⁴ሽዑ ኢየሱስ ኣግሂዱ “ኣልኣዛር ሞይቱ ኣሎ፤ ¹⁵ምእንቲ ኽትኣምኑ፥ ኣብኡ ብዘይ ምንባረይ ምእንታኹም ተሓጒሰ ኣለኹ፤ ግና ናብኡ ንኺድ” በሎም።

¹⁶ስለዙይ እቲ ዲዲሞስ ዝበሃል ቶማስ፥ ነቶም ካልኦት ደቀ መዛሙርቲ “ንሕናውን ከይድና ምስኡ ንሙት” በሎም።

¹⁷ኢየሱስ ምስ መፀ ድማ፥ ኣልኣዛር ኣብ መቓብር ኣርባዕተ መዓልቲ ከም ዝገበረ ረኸበ። ¹⁸ቢታንያ ኸዓ ናብ ኢየሩሳሌም ቀረባ ነበረት፥ ኣስታት ክልተ ማይል ርሒቓ፥ ^a a v18 ዓሰርተ ሓሙሽተ ስታድያ ኣስታት ክልተ ማይል (ኣስታት 3 ኪሎ ሜትር) ነበረ። ¹⁹ብዙሓት ኣይሁድ ድማ ብዛዕባ ሓዎም ምእንቲ ኸፅናንዕወን፥ ናብ ማርታን ማርያምን መፂኦም ነበሩ። ²⁰ማርታ ድማ ኢየሱስ ከም ዝመፅእ ምስ ሰምዐት፥ ክትቅበሎ ወፀት፤ ማርያም ግና ኣብ ገዛ ተቐሚጣ ተረፈት። ²¹ማርታ ድማ ንኢየሱስ “ኦ ጐይታ፥ ኣብዚ እንተ ትነብር ኔርካ፥ ሓወይ ኣይምሞተን ነይሩ። ²²ሕዚውን እንተኾነ ግና፥ ካብ ኣቦና ዝለመንካዮ ዅሉ ከም ዝህበካ እፈልጥ ኣለኹ” በለቶ።

²³ኢየሱስ ድማ “ሓውኪ ክትሳእ እዩ” በላ።

²⁴ማርታ ድማ “ኣብ መወዳእታ መዓልቲ ብዝኸውን ትንሳኤ ኸም ዝትሳእ እፈልጥ እየ” በለቶ።

²⁵ኢየሱስ ድማ “ኣነ ትንሳኤን ህይወትን እየ። እቲ ብኣይ ዝኣምን፥ እንተ ሞተ እኳ ክነብር እዩ፤ ²⁶እቲ ዝነብርን ብኣይ ዝኣምንን ኵሉ ድማ፥ ንዘለኣለም ኣይመውትን እዩ። እዙይዶ ትኣምኒ ኢኺ?” በላ።

²⁷ንሳ ድማ “እወ ጐይታ፥ ንስኻ ክርስቶስ ወዲ ኣቦና፥ እቲ ናብ ዓለም ዝመፅእ ምዃንካ እኣምን ኣለኹ” በለቶ።

²⁸እዙይ ምስ በለት ድማ፥ ከይዳ ንሓብታ ማርያም ብምስጢር ፀዊዓ “እቲ መምህር ኣብዚ ኣሎ፥ ይፅውዓኪ ኣሎ” በለታ። ²⁹ማርያም ድማ እዙይ ምስ ሰምዐት፥ ቀልጢፋ ተሲኣ ናብኡ ኸደት። ³⁰ኢየሱስ ድማ ገና ናብ ዓዲ ኣይኣተወን ነበረ፤ ኣብቲ ማርታ ዝተቐበለቶ ቦታ ገና ነበረ። ³¹እቶም ኣብ ገዛ ምስኣ ኾይኖም ዘፅናንዕዋ ዝነበሩ ኣይሁድ ድማ፥ ማርያም ቀልጢፋ ተሲኣ ክትወፅእ ምስ ረአዩ፥ ናብ መቓብር ኣብኡ ኽትበኪ ኸም እትኸይድ መሲልዎም ሰዓብዋ። ³²ማርያም ድማ ናብ ኢየሱስ መፂኣ ምስ ረአየቶ፥ ኣብ እግሩ ወዲቓ “ኦ ጐይታ፥ ኣብዚ እንተ ትነብር ኔርካ፥ ሓወይ ኣይምሞተን ነይሩ” በለቶ።

³³ኢየሱስ ድማ ንሳ ክትበኪ፥ እቶም ምስኣ ዝመፁ ኣይሁድውን ክበኽዩ ምስ ረአየ፥ ብመንፈሱ እናገዐረ ተሸበረ።

³⁴“ኣበይ ኣንቢርኩምዎ?” ኢሉ ድማ በሎም። ንሳቶም ከዓ “ኦ ጐይታ፥ መፂእኻ ርአ” በልዎ።

³⁵ኢየሱስ በኸየ።

³⁶ስለዙይ ኣይሁድ “እንሆ ኽንደይ የፍቅሮ ነይሩ!” በሉ። ³⁷ገሊኦም ግና “እዝ ኣዒንቲ እቲ ዕዉር ዝኸፈተ ሰብኣይ እዙይ፥ እዙይ ከይሞተ ኽገብር ኣይከኣለን?” በሉ።

³⁸ኢየሱስ ድማ ከም ብሓድሽ ብውሽጡ እናተነኽነኸ፥ ናብቲ መቓብር መፀ፤ እቲ መቓብር ከዓ በዓቲ ነበረ፥ ኣብ ልዕሊኡ ኸዓ እምኒ ተገይሩ ነበረ።

³⁹ኢየሱስ ድማ “ነቲ እምኒ ኣልዕልዎ” በለ። ማርታ፥ ሓብቲ እቲ ምዉት ድማ “ኦ ጐይታ፥ ኣርባዕተ መዓልቲ ገይሩ እዩ እሞ፥ ሕዚ ይጨንው ኣሎ” በለቶ።

⁴⁰ኢየሱስ ድማ “እንተ ኣመንኪ፥ ክብሪ ኣቦና ኸም እትሪኢ ኣይነገርኩኺንዶ?” በላ።

⁴¹ሽዑ ነቲ እምኒ ኣልዓልዎ። ኢየሱስ ድማ ናብ ላዕሊ ጠሚቱ ከምዙይ በለ፦ “ኦ ኣቦ፥ ስለ ዝሰማዕካኒ አመስግነካ ኣለኹ። ⁴²ንስኻ ወትሩ ኸም እትሰምዓኒ ፈሊጠ ኔረ፤ ነዙይ ግና፥ ንስኻ ኸም ዝለኣኽካኒ ምእንቲ ክኣምኑ፥ ስለ እዚ ኣብዙይ ደው ኢሉ ዘሎ ህዝቢ በልኩ።” ⁴³እዙይ ኢሉ ምስ በለ ድማ፥ ብዓብዪ ድምፂ “ኣልኣዛር፥ ንገዛእ ውፃእ!” ኢሉ ፀውዐ።

⁴⁴እቲ ምዉት ከዓ ኣእጋሩን ኣእዳዉን ብመግነዝ ተኣሲሮም፥ ገፁውን ብመንዲል ተጠቕሊሉ ወፀ። ኢየሱስ ድማ “ፍትሕዎ እሞ ይኺድ ሕደግዎ” በሎም።

ባይቶ ተኣከበ

⁴⁵ስለዙይ ካብቶም ናብ ማርያም ዝመፁ፥ ኢየሱስ ዝገበሮ ኸዓ ዝረኣዩ ኣይሁድ፥ ብዙሓት ብእኡ ኣመኑ። ⁴⁶ገሊኦም ግና ናብ ፈሪሳውያን ከዱ እሞ፥ ኢየሱስ ዝገበሮ ነገርዎም። ⁴⁷ስለዙይ ሊቃነ ካህናትን ፈሪሳውያንን ባይቶ ኣከቡ እሞ “እዝ ሰብኣይ ብዙሕ ተኣምራት ይገብር ኣሎ እሞ፥ እንታይ ንገብር ኣለና? ⁴⁸ከምዙይ እንተ ሓዲግናዮ፥ ኵሉ ብእኡ ክኣምን እዩ፤ ሮማውያን ከዓ መፂኦም ቦታናን ህዝብናን ክወስዱ እዮም” በሉ።

⁴⁹ሓደ ኻብኣቶም ግና፥ በታ ዓመት እቲኣ ሊቀ ካህናት ዝነበረ ቀያፋ፥ ከምዙይ በሎም፦ “ንስኻትኩም ሓንቲ እኳ ኣይትፈልጡን ኢኹም። ⁵⁰ኵሉ እቲ ህዝቢ ኻብ ዝጠፍእ፥ ሓደ ሰብ ኣብ ክንዲ እቲ ህዝቢ ክመውት ከም ዝሓሸኩም ኣይትርኡንዶ ኣለኹም?” ⁵¹ነዙይ ካብ ርእሱ ኣይበለን፤ በታ ዓመት እቲኣ ሊቀ ካህናት ስለ ዝነበረ ግና፥ ኢየሱስ ኣብ ክንዲ እቲ ህዝቢ ኸም ዝመውት ተነበየ፤ ⁵²ኣብ ክንዲ እቲ ህዝቢ ጥራሕ ዘይኮነ፥ ነቶም ተበቲኖም ዘለዉ ውሉድ ኣቦና ድማ ናብ ሓደ ምእንቲ ኽእክብ እዩ። ^b b v52 ቀያፋ ካብቲ ዝፈለጦ ንላዕሊ ተዛረበ። ኢየሱስ ኣብ ክንዲ ህዝቢ ኣይሁድ ጥራሕ ዘይኮነስ፥ ነፍሲ ወከፍ ተበቲኑ ዘሎ ውሉድ ኣቦና ናብ ሓደ ስድራ ምእንቲ ኽእክብ ደኣ እዩ ዝመውት ነይሩ። ⁵³ስለዙይ ካብታ መዓልቲ እቲኣ ጀሚሮም ክቐትልዎ ተማኸሩ። ⁵⁴ስለዙይ ኢየሱስ ድሕሪ ሕዚ ኣብ ማእኸል ኣይሁድ ብገሃድ ኣይተመላለሰን፤ ናብ ጥቓ ምድረ በዳ ናብ ዘላ ኤፍሬም እትበሃል ከተማ ረሓቐ እሞ፥ ምስ ደቀ መዛሙርቱ ኣብኡ ፀንሐ።

⁵⁵ፋሲካ ኣይሁድ ድማ ቀሪቡ ነበረ፤ ብዙሓት ከዓ ቅድሚኡ ነብሶም ምእንቲ ኸንፅሁ፥ ካብ ዓዲ ናብ ኢየሩሳሌም ደየቡ። ⁵⁶ስለዙይ ንኢየሱስ ይደልይዎ ነበሩ፤ ኣብ ቤተ መቕደስ ደው ኢሎም እንተለዉ ኸዓ ንሕድሕዶም “እንታይ ይመስለኩም? ናብ በዓል ፈፂሙ ኣይመፅእን ይኸውን?” ይበሃሃሉ ነበሩ። ⁵⁷ሊቃነ ካህናትን ፈሪሳውያንን ድማ፥ ምእንቲ ኽሕዝዎ፥ ኣበይ ከም ዘሎ ዝፈልጥ ዅሉ ኽሕብር ኣዚዞም ነበሩ።