Lazaro wa Bethania

Jesũ nĩaikara mĩthenya ĩĩrĩ, agakinya akererwo nĩ mĩthenya ĩna, na akarĩra mbĩrĩrainĩ ya mũrata wake. Nĩeera Maritha atĩ nĩ we kũriũka na muoyo, agacookeria Ithe wake ngaatho na mũgambo tondũ nĩamũiguĩte, na ageeta Lazaro oime nja. Hĩndĩ ĩyo nĩrĩo kĩama gĩgatua kũmũũraga.

Gĩcunjĩ 11.

Nĩkwarĩ mũndũ wetagwo Lazaro warĩ mũrwaru, wa kuuma Bethania, itũũra rĩa Mariamu na mwarĩ wa nyina Maritha. Nake Mariamu, ũrĩa mũrũ wa nyina Lazaro warĩ mũrwaru, nĩwe wahakire Mwathani maguta manungi wega, akĩũmia magũrũ make na njuĩrĩ ciake. Nĩ ũndũ ũcio aarĩ a nyina magĩtũmana kũrĩ we, makiuga atĩrĩ, “Mwathani, ũrĩa wendete nĩmũrwaru.”

Rĩrĩa Jesũ aiguire ũguo, akiuga atĩrĩ, “Mũrimũ ũyũ ndũgaathira na gĩkuũ, no nĩ wa riiri wa Ithe witũ, nĩ geetha Mũũriũ wa Ithe witũ agoocithio nĩ ũndũ waguo.”

Na rĩrĩ, Jesũ nĩendete Maritha na mwarĩ wa nyina na Lazaro. Nĩ ũndũ ũcio, rĩrĩa aiguire atĩ Lazaro aarĩ mũrwaru, agĩikara mĩthenya ĩngĩ ĩĩrĩ kũrĩa aarĩ.

Thuutha ũcio akĩĩra arutwo atĩrĩ, “Nĩtũcooke Judea rĩngĩ.”

Nao arutwo makĩmwĩra atĩrĩ, “Rabi, Ayahudi rĩu o rĩu nĩmageragia gũkũhũũra na mahiga, na wee nĩũgũcooka kuo rĩngĩ?”

Jesũ agĩcookia atĩrĩ, “Githĩ mũthenya ndũrĩ na mathaa ikũmi na meerĩ? Mũndũ o wothe ũthiiaga mũthenya ndangĩhĩngwo, tondũ nĩonaga ũtheri wa thĩ ĩno. No mũndũ angĩthiĩ ũtukũ nĩahĩngagwo, tondũ ũtheri ndũrĩ thĩinĩ wake.” Thuutha ũcio akĩmeera atĩrĩ, “Mũrata witũ Lazaro nĩakomete toro, no nĩngũthiĩ kũmũarahũra.”

Nao arutwo makĩmwĩra atĩrĩ, “Mwathani, angĩkorwo nĩakomete toro, nĩekũhona.” Na rĩrĩ, Jesũ aaragia ũhoro wa gĩkuũ gĩake, no-o meeciiragia aaragia ũhoro wa toro ũrĩa wa ndũire.

Nĩ ũndũ ũcio Jesũ akĩmeera o wega atĩrĩ, “Lazaro nĩakuĩte, nĩngenete nĩ ũndũ wanyu tondũ ndiarĩ kuo, nĩ geetha mwĩtĩkie. No rĩrĩ, nĩtũthiĩ kũrĩ we.”

Nĩ ũndũ ũcio Toma, ũrĩa wetagwo Mahatha, akĩĩra arutwo arĩa angĩ atĩrĩ, “Nĩtũthiĩ o na ithuĩ, tũgakuĩre hamwe nake.”

Nĩ ũndũ ũcio rĩrĩa Jesũ aakinyire, agĩkora Lazaro arĩkĩtie gũikara mbĩrĩra mĩthenya ĩna. Na rĩrĩ, Bethania rĩarĩ hakuhĩ na Jerusalemu, ta maela meerĩ, ^a na Ayahudi aingĩ nĩmokĩte kũrĩ Maritha na Mariamu kũmahooreria ngoro nĩ ũndũ wa mũrũ wa nyina wao. Rĩrĩa Maritha aiguire atĩ Jesũ nĩ agũũka, agĩthiĩ kũmũtũnga; nake Mariamu agĩikara aikarĩte thĩinĩ wa nyũmba. Nake Maritha akĩĩra Jesũ atĩrĩ, “Mwathani, ũngĩkorirwo ũrĩ gũkũ, mũrũ wa maitũ ndangĩakuire. No o na rĩu nĩnjũĩ atĩ o ũndũ wothe ũngĩhooya Ithe witũ, nĩegũkũhe.”

Jesũ akĩmwĩra atĩrĩ, “Mũrũ wa nyũkwa nĩekũriũka rĩngĩ.”

Nake Maritha akĩmwĩra atĩrĩ, “Nĩnjũĩ atĩ nĩekũriũka rĩngĩ hĩndĩ ya kũriũka kwa arĩa akuũ mũthenya wa mũthia.”

Jesũ akĩmwĩra atĩrĩ, “Niĩ nĩ niĩ kũriũka na muoyo. Mũndũ o wothe ũngĩnjĩtĩkia nĩagatũũra muoyo, o na angĩkua, nake mũndũ o wothe ũrĩ muoyo na anjĩtĩkie ndagakua o na rĩ. Nĩwĩtĩkĩtie ũguo?”

Akĩmwĩra atĩrĩ, “Ĩĩ, Mwathani; nĩnjĩtĩkĩtie atĩ wee nĩ we Kristũ, Mũũriũ wa Ithe witũ, ũrĩa ũgũũka gũkũ thĩ.”

Aarĩkia kuuga ũguo, agĩthiĩ agĩĩta mwarĩ wa nyina Mariamu na hitho, akĩmwĩra atĩrĩ, “Mũrutani arĩ gũkũ, na nĩaragwĩta.” Rĩrĩa Mariamu aiguire ũguo, agĩũkĩra na ihenya agĩthiĩ kũrĩ we. Na rĩrĩ, Jesũ ndaakoretwo atonyete itũũra; aarĩ o harĩa Maritha aamũtũngĩte. Nao Ayahudi arĩa maarĩ nake nyũmba makĩmũhooreria ngoro, rĩrĩa moonire Mariamu agĩũkĩra na ihenya akiuma nja, makĩmũrũmĩrĩra, meeciiragia atĩ nĩagũthiĩ mbĩrĩra akarĩrĩre kuo. Nake Mariamu aakinya kũrĩ Jesũ, akĩmuona, akĩĩgũithia magũrũinĩ make, akĩmwĩra atĩrĩ, “Mwathani, ũngĩkorirwo ũrĩ gũkũ, mũrũ wa maitũ ndangĩakuire.”

Rĩrĩa Jesũ aamuonire akĩrĩra, na Ayahudi arĩa mookire nake o nao makĩrĩra, agĩcaaya rohoinĩ wake, na agĩthĩĩnĩka ngoro.

Nake akiuga atĩrĩ, “Mũmũigĩte kũ?” Nao makĩmwĩra atĩrĩ, “Mwathani, ũka wone.”

Jesũ akĩrĩra maithori.

Nĩ ũndũ ũcio Ayahudi makiuga atĩrĩ, “Ta rorai ũrĩa aamwendete!” No amwe ao makiuga atĩrĩ, “Mũndũ ũyũ wahingũrire mũtumumu maitho, githĩ ndangĩahotire kũgiria mũndũ ũyũ akue?”

Nĩ ũndũ ũcio Jesũ, o rĩngĩ aathĩĩnĩkĩte ngoro thĩinĩ wake, agĩkinya mbĩrĩra—yarĩ ngurunga ĩhingĩtwo na ihiga.

Jesũ akiuga atĩrĩ, “Eheriai ihiga rĩu.” Nake Maritha, mwarĩ wa nyina na mũndũ ũcio wakuĩte, akĩmwĩra atĩrĩ, “Mwathani, rĩu nĩarĩkĩtie kũnunga—nĩakuĩte mĩthenya ĩna.”

Jesũ akĩmwĩra atĩrĩ, “Githĩ ndirakwĩĩrire atĩ ũngĩĩtĩkia nĩũkuona riiri wa Ithe witũ?”

Nĩ ũndũ ũcio makĩeheria ihiga rĩu. Nake Jesũ akĩrora na igũrũ, akiuga atĩrĩ, “Awa, nĩndagũcookeria ngaatho tondũ nĩũnjiguĩte. Nĩndĩũĩ atĩ ũnjiguaga hĩndĩ ciothe, no ndoiga ũũ nĩ ũndũ wa kĩrĩndĩ gĩkĩ kĩrũngiĩ haha, nĩ geetha metĩkie atĩ nĩwe wandũmire.” Aarĩkia kuuga ũguo, akĩanĩrĩra na mũgambo mũnene, “Lazaro, uma nja!”

Nake mũndũ ũcio wakuĩte akiuma nja, magũrũ na mooko ohetwo na mĩcĩĩrĩ ya taama, na ũthiũ wake ũohetwo na gĩtambaya. Jesũ akĩmeera atĩrĩ, “Muohorei; mũrekei athiĩ.”

Kĩama Gĩacookanĩrĩra

Nĩ ũndũ ũcio Ayahudi aingĩ arĩa mookĩte kũrĩ Mariamu, na makĩona ũrĩa Jesũ eekire, makĩmwĩtĩkia. No amwe ao magĩthiĩ kũrĩ Afarisai, makĩmeera ũrĩa Jesũ eekĩte. Nĩ ũndũ ũcio athĩnjĩri Ngai arĩa anene na Afarisai magĩĩta kĩama, makiuga atĩrĩ, “Nĩ atĩa tũreeka? Nĩgũkorwo mũndũ ũyũ nĩareeka ciama nyingĩ. Tũngĩmũtiga ũguo, andũ othe nĩmekũmwĩtĩkia, nao Aroma nĩmagooka, matwĩyarĩre handũ haitũ o na rũrĩrĩ rwitũ.”

No ũmwe wao, Kaiafa, ũrĩa warĩ mũthĩnjĩri Ngai ũrĩa mũnene mwaka ũcio, akĩmeera atĩrĩ, “Inyuĩ mũtirĩ ũndũ mũũĩ o na ũrĩkũ. Githĩ mũtireciiria atĩ nĩ kaba harĩ inyuĩ mũndũ ũmwe akuĩre andũ, gũkĩra rũrĩrĩ ruothe rũthire?” Ũndũ ũyũ ndaawaririe we mwene; no tondũ aarĩ mũthĩnjĩri Ngai ũrĩa mũnene mwaka ũcio, nĩarathire atĩ Jesũ nĩagakuĩra rũrĩrĩ, na ti rũrĩrĩ rũu tu, no nĩguo acookanĩrĩrie hamwe ciana cia Ithe witũ iria ciahurunjũkĩte. ^b Nĩ ũndũ ũcio kuuma mũthenya ũcio magĩthugũnda ũrĩa mangĩmũũraga. Nĩ ũndũ ũcio Jesũ ndaacookire gũthiĩ akĩonekaga gatagatĩ ka Ayahudi, no nĩeheririe agĩthiĩ itũũra rĩetagwo Efiraimu rĩrĩa rĩarĩ hakuhĩ na werũ, agĩikara kuo hamwe na arutwo ake.

Na rĩrĩ, Bathaka ya Ayahudi yarĩ hakuhĩ, nao andũ aingĩ makĩambata moimĩte bũrũri magĩthiĩ Jerusalemu ĩtaanakinya nĩguo meetherie. Nĩ ũndũ ũcio magĩcaria Jesũ, makĩũrania o ene marĩ hekaluinĩ atĩrĩ, “Mwĩciiria atĩa? Githĩ ndagooka irugainĩ rĩĩrĩ?” Na rĩrĩ, athĩnjĩri Ngai arĩa anene na Afarisai nĩmaathanĩte atĩ mũndũ o wothe ũngĩmenya kũrĩa arĩ nĩamenyithanie, nĩguo mamũnyiite.