Lazaro ne po Bethania
Kiibate Jeso peetuusyek aeng', koit ye kagobata peetuusyek ang'wan, ak koriir eng' keriingetap chorwennyi. Koleenji Martha kole ineendet ng'etunetap meet ak saboondo, kokoiyo Kwandanyi eng' kutit agobo kas ineendet, ak koguure Lazaro saang'. Nooto anyun sait ne kolewen tuiyet kobar ineendet.
11 1Ki myan chiito age ne ki kiguure Lazaro, ne po Bethania, nganaseet ne ming'in ne po Maria ak murerennyi Martha. 2Maria —ne ki myan otupchennyi Lazaro— ko ki iil Kiptaiyat mwaita ne ng'uu ne anyiny, ak koyaam keelyekyik eng' suumeekyik. 3Ki iyookyi murereek ineendet ng'aleek, koleenji, “Kiptaiyat, kimyan ineendet ne ichame.”
4Kingo kas ng'olyoondoni Jeso, kole, “Ma po meet myandoni, ago ko po toroornatetap Kwandanyo, si kegonyit Weeriitap Kwandanyo eng' ineendet.”
5Ki chame Jeso Martha ak murerennyi ak Lazaro. 6Ye kingo kas kole kimyan Lazaro, ko ki tebee peetuusyek aeng' alak ole ki mi.
7Yeityo let nooto, koleenji kasubik, “Kewe Judea.”
8Ki leenji ineendet kasubik, “Rabbi, kimache Yahudik kolach inyee eng' koik ra, ak imache iweek ooto kogeny?”
9Kowol Jeso kole, “Tos mami saaisyek taman ak aeng' eng' peetuut? Ma riichei chii age tugul ne wendi eng' peetuut - amu keerei lewenyeetap ng'wonyuni. 10Ago ngo wendi chii age tugul eng' kemeut, koriichkei, amu mami lewenyeet eng' ineendet.” 11Let nooto, koleenji icheek, “Karue chorwandanyo Lazaro, ago awendi ang'etu ineendet.”
12Koleenji kasubik ineendet, “Kiptaiyat, ngo karue, kosoobi.” 13Ki ng'alaali Jeso agobo meennyi, ago ki pwaat icheek kole ng'alaali agobo ruet ne nyolu.
14Yeityo koleenji Jeso icheek komyee, “Kame Lazaro, 15abaibai agobo okweek ale ki ma ami ooto, si oyan. Ago keba ole mi ineendet.”
16Koleenji Thomas ne ki kiguure Didumo kasubik alak, “Keba agacheek, si keme kobooto ineendet.”
17Ye kingo it Jeso, konyoor kole kagotebee Lazaro eng' keriinget peetuusyek ang'wan. 18Ki neegitee Bethania Jerusalem, ole loo ko uu mileetap aeng', a a v18 Stadiaisyek taman ak mut ko ki uu mileetap aeng' (ko uu kilomitaisyek somok). 19ak ki pwa Yahudik che chaang' ole mi Martha ak Maria, kogaigai icheek amu otupchennywa. 20Ye kingo kas Martha kole konyonei Jeso, kowo komet ineendet; ago ki tebyei Maria eng' koot. 21Koleenji Martha Jeso, “Kiptaiyat, ngo ki imi yu, ko ma ki me otupchennyu. 22Ago agot ra, angen ale kiy age tugul ne isaa Kwandanyo, kogoochin inyee.”
23Koleenji Jeso, “Kong'eet otupchennyu kogeny.”
24Koleenji Martha ineendet, “Angen ale kong'eet kogeny eng' ng'eetyeet eng' peetuut ne let.”
25Koleenji Jeso, “Anee ng'eetyeet ak saboondo. Ne iyana age tugul kosaptoi, agot ngo kame, 26ak age tugul ne sabei ak koyana ma kame koigeny. Tos iyani ng'olyoondoni?”
27Koleenji ineendet, “Ee, Kiptaiyat; ayani ale ii Kristo, Weeriitap Kwandanyo, ineendet ne nyonei eng' ng'wony.”
28Kingo mwa nooto, kowo koguur murerennyi Maria eng' ung'oot, kole, “Kagoit Kaneetindet—koguurin inyee.” 29Ye kingo kas Maria nooto, kong'eetu chomchom ak kowo ole mi ineendet. 30Ki tomo kochut Jeso nganaseet; ko ki mi kityo ole ki met ineendet Martha. 31Yahudik che ki mi kobooto ineendet eng' koot, che ki gaigaiyei ineendet, kingo keer Maria kong'eetu chomchom ak komanda, kosup icheek, ko ki pwaat kole kowendi keriinget koriir ooto. 32Kingo it Maria ole mi Jeso, kogeer ineendet, koputi eng' keelyekyik, ak kole, “Kiptaiyat, ngo ki imi yu, ma ki me otupchennyu.”
33Ye kingo keer Jeso koriir ineendet, ak Yahudik che ki pwa kobooto ineendet koriir agine, kotigen eng' kabuusennyi ak koiimgei.
34Ak kole, “Kaginde okweek ano?” Koleenji ineendet, “Kiptaiyat, nyoo igeer.”
35Koriir Jeso.
36Koleenji Yahudik, “Oger ole ki chame ineendet!” 37Ago ki le alak eng' icheek, “Tos ma muuchi chiichi ne ki yat konyegap chiito ne koraat, kobagak ineendet eng' meet?”
38Kingo iimgei kogeny Jeso miising' eng' ineegei, konyo keriinget—kebeneet ne ki inde koita kurgeetap.
39Kole Jeso, “Oiste koita.” Koleenji Martha ineendet, murerennyi chiito ne kame, “Kiptaiyat, kong'wechei nguno—amu kagome peetuusyek ang'wan.”
40Koleenji Jeso, “Tos ma ki amwaun ale, ngo iyani, ikeer toroornatetap Kwandanyo?”
41Ki koisto anyun koita. Ki ng'eet Jeso koonyek parak, kole, “Abba, amwaun kongoi amu kiikasyo. 42Angen ale ikasyowo koigeny, ago kaamwa nin agobo tuiyet ne tonone yu, si koyan kole ki iyookwo.” 43Kingo mwa ni, kowaach eng' kutit ne oo, kole, “Lazaro, mong'u!”
44Ki manda chiito ne kiga kobek, kiga kirat keelyekyik ak eunekyik eng' ngoroik, ak kilaakyi tainnyi ngoryeet. Koleenji Jeso icheek, “Otyach ineendet; oyachak kowe.”
Koyumgei Kapkirwooget
45Ki iyan anyun ineendet che chaang' eng' Yahudik, che ki pwa ole mi Maria ak kogeer ne ki yai Jeso. 46Ago ki pa alak eng' icheek ole mi Pharisaik, ak komwachi ne ki yai Jeso. 47Koyum anyun tisiik che eecheen ak Pharisaik kapkirwooget, kole, “Nee ne keyae? Amu yaei chiichi kaborunosyek che chaang'. 48Ngo kebagak ineendet, koyan piik tugul ineendet, ak konyo Romaik koip oldanyo ak emennyo.”
49Ago ki leenji age eng' icheek, Caiaphas, ne ki tisiindet ne oo eng' kenyinooto, “Ma ongen kiy age tugul kityo. 50Tos mogeeri kole komyee eng' okweek kome chii agenge agobo piik, kosiir kolusyo emet komugul?” 51Ma ki mwa nin eng' ineegei; ago amu ki tisiindet ne oo eng' kenyinooto, ki maoten kole kome Jeso agobo emet, 52ma agobo emet kityo, ago si koyum koek agenge lagogap Kwandanyo che kigaiyeis. b b v52 Ki ng'alaal Caiaphas ne myee kosiir ne ki ingen. Kome Jeso ma agobo emetap Yahudik kityo, ago si koyum lagogap Kwandanyo tugul che kigaiyeis koek kaang' agenge. 53Kong'eetee anyun peetuunooto, kotil ng'aleek kole si kobar ineendet. 54Nooto kobootiit, ma komuuch Jeso kowendoot kegeeroti kwenutap Yahudik, ago ki istoegei kwo nganaseet ne kiguure Ephraim ne neegitee surkwen, ak kotebee olooto kobooto kasubikyik.
55Ki neegitee paskaitap Yahudik, ak ki togoste che chaang' kobun emet koba Jerusalem kotom paskanooto, si koanyinygei. 56Ki cheeng' anyun icheek Jeso, koteebegei icheegei ye tonone eng' Hekaluut, kole, “Nee ne obwaat? Tos manyoonu sagutyet?” 57Ki ng'at tisiik che eecheen ak Pharisaik kole age tugul ne ingen ole mi, komwachi, si konam ineendet.