ሉቃስ 23

23 ¹ከዚያም ጉባኤው ሁሉ ተነሥቶ ወደ ጲላጦስ ፊት አመጣው። ²እንዲህ ብለውም ይከሱት ጀመር፤ “ይህን ሰው ሕዝባችንን ሲያስት፣ ለቄሳር ግብር መክፈልን ሲከለክል፣ ራሱንም ክርስቶስ ንጉሥ ነኝ ሲል አገኘነው።”

³ጲላጦስም፣ “አንተ የአይሁድ ንጉሥ ነህን?” ብሎ ጠየቀው። እርሱም መልሶ፣ “አንተው እንዳልህ ነው” አለው።

⁴ጲላጦስም ለካህናት አለቆችና ለሕዝቡ፣ “በዚህ ሰው ላይ ምንም በደል አላገኘሁበትም” አለ።

⁵እነርሱ ግን አጥብቀው፣ “ከገሊላ ጀምሮ እስከዚህ ድረስ በመላው ይሁዳ እያስተማረ ሕዝቡን ያውካል” አሉ።

⁶ጲላጦስም ይህን በሰማ ጊዜ ሰውየው የገሊላ ሰው እንደ ሆነ ጠየቀ። ⁷በሄሮድስ ግዛት ሥር እንዳለም ባወቀ ጊዜ፣ በዚያን ወራት እርሱ ደግሞ በኢየሩሳሌም ወደ ነበረው ወደ ሄሮድስ ላከው።

⁸ሄሮድስም ኢየሱስን ባየ ጊዜ እጅግ ደስ አለው፤ ስለ እርሱ ሰምቶ ስለ ነበር ከብዙ ጊዜ ጀምሮ ሊያየው ይፈልግ ነበርና፤ ተአምር ሲያደርግም ለማየት ተስፋ አድርጎ ነበር። ⁹በብዙ ቃልም ጠየቀው፤ ኢየሱስ ግን ምንም መልስ አልሰጠውም። ¹⁰የካህናት አለቆችና ጸሐፍት ቆመው አጥብቀው ይከሱት ነበር። ¹¹ሄሮድስም ከወታደሮቹ ጋር አቃለለውና ዘበተበት፤ የሚያንጸባርቅ ልብስም አልብሶ ወደ ጲላጦስ መለሰው። ¹²በዚያም ቀን ሄሮድስና ጲላጦስ እርስ በርሳቸው ተዋደዱ፤ ከዚህ በፊት ጠላቶች ነበሩና።

¹³ጲላጦስም የካህናትን አለቆች፣ ሹማምትንና ሕዝቡን በአንድነት ጠርቶ፣ ¹⁴እንዲህ አላቸው፤ “ይህን ሰው ሕዝቡን የሚያስት እንደ ሆነ አድርጋችሁ አመጣችሁልኝ። እነሆም፣ በፊታችሁ መረመርሁት፤ በምትከሱበትም ነገር በዚህ ሰው ላይ ምንም በደል አላገኘሁበትም። ¹⁵ሄሮድስም ስላላገኘ ወደ እኛ መልሶታል፤ እነሆ፣ ለሞት የሚያበቃ ምንም አላደረገም። ¹⁶ስለዚህ ቀጥቼ እለቅቀዋለሁ” አለ። ^a a v16 የመጀመሪያዎቹ ቅጂዎች እዚህ ላይ ቍጥር 17 የላቸውም፤ የኋለኞቹ ቅጂዎች ግን፣ “በበዓሉ አንድ እስረኛ ሊፈታላቸው ይገባ ነበርና” የሚለውን ይጨምራሉ። ¹⁸ሁሉም በአንድነት፣ “ይህ ሰው ይወገድ! በርባንን ፍታልን!” ብለው ጮኹ። ¹⁹ይህም ሰው በከተማው በተነሣ ዐመፅና በነፍስ ግድያ ምክንያት ታስሮ ነበር።

²⁰ጲላጦስም ኢየሱስን ሊፈታ ፈልጎ እንደ ገና ተናገራቸው፤ ²¹እነርሱ ግን፣ “ስቀለው፣ ስቀለው!” እያሉ ይጮኹ ነበር።

²²ለሦስተኛ ጊዜም፣ “ለምን? ይህ ሰው ምን ክፉ ነገር አደረገ? ለሞት የሚያበቃ ምንም ምክንያት አላገኘሁበትም። ስለዚህ ቀጥቼ እለቅቀዋለሁ” አላቸው። ²³እነርሱ ግን በታላቅ ድምፅ እየጮኹ እንዲሰቀል ይወተውቱ ነበር፤ ድምፃቸውም በረታ። ²⁴ጲላጦስም የለመኑትን ሊፈጽምላቸው ወሰነ። ²⁵ስለ ዐመፅና ነፍስ ግድያ ታስሮ የነበረውን የለመኑትን ሰው ፈታላቸው፤ ኢየሱስን ግን ለፈቃዳቸው አሳልፎ ሰጠ።

ወልድ ተሰቀለ

²⁶ወስደውም ሲሄዱ ከገጠር ይመጣ የነበረውን ስምዖን የተባለውን የቀሬናውን ሰው ያዙ፤ ከኢየሱስም ኋላ ተሸክሞ እንዲሄድ መስቀሉን በእርሱ ላይ ጫኑበት። ²⁷ከሕዝቡም ታላቅ ብዛት፣ ስለ እርሱ የሚያለቅሱና የሚዋደቁ ሴቶችም ተከተሉት።

²⁸ኢየሱስ ግን ወደ እነርሱ ዘወር ብሎ እንዲህ አለ፤ “የኢየሩሳሌም ሴቶች ልጆች ሆይ፤ ለእኔ አታልቅሱ፤ ለራሳችሁና ለልጆቻችሁ እንጂ አልቅሱ። ²⁹እነሆ፣ ‘መካኖች፣ ያልወለዱ ማኅፀኖች፣ ያላጠቡ ጡቶች ብፁዓን ናቸው’ የሚሉበት ቀን ይመጣልና። ³⁰ያን ጊዜ ተራሮችን፣ ‘በላያችን ውደቁ’ ኰረብቶችንም፣ ‘ሸፍኑን’ ማለት ይጀምራሉ። ³¹እንጨቱ ለምለም ሳለ ይህን ካደረጉ፣ በደረቀ ጊዜ ምን ይሆን?” ^b b v31 ምሳሌ ነው፤ ሮም ንጹሑን (ለምለም እንጨት) እንዲህ ካደረገች፣ ፍርድ በሚመጣበት ጊዜ በደለኛውን (ደረቅ እንጨት) ምን ያህል የከፋ ነገር ይጠብቀዋል።

³²ወንጀለኞች የሆኑ ሌሎች ሁለት ሰዎችም ከእርሱ ጋር እንዲገደሉ ተወሰዱ። ³³የራስ ቅል ተብሎ ወደ ተጠራው ስፍራ በደረሱ ጊዜ፣ በዚያ ከወንጀለኞቹ ጋር ሰቀሉት፤ አንዱን በቀኙ ሌላውንም በግራው አደረጉ።

³⁴ኢየሱስም፣ “አባት ሆይ፤ የሚያደርጉትን አያውቁምና ይቅር በላቸው” አለ። ዕጣም ተጣጥለው ልብሱን ተከፋፈሉ። ^c c v34 እነዚህ ቃላት በአንዳንድ ጥንታዊ ቅጂዎች ውስጥ የሉም፤ ነገር ግን እንደ ብዙ ዘመናዊ መጻሕፍት ቅዱሳት እዚህ ተጽፈዋል።

³⁵ሕዝቡም ቆሞ ይመለከት ነበር፤ ሹማምቱም፣ “ሌሎችን አዳነ፤ የእግዚአብሔር ክርስቶስ፣ ምርጡ እርሱ ከሆነ ራሱን ያድን” እያሉ ይዘብቱበት ነበር።

³⁶ወታደሮቹ ደግሞ ወደ እርሱ ቀርበው መራራ የወይን ጠጅ እያቀረቡለት ይዘብቱበት ነበር፤ ³⁷እንዲህም አሉ፤ “የአይሁድ ንጉሥ ከሆንህ ራስህን አድን!”

³⁸ከበላዩም፣ “ይህ የአይሁድ ንጉሥ ነው” የሚል ጽሑፍ ነበር።

³⁹ተሰቅለው ከነበሩት ወንጀለኞችም አንዱ፣ “አንተ ክርስቶስ አይደለህምን? ራስህንም እኛንም አድን!” ብሎ ሰደበው።

⁴⁰ሌላው ግን እንዲህ ብሎ ገሠጸው፤ “አንተ በዚያው ፍርድ ሥር ሆነህ ሳለ እግዚአብሔርን እንኳ አትፈራምን? ⁴¹እኛስ በትክክል እንደ ሠራነው የሚገባንን እየተቀበልን ነው፤ ይህ ሰው ግን ምንም ክፉ ነገር አላደረገም” አለ። ⁴²ደግሞም፣ “ኢየሱስ ሆይ፤ ወደ መንግሥትህ በመጣህ ጊዜ አስበኝ” አለ።

⁴³ኢየሱስም፣ “እውነት እልሃለሁ፤ ዛሬ ከእኔ ጋር በገነት ትሆናለህ” አለው።

ወልድ ነፍሱን ሰጠ

⁴⁴አሁንም ስድስት ሰዓት ያህል ሆኖ ነበር፤ እስከ ዘጠኝ ሰዓትም ጨለማ ምድርን ሁሉ ዋጠ፤ ⁴⁵የፀሐይ ብርሃን ጠፍቶ ነበርና፤ የቤተ መቅደሱም መጋረጃ ለሁለት ተቀደደ።

⁴⁶ኢየሱስም በታላቅ ድምፅ ጮኾ፣ “አባት ሆይ፤ ነፍሴን በእጅህ አደራ እሰጣለሁ!” አለ። ይህንም ብሎ ነፍሱን ሰጠ።

⁴⁷የመቶ አለቃውም የሆነውን ባየ ጊዜ አባታችንን እያከበረ፣ “ይህ ሰው በእውነት ጻድቅ ነበረ” አለ። ⁴⁸ለዚህ ትእይንት የተሰበሰበውም ሕዝብ ሁሉ የሆነውን አይተው ደረታቸውን እየደቁ ወደ ቤታቸው ተመለሱ። ⁴⁹የሚያውቁትም ሁሉ፣ ከገሊላም የተከተሉት ሴቶች በሩቅ ቆመው እነዚህን ነገሮች ይመለከቱ ነበር።

ወልድ በመቃብር ተኛ

⁵⁰እነሆም፣ ዮሴፍ የተባለ አንድ ሰው ነበረ፤ እርሱም የሸንጎ አባል የሆነ፣ ቸርና ጻድቅ ሰው ነበር፤ ⁵¹እርሱም በምክራቸውና በሥራቸው ያልተስማማ ነበር። የአይሁድ ከተማ ከሆነችው ከአርማትያስ የመጣ ሲሆን፣ የአባታችንን መንግሥት ይጠባበቅ ነበር። ⁵²ይህ ሰው ወደ ጲላጦስ ሄዶ የኢየሱስን ሥጋ ለመነ። ⁵³አውርዶም በተልባ እግር ልብስ ከፈነው፤ ማንም ገና ባልተቀበረበት ከዐለት በተቈረጠ መቃብር ውስጥ አኖረው። ⁵⁴ያም ቀን የመዘጋጀት ቀን ነበር፤ ሰንበትም ሊጀምር ተቃርቦ ነበር። ⁵⁵ከገሊላም ከእርሱ ጋር የመጡት ሴቶች ተከትለው መቃብሩን፣ ሥጋውም እንዴት እንደ ተቀመጠ አዩ። ⁵⁶ተመልሰውም ሽቱና ቅባት አዘጋጁ፤ እንደ ታዘዙትም በሰንበት ዐረፉ።