A Gaban Bilatus da Hirudus

Bilatus ya faɗa sau uku cewa bai sami wani laifi a gare shi ba, duk da haka ya ba da kai. Yesu ya gaya wa matan da suke kuka su yi kuka domin kansu, ya roƙi Ubansa ya gafarta wa mutanen da suke gicciye shi, ya kuma yi wa wani mai laifi alkawarin aljanna. Duhu ya rufe ƙasa, labulen ya tsage, Yusufu kuma ya roƙi a ba shi gawar.

Babi na 23.

Sai dukan taron suka tashi, suka kawo shi gaban Bilatus. Suka fara zarginsa, suka ce, “Mun sami wannan mutum yana ɓatar da al'ummarmu, yana hana a biya Kaisar haraji, yana kuma da'awar cewa shi Almasihu ne, wani sarki.”

Bilatus ya tambaye shi, “Kai ne Sarkin Yahudawa?” Ya amsa ya ce, “Kai ka faɗa.”

Sai Bilatus ya ce wa manyan firistoci da taron jama'a, “Ban sami wani laifi a kan wannan mutum ba.”

Amma suka nace, suka ce, “Yana tā da hankalin mutane, yana koyarwa ko'ina a Yahudiya, tun daga Galili har zuwa nan.”

Da Bilatus ya ji haka, sai ya tambaya ko mutumin Bagalile ne. Da ya gane cewa yana ƙarƙashin ikon Hirudus ne, sai ya aike shi wurin Hirudus, wanda shi kansa ma yana a Urushalima a kwanakin nan.

Da Hirudus ya ga Yesu, sai ya yi farin ciki ƙwarai, domin tun da daɗewa yana so yă gan shi, saboda ya ji labarinsa, yana kuma fatan yă ga yă yi wata alama. Ya yi masa tambayoyi masu yawa, amma Yesu bai ba shi amsa ba. Manyan firistoci da malaman Attaura kuwa suna tsaye, suna zarginsa da ƙarfi. Hirudus da sojojinsa suka rena shi, suka yi masa ba'a, suka sa masa riga mai walƙiya, suka mayar da shi wurin Bilatus. A ranar nan Hirudus da Bilatus suka zama abokai, gama a dā maƙiya ne su.

Sai Bilatus ya tara manyan firistoci, da shugabanni, da jama'a, ya ce musu, “Kun kawo mini wannan mutum kamar mai juyar da mutane. Na bincike shi a gabanku, ban kuma sami wani laifi a kan wannan mutum game da zargin da kuke yi masa ba. Haka ma Hirudus bai samu ba, don haka ya mayar da shi gare mu. Ga shi, bai yi wani abin da ya cancanci mutuwa ba. Saboda haka zan hore shi, sa'an nan in sake shi.” ^a Amma duka suka yi ihu gaba ɗaya, suka ce, “A kashe wannan mutum! Ka sakar mana Barabbas!” shi wani mutum ne da aka sa a kurkuku saboda wani tawaye da ya auku a birni, da kuma kisan kai.

Bilatus ya sāke yi musu magana, domin yana so yă saki Yesu, amma suna ta ihu, suna cewa, “A gicciye shi, a gicciye shi!”

Sau na uku ya ce musu, “Me ya sa? Wane irin laifi wannan mutum ya yi? Ban sami wani dalilin da zai sa a kashe shi ba. Saboda haka zan hukunta shi, sa'an nan in sake shi.” Amma suka ci gaba da ihu da ƙarfi, suna buƙatar a gicciye shi, sai muryoyinsu suka yi nasara. Saboda haka Bilatus ya yanke shawarar a biya buƙatarsu. Ya saki mutumin da suka roƙa, wanda aka sa a kurkuku saboda tawaye da kisan kai, amma ya ba da Yesu bisa ga nufinsu.

An Gicciye Ɗa

Sa'ad da suke kai shi, sai suka kama wani mutum mai suna Saminu Bakurane, wanda yake shigowa daga ƙauye, suka ɗora masa gicciyen yă ɗauka a bayan Yesu. Babban taron jama'a ya bi shi, har da waɗansu mata waɗanda suke kuka suna makoki dominsa.

Amma Yesu ya juyo gare su, ya ce, “Ya'yan Urushalima mata, kada ku yi kuka domina; ku yi kuka domin kanku da 'ya'yanku. Gama kwanaki suna zuwa da za a ce, ‘Masu albarka ne bakarare, da mahaifun da ba su taɓa haihuwa ba, da mamman da ba su taɓa shayarwa ba.’ Sa'an nan za su fara ce wa duwatsu, ‘Ku faɗo a kanmu,’ su ce wa tuddai kuma, ‘Ku rufe mu.’ Gama in suna yin haka da itace yana da ɗanye, to me zai faru sa'ad da ya bushe?” ^b

Aka kuma kai waɗansu biyu, masu laifi, domin a kashe su tare da shi. Da suka isa wurin da ake kira Ƙoƙon Kai, sai suka gicciye shi a can tare da masu laifin nan, ɗaya a damansa, ɗaya kuma a hagunsa.

Yesu ya ce, “Ya Uba, ka gafarta musu, gama ba su san abin da suke yi ba.” Sa'an nan suka raba tufafinsa, suna jefa ƙuri'a. ^c

Jama'a kuwa suna tsaye suna kallo; shugabanni kuma suka yi masa ba'a, suka ce, “Ya ceci waɗansu, to yă ceci kansa mana, in shi ne Almasihun Allah, Zaɓaɓɓen nan.”

Sojoji ma suka yi masa ba'a, suna zuwa gare shi suna ba shi ruwan inabi mai tsami, suna cewa, “In kai ne Sarkin Yahudawa, ka ceci kanka!”

Akwai kuma rubutu a bisansa, “Wannan shi ne Sarkin Yahudawa.”

Ɗaya daga cikin masu laifin da aka rataye ya zage shi, ya ce, “Ashe, ba kai ne Almasihu ba? Ka ceci kanka da mu mana!”

Amma ɗayan ya tsawata masa, ya ce, “Ba ka ma tsoron Allah, tun da yake kana ƙarƙashin hukunci iri ɗaya? Mu fa daidai ne, muna samun sakamakon abin da muka aikata; amma wannan mutum bai yi wani laifi ba.” Sa'an nan ya ce, “Ya Yesu, ka tuna da ni sa'ad da ka shiga mulkinka.”

Yesu ya ce masa, “Lalle hakika, ina gaya maka, yau za ka kasance tare da ni a Firdausi.”

Ɗa Ya Saki Numfashinsa na Ƙarshe

Ana kusan tsakar rana ke nan, sai duhu ya rufe dukan ƙasar har zuwa ƙarfe uku na yamma, domin hasken rana ya ƙi haskakawa; labulen haikali kuma ya tsage kashi biyu.

Yesu ya yi kira da babbar murya, ya ce, “Ya Uba, a hannuwanka na miƙa ruhuna!” Sa'an nan ya saki numfashinsa na ƙarshe.

Da jarumin ya ga abin da ya faru, sai ya yabi Ubanmu, ya ce, “Lalle wannan mutum mai adalci ne.” Dukan taron da suka taru domin wannan kallo, da suka ga abin da ya faru, sai suka koma gida suna bugun ƙirjinsu. Dukan masaninsa, da matan da suka bi shi daga Galili, suna tsaye daga nesa suna kallon waɗannan abubuwa.

An Kwantar da Ɗa a Kabari

To, akwai wani mutum mai suna Yusufu, ɗan majalisa, mutumin kirki ne mai adalci kuma, wanda bai yarda da shawararsu da aikinsu ba. Daga Arimateya ne shi, wani gari na Yahudawa, yana kuma jiran Mulkin Ubanmu. Wannan mutum ya je wurin Bilatus, ya roƙi jikin Yesu. Ya saukar da shi, ya naɗe shi da likafani, ya kwantar da shi a cikin wani kabarin da aka sassaƙa a dutse, inda ba a taɓa kwantar da kowa ba tukuna. Ranar Shiri ce, Asabar kuma tana gab da farawa. Matan da suka zo tare da shi daga Galili suka bi, suka ga kabarin, da kuma yadda aka kwantar da jikinsa. Suka koma, suka shirya kayan ƙamshi da man shafawa, sa'an nan suka huta a ranar Asabar kamar yadda aka umarta.