Luke 23

23 ¹Chieina kazip katonga saikorana ngakarthuida ali Pilatewui mangāli khuirai. ²Athumna ali phenphokta hānga, "Ithumna mipā hi ithumwui yurbing mikhanamda, Caesarli khāshinā khami khavai kharar sāda, kala 'I Khrista, awunga akhana' da hāng kaji samphanga."

³Pilatena ali ngahāna, "Na Jihudiwui Awunga chila?" Ana ngahānkai, "Chi nana hānghaira."

⁴Chieina Pilatena pāngmon akhokabing eina yaruibingli hānga, "Ina mipā hili khikha khayon masamphangmana."

⁵Kha athumna ngarorda hānga, "Ana Galileewui eina thuida hi apamli tangda Judea saikora hupta tamchitheida mibingli kasata."

⁶Pilatena chi shālaga, mipā hi Galileenaona chila da ngahāna. ⁷Herodwui azingli lei da theilaga, ali Herodwui pāngli chihovāhaowa; Herod akhalattala chitharan Jerusalemli leisai.

⁸Herodna Jishuli thei eina penlakhaowa, kaja ana awui maram shālaga, kasāngkha eina ali thei khavai ningchānghaowa, kala ana machut akha sāra kaji thei khavai chihāna. ⁹Ana ali tui kachungkha eina ngahāna, kha Jishuna ali khikha mangahānkāmana. ¹⁰Pāngmon akhokabing eina ain kathemabingna nganingda, ali panglāk eina phena. ¹¹Herod eina awui shipaibingna ali mana̱kashila mana̱shida kachon khangavai kashankachon ngavai ngasakta ali Pilateli chihovāluishithaowa. ¹²Chithang eina Herod eina Pilate ngasotnao ngasāhaowa, kaja thuida athum yangkashe sai.

¹³Chiwui thili Pilatena pāngmon akhokabing, khamungabing kala mibingli kazip khavai hokhuida, ¹⁴kala athumli hānga, "Nathumna mipā hi mibing mikhanama mina da iwuili khuirāhaira. Ina nathumwui miktāli ali rāyanglaga nathumna kaphen apongli mipā hili khikha khayon masamphangmana. ¹⁵Herodnala khayon masamphangmana, kaja ana ali ithumli chihovāluishithaira. Yanglu, ana thikapai khayon khikha masāmana. ¹⁶Chiwui vang eina ina ali shaolaga chihomira." ^a a v16 Rimeikapta kapi kahaibingli hili verse 17 maleimana; thili kapibingna hi hangchisang: "Kaja ana phanit kachida athumli phātopli narkahai mi akha chihomi khavai mayākhavaina." ¹⁸Kha athum saikorana katonga vaoda hānga, "Mipā hi khuithuihaolu! Ithumwui vang Barabbasli chihomilu!" ¹⁹keinung chili shokkahai ngakaiwui vang kala mi shaokathatwui vang phātopli sangkahai mi akhana.

²⁰Pilatena Jishuli chihomi ngasakngaiwui vang, athumli arui hānglui, ²¹kha athumna, "Krushli shaoshānhaolu, ali krushli shaoshānhaolu!" da vaozata.

²²Kakathumali ana athumli hānga, "Khiwui vang? Ana khi khayon sāhaokhala? Ina awuili kathiwui vang khikha maleisā. Chieina ina ali tandi mida chihomira." ²³Kha athumna ali krushli shaoshān khavai chihoda panglāk eina vaozata; kala athumwui vaokhon china yuihaowa. ²⁴Chieina Pilatena athumna kapo chi mi khavai tuitak khuiya. ²⁵Ana ngakai kala mi shaokathatwui vang phātopli sangkahai athumna kapo mi chi chihomi; kha Jishuli athumwui ningkachāngli horsangmihaowa.

Anaomayara Krushli Shaoshānhaira

²⁶Athumna ali thānshokta kha̱wui eina rārā Cyrenewui mi Simon kaho akhali tukkhuilaga Jishuwui khanukshong phungvā khavai awuitungli krush chi haimi. ²⁷Mi kachungkhana awui thi shurrai, awui vang chapngachāda leikasā sha̱naobingla zanga.

²⁸Kha Jishuna athumli ngareiungda hānga, "Jerusalemwui naongalāva̱ngarā, iwui vang machapalu; nathum khalatta kala nathumwui naongarāwui vang chaplu. ²⁹Kaja atam rāra, chitharan mibingna hāngra, 'Nao kashum sha̱naobing, mapharāla pharātābing, kala manganaokakhuisā sungtheibing sokhami ngasāranu.' ³⁰Chitharan athumna phungreibingli, "Ithumwuitungli pitāhaolu," da hāngtāra, kala phungrābingli, "Ithumli romlu," da hāngra. ³¹Kaja thing ra̱ zatta leilakha athumna hikathā saakha, thing chi theng tharan khi shokrakhala?" ^b b v31 Chānjam akha: Romena khayonmāng mi (thing ra̱ zat) li hikathā saakha, bichar rā tharan khayon kapunga mi (thing theng) li kaya kashi khare pamsāra.

³²Khayon kasā khangatei mi khani chila ali ngasoda shaothat khavai thānshoka. ³³Akuira̱ kaho apam chili vākashung tharan athumna ali khayon kasābing ngasoda akhana yāshong kala akhana uishong da apam chili krushli shaoshāna.

³⁴Jishuna hānga, "Avā, athumli kapheomilu, kaja athumna khi sākhala kaji matheimana." Chitharan athumna ka̱lā yanglaga awui kashankachon chi ngayara. ^c c v34 Hi tuibing chi haokaphokwui kapi kaikhali maleimana. Aja atam Bible kachungkhali khalei thada, hili kapikahaina.

³⁵Mibingna nganinglaga yangda leisai; kha khamungabingna mana̱shida hānga, "Ana mi khangateili huimi; ana Varewui kapang kahai Khrista ngasaakha, ara ana khalatta huikhuiranu."

³⁶Shipaibingnala ali mana̱shida, ali drakhāra̱ kathur mangkhavai rālaga, ³⁷hānga, "Na Jihudiwui Awunga jiakha, na khalatta huikhuilu!"

³⁸Awui tungli kapi kahai akhala leisai: "Hi Jihudiwui Awungana."

³⁹Hokthanghai kahai morei kaphungbingwui ngachaili akhana ali zeida hānga: "Na Khrista chi maningmala? Na khalatta kala ithumli huikhuilu!"

⁴⁰Kha akhapā china ali kahara: "Nala chichinga tandi azingli leisi, Vareli na makhangacheela? ⁴¹Iniwui vanga mashunga, kaja inina kasā chiwui vang samphang khangayi samphanga; kha mipā hina khayon khikha masāmana." ⁴²Chieina ana hānga, "Jishu, na nawui wungramli kārā tharan ili phaningungmilu."

⁴³Kala Jishuna ali hānga, "Ina nali kachangkhat kahāngna, aja na Paradiseli ili ngasora."

Anaomayara Thivāhaowa

⁴⁴Ara katā pung katharuka sai, kala tangkhamang chi ngalei katonga pung kachiko tāshungda tangmanga, ⁴⁵kaja kachāngwui kahor chi mithaowa; kala khani sāda khorumshimwui chonrān chi kakhaowa.

⁴⁶Jishuna panglāk eina vaoda hānga, "Avā, nawui pāngli iwui manglā chi horsangmihaowa!" Chi hānghailaga ana thivāhaowa.

⁴⁷Kashokkahai chi kathei eina, shipai shākhawui akhavāna ithumwui Avāli masot chikatlaga hānga: "Mipā hi kachangkhat eina khangarong mi akhana." ⁴⁸Hi yangkhavai rākazip kahai yarui saikorana kashokkahai chi kathei eina malung kapheda shimli unghaowa. ⁴⁹Awui ngasotnaobing saikora, kala Galileewui eina ali shurrai kahai sha̱naobingla ot hibing yangda katāva̱li nganinga.

Anaomayara Chikhurli Chifahaowa

⁵⁰Ara Joseph kaho mi akha leisai, ana hanga̱wui minganin akhana, kala kaphā kala khangarong mina. ⁵¹Ana athumwui khangarān kala otsak chili mayā makhuimana. Ana Jihudiwui keinung Arimatheawui eina kharā mina, kala ithumwui Avā wungram kapha mina. ⁵²Mipā hina Pilateli vālaga Jishuwui phasā chi apoi. ⁵³Ana khuitāda khamanaka kachon eina khalaphailaga khipālikha machizanlakrang kasā lungkaili kashophutkakhui chikhur akhali chizanhaowa. ⁵⁴Chithang chi Khangarān kasā zimikshona, kala sabbath khavā khavai jihaowa. ⁵⁵Galileewui eina Jishuli ngasokharā sha̱naobing china ali shurda, chikhur kala awui angun kathāda chizanhaira chi thei. ⁵⁶Athumna latunglaga nganamkaphā thaoyur kala thao neomi khavai thaobing ngarānhai; kala kakaso athishurda sabbaththang ngasāmkhui.