Luke 22

Chapter 22.

22 ¹Chitharan Makānkhami da kaho Khawok makazang khamui phanit chi nganaihairasai. ²Pāngmon akhokabing eina ain kathembingna ali shimān ngasak khavai apong phai, kaja athumna mibing chili ngacheehaowa.

³Chiwui thili tharāda khaniwui ngachaili Iscariot da kaho Judasli Satanna zanghaowa. ⁴Ana vāda pāngmon akhokabing eina khorumshimwui otva̱bingli kathada ali athumli yansairakhala kaji ngasanda hānga. ⁵Athum ringphāda ali lupā mikhavai mayāserhaowa. ⁶Ana mayāserhaowa, kala mi kachungkha maleila ali athumli yansai khavai atam kachā phāhaowa.

Makānkhami Phanit Khanaowa chi Khangarān Sā

⁷Chiwui thili makānkhamiwui yaonao taikathat kida Khawok makazang khamui zimiksho chi ungshunghaowa.

⁸Jishuna Peter eina Johnli chihovāda hānga, "Vāda ithumli zākhavai makānkhami phazat angarānlu."

⁹Athumna ali hānga, "Nana ithumli kali angarānlu jikhala?"

¹⁰Ana hānga, "Nanina keinungli vāzang tharan mi akha tara̱ham phunglaga nanili ngarokra. Ana akazang shimli ali shurvālu,

¹¹"kala shimwui akhavāli ahānglu, 'Ojāna nali hānga: Makānkhami phazat iwui sākhangatha̱bing ngasoda zārumki kā kaji kali leikhala?' ¹²Chieina ana nanili ngarankhariklaga kala haikasā kā kahaka mathāng atoli chitheira; chili ngarānlu."

¹³Anina vāda Jishuna anili hāngmi kahai tākam eina samphanglaga makānkhamiwui phazat chi angarāna.

¹⁴Atam kharā eina ana tableli phazā khavai pama, kala paokazatbingla ali ngasoda pama.

¹⁵Ana athumli hānga, "Ina kakhanang maphungmajā, nathumli ngasoda hi makānkhami phazat zākhavai theingailak eina longa. ¹⁶Khikhalajila ina nathumli kahāngna, ithumwui Avā wungramli chi maungshungranglakha eina tangda ina mazāmara." ¹⁷Ana tengkot khuida ningkashi mihailaga hānga, "Hi khuida nathum kapupta ngayarlu. ¹⁸Kaja ina nathumli kahāngna, ara eina thuida ithumwui Avā wungram marāranglakha eina tangda ina khararwui athei chi mamangmara."

¹⁹Ana khamui khuida ningkashi mihailaga serkhaida athumli mihaida hānga, "Hi iwui asāna, nathumwui vang khami kahaina. Ili phaningung khavai hi sālu." ²⁰Phazā kahaiwui thili, tengkotwui chila chithada sai: "Tengkot hi iwui asheeli khalei kadhara tuingashitna; chi nathumwui vang heishokmi kahaina. ²¹Kha yanglu, ili yansaiki kajiwui pāng chi ili ngasoda tableli lei. ²²Miwui Naomayarava kaphaningkasā athishurda jira, kha ali yankasaia a chiwui kalāshāt!"

²³Chieina athumna athumwui ngachaili khipāna hi sārakhala da akha eina akha ngahān pophoka.

²⁴Chithada sāda athumwui ngachaili khipa reimeikapkhala da athum akha eina akha ngayātla ngaroka.

²⁵Ana athumli hānga, "Yurbingwui awungabingna athumwuitungli munga, kala athumwuitungli khamungabing chi 'michon kasābing' da hokhuiya. ²⁶Nathumwui vang chithāda maningmana; kha nathumwui ngachaili reimeikap kaje china paisho thada sāranu, kala kathāna china otram ngatha̱khami thada sāranu. ²⁷Tableli phazā khavai pama miakha lah otram ngatha̱khami miakha, khipa reimeikapkhala? Phazā khavai pama miakha maningmala? Chithālala ina nathumwui ngachaili otram ngatha̱khami mi thāda leili.

²⁸"Nathum iwui kachotkachāng saikorali ili ngasoda pamsangabing chi nathumna, ²⁹kala iwui Avāna ili wungram mihaikasā thada, ina nathumli wungram mihaira, ³⁰chieina nathumna iwui wungramli iwui tableli phazā zāda manghaora, kala wungpamkhongbingli pamda Israel shang tharāda khanili bichar sāra."

³¹"Simon, Simon, nganālu! Satanna nathum saikorali kehu thāda tamyang khavai demasna, ³²kha ina nawui vang seihā sai, nawui shitkasang mangui thipaishina. Nana hanunghaiwui thili, navānaobingli pangngasaklu."

³³Peterna hānga, "Proho, ina nali ngasoda phātopli kala kathili vākhavai ngarānhaira."

³⁴Jishuna hānga, "Peter, ina nali kahāngna, nana ili matheimana da kathum shida mahatranglakha eina tangda, aja harvāna makhongmara."

³⁵Ana ngahāna, "Ina nathumli lupākhao, paidu, pheihopla maleila chihovā tharan, nathum khikha vātla?" "Khikha mavātmana," da athumna hānga.

³⁶Ana athumli hānga, "Kha ara, lupākhao kakāna chi khuiranu, kala paidula khuiranu. Raighai maleila china awui kachon yorhailaga akha lokhuiranu. ³⁷Kaja ina nathumli kahāngna, 'Ali morei kaphungbing akha thāda shānkhui' da kapi kahai kathara tui hi iwuitungli ungshungphalungra. Kaja iwui pongli kapi kahai chi mashungsera."

³⁸Athumna hānga, "Proho, yanglu, hili raighai khani lei." Ana athumli hānga, "Chi shaphaira."

Anaomayarana Avāli Yāmsangmi

³⁹Kala ana awui khangachā athishurda Olive kaphungli vāhaowa, kala sākhangatha̱bingna awui thi shurrai.

⁴⁰Ana apam chili vākashung tharan, athumli hānga, "Nathum kasuili matāzang khavai seihā sālu."

⁴¹Kala ana athumwui eina lung akha horvāk shakha zatthailaga, khuktizangda seihā sai,

⁴²chiya, "Avā, nana phaningmiakha, tengkot hi iwui eina khuithuiulu. Chithālala iwui ningkachāng maningla, kha nawui ningkachāng sāphalungra."

⁴³Kala kazingramwui eina kazingrao akhana ali samphangda pangngasaka. ^a a v43 Sātho 43-44 hi kharethangwui lairik kateibingli maleimana. Apam kachungkha rida Bible thada, hili kapihaida lei. ⁴⁴Kachotli ana thuklak eina seihā sai; awui shairanra̱ china ashee zingpā kahak ngaleili tātung kahai thāda onhaowa.

⁴⁵Seihā kasāwui eina ngakarthuilaga, ana sākhangatha̱bingli hanunglaga, kakhanangwui vang athum pida leisai da ungthei,

⁴⁶athumli hānga, "Khisāda nathum pida leikhala? Ngakarthuilu, kala kasuili matāzang khavai seihā sālu."

Maya̱khui Eina Yansai

⁴⁷Jishuna matui mahungda leilakha, tharāda khaniwuili zangkasā Judas kaho china sāda, mi kachungkha rāsai. Ana Jishuli maya̱khui khavai rāsaza̱,

⁴⁸kha Jishuna awuili ngahānkai, "Judas, miwui Naomayarali nana maya̱khui eina yansaira?"

⁴⁹Awuili ngasokazatbingna khi shok khavai kasā chi theida hānga, "Proho, ithumna raighai eina horthatra?" ⁵⁰Kala athum akhana pāngmon khareiwui rao akhali hortāda awui khanā yāvāk yortāmihaowa.

⁵¹Kha Jishuna ngahānkai, "Chi lāngda masaalu!" Kala ana khanā chi sākaza̱ eina ali raimihaowa. ⁵²Chieina Jishuna awuitungli kashok pāngmon akhokabing, khorumshimwui otva̱bing kala ararbing chili hānga, "Ili pha̱ma̱ kashao tukkhuiki kaji thada raighai kala thinghun singda kharālā? ⁵³Thangkachida khorumshimli ina nathumli ngasopama, kha nathumna ili pāng masa̱khuimana. Kha hi nathumwui pung, kala tangkhamangwui pangshapna."

Peterna Jishuli Khalana

⁵⁴Ali tukkhuilaga, athumna ali pāngmon khareiwui shimli khuizanga; Peterna lachāham eina athi shurvai. ⁵⁵Athumna kayāngwui alungli mei sālaga ngasoda pama; Peterna athumwui ngachaili pama. ⁵⁶Kha rao sha̱nao akhana ali kahorwui yangkhangasungli pamsai chi theilaga, ali yangtitta hānga, "Mipa hila awuili ngasosai."

⁵⁷Kha ana ali mamayāmada, "Sha̱nao, ina ali matheimana," da hānga.

⁵⁸Khaleilaga, khangatei akhana ali theida hānga, "Nala athumwui ngachaili akhana." Kha Peterna hānga, "Mikumo, I maningmana."

⁵⁹Pung akha sha̱kha shānglaga, khangatei akhana pinglak eina hānga, "Kachangkhat eina mipa hi awuili ngasosai, kaja ala Galileenaona."

⁶⁰Kha Peterna hānga, "Mikumo, nana kahāng chi I matheimana." Ana matui mahungda leilakha, ngalāngda harvāna khonguwa. ⁶¹Prohona ngareiungda Peterli yanga. Chieina Peterna Prohona ali hāngkahai, "Aja harvāna makhongranglakha nana ili matheimana da kathumshida hatra," kaji chi phaningunga. ⁶²Chieina ana kayāngli shokta soso chapa.

⁶³Chitharan Jishuli zangkasā mibing china ali shaoshaomihaida mana̱shiya. ⁶⁴Athumna ali mik khupmilaga ngahānchinga, "Phongmilu! Khipāna nali shaolikhala?" ⁶⁵Kala athumna awui pongli apong khangatei kachungkha hānglaga ali kazeila zeiya.

Jishuna Hangva̱naobingwui Mangāli Nganinga

⁶⁶Kazing kathang eina, mibingwui ararbing, pāngmon akhokabing eina ain kathembing rākazipa, kala ali athumwui hanga̱shimli khuivāda hānga,

⁶⁷"Na Khrista jiakha, ithumli hānglu." Ana athumli hānga, "Ina nathumli hāngakha, nathumna mashitsangmara,

⁶⁸"kala ina nathumli ngahānakha, nathumna mangahānkāmara."

⁶⁹"Kha aruiwui eina thuilaga miwui Naomayarana ithumwui Avāwui pangshapwui yāshong pamra."

⁷⁰Athum saikorana hānga, "Chithākha na Varewui Naomayarala?" Ana athumli hānga, "Nathumna I chi ilaka da hānghaira."

⁷¹Athumna hānga, "Ithumna shākhi kachungkha khi darkar leira? Kaja ithum khalattana awui khamor eina shāhaira."