کاهئنلر و دئن عالئملری اونو اؤلدورمه‌یه چالیشیرلار
یهودا بئر قئیمت اوستونده راضیلاشیر. پاسخا سوفره‌سئنده عئسا چؤرک و پئیالانی ورئر، دوستلاری ایسه رتبه اوستونده موباحئثه ادئرلر. او، عذاب ائچئنده آتاسینا دوعا ادئر، اله کی، تری قان کئمی یره تؤکولور، بئر اؤپوشله اله ورئلئر، و پطروس اونو اوچ دفه ائنکار ادئب، سونرا اونون گؤزلری ائله راست گلئر.
22 1ائندی پاسخا آدلانان مایاسیز چؤرک بایرامی یاخینلاشیردی. 2باش کاهئنلر و دئن عالئملری اونو اؤلدورمک اوچون بئر یول آختاریردیلار، چونکی خالقدان قورخوردولار.
3او زامان شیطان، اون‌ائکئلردن بئری اولان، ائسکاریوت آدلانان یهودانین ائچئنه گئردی. 4یهودا گدئب باش کاهئنلر و معبد مأمورلاری ائله اَل‌بئر اولدو کی، عئسانی نجه اونلارا تسلئم اده بئلر. 5اونلار شادلاندیلار و اونا پول ورمک اوچون راضی اولدولار. 6او دا راضی اولدو و جاماعاتدان اوزاق، عئسانی اونلارا تسلئم اتمک اوچون فورصت آختارماغا باشلادی.
سون پاسخا حاضیرلانیر
7سونرا مایاسیز چؤرک گونو گلئب چاتدی کی، پاسخا قوزوسونون قوربان ادئلمه‌سی لازیم ائدی.
8عئسا پطروس و یحیانی گؤندَ‌ردی و ددی: «گدئن، بئزئم اوچون پاسخا یمه‌یئنی حاضیرلایین.»
9اونلار اونا ددئلر: «هارادا حاضیرلاماغیمیزی ائسته‌یئرسن؟»
10عئسا ددی: «شهره گئرنده، سو سهنگی داشییان بئر کئشی سئزه راست گله‌جک. اونون دالیسیجا گدئب، گئردئیی اِوه گئرئن،
11و اِوئن یئیه‌سئنه بله دیئن: ”اوستاد سنه دیئر: شاگئردلرئمله پاسخا یمه‌یئنی یِیه‌جیئم قوناق اوتاغی هانسی‌دیر؟“ 12او دا سئزه دؤشَنمئش، بؤیوک بئر یوخاری اوتاق گؤرسده‌جک؛ پاسخانی اورادا حاضیرلایین.»
13اونلار گدئب، عئسانین اونلارا ددئیی کئمی تاپدیلار و پاسخا یمه‌یئنی حاضیرلادیلار.
14ساعات گلنده، عئسا سوفره باشیندا اوتوردو و حوارئلر ده اونونلا.
15عئسا اونلارا ددی: «عذاب چکمه‌مئشدن قاباق، بو پاسخانی سئزئنله یِمه‌یه چوخ آرزو اتمئشَم. 16چونکی سئزه دیئرم، او، آتامیزین پادشاهلیغیندا یرئنه یتمَیئنجه، اونو یِمه‌یه‌جه‌یم.» 17عئسا پئیالانی اَلئنه آلیب، شوکور ادندن سونرا ددی: «بونو آلیب اؤز آرانیزدا بؤلون. 18چونکی سئزه دیئرم، بوندان سونرا، آتامیزین پادشاهلیغی گلمه‌یئنجه، اوزوم آغاجینین میوه‌سئندن ائچمیه‌جه‌یم.»
19عئسا چؤرک گؤتوروب، شوکور ادئب، اونو بؤلدو، اونلارا وردی و ددی: «بو، سئزئن اوچون ورئلن بدنئمدئر. بونو منئم خاطئرئمه ادئن.» 20آخشام یمه‌یئندن سونرا، عئسا پئیالا ائله ده همئن‌جور اتدی: «بو پئیالا منئم قانیمدا اولان تزه عهددئر کی، سئزئن اوچون تؤکولور. 21آمّا باخین، منی تسلئم ادن آدامین اَلی، منئمله سوفره اوستونده‌دئر. 22ائنسان اوغلو تعیئن اولدوغو کئمی گدئر، آمّا وای او آدامین حالینا کی، اونون واسئطه‌سئله تسلئم ادئلئر!»
23اونلار بئربئرئندن سوروشماغا باشلادیلار کی، اونلاردان هانسی بئری بونو اده‌جک.
24همچئنئن اونلارین آراسیندا موباحئثه دوشدو کی، اونلاردان هانسی بئری ان بؤیوکدور.
25عئسا اونلارا ددی: «مئلّتلرئن پادشاهلاری اونلارا حؤکمرانلیق ادئرلر و اونلارین اوستونده‌کی حاکئملر، ولی‌نئعمت آدلانیرلار. 26آمّا سئز اله دیئلسئنئز: قوی آرانیزدا ان بؤیوک، ان کئچئک کئمی اولسون و باشچی، خئدمت ادن کئمی. 27کئم داها بؤیوکدور؟ سوفره باشیندا اوتوران قوناق، یوخسا خئدمت ادن؟ قوناق، دیئلمی؟ آمّا من سئزئن آرانیزدا خئدمت ادن کئمی‌یَم.
28«سئز منئم ائمتاحانلاریمدا منئمله قالانلارسینیز، 29و من ده، آتامین منه پادشاهلیق تعیئن اتدئیی کئمی، سئزه پادشاهلیق تعیئن ادئرم، 30بله‌جه سئز منئم پادشاهلیغیمدا، منئم سوفرَ‌مده یِیئب‌ائچه‌سئنئز و تختلرده اوتوراراق ائسرایئلئن اون‌ائکی قبئله‌سئنه داورلئک اده‌سئنئز.»
31«شمعون، شمعون، قولاق آس، شیطان ائسته‌یئب کی، هامینیزی بوغدا کئمی اَلَکدن کچئرتسئن، 32آمّا من سنئن اوچون دوعا اتدئم کی، ائمانین اَسکئلمه‌سئن. سن قاییداندان سونرا، قارداشلارینی قووّتلَندئر.»
33پطروس ددی: «یارب، من سنئنله بئرلئکده زئندانا و اؤلومه گتمه‌یه حاضیرام.»
34عئسا ددی: «سنه دیئرم، پطروس: بو گون خوروز بانلامامیشدان قاباق، سن منی تانیدیغینی اوچ دفه ائنکار اده‌جکسن.»
35عئسا سوروشدو: «من سئزی پول کئسه‌سی، توربا و چاریق اولمادان گؤندَردئیئم زامان، بئر شیه اِحتئیاجینیز اولدو؟» اونلار ددئلر: «هچ بئر شیه.»
36عئسا اونلارا ددی: «آمّا ائندی، پول کئسه‌سی اولان، اونو گؤتورسون، همچئنئن بئر توربا دا. قیلینجی اولمایان، عباسینی ساتیب بئر قیلینج آلسین. 37چونکی سئزه دیئرم، بو یازینین منده یرئنه یتمه‌سی لازیمدیر: ”او، گوناهکارلارین آراسیندا ساییلدی.“ چونکی منئم حاقّیمدا یازیلان، باشا گلئر.»
38اونلار جاواب وردئلر: «یارب، باخ، بورادا ائکی دانه قیلینج وار.» عئسا اونلارا ددی: «بو بَسدئر.»
اوغول اؤزونو آتایا تسلئم ادر
39عئسا همئشه‌کی کئمی اِشئیه چیخیب زیتون داغینا گتدی و شاگئردلر ده اونون دالیسیجا گتدئلر.
40او یره چاتاندا، عئسا اونلارا ددی: «دوعا ادئن کی، ائمتاحانا دوشمه‌یه‌سئنئز.»
41عئسا اونلاردان بئر داش آتیمی قدر آرالاندی، سونرا دئزلری اوسته چؤکوب دوعا اتدی،
42ددی: «ای آتا، اگر راضیسان، بو جامی مندن گؤتور. آمّا منئم ایراده‌م یوخ، سنئن ایراده‌ن اولسون.»
43گؤیدن بئر ملک اونا ظاهئر اولوب، اونو قووّتلَندئردی. a a v43 ٤٣-٤٤ آیه‌لر بعضی اَوّلکی الیازمالاردا یوخدور. اونلار بورادا، چوخ معاصر موقدّس کئتابلاردا اولدوغو کئمی، چاپ اولونوب. 44عذاب ائچئنده داها آرتیق حَرارتله دوعا اتدی؛ تری یره تؤکولن بؤیوک قان داملالاری کئمی اولدو.
45دوعادان قالخاندا، شاگئردلرئن یانینا گلئب اونلاری قم-قوصّه‌دن یاتمیش حالدا گؤردو،
46اونلارا ددی: «نئیه یاتیبسینیز؟ دورون دوعا ادئن کی، ائمتاحانا دوشمه‌یه‌سئنئز.»
بئر اؤپوشله اَله ورئلدی
47عئسا حله دانیشیردی کی، بئر جاماعات گلدی. اون‌ائکئلردن بئری اولان، یهودا آدلانان آدام اونلارا باشچیلیق ادئردی. او، عئسانی اؤپمک اوچون اونا یاخینلاشدی،
48آمّا عئسا اونا ددی: «یهودا، ائنسان اوغلونو اؤپمکله اَله وِرَرسن؟»
49یانیندا اولانلار نه اولاجاغینی گؤرنده ددئلر: «یارب، قیلینجلا ووراق؟» 50اونلاردان بئری باش کاهئنئن قولونو ووروب اونون ساغ قولاغینی کَسدی.
51آمّا عئسا جاواب وردی: «بو قدر بسدئر!» و قولاغینا توخونوب اونو ساغالتدی. 52سونرا عئسا اونون ضئدّئنه گلن باش کاهئنلره، معبدئن کشئکچی‌لرئنه و آغساقّاللارا ددی: «قیلینجلار و دینکلرله، اله بئل بئر اوغرونون اوستونه گلن کئمی، منی توتماغا چیخیبسینیز؟ 53من هر گون معبدده سئزئنله ائدئم و منه اَل اوزاتمادینیز. آمّا بو سئزئن ساعاتینیزدیر و ظولمتئن ائختئیاریدیر.»
پطروس عئسانی تانیدیغینی ائنکار ادر
54عئسانی توتوب، باش کاهئنئن اِوئنه آپاردیلار؛ پطروس دا اوزاقدان اونون دالیسیجا گدئردی. 55حیطئن اورتاسیندا بئر اود یاندیریب بئر یرده اوتوردولار؛ پطروس دا گلئب اونلارین ایچئنده اوتوردو. 56آمّا بئر کنئز ائشیغا ساری اوتوران عئسانی گؤروب، اونا دئقّتله باخدی و ددی: «بو دا اونونلا ائدی.»
57آمّا پطروس ائنکار ادئب ددی: «ای آرواد، اونو تانیمیرام.»
58بئر آز سونرا آیری بئری اونو گؤرنده ددی: «سن ده اونلاردان بئرئسن.» آمّا پطروس جاواب وردی: «ای کئشی، من دیئلم.»
59تقرئبن بئر ساعات سونرا بئر آیریسی تأکئد ادئب ددی: «بو آدام حتمن اونونلا ائدی، چونکی او دا جلئل‌لی‌دئر.»
60آمّا پطروس ددی: «ای کئشی، سنئن نه ددئیئنی بئلمئرم.» او حله دانیشیردی کی، همن آندا خوروز بانلادی. 61رب گری دؤنوب پطروسا باخدی. پطروسون یادینا، ربّئن اونا ددئیی سؤز دوشدو: «بو گون خوروز بانلامامیشدان، سن منی اوچ دفه ائنکار اده‌جکسن.» 62و او، چؤله چیخیب آجی-آجی آغلادی.
63عئسانی توتان آداملار اونو دؤیوب مسخره اتدئلر. 64اونون گؤزونو باغلاییب سوروشوردولار: «پیغمبرلئک ات! سنی ووران کئمدئر؟» 65و اونا توهین اِدَرکَن، ضئدّئنه چوخلو آیری سؤزلر ددئلر.
عئسا شورانین قاباغیندا دورور
66سحر آچیلاندا، خالقین آغساقّاللاری، باش کاهئنلر و دئن عالئملری توپلاشدیلار و اونو اؤز شوراسینا آپاریب ددئلر:
67«اگر سن مسئحسن، بئزه دِه.» عئسا اونلارا ددی: «اگر سئزه دسم، ائنانمایاجاقسینیز،
68«و اگر سئزدن سوروشسام، جاواب ورمه‌یه‌جکسئنئز.
69«آمّا بوندان سونرا ائنسان اوغلو آتامیزین قودرتئنئن ساغ طرفئنده اوتوراجاق.»
70اونلارین هامیسی سوروشدو: «بله اولسا، سن تارینین اوغلوسان؟» عئسا جاواب وردی: «اؤزونوز دیئرسئنئز کی، منم.»
71ددئلر: «داها نه شهادته احتئیاجیمیز وار؟ چونکی اؤزوموز اونو اؤز آغزیندان اشئتدئک.»
