ሉቃስ 22

ምዕራፍ 22።

22 ¹እርሾ የሌለበት የቂጣ በዓል፣ ፋሲካ የሚባለው፣ ተቃርቦ ነበር። ²የካህናት አለቆችና ጸሐፍት ሕዝቡን ይፈሩ ስለነበር እንዴት እንደሚገድሉት መንገድ ይፈልጉ ነበር።

³ከዐሥራ ሁለቱም አንዱ በነበረው አስቆሮቱ በተባለው በይሁዳ ሰይጣን ገባበት። ⁴ሄዶም ከካህናት አለቆችና ከቤተ መቅደሱ ሹማምንት ጋራ እንዴት አድርጎ አሳልፎ እንደሚሰጣቸው ተማከረ። ⁵እነርሱም ደስ አላቸው፤ ገንዘብም ሊሰጡት ተስማሙ። ⁶እርሱም ተስማማ፤ ከሕዝቡም ራቅ ባለ ጊዜ አሳልፎ ሊሰጣቸው አመቺ ጊዜ መፈለግ ጀመረ።

የመጨረሻው ፋሲካ ተዘጋጀ

⁷የፋሲካ በግ የሚታረድበት የቂጣ በዓል ቀን ደረሰ።

⁸ኢየሱስም ጴጥሮስንና ዮሐንስን፣ “ሄዳችሁ የምንበላውን ፋሲካ አዘጋጁልን” ብሎ ላካቸው።

⁹እነርሱም፣ “የት እንድናዘጋጀው ትፈልጋለህ?” አሉት።

¹⁰እርሱም እንዲህ አለ፤ “ወደ ከተማዋ እንደ ገባችሁ ማድጋ ውሃ የተሸከመ ሰው ይገናኛችኋል፤ እርሱ ወደሚገባበት ቤት ተከትላችሁ ግቡ፤

¹¹የቤቱንም ባለቤት፣ ‘መምህሩ፦ ከደቀ መዛሙርቴ ጋራ ፋሲካን የምበላበት የእንግዳ ማረፊያ ክፍል የት ነው? ይልሃል’ በሉት። ¹²እርሱም ሰፊ የሆነ የተነጠፈ የላይ ክፍል ያሳያችኋል፤ በዚያ አዘጋጁ።”

¹³ሄደውም እንደ ነገራቸው ሆኖ አገኙ፤ ፋሲካንም አዘጋጁ።

¹⁴ሰዓቱ በደረሰ ጊዜም እርሱ ከሐዋርያቱ ጋራ በማዕድ ተቀመጠ።

¹⁵እንዲህም አላቸው፤ “ከመከራዬ በፊት ይህን ፋሲካ ከእናንተ ጋራ ልበላ እጅግ ናፍቄአለሁ። ¹⁶እላችኋለሁና፣ በአባታችን መንግሥት እስኪፈጸም ድረስ ከእንግዲህ አልበላውም።” ¹⁷ጽዋም ተቀብሎ አመስግኖ እንዲህ አለ፤ “ይህን ውሰዱ፤ እርስ በርሳችሁም ተካፈሉት። ¹⁸እላችኋለሁና፣ የአባታችን መንግሥት እስክትመጣ ድረስ ከእንግዲህ ከወይን ፍሬ አልጠጣም።”

¹⁹እንጀራም አንሥቶ አመሰገነ፤ ቈርሶም ሰጣቸውና፣ “ይህ ስለ እናንተ የሚሰጥ ሥጋዬ ነው፤ ይህን ለመታሰቢያዬ አድርጉት” አለ። ²⁰እንደዚሁም ከእራት በኋላ ጽዋውን አንሥቶ፣ “ይህ ጽዋ ስለ እናንተ በሚፈስ በደሜ የሚሆን አዲስ ኪዳን ነው። ²¹ነገር ግን እነሆ፣ አሳልፎ የሚሰጠኝ ሰው እጅ በማዕድ ላይ ከእኔ ጋራ ነው። ²²የሰው ልጅ እንደ ተወሰነበት ይሄዳል፤ ነገር ግን አሳልፎ በሚሰጥበት በዚያ ሰው ወዮለት!”

²³ከእነርሱም ይህን የሚያደርገው ማን እንደ ሆነ እርስ በርሳቸው መጠያየቅ ጀመሩ።

²⁴ደግሞም ከእነርሱ ማን እንደሚበልጥ በመካከላቸው ክርክር ተነሣ።

²⁵እርሱም እንዲህ አላቸው፤ “የአሕዛብ ነገሥታት ይገዟቸዋል፤ በእነርሱም ላይ ሥልጣን ያላቸው ቸሮች ይባላሉ። ²⁶እናንተ ግን እንደዚህ አትሁኑ፤ ከእናንተ የሚበልጠው እንደ ታናሹ፣ መሪውም እንደሚያገለግለው ይሁን። ²⁷በማዕድ የተቀመጠው ወይስ የሚያገለግለው ማን ይበልጣል? በማዕድ የተቀመጠው አይደለምን? እኔ ግን በመካከላችሁ እንደሚያገለግል ነኝ።

²⁸“በፈተናዬ ከእኔ ጋራ የጸናችሁ እናንተ ናችሁ፤ ²⁹አባቴ ለእኔ መንግሥት እንደ ሰጠኝ፣ እኔም ለእናንተ እሰጣችኋለሁ፤ ³⁰በመንግሥቴ በማዕዴ ትበሉና ትጠጡ ዘንድ፣ በዙፋኖችም ተቀምጣችሁ በዐሥራ ሁለቱ የእስራኤል ነገዶች ትፈርዱ ዘንድ ነው።”

³¹“ስምዖን፣ ስምዖን ሆይ፣ ስማ፤ ሰይጣን እንደ ስንዴ ሁላችሁንም ሊያበጥራችሁ ለመነ፤ ³²እኔ ግን እምነትህ እንዳይጠፋ ስለ አንተ ጸለይሁ፤ አንተም በተመለስህ ጊዜ ወንድሞችህን አጽና።”

³³ጴጥሮስም፣ “ጌታ ሆይ፣ ከአንተ ጋራ ወደ እስር ቤትም ወደ ሞትም ለመሄድ ተዘጋጅቻለሁ” አለው።

³⁴ኢየሱስም፣ “ጴጥሮስ ሆይ፣ እልሃለሁ፤ ዛሬ ሦስት ጊዜ እንደማታውቀኝ ሳትክድ ዶሮ አይጮኽም” አለው።

³⁵እርሱም፣ “ያለ ኰረጆ፣ ያለ ከረጢት፣ ያለ ጫማ በላክኋችሁ ጊዜ አንዳች አጥታችሁ ነበርን?” አላቸው። እነርሱም፣ “ምንም የለም” አሉ።

³⁶እርሱም እንዲህ አላቸው፤ “አሁን ግን ኰረጆ ያለው ይውሰድ፤ ከረጢትም እንዲሁ፤ ሰይፍ የሌለውም ልብሱን ሽጦ ይግዛ። ³⁷እላችኋለሁና፣ ‘ከኀጥኣን ጋራ ተቈጠረ’ ተብሎ የተጻፈው ይህ መጽሐፍ በእኔ ሊፈጸም ይገባል፤ ስለ እኔ የተጻፈው እየተፈጸመ ነውና።”

³⁸እነርሱም፣ “ጌታ ሆይ፣ እነሆ፣ እዚህ ሁለት ሰይፎች አሉ” አሉ። እርሱም፣ “ይበቃል” አላቸው።

ወልድ ለአብ ራሱን አሳልፎ ይሰጣል

³⁹እንደ ልማዱም ወጥቶ ወደ ደብረ ዘይት ሄደ፤ ደቀ መዛሙርቱም ተከተሉት።

⁴⁰ወደ ስፍራውም በደረሰ ጊዜ፣ “ወደ ፈተና እንዳትገቡ ጸልዩ” አላቸው።

⁴¹እርሱም ድንጋይ ውርወራ ያህል ከእነርሱ ራቅ ብሎ ተንበርክኮ ጸለየ፤

⁴²እንዲህም አለ፤ “አባት ሆይ፣ ብትፈቅድ ይህን ጽዋ ከእኔ አስወግድ፤ ነገር ግን የአንተ ፈቃድ እንጂ የእኔ ፈቃድ አይሁን።”

⁴³ከሰማይም መልአክ እያበረታው ተገለጠለት። ^a a v43 ቍጥር 43-44 በአንዳንድ ጥንታዊ ቅጆች ውስጥ የሉም። በአብዛኞቹ ዘመናዊ መጻሕፍት ቅዱሳት እንደሚደረገው እዚህ ተካተዋል። ⁴⁴በጭንቀትም ሆኖ አብልጦ ይጸልይ ነበር፤ ላበቱም ወደ መሬት እንደሚወድቅ እንደ ትልቅ የደም ነጠብጣብ ሆነ።

⁴⁵ከጸሎትም ተነሥቶ ወደ ደቀ መዛሙርቱ መጣ፤ ከኀዘን የተነሣ ተኝተው አገኛቸው፤

⁴⁶እንዲህም አላቸው፤ “ስለ ምን ትተኛላችሁ? ወደ ፈተና እንዳትገቡ ተነሥታችሁ ጸልዩ።”

በመሳም አሳልፎ ተሰጠ

⁴⁷ገና ሲናገር ሳለ፣ ከዐሥራ ሁለቱ አንዱ ይሁዳ የተባለው እየመራ ሕዝብ መጣ፤ ኢየሱስንም ሊስመው ቀረበ፤

⁴⁸ኢየሱስ ግን፣ “ይሁዳ ሆይ፣ የሰው ልጅን በመሳም አሳልፈህ ትሰጣለህን?” አለው።

⁴⁹ከእርሱ ጋራ የነበሩትም የሚሆነውን አይተው፣ “ጌታ ሆይ፣ በሰይፍ እንምታቸውን?” አሉ። ⁵⁰ከእነርሱም አንዱ የሊቀ ካህናቱን አገልጋይ መትቶ ቀኝ ጆሮውን ቈረጠ።

⁵¹ኢየሱስ ግን መልሶ፣ “ይህ ይብቃ!” አለ፤ ጆሮውንም ዳስሶ ፈወሰው። ⁵²ኢየሱስም ሊይዙት ወደ እርሱ ለመጡት ለካህናት አለቆችና ለቤተ መቅደሱ ሹማምንት፣ ለሽማግሌዎችም እንዲህ አለ፤ “እንደ ወንበዴ በሰይፍና በዱላ ልትይዙኝ ወጣችሁን? ⁵³ዕለት ዕለት በቤተ መቅደስ ከእናንተ ጋራ ሳለሁ እጃችሁን አልዘረጋችሁብኝም፤ ነገር ግን ይህ የእናንተ ሰዓት፣ የጨለማውም ሥልጣን ነው።”

ጴጥሮስ ኢየሱስን ማወቁን ይክዳል

⁵⁴ይዘውም ወሰዱት፤ ወደ ሊቀ ካህናቱም ቤት አገቡት፤ ጴጥሮስም በሩቅ ይከተል ነበር። ⁵⁵በግቢው መካከልም እሳት አንድደው አብረው ተቀመጡ፤ ጴጥሮስም በመካከላቸው ተቀመጠ። ⁵⁶አንዲት ገረድ ግን በእሳቱ ብርሃን ፊት ለፊት ተቀምጦ አይታ ትኵር ብላ ተመለከተችውና፣ “ይህ ደግሞ ከእርሱ ጋራ ነበረ” አለች።

⁵⁷እርሱ ግን፣ “አንቺ ሴት፣ አላውቀውም” ብሎ ካደ።

⁵⁸ከጥቂት ጊዜም በኋላ ሌላው አይቶት፣ “አንተም ከእነርሱ አንዱ ነህ” አለ። ጴጥሮስ ግን፣ “አንተ ሰው፣ አይደለሁም” አለ።

⁵⁹አንድ ሰዓት ያህል ቈይቶም ሌላው፣ “ይህ ሰው በርግጥ ከእርሱ ጋራ ነበረ፤ ገሊላዊ ነውና” ብሎ አጥብቆ ተናገረ።

⁶⁰ጴጥሮስ ግን፣ “አንተ ሰው፣ የምትለውን አላውቅም” አለ። ወዲያውም ገና ሲናገር ሳለ ዶሮ ጮኸ። ⁶¹ጌታም ዘወር ብሎ ጴጥሮስን ተመለከተው። ጴጥሮስም ጌታ፣ “ዛሬ ዶሮ ሳይጮኽ ሦስት ጊዜ ትክደኛለህ” ብሎ የነገረውን ቃል አስታወሰ። ⁶²ወደ ውጭም ወጥቶ ምርር ብሎ አለቀሰ።

⁶³ኢየሱስን የያዙት ሰዎችም እየደበደቡት ያፌዙበት ነበር። ⁶⁴ዐይኑንም ሸፍነው፣ “ትንቢት ተናገር! የመታህ ማን ነው?” እያሉ ይጠይቁት ነበር። ⁶⁵እየሰደቡትም ሌላ ብዙ ነገር በእርሱ ላይ ተናገሩ።

ኢየሱስ በሸንጎው ፊት ቆመ

⁶⁶በነጋም ጊዜ የሕዝቡ ሽማግሌዎች ጉባኤ ማለትም የካህናት አለቆችና ጸሐፍት ተሰበሰቡ፤ ወደ ሸንጎአቸውም ወስደው እንዲህ አሉ፤

⁶⁷“ክርስቶስ ከሆንህ፣ ንገረን።” እርሱም እንዲህ አላቸው፤ “ብነግራችሁ አታምኑም፤

⁶⁸ብጠይቃችሁም አትመልሱም።

⁶⁹ነገር ግን ከእንግዲህ የሰው ልጅ በአባታችን ኀይል ቀኝ ይቀመጣል።”

⁷⁰ሁሉም፣ “እንግዲያውስ አንተ የእግዚአብሔር ልጅ ነህን?” አሉ። እርሱም፣ “እኔ እንደ ሆንሁ እናንተ ትላላችሁ” አላቸው።

⁷¹እነርሱም፣ “ከእንግዲህ ምን ምስክር ያስፈልገናል? ራሳችን ከአፉ ሰምተናልና” አሉ።