ሉቃስ 21

21 ¹ኢየሱስ ቀና ብሎ ሲመለከት፣ ባለጠጎች ስጦታቸውን በቤተ መቅደሱ መዝገብ ውስጥ ሲያስገቡ አየ። ²ድሃ የሆነች አንዲት መበለትም ሁለት ትንንሽ የናስ ሳንቲሞች ስትጨምር አየ።

³“እውነት እላችኋለሁ፣” አለ፤ “ይህች ድሃ መበለት ከሌሎች ሁሉ ይበልጥ ጨምራለች። ⁴እነዚህ ሁሉ ከትርፋቸው ስጦታ አበርክተዋልና፤ እርሷ ግን ከድህነቷ፣ ለኑሮዋ የሚሆናትን ሁሉ ሰጠች።”

ቤተ መቅደሱ ይፈርሳል

⁵አንዳንዶች ስለ ቤተ መቅደሱ፣ በተዋቡ ድንጋዮችና ለአባታችን በተሰጡ ስጦታዎች እንዴት እንዳጌጠ ሲናገሩ፣ እንዲህ አለ፤

⁶“የምትመለከቱትማ፣ አንዱ ድንጋይ በሌላው ላይ ሳይቀር የሚፈርስበት ዘመን ይመጣል፤ ሁሉም ይናዳል።”

⁷“መምህር ሆይ፣” ብለው ጠየቁ፤ “ይህ መቼ ይሆናል? ይህስ ሊሆን መሆኑን የሚያሳየው ምን ምልክት ነው?”

⁸“ተጠንቀቁ፣ እንዳትታለሉ፣” አለ። “ብዙዎች፣ ‘እኔ ነኝ’ እያሉ፣ ‘ዘመኑም ቀርቧል’ እያሉ በስሜ ይመጣሉ። አትከተሏቸው። ⁹ስለ ጦርነትና ዐመፅ በምትሰሙ ጊዜ፣ አትደንግጡ፤ ይህ አስቀድሞ ሊሆን ግድ ነውና፤ ፍጻሜው ግን ወዲያውኑ አይከተልም።”

¹⁰ከዚያም እንዲህ አላቸው፤ “ሕዝብ በሕዝብ ላይ፣ መንግሥትም በመንግሥት ላይ ይነሣል። ¹¹ታላላቅ የመሬት መንቀጥቀጦች ይሆናሉ፤ በልዩ ልዩ ስፍራዎችም ራብና ቸነፈር፣ እንዲሁም አስፈሪ ነገሮችና ከሰማይ ታላላቅ ምልክቶች ይሆናሉ። ¹²ነገር ግን ከዚህ ሁሉ በፊት ይይዟችኋል፣ ያሳድዷችሁማል፤ ወደ ምኵራብና ወደ እስር ቤት አሳልፈው ይሰጧችኋል፤ ስለ ስሜም ወደ ነገሥታትና ወደ ገዦች ይጎትቷችኋል። ¹³ይህም ለመመስከር አጋጣሚ ይሆንላችኋል። ¹⁴ስለዚህ መልሳችሁን አስቀድማችሁ ላለማዘጋጀት በልባችሁ ቍረጡ፤ ¹⁵ተቃዋሚያችሁ ሁሉ ሊቋቋመውም ሆነ ሊከራከረው የማይችለውን ቃልና ጥበብ እኔ እሰጣችኋለሁና። ¹⁶በወላጆችም እንኳ፣ በወንድሞች፣ በዘመዶችና በወዳጆች ሳይቀር አልፋችሁ ትሰጣላችሁ፤ ከእናንተም አንዳንዶችን ይገድላሉ። ¹⁷ስለ ስሜም በሁሉ ትጠላላችሁ። ¹⁸ነገር ግን ከራሳችሁ አንዲት ጠጉር እንኳ አትጠፋም። ¹⁹በመጽናታችሁ ነፍሳችሁን ታተርፋላችሁ።”

²⁰“ኢየሩሳሌም በጭፍሮች ተከባ ስታዩ፣ ጥፋቷ እንደ ቀረበ ዕወቁ። ²¹ያን ጊዜ በይሁዳ ያሉ ወደ ተራራዎች ይሽሹ፤ በከተማዪቱ ውስጥ ያሉ ይውጡ፤ በገጠር ያሉም ወደ እርሷ አይግቡ፤ ²²የተጻፈው ሁሉ የሚፈጸምበት የፍርድ ዘመን ነውና። ²³በዚያ ዘመን ለእርጉዞችና ለሚያጠቡ እናቶች ወዮላቸው! በምድሪቱ ላይ ታላቅ መከራ፣ በዚህም ሕዝብ ላይ ቍጣ ይወርዳልና። ²⁴በሰይፍ ስለት ይወድቃሉ፤ ተማርከውም ወደ አሕዛብ ሁሉ ይወሰዳሉ፤ የአሕዛብ ዘመን እስኪፈጸም ድረስ ኢየሩሳሌም በአሕዛብ ትረገጣለች።”

²⁵“በፀሐይ፣ በጨረቃና በከዋክብት ምልክቶች ይሆናሉ፤ በምድር ላይም የባሕሩ ሞገድና ነውጥ ያሸበራቸው አሕዛብ ይጨነቃሉ። ²⁶የሰማያት ኀይላት ይናወጣሉና ሰዎች በዓለም ላይ የሚመጣውን ነገር እየፈሩ ከፍርሃት የተነሣ ይዝለፈፋሉ። ²⁷ያን ጊዜ የሰው ልጅ በኀይልና በታላቅ ክብር በደመና ሲመጣ ያዩታል። ²⁸ይህ መሆን ሲጀምር ቀና በሉ፣ ራሳችሁንም አንሡ፤ ቤዛችሁ ቀርቧልና።”

²⁹ከዚያም ምሳሌ ነገራቸው፤ “በለስን፣ ዛፎችንም ሁሉ ተመልከቱ። ³⁰ቅጠል ሲያወጡ አይታችሁ በጋ አሁን እንደ ቀረበ ራሳችሁ ታውቃላችሁ። ³¹እንዲሁም ይህ ሁሉ ሲሆን ስታዩ የአባታችን መንግሥት እንደ ቀረበ ዕወቁ። ³²እውነት እላችኋለሁ፣ ይህ ሁሉ እስኪፈጸም ድረስ ይህ ትውልድ አያልፍም። ³³ሰማይና ምድር ያልፋሉ፤ ቃሌ ግን ከቶ አያልፍም።”

³⁴“ልባችሁ በመሰነፍ፣ በስካርና በኑሮ ጭንቀት እንዳይከብድ፣ ያም ቀን እንደ ወጥመድ ድንገት እንዳይመጣባችሁ ራሳችሁን ጠብቁ። ³⁵በምድር ሁሉ ፊት ለሚኖሩ ሁሉ ላይ ይመጣባቸዋልና። ³⁶ይህ ሊመጣ ካለው ሁሉ ለማምለጥ፣ በሰው ልጅም ፊት ለመቆም እንድትችሉ እየጸለያችሁ ሁልጊዜ ትጉ።”

³⁷በቀኑ በቤተ መቅደስ ያስተምር ነበር፤ በሌሊት ግን ወጥቶ በደብረ ዘይት ያድር ነበር። ³⁸ሕዝቡም ሁሉ ሊሰሙት ማልደው ወደ ቤተ መቅደስ ወደ እርሱ ይመጡ ነበር።