Tameinu om Sung Pumza
Lungsianu tameinu pakhatna sian pek swan kani sat thangluga, maan ga tai rwan koi maan kattina tamga sat thang rwe diga rin rwe. Kalum in om lungna sembazaangnu ga phaangnu kaan bi, Jisu na hei bing khatchale han sia mak lune diga rinne, khatle kraan, katwak thounu, imlongna pi swaknu khatle Jerusalem kraanmina kol tam lune diga rinluga, Baom potroi rwan khou lu kaithouluga barak theiyo diga rinne.
21 1Jisu na basaang la phaangluga lungsanu mi nunna bani om leithwan kalum in sian thangnu riak bi riak ongnu mu rwe. 2Maanna le lungsianu tameinu khatna sian pek swan kani sat thang ongnu mu rwe.
3“Batak sekka Eina nani khou rinnuwe,” Maanna rinne, “heiba lungsianu tameinuna tai rwan koi maan kattinaba tamga sat thang rwe. 4Balangbe hei rwan mi bingna bani om baleinu bina leithwan sat thangnuwe atiyeda maanna balungsiat sung bina maan sa ring dingnu bingza thangta rwe.”
Kalum In Dam Dinguwe
5Katei rwanna kasanu lung khatle ani Pa khou pi thangnu leithwan bingna sembazaangnu kalum in om lang bi rin ongnu kaan bi, Maanna rinne,
6“Nanina mu ongnu hei bing lang bi, lung khatcha hakna lung khat chung bi han sia maknu lumik hunglune; koi maan ding bazwanta lune.”
7“Bachuthangnupa,” banina Bakhou hanluga rinne, “hei bing nga tubeida swak dingbo, atiga hei bing nga swak tingnu ding theilan langnu khudamnu ga pa-aambo?”
8“Barak theiyo, nani ding minam thang mako,” Maanna rinne. “Mi khang pui Ameng bi se hunglune, ‘Ei Maan ye,’ khatle, ‘Chakrin ga nai rwe,’ diga rinlune. Bani ding sui mako. 9Nanina kraan khatle katwak thounu om lang ngaisunu kaan bi nani sung katop mako. Balangbe ha bing ga kama bi swak tingnu zung rwe atiyeda kakhamnu ga khin takka hunglaye.”
10Haba nung bi Maanna bani khou rinne, “Chaat khatna chaat khat luchung bi khatle krwang talei khatna krwang talei khat maitwang bi katwak thoulune. 11Bariak inza bi talei kalingnu lianu, bu taangnu khatle lai kanangnu amlune, atiga tambaan lana kachinu thinu khatle khudamnu lianu bing swaklune. 12Atiyeda hei bing swak tingnu kama bi, banina nani ding namluga railune, synagogue bing khatle qwan in bing bi pi thanglune, atiga Ameng om sake nani ding krwang nun khatle taleipuba rwan meithaan bi phun hunglune. 13Heiya nani lang sake to lang chakrin ga imbeilune. 14Atibriakpina nani ding tamphaangnu chong meithaanna daan mak lang nani sung bi tip thangbiyo, 15balangbe nani om munanu nun pakhatchanale kakhang mak tabe koi indao thang mak ngamlanu chongkaang khatle ningtingnu ding Eina nani khou pi thanglune. 16Nani ding napa nanu rwan, nani unao rwan, nathirui rwan khatle nani luang rwanna le pi swaklune, atiga banina nani lak pi katei ding athatlune. 17Ameng om sake nani ding mi bingza koiyalune. 18Atiyeda nani lu om sam khatchale braan laye. 19Nani khaangnu paan bina nanina nani sa ring dingnu lousulune.”
20“Jerusalem ding kraanmi rwanna han qwatnu nanina munu kaan bi, haga to braan to mutnu ga nai rwe dinu theiyo. 21Habei ga Judea bi ongnu nunna rammwan la pak thou dam ding ngo, namlian bi ongnu nunna haga paan la thou dam ding ngo, atiga taram bi ongnu nunna haga sung bi khut mak ting ngo, 22balangbe hei bing ga chongsem om lumik gaye, haba bi hiak thang ongnu bingza tanglune. 23Haba lumik bing bi pum rit ongnu khatle naosen kainu kamaisa rwan ga aih sia yeda! Balangbe talei ram chung bi riangre kanangnu amlune, atiga hei misa rwan lu chung bi balung khwaknu ta thanglune. 24Banina chemlem bina ta loilune khatle chaat bing khangza la qwan in mi ding danga kai se damlune. Atiga chaat bing om lumik tang dam phaang, Jerusalem ding chaat bingna kadimlune.”
25“Nungsa, tha khatle insi bing bi khudamnu swaklune, atiga talei ram chung bi chaat bingna riangre thoulune, tuipui baraam khatle tui kalangnu bina batok bariak onglune. 26Mi nunna kachi takka khatle talei ram la hung dingnu bing ding zung takka pum thi khalune, balangbe tambaan om nat bing ding kaling thanglune. 27Habei ga Misa Sa Kapaisa nat khatle liannu lianu le diga meikhwa bi hung ongnu banina mulune. 28Hei bing nga swak hou thounu kaan bi, baraanto han thouluga nani lu ka thouwo, balangbe nani om ran swak thangnu ga nai rwe.”
29Haba nung bi Maanna bani khou paradise khat rinne, “Tacham kung khatle thingkung bingza phaang ngo. 30Hagana banaa phun swaknu kaan bi, nani bazanna muluga khwalumpha nai swak rwe dinu nanina theiye. 31Hadanga, hei bing nga swaknu nanina munu kaan bi, ani Pa om krwang talei ga nai rwe dinu theiyo. 32Batak sekka Eina nani khou rinnuwe, hei bing bingza swak tang mak aang nga, hei kahan om misa rwan mang laye. 33Tambaan le talei ram le mang damlune, atiyeda Achong bing khwa seiga mang laye.”
34“Nani barak theiyo, mak dabe nani sung ga imbet boulaanu, zu kalonu khatle lungning om katopnu bingna karit thanglune, atiga haba lumik ga phaa danga khin takka nani chung bi ta thanglune. 35Balangbe haga talei ram pumza om meithaan bi ringnu mi bingza chung bi ta thanglune. 36Atibriakpina chakrin khangza barak theiga ongro, swak tingnu bing khangza bina pak dwakluga Misa Sa Kapaisa meithaan bi han ong ngamnu ding rithoi pi thangbiyo.”
37Nung khangza Maanna kalum in bi bachu thang ngaake; zing bi ga Maan paan la thouluga Olive chen la ong bacham ngaake. 38Mi bingza inkhuiga Bachong ngaisu lang kalum in bi Maan kim bi hung ongme.