Lik 21 FHB Father's Heart Bible™

21 ¹Jezi leve je l gade, li wè moun rich yo t'ap mete kado yo nan kès tanp lan. ²Li wè tou yon pòv vèv ki t'ap mete de ti pyès monen an kwiv.

³“Sa m'ap di nou la a, se vre,” li di, “pòv vèv sa a mete plis pase tout lòt yo. ⁴Paske tout moun sa yo bay kado nan sa yo genyen an plis, men li menm, nan mizè li, li bay tou sa li te genyen pou l viv.”

Tanp lan Pral Tonbe

⁵Antan kèk moun t'ap pale sou tanp lan, ki te byen dekore ak bèl wòch ak kado yo te ofri bay Papa nou, Jezi di:

⁶“Pou tout bagay n'ap gade la a, jou yo ap vini lè yo p'ap kite yon wòch sou yon lòt—yo pral jete yo tout atè.”

⁷“Mèt,” yo mande l, “kilè bagay sa yo ap rive, e ki siy ki pral montre bagay sa yo prèt pou rive?”

⁸“Veye kò nou, pa kite moun twonpe nou,” li di. “Anpil moun va vini nan non mwen, y'a di, ‘Se mwen menm,’ ak, ‘Lè a rive.’ Pa swiv yo. ⁹Lè nou tande pale de lagè ak revòlt, pa pè. Fòk bagay sa yo rive anvan, men lafen an p'ap vini touswit.”

¹⁰Apre sa, li di yo: “Yon nasyon va leve kont yon lòt nasyon, yon wayòm kont yon lòt wayòm. ¹¹Va gen gwo tranblemanntè, grangou ak epidemi nan divès kote, ak bagay ki pral fè moun pè ak gwo siy nan syèl la. ¹²Men anvan tout bagay sa yo, yo pral mete men sou nou, yo pral pèsekite nou, yo pral lage nou nan sinagòg ak nan prizon, yo pral trennen nou devan wa ak gouvènè poutèt non mwen. ¹³Sa va ban nou okazyon pou nou rann temwayaj. ¹⁴Se poutèt sa, mete nan tèt nou pou nou pa pare davans sa nou pral di pou defann tèt nou, ¹⁵paske m'ap ban nou pawòl ak bon konprann okenn lènmi nou p'ap ka kenbe tèt ak li ni demanti l. ¹⁶Se pwòp paran nou, frè nou, fanmi nou ak zanmi nou ki pral trayi nou, y'a touye kèk nan nou. ¹⁷Tout moun pral rayi nou poutèt non mwen. ¹⁸Men pa yon grenn cheve nan tèt nou p'ap pèdi. ¹⁹Se avèk pasyans nou n'a sove lavi nou.”

²⁰“Lè nou wè lame sènen lavil Jerizalèm, lè sa a konnen moman pou l kraze a rive toupre. ²¹Lè sa a, moun ki nan peyi Jide fèt pou kouri al nan mòn, moun ki nan lavil la fèt pou soti, moun ki andeyò pa dwe antre ladan l, ²²paske se jou pou Bondye pini, lè tou sa ki ekri a va rive. ²³Ala malè pou fanm ansent ak manman k'ap bay tete nan jou sa yo! Paske pral gen gwo lafliksyon nan peyi a, ak kòlè sou pèp sa a. ²⁴Nepe pral touye yo, y'a mennen yo prizonye nan tout nasyon yo. Nasyon yo pral pilonnen lavil Jerizalèm anba pye jouk tan tan nasyon yo va fin akonpli.”

²⁵“Va gen siy nan solèy, nan lalin ak nan zetwal yo, e sou tè a, nasyon yo va nan gwo tèt chaje, yo p'ap konn sa pou yo fè devan gwo bri ak gwo vag lanmè a. ²⁶Moun va endispoze tèlman yo pè, y'a tranble lè yo wè sa k'ap rive sou latè, paske pouvwa ki nan syèl yo pral souke. ²⁷Lè sa a, y'a wè Pitit Lòm lan ap vini nan yon nwaj avèk pouvwa ak yon gwo laglwa. ²⁸Lè bagay sa yo kòmanse rive, kanpe dwat, leve tèt nou, paske delivrans nou an toupre.”

²⁹Apre sa, li ba yo yon parabòl: “Gade pye figye a ak tout lòt pyebwa yo. ³⁰Lè nou wè yo pouse fèy, nou konnen pou kont nou sezon chalè a gen tan toupre. ³¹Konsa tou, lè nou wè bagay sa yo ap rive, konnen wayòm Papa nou an toupre. ³²Sa m'ap di nou la a, se vre: jenerasyon sa a p'ap pase anvan tout bagay sa yo rive. ³³Syèl la ak tè a va pase, men pawòl mwen yo p'ap janm pase.”

³⁴“Veye kò nou, pou kè nou pa vin lou anba banbòch, bweson ak traka lavi, pou jou sa a pa vin tonbe sou nou sanzatann, tankou yon pèlen. ³⁵Paske l'ap tonbe sou tout moun k'ap viv sou tout latè. ³⁶Rete veye tout tan, lapriyè pou nou gen fòs pou nou chape anba tou sa ki prèt pou rive, pou nou ka kanpe devan Pitit Lòm lan.”

³⁷Lajounen li t'ap anseye nan tanp lan; lannwit li soti al rete sou mòn Oliv la. ³⁸Granmaten, tout pèp la te konn vin jwenn li nan tanp lan pou tande l.