Luka 21

21 ¹Yesu alipoinua macho, aliwaona matajiri wakiweka sadaka zao katika hazina ya hekalu. ²Akamwona pia mjane maskini akiweka humo sarafu mbili ndogo za shaba.

³Akasema, "Amin, nawaambia, mjane huyu maskini ameweka zaidi kuliko wote. ⁴Kwa maana hao wote walitoa sadaka kutokana na ziada yao, lakini yeye, katika umaskini wake, ametoa vyote alivyokuwa navyo vya kuishi."

Hekalu Litabomoka

⁵Baadhi ya watu walipokuwa wakisema juu ya hekalu, jinsi lilivyopambwa kwa mawe mazuri na sadaka zilizowekwa wakfu kwa Baba yetu, akasema:

⁶"Haya mnayoyaangalia, zitakuja siku ambazo hakutasalia jiwe juu ya jiwe ambalo halitabomolewa."

⁷Wakamuuliza, "Mwalimu, mambo haya yatatukia lini, na ni ishara gani itakayoonyesha kwamba mambo haya yanakaribia kutukia?"

⁸Akasema, "Jihadharini, msidanganywe. Wengi watakuja kwa jina langu, wakisema, 'Mimi ndiye,' na, 'Wakati umekaribia.' Msiwafuate. ⁹Mtakaposikia habari za vita na maasi, msifadhaike. Mambo haya hayana budi kutokea kwanza, lakini mwisho hautafuata mara moja."

¹⁰Kisha akawaambia, "Taifa litainuka juu ya taifa, na ufalme juu ya ufalme. ¹¹Kutakuwa na matetemeko makubwa ya nchi, na njaa na tauni katika sehemu mbalimbali, na vitisho na ishara kubwa kutoka mbinguni. ¹²Lakini kabla ya mambo haya yote, watawakamata na kuwatesa, wakiwatia mikononi mwa masinagogi na magereza, wakiwapeleka mbele ya wafalme na maliwali kwa ajili ya jina langu. ¹³Hii itakuwa nafasi yenu ya kutoa ushuhuda. ¹⁴Basi kusudieni mioyoni mwenu msifikirie mapema jinsi mtakavyojitetea, ¹⁵kwa maana nitawapa maneno na hekima ambayo hakuna adui yeyote atakayeweza kuyapinga wala kuyakanusha. ¹⁶Nanyi mtasalitiwa hata na wazazi, na ndugu, na jamaa, na rafiki, nao watawaua baadhi yenu. ¹⁷Nanyi mtachukiwa na watu wote kwa ajili ya jina langu. ¹⁸Lakini hautaangamia hata unywele mmoja wa vichwa vyenu. ¹⁹Kwa saburi yenu mtaziponya nafsi zenu."

²⁰"Mtakapoona Yerusalemu limezungukwa na majeshi, ndipo jueni kwamba ukiwa wake umekaribia. ²¹Ndipo walio Uyahudi na wakimbilie milimani, na walio ndani ya mji na watoke, na walio mashambani wasiingie mjini, ²²kwa maana hizi ni siku za hukumu, ili yatimizwe yote yaliyoandikwa. ²³Ole wao wenye mimba na wanyonyeshao katika siku hizo! Kwa maana kutakuwa na dhiki kuu juu ya nchi, na ghadhabu juu ya watu hawa. ²⁴Wataanguka kwa makali ya upanga, na watachukuliwa mateka katika mataifa yote. Nalo Yerusalemu litakanyagwa na mataifa, hata nyakati za mataifa zitakapotimia."

²⁵"Kutakuwa na ishara katika jua, na mwezi, na nyota, na juu ya nchi dhiki ya mataifa, wakifadhaishwa na mngurumo wa bahari na mawimbi yake. ²⁶Watu watazimia kwa hofu na kwa kutazamia mambo yatakayoupata ulimwengu, kwa maana nguvu za mbinguni zitatikiswa. ²⁷Ndipo watakapomwona Mwana wa Adamu akija katika wingu pamoja na nguvu na utukufu mwingi. ²⁸Basi mambo haya yatakapoanza kutukia, jinyosheni na kuinua vichwa vyenu, kwa sababu ukombozi wenu umekaribia."

²⁹Kisha akawaambia mfano: "Utazameni mtini na miti yote. ³⁰Inapoanza kuchipua, ninyi wenyewe mwaona na kutambua kwamba tayari majira ya kiangazi yamekaribia. ³¹Vivyo hivyo, mtakapoona mambo haya yakitukia, jueni kwamba ufalme wa Baba yetu umekaribia. ³²Amin, nawaambia, kizazi hiki hakitapita hata mambo haya yote yatakapotimia. ³³Mbingu na nchi zitapita, lakini maneno yangu hayatapita kamwe."

³⁴"Jihadharini nafsi zenu, isije mioyo yenu ikalemewa na ulevi na anasa na masumbufu ya maisha, na siku ile ikawajia ghafula kama mtego. ³⁵Kwa maana itawajia watu wote wakaao juu ya uso wa dunia nzima. ³⁶Kesheni kila wakati, mkiomba mpate nguvu za kuyaepuka mambo haya yote yatakayotukia, na kusimama mbele ya Mwana wa Adamu."

³⁷Wakati wa mchana alikuwa akifundisha hekaluni; na usiku alitoka nje na kukaa katika mlima uitwao wa Mizeituni. ³⁸Nao watu wote walikuwa wakija kwake asubuhi na mapema hekaluni ili wamsikilize.